| Library / Tipiṭaka / તિપિટક • Tipiṭaka / ઇતિવુત્તકપાળિ • Itivuttakapāḷi |
૭. આતાપીસુત્તં
7. Ātāpīsuttaṃ
૩૪. વુત્તઞ્હેતં ભગવતા, વુત્તમરહતાતિ મે સુતં –
34. Vuttañhetaṃ bhagavatā, vuttamarahatāti me sutaṃ –
‘‘અનાતાપી, ભિક્ખવે, ભિક્ખુ અનોત્તાપી 1 અભબ્બો સમ્બોધાય, અભબ્બો નિબ્બાનાય, અભબ્બો અનુત્તરસ્સ યોગક્ખેમસ્સ અધિગમાય. આતાપી ચ ખો, ભિક્ખવે, ભિક્ખુ ઓત્તાપી 2 ભબ્બો સમ્બોધાય, ભબ્બો નિબ્બાનાય, ભબ્બો અનુત્તરસ્સ યોગક્ખેમસ્સ અધિગમાયા’’તિ. એતમત્થં ભગવા અવોચ . તત્થેતં ઇતિ વુચ્ચતિ –
‘‘Anātāpī, bhikkhave, bhikkhu anottāpī 3 abhabbo sambodhāya, abhabbo nibbānāya, abhabbo anuttarassa yogakkhemassa adhigamāya. Ātāpī ca kho, bhikkhave, bhikkhu ottāpī 4 bhabbo sambodhāya, bhabbo nibbānāya, bhabbo anuttarassa yogakkhemassa adhigamāyā’’ti. Etamatthaṃ bhagavā avoca . Tatthetaṃ iti vuccati –
‘‘અનાતાપી અનોત્તાપી, કુસીતો હીનવીરિયો;
‘‘Anātāpī anottāpī, kusīto hīnavīriyo;
યો થીનમિદ્ધબહુલો, અહિરીકો અનાદરો;
Yo thīnamiddhabahulo, ahirīko anādaro;
અભબ્બો તાદિસો ભિક્ખુ, ફુટ્ઠું સમ્બોધિમુત્તમં.
Abhabbo tādiso bhikkhu, phuṭṭhuṃ sambodhimuttamaṃ.
‘‘યો ચ સતિમા નિપકો ઝાયી, આતાપી ઓત્તાપી ચ અપ્પમત્તો;
‘‘Yo ca satimā nipako jhāyī, ātāpī ottāpī ca appamatto;
સંયોજનં જાતિજરાય છેત્વા, ઇધેવ સમ્બોધિમનુત્તરં ફુસે’’તિ.
Saṃyojanaṃ jātijarāya chetvā, idheva sambodhimanuttaraṃ phuse’’ti.
અયમ્પિ અત્થો વુત્તો ભગવતા, ઇતિ મે સુતન્તિ. સત્તમં.
Ayampi attho vutto bhagavatā, iti me sutanti. Sattamaṃ.
Footnotes:
Related texts:
અટ્ઠકથા • Aṭṭhakathā / સુત્તપિટક (અટ્ઠકથા) • Suttapiṭaka (aṭṭhakathā) / ખુદ્દકનિકાય (અટ્ઠકથા) • Khuddakanikāya (aṭṭhakathā) / ઇતિવુત્તક-અટ્ઠકથા • Itivuttaka-aṭṭhakathā / ૭. આતાપીસુત્તવણ્ણના • 7. Ātāpīsuttavaṇṇanā
