| Library / Tipiṭaka / तिपिटक • Tipiṭaka / चूळवग्ग-अट्ठकथा • Cūḷavagga-aṭṭhakathā |
अत्तादानअङ्गकथा
Attādānaaṅgakathā
३९८. अत्तादानं आदातुकामेनाति एत्थ सासनं सोधेतुकामो भिक्खु यं अधिकरणं अत्तना आदियति, तं अत्तादानन्ति वुच्चति। अकालो इमं अत्तादानं आदातुन्ति एत्थ राजभयं चोरभयं दुब्भिक्खभयं वस्सारत्तोति अयं अकालो, विपरीतो कालो।
398.Attādānaṃ ādātukāmenāti ettha sāsanaṃ sodhetukāmo bhikkhu yaṃ adhikaraṇaṃ attanā ādiyati, taṃ attādānanti vuccati. Akālo imaṃ attādānaṃ ādātunti ettha rājabhayaṃ corabhayaṃ dubbhikkhabhayaṃ vassārattoti ayaṃ akālo, viparīto kālo.
अभूतं इदं अत्तादानन्ति असन्तमिदं, मया अधम्मो वा धम्मोति, धम्मो वा अधम्मोति, अविनयो वा विनयोति, विनयो वा अविनयोति, दुस्सीलो वा पुग्गलो सीलवाति, सीलवा वा दुस्सीलोति गहितोति अत्थो; विपरियायेन भूतं वेदितब्बं। अनत्थसंहितं इदं अत्तादानन्ति एत्थ यं जीवितन्तरायाय वा ब्रह्मचरियन्तरायाय वा संवत्तति, इदं अनत्थसंहितं, विपरीतं अत्थसंहितं नाम।
Abhūtaṃ idaṃ attādānanti asantamidaṃ, mayā adhammo vā dhammoti, dhammo vā adhammoti, avinayo vā vinayoti, vinayo vā avinayoti, dussīlo vā puggalo sīlavāti, sīlavā vā dussīloti gahitoti attho; vipariyāyena bhūtaṃ veditabbaṃ. Anatthasaṃhitaṃ idaṃ attādānanti ettha yaṃ jīvitantarāyāya vā brahmacariyantarāyāya vā saṃvattati, idaṃ anatthasaṃhitaṃ, viparītaṃ atthasaṃhitaṃ nāma.
न लभिस्सामि सन्दिट्ठे सम्भत्ते भिक्खूति अप्पेकदा हि राजभयादीसु एवरूपा अत्तनो पक्खस्स उपत्थम्भका भिक्खू लद्धुं न सक्का होन्ति, तं सन्धाय वुत्तं ‘‘न लभिस्सामी’’ति । अप्पेकदा पन खेमसुभिक्खादीसु लद्धुं सक्का होन्ति, तं सन्धाय ‘‘लभिस्सामी’’ति वुत्तं।
Na labhissāmi sandiṭṭhe sambhatte bhikkhūti appekadā hi rājabhayādīsu evarūpā attano pakkhassa upatthambhakā bhikkhū laddhuṃ na sakkā honti, taṃ sandhāya vuttaṃ ‘‘na labhissāmī’’ti . Appekadā pana khemasubhikkhādīsu laddhuṃ sakkā honti, taṃ sandhāya ‘‘labhissāmī’’ti vuttaṃ.
भविस्सति सङ्घस्स ततोनिदानं भण्डनन्ति कोसम्बकानं विय भण्डनं कलहो विग्गहो विवादो सङ्घभेदो च भविस्सतीति। पच्छापि अविप्पटिसारकरं भविस्सतीति सुभद्दं वुड्ढपब्बजितं निग्गहेत्वा पञ्चसतिकसङ्गीतिं करोन्तस्स महाकस्सपत्थेरस्सेव, दसवत्थुके अधिकरणे दसभिक्खुसहस्सानि निग्गहेत्वा सत्तसतिकसङ्गीतिं करोन्तस्स आयस्मतो यसस्सेव, सट्ठिभिक्खुसहस्सानि निग्गहेत्वा सहस्सिकसङ्गीतिं करोन्तस्स मोग्गलिपुत्ततिस्सत्थेरस्सेव च पच्छा समनुस्सरणकरणं होति, सासनस्स च विगतुपक्किलेसचन्दिमसूरियसस्सिरिकताय संवत्तति।
Bhavissati saṅghassa tatonidānaṃ bhaṇḍananti kosambakānaṃ viya bhaṇḍanaṃ kalaho viggaho vivādo saṅghabhedo ca bhavissatīti. Pacchāpi avippaṭisārakaraṃ bhavissatīti subhaddaṃ vuḍḍhapabbajitaṃ niggahetvā pañcasatikasaṅgītiṃ karontassa mahākassapattherasseva, dasavatthuke adhikaraṇe dasabhikkhusahassāni niggahetvā sattasatikasaṅgītiṃ karontassa āyasmato yasasseva, saṭṭhibhikkhusahassāni niggahetvā sahassikasaṅgītiṃ karontassa moggaliputtatissattherasseva ca pacchā samanussaraṇakaraṇaṃ hoti, sāsanassa ca vigatupakkilesacandimasūriyasassirikatāya saṃvattati.
अत्तादानअङ्गकथा निट्ठिता।
Attādānaaṅgakathā niṭṭhitā.
Related texts:
तिपिटक (मूल) • Tipiṭaka (Mūla) / विनयपिटक • Vinayapiṭaka / चूळवग्गपाळि • Cūḷavaggapāḷi / ७. अत्तादानअङ्गं • 7. Attādānaaṅgaṃ
टीका • Tīkā / विनयपिटक (टीका) • Vinayapiṭaka (ṭīkā) / सारत्थदीपनी-टीका • Sāratthadīpanī-ṭīkā / अत्तादानअङ्गकथावण्णना • Attādānaaṅgakathāvaṇṇanā
टीका • Tīkā / विनयपिटक (टीका) • Vinayapiṭaka (ṭīkā) / वजिरबुद्धि-टीका • Vajirabuddhi-ṭīkā / अत्तादानअङ्गकथावण्णना • Attādānaaṅgakathāvaṇṇanā
टीका • Tīkā / विनयपिटक (टीका) • Vinayapiṭaka (ṭīkā) / विमतिविनोदनी-टीका • Vimativinodanī-ṭīkā / अत्तादानअङ्गकथादिवण्णना • Attādānaaṅgakathādivaṇṇanā
टीका • Tīkā / विनयपिटक (टीका) • Vinayapiṭaka (ṭīkā) / पाचित्यादियोजनापाळि • Pācityādiyojanāpāḷi / ७. अत्तादानअङ्गकथा • 7. Attādānaaṅgakathā
