| Library / Tipiṭaka / திபிடக • Tipiṭaka / ஸுத்தனிபாத-அட்ட²கதா² • Suttanipāta-aṭṭhakathā |
15. அத்தத³ண்ட³ஸுத்தவண்ணனா
15. Attadaṇḍasuttavaṇṇanā
942. அத்தத³ண்டா³ ப⁴யங் ஜாதந்தி அத்தத³ண்ட³ஸுத்தங். கா உப்பத்தி? யோ ஸோ ஸம்மாபரிப்³பா³ஜனீயஸுத்தஸ்ஸ உப்பத்தியங் வுச்சமானாய ஸாகியகோலியானங் உத³கங் படிச்ச கலஹோ வண்ணிதோ, தங் ஞத்வா ப⁴க³வா ‘‘ஞாதகா கலஹங் கரொந்தி, ஹந்த³ நே வாரெஸ்ஸாமீ’’தி த்³வின்னங் ஸேனானங் மஜ்ஜே² ட²த்வா இமங் ஸுத்தமபா⁴ஸி.
942.Attadaṇḍābhayaṃ jātanti attadaṇḍasuttaṃ. Kā uppatti? Yo so sammāparibbājanīyasuttassa uppattiyaṃ vuccamānāya sākiyakoliyānaṃ udakaṃ paṭicca kalaho vaṇṇito, taṃ ñatvā bhagavā ‘‘ñātakā kalahaṃ karonti, handa ne vāressāmī’’ti dvinnaṃ senānaṃ majjhe ṭhatvā imaṃ suttamabhāsi.
தத்த² பட²மகா³தா²யத்தோ² – யங் லோகஸ்ஸ தி³ட்ட²த⁴ம்மிகங் வா ஸம்பராயிகங் வா ப⁴யங் ஜாதங், தங் ஸப்³ப³ங் அத்தத³ண்டா³ ப⁴யங் ஜாதங் அத்தனோ து³ச்சரிதகாரணா ஜாதங், ஏவங் ஸந்தேபி ஜனங் பஸ்ஸத² மேத⁴க³ங், இமங் ஸாகியாதி³ஜனங் பஸ்ஸத² அஞ்ஞமஞ்ஞங் மேத⁴க³ங் ஹிங்ஸகங் பா³த⁴கந்தி. ஏவங் தங் படிவிருத்³த⁴ங் விப்படிபன்னங் ஜனங் பரிபா⁴ஸித்வா அத்தனோ ஸம்மாபடிபத்தித³ஸ்ஸனேன தஸ்ஸ ஸங்வேக³ங் ஜனேதுங் ஆஹ ‘‘ஸங்வேக³ங் கித்தயிஸ்ஸாமி, யதா² ஸங்விஜிதங் மயா’’தி, புப்³பே³ போ³தி⁴ஸத்தேனேவ ஸதாதி அதி⁴ப்பாயோ.
Tattha paṭhamagāthāyattho – yaṃ lokassa diṭṭhadhammikaṃ vā samparāyikaṃ vā bhayaṃ jātaṃ, taṃ sabbaṃ attadaṇḍā bhayaṃ jātaṃ attano duccaritakāraṇā jātaṃ, evaṃ santepi janaṃ passatha medhagaṃ, imaṃ sākiyādijanaṃ passatha aññamaññaṃ medhagaṃ hiṃsakaṃ bādhakanti. Evaṃ taṃ paṭiviruddhaṃ vippaṭipannaṃ janaṃ paribhāsitvā attano sammāpaṭipattidassanena tassa saṃvegaṃ janetuṃ āha ‘‘saṃvegaṃ kittayissāmi, yathā saṃvijitaṃ mayā’’ti, pubbe bodhisatteneva satāti adhippāyo.
943. இதா³னி யதா²னேன ஸங்விஜிதங், தங் பகாரங் த³ஸ்ஸெந்தோ ‘‘ப²ந்த³மான’’ந்திஆதி³மாஹ. தத்த² ப²ந்த³மானந்தி தண்ஹாதீ³ஹி கம்பமானங். அப்போத³கேதி அப்பஉத³கே. அஞ்ஞமஞ்ஞேஹி ப்³யாருத்³தே⁴ தி³ஸ்வாதி நானாஸத்தே ச அஞ்ஞமஞ்ஞேஹி ஸத்³தி⁴ங் விருத்³தே⁴ தி³ஸ்வா. மங் ப⁴யமாவிஸீதி மங் ப⁴யங் பவிட்ட²ங்.
