| Library / Tipiṭaka / तिपिटक • Tipiṭaka / इतिवुत्तकपाळि • Itivuttakapāḷi |
४. अतपनीयसुत्तं
4. Atapanīyasuttaṃ
३१. वुत्तञ्हेतं भगवता, वुत्तमरहताति मे सुतं –
31. Vuttañhetaṃ bhagavatā, vuttamarahatāti me sutaṃ –
‘‘द्वेमे, भिक्खवे, धम्मा अतपनीया। कतमे द्वे? इध, भिक्खवे, एकच्चो कतकल्याणो होति, कतकुसलो, कतभीरुत्ताणो, अकतपापो, अकतलुद्दो, अकतकिब्बिसो। सो ‘कतं मे कल्याण’न्तिपि न तप्पति, ‘अकतं मे पाप’न्तिपि न तप्पति। इमे खो, भिक्खवे, द्वे धम्मा अतपनीया’’ति। एतमत्थं भगवा अवोच। तत्थेतं इति वुच्चति –
‘‘Dveme, bhikkhave, dhammā atapanīyā. Katame dve? Idha, bhikkhave, ekacco katakalyāṇo hoti, katakusalo, katabhīruttāṇo, akatapāpo, akataluddo, akatakibbiso. So ‘kataṃ me kalyāṇa’ntipi na tappati, ‘akataṃ me pāpa’ntipi na tappati. Ime kho, bhikkhave, dve dhammā atapanīyā’’ti. Etamatthaṃ bhagavā avoca. Tatthetaṃ iti vuccati –
‘‘कायदुच्चरितं हित्वा, वचीदुच्चरितानि च।
‘‘Kāyaduccaritaṃ hitvā, vacīduccaritāni ca;
मनोदुच्चरितं हित्वा, यञ्चञ्ञं दोससञ्हितं॥
Manoduccaritaṃ hitvā, yañcaññaṃ dosasañhitaṃ.
‘‘अकत्वाकुसलं कम्मं, कत्वान कुसलं बहुं।
‘‘Akatvākusalaṃ kammaṃ, katvāna kusalaṃ bahuṃ;
कायस्स भेदा सप्पञ्ञो, सग्गं सो उपपज्जती’’ति॥
Kāyassa bhedā sappañño, saggaṃ so upapajjatī’’ti.
अयम्पि अत्थो वुत्तो भगवता, इति मे सुतन्ति। चतुत्थं।
Ayampi attho vutto bhagavatā, iti me sutanti. Catutthaṃ.
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / इतिवुत्तक-अट्ठकथा • Itivuttaka-aṭṭhakathā / ४. अतपनीयसुत्तवण्णना • 4. Atapanīyasuttavaṇṇanā
