| Library / Tipiṭaka / တိပိဋက • Tipiṭaka / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) |
၁၀. အာတပ္ပကရဏီယသုတ္တဝဏ္ဏနာ
10. Ātappakaraṇīyasuttavaṇṇanā
၅၀. ဒသမေ အာတပ္ပံ ကရဏီယန္တိ ဝီရိယံ ကာတုံ ယုတ္တံ။ အနုပ္ပာဒာယာတိ အနုပ္ပာဒတ္ထာယ, အနုပ္ပာဒံ သာဓေသ္သာမီတိ ဣမိနာ ကာရဏေန ကတ္တဗ္ဗန္တိ အတ္ထော။ ပရတောပိ ဧသေဝ နယော။ သာရီရိကာနန္တိ သရီရသမ္ဘဝာနံ။ ဒုက္ခာနန္တိ ဒုက္ခမာနံ။ တိဗ္ဗာနန္တိ ဗဟလာနံ, တာပနဝသေန ဝာ တိဗ္ဗာနံ။ ခရာနန္တိ ဖရုသာနံ။ ကဋုကာနန္တိ တိခိဏာနံ။ အသာတာနန္တိ အမဓုရာနံ။ အမနာပာနန္တိ မနံ ဝဍ္ဎေတုံ အသမတ္ထာနံ။ ပာဏဟရာနန္တိ ဇီဝိတဟရာနံ။ အဓိဝာသနာယာတိ အဓိဝာသနတ္ထာယ သဟနတ္ထာယ ခမနတ္ထာယ။
50. Dasame ātappaṃ karaṇīyanti vīriyaṃ kātuṃ yuttaṃ. Anuppādāyāti anuppādatthāya, anuppādaṃ sādhessāmīti iminā kāraṇena kattabbanti attho. Paratopi eseva nayo. Sārīrikānanti sarīrasambhavānaṃ. Dukkhānanti dukkhamānaṃ. Tibbānanti bahalānaṃ, tāpanavasena vā tibbānaṃ. Kharānanti pharusānaṃ. Kaṭukānanti tikhiṇānaṃ. Asātānanti amadhurānaṃ. Amanāpānanti manaṃ vaḍḍhetuṃ asamatthānaṃ. Pāṇaharānanti jīvitaharānaṃ. Adhivāsanāyāti adhivāsanatthāya sahanatthāya khamanatthāya.
ဧတ္တကေ ဌာနေ သတ္ထာ အာဏာပေတ္ဝာ အာဏတ္တိံ ပဝတ္တေတ္ဝာ ဣဒာနိ သမာဒပေန္တော ယတော ခော, ဘိက္ခဝေတိအာဒိမာဟ။ တတ္ထ ယတောတိ ယဒာ။ အာတာပီတိ ဝီရိယဝာ။ နိပကောတိ သပ္ပညော။ သတောတိ သတိယာ သမန္နာဂတော။ ဒုက္ခသ္သ အန္တကိရိယာယာတိ ဝဋ္ဋဒုက္ခသ္သ ပရိစ္ဆေဒပရိဝဋုမကိရိယာယ။ ဣမေ စ ပန အာတာပာဒယော တယောပိ လောကိယလောကုတ္တရမိသ္သကာ ကထိတာ။
Ettake ṭhāne satthā āṇāpetvā āṇattiṃ pavattetvā idāni samādapento yato kho, bhikkhavetiādimāha. Tattha yatoti yadā. Ātāpīti vīriyavā. Nipakoti sappañño. Satoti satiyā samannāgato. Dukkhassa antakiriyāyāti vaṭṭadukkhassa paricchedaparivaṭumakiriyāya. Ime ca pana ātāpādayo tayopi lokiyalokuttaramissakā kathitā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / အင္ဂုတ္တရနိကာယ • Aṅguttaranikāya / ၁၀. အာတပ္ပကရဏီယသုတ္တံ • 10. Ātappakaraṇīyasuttaṃ
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / အင္ဂုတ္တရနိကာယ (ဋီကာ) • Aṅguttaranikāya (ṭīkā) / ၁၀. အာတပ္ပကရဏီယသုတ္တဝဏ္ဏနာ • 10. Ātappakaraṇīyasuttavaṇṇanā