943. Idāni yathānena saṃvijitaṃ, taṃ pakāraṃ dassento ‘‘phandamāna’’ntiādimāha. Tattha phandamānanti taṇhādīhi kampamānaṃ. Appodaketi appaudake. Aññamaññehi byāruddhe disvāti nānāsatte ca aññamaññehi saddhiṃ viruddhe disvā. Maṃ bhayamāvisīti maṃ bhayaṃ paviṭṭhaṃ.
944. ஸமந்தமஸாரோ லோகோதி நிரயங் ஆதி³ங் கத்வா ஸமந்ததோ லோகோ அஸாரோ நிச்சஸாராதி³ரஹிதோ. தி³ஸா ஸப்³பா³ ஸமேரிதாதி ஸப்³பா³ தி³ஸா அனிச்சதாய கம்பிதா. இச்ச²ங் ப⁴வனமத்தனோதி அத்தனோ தாணங் இச்ச²ந்தோ. நாத்³த³ஸாஸிங் அனோஸிதந்தி கிஞ்சி டா²னங் ஜராதீ³ஹி அனஜ்ஜா²வுத்த²ங் நாத்³த³க்கி²ங்.
944.Samantamasāro lokoti nirayaṃ ādiṃ katvā samantato loko asāro niccasārādirahito. Disā sabbā sameritāti sabbā disā aniccatāya kampitā. Icchaṃ bhavanamattanoti attano tāṇaṃ icchanto. Nāddasāsiṃ anositanti kiñci ṭhānaṃ jarādīhi anajjhāvutthaṃ nāddakkhiṃ.
945. ஓஸானெத்வேவ ப்³யாருத்³தே⁴, தி³ஸ்வா மே அரதீ அஹூதி யொப்³ப³ஞ்ஞாதீ³னங் ஓஸானே ஏவ அந்தக³மகே ஏவ வினாஸகே ஏவ ஜராதீ³ஹி ப்³யாருத்³தே⁴ ஆஹதசித்தே ஸத்தே தி³ஸ்வா அரதி மே அஹோஸி. அதெ²த்த² ஸல்லந்தி அத² ஏதேஸு ஸத்தேஸு ராகா³தி³ஸல்லங். ஹத³யனிஸ்ஸிதந்தி சித்தனிஸ்ஸிதங்.
945.Osānetveva byāruddhe, disvā me aratī ahūti yobbaññādīnaṃ osāne eva antagamake eva vināsake eva jarādīhi byāruddhe āhatacitte satte disvā arati me ahosi. Athettha sallanti atha etesu sattesu rāgādisallaṃ. Hadayanissitanti cittanissitaṃ.
946. ‘‘கத²ங்ஆனுபா⁴வங் ஸல்ல’’ந்தி சே – யேன ஸல்லேன ஓதிண்ணோதி கா³தா². தத்த² தி³ஸா ஸப்³பா³ விதா⁴வதீதி ஸப்³பா³ து³ச்சரிததி³ஸாபி புரத்தி²மாதி³தி³ஸாவிதி³ஸாபி தா⁴வதி. தமேவ ஸல்லமப்³பு³ய்ஹ, ந தா⁴வதி ந ஸீத³தீதி தமேவ ஸல்லங் உத்³த⁴ரித்வா தா ச தி³ஸா ந தா⁴வதி, சதுரோகே⁴ ச ந ஸீத³தீதி.
946. ‘‘Kathaṃānubhāvaṃ salla’’nti ce – yena sallena otiṇṇoti gāthā. Tattha disā sabbā vidhāvatīti sabbā duccaritadisāpi puratthimādidisāvidisāpi dhāvati. Tameva sallamabbuyha, na dhāvati na sīdatīti tameva sallaṃ uddharitvā tā ca disā na dhāvati, caturoghe ca na sīdatīti.
947. ஏவங்மஹானுபா⁴வேன ஸல்லேன ஓதிண்ணெஸ்வபி ச ஸத்தேஸு – தத்த² ஸிக்கா²னுகீ³யந்தி, யானி லோகே க³தி⁴தானீதி கா³தா². தஸ்ஸத்தோ² – யே லோகே பஞ்ச காமகு³ணா படிலாபா⁴ய கி³ஜ்ஜ²ந்தீதி கத்வா ‘‘க³தி⁴தானீ’’தி வுச்சந்தி, சிரகாலாஸேவிதத்தா வா ‘‘க³தி⁴தானீ’’தி வுச்சந்தி, தத்த² தங் நிமித்தங் ஹத்தி²ஸிக்கா²தி³கா அனேகா ஸிக்கா² கதீ²யந்தி உக்³க³ய்ஹந்தி வா. பஸ்ஸத² யாவ பமத்தோ வாயங் லோகோ, யதோ பண்டி³தோ குலபுத்தோ தேஸு வா க³தி⁴தேஸு தாஸு வா ஸிக்கா²ஸு அதி⁴முத்தோ ந ஸியா, அஞ்ஞத³த்து² அனிச்சாதி³த³ஸ்ஸனேன நிப்³பி³ஜ்ஜ² ஸப்³ப³ஸோ காமே அத்தனோ நிப்³பா³னமேவ ஸிக்கே²தி.
