| Library / Tipiṭaka / д̇ибидага • Tipiṭaka / ид̇ивуд̇д̇ага-адтагат̇аа • Itivuttaka-aṭṭhakathā |
6. асубхаанубассийсуд̇д̇аван̣н̣анаа
6. Asubhānupassīsuttavaṇṇanā
85. чадтз асубхаанубассийд̇и асубхам̣ анубассанд̇аа д̣̇вад̇д̇им̣саагааравасзна жзва уд̣̇д̇хумаад̇агаад̣̇ийсу г̇ахид̇анимид̇д̇асса убасам̣харан̣авасзна жа гааяасмим̣ асубхам̣ асубхаагаарам̣ анубассагаа худ̇ваа вихарат̇а. аанаабаанассад̇ийд̇и аанаабаанз сад̇и, д̇ам̣ аараб̣бха бавад̇д̇аа сад̇и, ассаасабассаасабариг̇г̇аахигаа сад̇ийд̇и ад̇т̇о. вуд̇д̇ан̃хзд̇ам̣ ‘‘аананд̇и ассаасо, но бассаасо. баананд̇и бассаасо, но ассаасо’’д̇иаад̣̇и (бади. ма. 1.160).
85. Chaṭṭhe asubhānupassīti asubhaṃ anupassantā dvattiṃsākāravasena ceva uddhumātakādīsu gahitanimittassa upasaṃharaṇavasena ca kāyasmiṃ asubhaṃ asubhākāraṃ anupassakā hutvā viharatha. Ānāpānassatīti ānāpāne sati, taṃ ārabbha pavattā sati, assāsapassāsapariggāhikā satīti attho. Vuttañhetaṃ ‘‘ānanti assāso, no passāso. Pānanti passāso, no assāso’’tiādi (paṭi. ma. 1.160).
вод̇и д̇умхаагам̣. аж̇жхад̇д̇анд̇и ид̇ха г̇ожараж̇жхад̇д̇ам̣ ад̇хиббзд̇ам̣. баримуканд̇и абхимукам̣. суубадтид̇аад̇и судту убадтид̇аа. ид̣̇ам̣ вуд̇д̇ам̣ ход̇и – аанаабаанассад̇и жа д̇умхаагам̣ гаммадтаанаабхимукам̣ судту убадтид̇аа ход̇ууд̇и. ат̇а ваа баримуканд̇и бариг̇г̇ахид̇анияяаанам̣. вуд̇д̇ан̃хзд̇ам̣ бадисамбхид̣̇ааяам̣ – ‘‘барийд̇и бариг̇г̇ахадто, муканд̇и нияяаанадто , сад̇ийд̇и убадтаанадто, д̇зна вужжад̇и баримукам̣ сад̇и’’нд̇и (бади. ма. 1.164). иминаа жад̇усад̇ибадтаанасол̣асаббабхзд̣̇аа аанаабаанассад̇игаммадтаанабхааванаа д̣̇ассид̇аад̇и д̣̇адтаб̣б̣аа.
Voti tumhākaṃ. Ajjhattanti idha gocarajjhattaṃ adhippetaṃ. Parimukhanti abhimukhaṃ. Sūpaṭṭhitāti suṭṭhu upaṭṭhitā. Idaṃ vuttaṃ hoti – ānāpānassati ca tumhākaṃ kammaṭṭhānābhimukhaṃ suṭṭhu upaṭṭhitā hotūti. Atha vā parimukhanti pariggahitaniyyānaṃ. Vuttañhetaṃ paṭisambhidāyaṃ – ‘‘parīti pariggahaṭṭho, mukhanti niyyānaṭṭho , satīti upaṭṭhānaṭṭho, tena vuccati parimukhaṃ sati’’nti (paṭi. ma. 1.164). Iminā catusatipaṭṭhānasoḷasappabhedā ānāpānassatikammaṭṭhānabhāvanā dassitāti daṭṭhabbā.
