| Library / Tipiṭaka / తిపిటక • Tipiṭaka / అఙ్గుత్తరనికాయ (అట్ఠకథా) • Aṅguttaranikāya (aṭṭhakathā) |
౪. అస్సఖళుఙ్కసుత్తవణ్ణనా
4. Assakhaḷuṅkasuttavaṇṇanā
౧౪. చతుత్థే ‘‘పేహీ’’తి వుత్తోతి ‘‘గచ్ఛా’’తి వుత్తో. పిట్ఠితో రథం పవత్తేతీతి ఖన్ధట్ఠికేన యుగం ఉప్పీళిత్వా పచ్ఛిమభాగేన రథం పవట్టేన్తో ఓసక్కతి. పచ్ఛా లఙ్ఘతి, కుబ్బరం హనతీతి ద్వే పచ్ఛిమపాదే ఉక్ఖిపిత్వా తేహి పహరిత్వా రథకుబ్బరం భిన్దతి. తిదణ్డం భఞ్జతీతి రథస్స పురతో తయో దణ్డకా హోన్తి, తే భఞ్జతి. రథీసాయ సత్థిం ఉస్సజ్జిత్వాతి సీసం నామేత్వా యుగం భూమియం పాతేత్వా సత్థినా రథీసం పహరిత్వా. అజ్ఝోమద్దతీతి ద్వీహి పురిమపాదేహి ఈసం మద్దన్తో తిట్ఠతి. ఉబ్బటుమం రథం కరోతీతి థలం వా కణ్డకట్ఠానం వా రథం ఆరోపేతి. అనాదియిత్వాతి అమనసికత్వా అగణిత్వా. ముఖాధానన్తి ముఖఠపనత్థాయ దిన్నం అయసఙ్ఖలికం. ఖీలట్ఠాయీతి చత్తారో పాదే థమ్భే వియ నిచ్చలం ఠపేత్వా ఖీలట్ఠానసదిసేన ఠానేన తిట్ఠతి. ఇమస్మిం సుత్తే వట్టమేవ కథితం.
14. Catutthe ‘‘pehī’’ti vuttoti ‘‘gacchā’’ti vutto. Piṭṭhito rathaṃ pavattetīti khandhaṭṭhikena yugaṃ uppīḷitvā pacchimabhāgena rathaṃ pavaṭṭento osakkati. Pacchā laṅghati, kubbaraṃ hanatīti dve pacchimapāde ukkhipitvā tehi paharitvā rathakubbaraṃ bhindati. Tidaṇḍaṃ bhañjatīti rathassa purato tayo daṇḍakā honti, te bhañjati. Rathīsāya satthiṃ ussajjitvāti sīsaṃ nāmetvā yugaṃ bhūmiyaṃ pātetvā satthinā rathīsaṃ paharitvā. Ajjhomaddatīti dvīhi purimapādehi īsaṃ maddanto tiṭṭhati. Ubbaṭumaṃ rathaṃ karotīti thalaṃ vā kaṇḍakaṭṭhānaṃ vā rathaṃ āropeti. Anādiyitvāti amanasikatvā agaṇitvā. Mukhādhānanti mukhaṭhapanatthāya dinnaṃ ayasaṅkhalikaṃ. Khīlaṭṭhāyīti cattāro pāde thambhe viya niccalaṃ ṭhapetvā khīlaṭṭhānasadisena ṭhānena tiṭṭhati. Imasmiṃ sutte vaṭṭameva kathitaṃ.
Related texts:
తిపిటక (మూల) • Tipiṭaka (Mūla) / సుత్తపిటక • Suttapiṭaka / అఙ్గుత్తరనికాయ • Aṅguttaranikāya / ౪. అస్సఖళుఙ్కసుత్తం • 4. Assakhaḷuṅkasuttaṃ
టీకా • Tīkā / సుత్తపిటక (టీకా) • Suttapiṭaka (ṭīkā) / అఙ్గుత్తరనికాయ (టీకా) • Aṅguttaranikāya (ṭīkā) / ౩-౪. అస్సాజానీయసుత్తాదివణ్ణనా • 3-4. Assājānīyasuttādivaṇṇanā