947. Evaṃmahānubhāvena sallena otiṇṇesvapi ca sattesu – tattha sikkhānugīyanti, yāni loke gadhitānīti gāthā. Tassattho – ye loke pañca kāmaguṇā paṭilābhāya gijjhantīti katvā ‘‘gadhitānī’’ti vuccanti, cirakālāsevitattā vā ‘‘gadhitānī’’ti vuccanti, tattha taṃ nimittaṃ hatthisikkhādikā anekā sikkhā kathīyanti uggayhanti vā. Passatha yāva pamatto vāyaṃ loko, yato paṇḍito kulaputto tesu vā gadhitesu tāsu vā sikkhāsu adhimutto na siyā, aññadatthu aniccādidassanena nibbijjha sabbaso kāme attano nibbānameva sikkheti.
948. இதா³னி யதா² நிப்³பா³னாய ஸிக்கி²தப்³ப³ங், தங் த³ஸ்ஸெந்தோ ‘‘ஸச்சோ ஸியா’’திஆதி³மாஹ. தத்த² ஸச்சோதி வாசாஸச்சேன ஞாணஸச்சேன மக்³க³ஸச்சேன ச ஸமன்னாக³தோ. ரித்தபேஸுணோதி பஹீனபேஸுணோ. வேவிச்ச²ந்தி மச்ச²ரியங்.
948. Idāni yathā nibbānāya sikkhitabbaṃ, taṃ dassento ‘‘sacco siyā’’tiādimāha. Tattha saccoti vācāsaccena ñāṇasaccena maggasaccena ca samannāgato. Rittapesuṇoti pahīnapesuṇo. Vevicchanti macchariyaṃ.
949. நித்³த³ங் தந்தி³ங் ஸஹே தீ²னந்தி பசலாயிகஞ்ச காயாலஸியஞ்ச சித்தாலஸியஞ்சாதி இமே தயோ த⁴ம்மே அபி⁴ப⁴வெய்ய. நிப்³பா³னமனஸோதி நிப்³பா³னநின்னசித்தோ.
949.Niddaṃ tandiṃ sahe thīnanti pacalāyikañca kāyālasiyañca cittālasiyañcāti ime tayo dhamme abhibhaveyya. Nibbānamanasoti nibbānaninnacitto.
950-51. ஸாஹஸாதி ரத்தஸ்ஸ ராக³சரியாதி³பே⁴தா³ ஸாஹஸகரணா. புராணங் நாபி⁴னந்தெ³ய்யாதி அதீதரூபாதி³ங் நாபி⁴னந்தெ³ய்ய. நவேதி பச்சுப்பன்னே. ஹிய்யமானேதி வினஸ்ஸமானே. ஆகாஸங் ந ஸிதோ ஸியாதி தண்ஹானிஸ்ஸிதோ ந ப⁴வெய்ய. தண்ஹா ஹி ரூபாதீ³னங் ஆகாஸனதோ ‘‘ஆகாஸோ’’தி வுச்சதி.
950-51.Sāhasāti rattassa rāgacariyādibhedā sāhasakaraṇā. Purāṇaṃ nābhinandeyyāti atītarūpādiṃ nābhinandeyya. Naveti paccuppanne. Hiyyamāneti vinassamāne. Ākāsaṃ na sito siyāti taṇhānissito na bhaveyya. Taṇhā hi rūpādīnaṃ ākāsanato ‘‘ākāso’’ti vuccati.
