| Library / Tipiṭaka / തിപിടക • Tipiṭaka / അങ്ഗുത്തരനികായ (അട്ഠകഥാ) • Aṅguttaranikāya (aṭṭhakathā) |
൪. അസ്സഖളുങ്കസുത്തവണ്ണനാ
4. Assakhaḷuṅkasuttavaṇṇanā
൧൪. ചതുത്ഥേ ‘‘പേഹീ’’തി വുത്തോതി ‘‘ഗച്ഛാ’’തി വുത്തോ. പിട്ഠിതോ രഥം പവത്തേതീതി ഖന്ധട്ഠികേന യുഗം ഉപ്പീളിത്വാ പച്ഛിമഭാഗേന രഥം പവട്ടേന്തോ ഓസക്കതി. പച്ഛാ ലങ്ഘതി, കുബ്ബരം ഹനതീതി ദ്വേ പച്ഛിമപാദേ ഉക്ഖിപിത്വാ തേഹി പഹരിത്വാ രഥകുബ്ബരം ഭിന്ദതി. തിദണ്ഡം ഭഞ്ജതീതി രഥസ്സ പുരതോ തയോ ദണ്ഡകാ ഹോന്തി, തേ ഭഞ്ജതി. രഥീസായ സത്ഥിം ഉസ്സജ്ജിത്വാതി സീസം നാമേത്വാ യുഗം ഭൂമിയം പാതേത്വാ സത്ഥിനാ രഥീസം പഹരിത്വാ. അജ്ഝോമദ്ദതീതി ദ്വീഹി പുരിമപാദേഹി ഈസം മദ്ദന്തോ തിട്ഠതി. ഉബ്ബടുമം രഥം കരോതീതി ഥലം വാ കണ്ഡകട്ഠാനം വാ രഥം ആരോപേതി. അനാദിയിത്വാതി അമനസികത്വാ അഗണിത്വാ. മുഖാധാനന്തി മുഖഠപനത്ഥായ ദിന്നം അയസങ്ഖലികം. ഖീലട്ഠായീതി ചത്താരോ പാദേ ഥമ്ഭേ വിയ നിച്ചലം ഠപേത്വാ ഖീലട്ഠാനസദിസേന ഠാനേന തിട്ഠതി. ഇമസ്മിം സുത്തേ വട്ടമേവ കഥിതം.
14. Catutthe ‘‘pehī’’ti vuttoti ‘‘gacchā’’ti vutto. Piṭṭhito rathaṃ pavattetīti khandhaṭṭhikena yugaṃ uppīḷitvā pacchimabhāgena rathaṃ pavaṭṭento osakkati. Pacchā laṅghati, kubbaraṃ hanatīti dve pacchimapāde ukkhipitvā tehi paharitvā rathakubbaraṃ bhindati. Tidaṇḍaṃ bhañjatīti rathassa purato tayo daṇḍakā honti, te bhañjati. Rathīsāya satthiṃ ussajjitvāti sīsaṃ nāmetvā yugaṃ bhūmiyaṃ pātetvā satthinā rathīsaṃ paharitvā. Ajjhomaddatīti dvīhi purimapādehi īsaṃ maddanto tiṭṭhati. Ubbaṭumaṃ rathaṃ karotīti thalaṃ vā kaṇḍakaṭṭhānaṃ vā rathaṃ āropeti. Anādiyitvāti amanasikatvā agaṇitvā. Mukhādhānanti mukhaṭhapanatthāya dinnaṃ ayasaṅkhalikaṃ. Khīlaṭṭhāyīti cattāro pāde thambhe viya niccalaṃ ṭhapetvā khīlaṭṭhānasadisena ṭhānena tiṭṭhati. Imasmiṃ sutte vaṭṭameva kathitaṃ.
Related texts:
തിപിടക (മൂല) • Tipiṭaka (Mūla) / സുത്തപിടക • Suttapiṭaka / അങ്ഗുത്തരനികായ • Aṅguttaranikāya / ൪. അസ്സഖളുങ്കസുത്തം • 4. Assakhaḷuṅkasuttaṃ
ടീകാ • Tīkā / സുത്തപിടക (ടീകാ) • Suttapiṭaka (ṭīkā) / അങ്ഗുത്തരനികായ (ടീകാ) • Aṅguttaranikāya (ṭīkā) / ൩-൪. അസ്സാജാനീയസുത്താദിവണ്ണനാ • 3-4. Assājānīyasuttādivaṇṇanā