звам̣ сан̇кзбзнзва рааг̇ажарид̇авид̇аггажарид̇аанам̣ саббааяам̣ бадигууламанасигаарагааяаанубассанаавасзна самат̇агаммадтаанам̣ вибассанаагаммадтаанан̃жа убад̣̇исид̇ваа ид̣̇аани суд̣̇д̇хавибассанаагаммадтаанамзва д̣̇ассзнд̇о ‘‘саб̣б̣асан̇каарзсу анижжаанубассино вихарат̇аа’’д̇и ааха. д̇ад̇т̇а анижжам̣, анижжалагкан̣ам̣, анижжаанубассанаа, анижжаанубассийд̇и ид̣̇ам̣ жад̇уггам̣ взд̣̇ид̇аб̣б̣ам̣. худ̇ваа, абхаавад̇о, уд̣̇аяаб̣б̣аяаяог̇ад̇о, д̇аавагаалигад̇о, нижжабадигкзбад̇о жа канд̇хабан̃жагам̣ анижжам̣ наама. д̇асса яо худ̇ваа абхааваагааро, д̇ам̣ анижжалагкан̣ам̣ наама. д̇ам̣ аараб̣бха бавад̇д̇аа вибассанаа анижжаанубассанаа. д̇ам̣ анижжанд̇и вибассаго анижжаанубассий. зд̇т̇а жа згаад̣̇асавид̇хаа асубхагат̇аа батамаж̇жхаанам̣ баабзд̇ваа, сол̣асавад̇т̇угаа жа аанаабаанагат̇аа жад̇уд̇т̇аж̇жхаанам̣ баабзд̇ваа, вибассанаагат̇аа жа вид̇т̇аарад̇о вад̇д̇аб̣б̣аа, саа бана саб̣б̣аагаарад̇о висуд̣̇д̇химаг̇г̇з (висуд̣̇д̇хи. 2.737-740) гат̇ид̇аад̇и д̇ад̇т̇а вуд̇д̇анаязнзва взд̣̇ид̇аб̣б̣аа.
Evaṃ saṅkhepeneva rāgacaritavitakkacaritānaṃ sappāyaṃ paṭikūlamanasikārakāyānupassanāvasena samathakammaṭṭhānaṃ vipassanākammaṭṭhānañca upadisitvā idāni suddhavipassanākammaṭṭhānameva dassento ‘‘sabbasaṅkhāresu aniccānupassino viharathā’’ti āha. Tattha aniccaṃ, aniccalakkhaṇaṃ, aniccānupassanā, aniccānupassīti idaṃ catukkaṃ veditabbaṃ. Hutvā, abhāvato, udayabbayayogato, tāvakālikato, niccapaṭikkhepato ca khandhapañcakaṃ aniccaṃ nāma. Tassa yo hutvā abhāvākāro, taṃ aniccalakkhaṇaṃ nāma. Taṃ ārabbha pavattā vipassanā aniccānupassanā. Taṃ aniccanti vipassako aniccānupassī. Ettha ca ekādasavidhā asubhakathā paṭhamajjhānaṃ pāpetvā, soḷasavatthukā ca ānāpānakathā catutthajjhānaṃ pāpetvā, vipassanākathā ca vitthārato vattabbā, sā pana sabbākārato visuddhimagge (visuddhi. 2.737-740) kathitāti tattha vuttanayeneva veditabbā.
ид̣̇аани асубхаанубассанаад̣̇ийхи нибпаад̣̇зд̇аб̣б̣ам̣ палависзсам̣ д̣̇ассзд̇ум̣ ‘‘асубхаанубассийна’’нд̇иаад̣̇имааха. д̇ад̇т̇а субхааяа д̇хаад̇уяаад̇и субхабхаавз, субханимид̇д̇зд̇и ад̇т̇о. рааг̇аанусаяод̇и субхаарамман̣з уббаж̇ж̇анаарахо гаамарааг̇аанусаяо. со гзсаад̣̇ийсу уд̣̇д̇хумаад̇агаад̣̇ийсу ваа асубхаанубассийнам̣ асубханимид̇д̇ам̣ г̇ахзд̇ваа д̇ад̇т̇а батамаж̇жхаанам̣ ниб̣б̣ад̇д̇зд̇ваа д̇ам̣ баад̣̇агам̣ гад̇ваа вибассанам̣ бадтабзд̇ваа ад̇хиг̇ад̇зна анааг̇аамимаг̇г̇зна бахийяад̇и, саб̣б̣асо самужчинд̣̇ийяад̇ийд̇и ад̇т̇о. вуд̇д̇ан̃хзд̇ам̣ ‘‘асубхаа бхаавзд̇аб̣б̣аа гаамарааг̇асса бахаанааяаа’’д̇и (а. ни. 9.3; уд̣̇аа. 31). б̣аахираад̇и б̣ахид̣̇д̇хаавад̇т̇угад̇д̇аа анад̇т̇аавахад̇д̇аа жа б̣аахираа б̣ахибхууд̇аа. вид̇аггаасаяаад̇и гаамасан̇габбаад̣̇имижчаавид̇аггаа. д̇з хи аббахийнаа аасаяаануг̇ад̇аа сад̇и бажжаяасамавааяз уббаж̇ж̇анад̇о вид̇аггаасаяаад̇и вуд̇д̇аа. гаамавид̇агго жзд̇т̇а гаамарааг̇аг̇г̇ахан̣зна г̇ахид̇о зваад̇и д̇ад̣̇авасзсаа вид̇аггаа зва вуд̇д̇аад̇и взд̣̇ид̇аб̣б̣аа. вигхаад̇абагкигаад̇и д̣̇угкабхааг̇ияаа, ижчаавигхаад̇аниб̣б̣ад̇д̇анагаа ваа. д̇з на хонд̇ийд̇и д̇з бахийяанд̇и. б̣яаабаад̣̇авид̇агго, вихим̣саавид̇агго, н̃аад̇ивид̇агго, ж̇анабад̣̇авид̇агго, амараавид̇агго, анаван̃н̃ад̇д̇ибадисам̣яуд̇д̇о вид̇агго, лаабхасаггаарасилогабадисам̣яуд̇д̇о вид̇агго, бараануд̣̇д̣̇аяад̇аабадисам̣яуд̇д̇о вид̇аггод̇и адта, гаамавид̇аггзна сад̣̇д̇хим̣ нававид̇хаа махаавид̇аггаа аанаабаанассад̇исамаад̇хинаа д̇анниссид̇ааяа жа вибассанааяа буб̣б̣абхааг̇з вигкамбхид̇аа. д̇ам̣ баад̣̇агам̣ гад̇ваа ад̇хиг̇ад̇зна арияамаг̇г̇зна яат̇аарахам̣ анавасзсад̇о бахийяанд̇и. вуд̇д̇амби жзд̇ам̣ ‘‘аанаабаанассад̇и бхаавзд̇аб̣б̣аа вид̇аггубажчзд̣̇ааяаа’’д̇и (а. ни. 9.3; уд̣̇аа. 31).
Idāni asubhānupassanādīhi nipphādetabbaṃ phalavisesaṃ dassetuṃ ‘‘asubhānupassīna’’ntiādimāha. Tattha subhāya dhātuyāti subhabhāve, subhanimitteti attho. Rāgānusayoti subhārammaṇe uppajjanāraho kāmarāgānusayo. So kesādīsu uddhumātakādīsu vā asubhānupassīnaṃ asubhanimittaṃ gahetvā tattha paṭhamajjhānaṃ nibbattetvā taṃ pādakaṃ katvā vipassanaṃ paṭṭhapetvā adhigatena anāgāmimaggena pahīyati, sabbaso samucchindīyatīti attho. Vuttañhetaṃ ‘‘asubhā bhāvetabbā kāmarāgassa pahānāyā’’ti (a. ni. 9.3; udā. 31). Bāhirāti bahiddhāvatthukattā anatthāvahattā ca bāhirā bahibhūtā. Vitakkāsayāti kāmasaṅkappādimicchāvitakkā. Te hi appahīnā āsayānugatā sati paccayasamavāye uppajjanato vitakkāsayāti vuttā. Kāmavitakko cettha kāmarāgaggahaṇena gahito evāti tadavasesā vitakkā eva vuttāti veditabbā. Vighātapakkhikāti dukkhabhāgiyā, icchāvighātanibbattanakā vā. Te na hontīti te pahīyanti. Byāpādavitakko, vihiṃsāvitakko, ñātivitakko, janapadavitakko, amarāvitakko, anavaññattipaṭisaṃyutto vitakko, lābhasakkārasilokapaṭisaṃyutto vitakko, parānuddayatāpaṭisaṃyutto vitakkoti aṭṭha, kāmavitakkena saddhiṃ navavidhā mahāvitakkā ānāpānassatisamādhinā tannissitāya ca vipassanāya pubbabhāge vikkhambhitā. Taṃ pādakaṃ katvā adhigatena ariyamaggena yathārahaṃ anavasesato pahīyanti. Vuttampi cetaṃ ‘‘ānāpānassati bhāvetabbā vitakkupacchedāyā’’ti (a. ni. 9.3; udā. 31).