952. ‘‘கிங்காரணா ஆகாஸங் ந ஸிதோ ஸியா’’தி சே – ‘‘கே³த⁴ங் ப்³ரூமீ’’தி கா³தா². தஸ்ஸத்தோ² – அஹஞ்ஹி இமங் ஆகாஸஸங்கா²தங் தண்ஹங் ரூபாதீ³ஸு கி³ஜ்ஜ²னதோ கே³த⁴ங் ப்³ரூமி ‘‘கே³தோ⁴’’தி வதா³மி. கிஞ்ச பி⁴ய்யோ – அவஹனநட்டே²ன ‘‘ஓகோ⁴’’தி ச ஆஜவனட்டே²ன ‘‘ஆஜவ’’ந்தி ச ‘‘இத³ங் மய்ஹங், இத³ங் மய்ஹ’’ந்தி ஜப்பகாரணதோ ‘‘ஜப்பன’’ந்தி ச து³ம்முஞ்சனட்டே²ன ‘‘ஆரம்மண’’ந்தி ச கம்பகரணேன ‘‘பகம்பன’’ந்தி ச ப்³ரூமி, ஏஸா ச லோகஸ்ஸ பலிபோ³த⁴ட்டே²ன து³ரதிக்கமனீயட்டே²ன ச காமபங்கோ து³ரச்சயோதி. ‘‘ஆகாஸங் ந ஸிதோ ஸியா’’தி ஏவங் வுத்தே வா ‘‘கிமேதங் ஆகாஸ’’ந்தி சே? கே³த⁴ங் ப்³ரூமீதி. ஏவம்பி தஸ்ஸா கா³தா²ய ஸம்ப³ந்தோ⁴ வேதி³தப்³போ³. தத்த² பத³யோஜனா – ஆகாஸந்தி கே³த⁴ங் ப்³ரூமீதி. ததா² ய்வாயங் மஹோகோ⁴தி வுச்சதி. தங் ப்³ரூமி, ஆஜவங் ப்³ரூமி, ஜப்பனங் ப்³ரூமி, பகம்பனங் ப்³ரூமி, ய்வாயங் ஸதே³வகே லோகே காமபங்கோ து³ரச்சயோ, தங் ப்³ரூமீதி.
952. ‘‘Kiṃkāraṇā ākāsaṃ na sito siyā’’ti ce – ‘‘gedhaṃ brūmī’’ti gāthā. Tassattho – ahañhi imaṃ ākāsasaṅkhātaṃ taṇhaṃ rūpādīsu gijjhanato gedhaṃ brūmi ‘‘gedho’’ti vadāmi. Kiñca bhiyyo – avahananaṭṭhena ‘‘ogho’’ti ca ājavanaṭṭhena ‘‘ājava’’nti ca ‘‘idaṃ mayhaṃ, idaṃ mayha’’nti jappakāraṇato ‘‘jappana’’nti ca dummuñcanaṭṭhena ‘‘ārammaṇa’’nti ca kampakaraṇena ‘‘pakampana’’nti ca brūmi, esā ca lokassa palibodhaṭṭhena duratikkamanīyaṭṭhena ca kāmapaṅko duraccayoti. ‘‘Ākāsaṃ na sito siyā’’ti evaṃ vutte vā ‘‘kimetaṃ ākāsa’’nti ce? Gedhaṃ brūmīti. Evampi tassā gāthāya sambandho veditabbo. Tattha padayojanā – ākāsanti gedhaṃ brūmīti. Tathā yvāyaṃ mahoghoti vuccati. Taṃ brūmi, ājavaṃ brūmi, jappanaṃ brūmi, pakampanaṃ brūmi, yvāyaṃ sadevake loke kāmapaṅko duraccayo, taṃ brūmīti.
953. ஏவமேதங் கே³தா⁴தி³பரியாயங் ஆகாஸங் அனிஸ்ஸிதோ – ஸச்சா அவோக்கம்மாதி கா³தா². தஸ்ஸத்தோ² – புப்³பே³ வுத்தா திவிதா⁴பி ஸச்சா அவோக்கம்ம மோனெய்யப்பத்தியா முனீதி ஸங்க்²யங் க³தோ நிப்³பா³னத்த²லே திட்ட²தி ப்³ராஹ்மணோ, ஸ வே ஏவரூபோ ஸப்³பா³னி ஆயதனானி நிஸ்ஸஜ்ஜித்வா ‘‘ஸந்தோ’’தி வுச்சதீதி.
953. Evametaṃ gedhādipariyāyaṃ ākāsaṃ anissito – saccā avokkammāti gāthā. Tassattho – pubbe vuttā tividhāpi saccā avokkamma moneyyappattiyā munīti saṅkhyaṃ gato nibbānatthale tiṭṭhati brāhmaṇo, sa ve evarūpo sabbāni āyatanāni nissajjitvā ‘‘santo’’ti vuccatīti.
954. கிஞ்ச பி⁴ய்யோ – ஸ வே வித்³வாதி கா³தா². தத்த² ஞத்வா த⁴ம்மந்தி அனிச்சாதி³னயேன ஸங்க²தத⁴ம்மங் ஞத்வா. ஸம்மா ஸோ லோகே இரியானோதி அஸம்மாஇரியனகரானங் கிலேஸானங் பஹானா ஸம்மா ஸோ லோகே இரியமானோ.