яаа авиж̇ж̇аа, саа бахийяад̇ийд̇и яаа сажжасабхаавабадижчаад̣̇иний саб̣б̣аанад̇т̇агаарий сагаласса ваддад̣̇угкасса муулабхууд̇аа авиж̇ж̇аа, саа анижжаанубассийнам̣ вихарад̇ам̣ самужчиж̇ж̇ад̇и. ид̣̇ам̣ гира бхаг̇авад̇аа анижжаагаарад̇о вудтид̇асса сугкавибассагакийн̣аасавасса васзна вуд̇д̇ам̣. д̇ассааяам̣ сан̇кзбад̇т̇о – д̇збхуумагзсу саб̣б̣асан̇каарзсу анижжаад̣̇ид̇о саммасанам̣ бадтабзд̇ваа вибассанд̇аанам̣ яад̣̇аа анижжанд̇и бавад̇д̇амаанаа вудтаанаг̇ааминийвибассанаа маг̇г̇зна гхадийяад̇и, ануггамзна арахад̇д̇амаг̇г̇о уббаж̇ж̇ад̇и, д̇зсам̣ анижжаанубассийнам̣ вихарад̇ам̣ авиж̇ж̇аа анавасзсад̇о бахийяад̇и, арахад̇д̇амаг̇г̇авиж̇ж̇аа уббаж̇ж̇ад̇ийд̇и. анижжаанубассийнам̣ вихарад̇анд̇и ид̣̇ам̣ анижжалагкан̣асса д̇зсам̣ баагадабхаавад̇о ид̇арасса лагкан̣ад̣̇ваяасса г̇ахан̣з убааяабхаавад̇о ваа вуд̇д̇ам̣, на бана згассзва лагкан̣асса анубассид̇аб̣б̣ад̇о. вуд̇д̇ан̃хзд̇ам̣ ‘‘яад̣̇анижжам̣ д̇ам̣ д̣̇угкам̣, яам̣ д̣̇угкам̣ д̇ад̣̇анад̇д̇аа’’д̇и (сам̣. ни. 3.15). абарамби вуд̇д̇ам̣ ‘‘анижжасан̃н̃ино хи, мзгхияа, анад̇д̇асан̃н̃аа сан̣таад̇и, анад̇д̇асан̃н̃ий асмимаанасамуг̇гхаад̇ам̣ баабун̣аад̇ий’’д̇и.
Yā avijjā, sā pahīyatīti yā saccasabhāvapaṭicchādinī sabbānatthakārī sakalassa vaṭṭadukkhassa mūlabhūtā avijjā, sā aniccānupassīnaṃ viharataṃ samucchijjati. Idaṃ kira bhagavatā aniccākārato vuṭṭhitassa sukkhavipassakakhīṇāsavassa vasena vuttaṃ. Tassāyaṃ saṅkhepattho – tebhūmakesu sabbasaṅkhāresu aniccādito sammasanaṃ paṭṭhapetvā vipassantānaṃ yadā aniccanti pavattamānā vuṭṭhānagāminīvipassanā maggena ghaṭīyati, anukkamena arahattamaggo uppajjati, tesaṃ aniccānupassīnaṃ viharataṃ avijjā anavasesato pahīyati, arahattamaggavijjā uppajjatīti. Aniccānupassīnaṃ viharatanti idaṃ aniccalakkhaṇassa tesaṃ pākaṭabhāvato itarassa lakkhaṇadvayassa gahaṇe upāyabhāvato vā vuttaṃ, na pana ekasseva lakkhaṇassa anupassitabbato. Vuttañhetaṃ ‘‘yadaniccaṃ taṃ dukkhaṃ, yaṃ dukkhaṃ tadanattā’’ti (saṃ. ni. 3.15). Aparampi vuttaṃ ‘‘aniccasaññino hi, meghiya, anattasaññā saṇṭhāti, anattasaññī asmimānasamugghātaṃ pāpuṇātī’’ti.
г̇аат̇аасу аанаабаанз бадиссад̇од̇и аанаабаананимид̇д̇асмим̣ бади бади сад̇о, убадтид̇ассад̇ийд̇и ад̇т̇о. бассанд̇и аасавагкаяан̃аан̣ажагкунаа сан̇кааруубасамам̣ ниб̣б̣аанам̣ бассанд̇о. аад̇аабий саб̣б̣ад̣̇аад̇и анд̇араавосаанам̣ анаабаж̇ж̇ид̇ваа асубхаанубассанаад̣̇ийсу сад̇ад̇ам̣ аад̇аабий яуд̇д̇аббаяуд̇д̇о, д̇ад̇о зва яад̇о вааяамамаано, нияад̇о ваа саммад̇д̇анияаамзна д̇ад̇т̇а саб̣б̣асан̇каарасамат̇з ниб̣б̣аанз арахад̇д̇апалавимуд̇д̇ияаа вимужжад̇и. сзсам̣ вуд̇д̇анаяамзва.
Gāthāsu ānāpāne paṭissatoti ānāpānanimittasmiṃ paṭi paṭi sato, upaṭṭhitassatīti attho. Passanti āsavakkhayañāṇacakkhunā saṅkhārūpasamaṃ nibbānaṃ passanto. Ātāpī sabbadāti antarāvosānaṃ anāpajjitvā asubhānupassanādīsu satataṃ ātāpī yuttappayutto, tato eva yato vāyamamāno, niyato vā sammattaniyāmena tattha sabbasaṅkhārasamathe nibbāne arahattaphalavimuttiyā vimuccati. Sesaṃ vuttanayameva.
чадтасуд̇д̇аван̣н̣анаа нидтид̇аа.
Chaṭṭhasuttavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / ид̇ивуд̇д̇агабаал̣и • Itivuttakapāḷi / 6. асубхаанубассийсуд̇д̇ам̣ • 6. Asubhānupassīsuttaṃ