954. Kiñca bhiyyo – sa ve vidvāti gāthā. Tattha ñatvā dhammanti aniccādinayena saṅkhatadhammaṃ ñatvā. Sammā so loke iriyānoti asammāiriyanakarānaṃ kilesānaṃ pahānā sammā so loke iriyamāno.
955. ஏவங் அபிஹெந்தோ ச – யோத⁴ காமேதி கா³தா². தத்த² ஸங்க³ந்தி ஸத்தவித⁴ங் ஸங்க³ஞ்ச யோ அச்சதரி நாஜ்ஜே²தீதி நாபி⁴ஜ்ஜா²யதி.
955. Evaṃ apihento ca – yodha kāmeti gāthā. Tattha saṅganti sattavidhaṃ saṅgañca yo accatari nājjhetīti nābhijjhāyati.
956. தஸ்மா தும்ஹேஸுபி யோ ஏவரூபோ ஹோதுமிச்ச²தி, தங் வதா³மி – யங் புப்³பே³தி கா³தா². தத்த² யங் புப்³பே³தி அதீதே ஸங்கா²ரே ஆரப்³ப⁴ உப்பஜ்ஜனத⁴ம்மங் கிலேஸஜாதங் அதீதகம்மஞ்ச. பச்சா² தே மாஹு கிஞ்சனந்தி அனாக³தேபி ஸங்கா²ரே ஆரப்³ப⁴ உப்பஜ்ஜனத⁴ம்மங் ராகா³தி³கிஞ்சனங் மாஹு. மஜ்ஜே² சே நோ க³ஹெஸ்ஸஸீதி பச்சுப்பன்னே ரூபாதி³த⁴ம்மேபி ந க³ஹெஸ்ஸஸி சே.
956. Tasmā tumhesupi yo evarūpo hotumicchati, taṃ vadāmi – yaṃ pubbeti gāthā. Tattha yaṃ pubbeti atīte saṅkhāre ārabbha uppajjanadhammaṃ kilesajātaṃ atītakammañca. Pacchā te māhu kiñcananti anāgatepi saṅkhāre ārabbha uppajjanadhammaṃ rāgādikiñcanaṃ māhu. Majjhe ce no gahessasīti paccuppanne rūpādidhammepi na gahessasi ce.
957. ஏவங் ‘‘உபஸந்தோ சரிஸ்ஸஸீ’’தி அரஹத்தப்பத்திங் த³ஸ்ஸெத்வா இதா³னி அரஹதோ து²திவஸேன இதோ பரா கா³தா²யோ அபா⁴ஸி. தத்த² ஸப்³ப³ஸோதி கா³தா²ய மமாயிதந்தி மமத்தகரணங், ‘‘மம இத³’’ந்தி க³ஹிதங் வா வத்து². அஸதா ச ந ஸோசதீதி அவிஜ்ஜமானகாரணா அஸந்தகாரணா ந ஸோசதி. ந ஜீயதீதி ஜானிம்பி ந க³ச்ச²தி.
957. Evaṃ ‘‘upasanto carissasī’’ti arahattappattiṃ dassetvā idāni arahato thutivasena ito parā gāthāyo abhāsi. Tattha sabbasoti gāthāya mamāyitanti mamattakaraṇaṃ, ‘‘mama ida’’nti gahitaṃ vā vatthu. Asatā ca na socatīti avijjamānakāraṇā asantakāraṇā na socati. Na jīyatīti jānimpi na gacchati.
958-9. கிஞ்ச பி⁴ய்யோ – யஸ்ஸ நத்தீ²தி கா³தா². தத்த² கிஞ்சனந்தி கிஞ்சி ரூபாதி³த⁴ம்மஜாதங். கிஞ்ச பி⁴ய்யோ – அனிட்டு²ரீதி கா³தா². தத்த² அனிட்டு²ரீதி அனிஸ்ஸுகீ. ‘‘அனித்³து⁴ரீ’’திபி கேசி பட²ந்தி. ஸப்³ப³தீ⁴ ஸமோதி ஸப்³ப³த்த² ஸமோ, உபெக்க²கோதி அதி⁴ப்பாயோ. கிங் வுத்தங் ஹோதி? யோ ஸோ ‘‘நத்தி² மே’’தி ந ஸோசதி, தமஹங் அவிகம்பினங் புக்³க³லங் புட்டோ² ஸமானோ அனிட்டு²ரீ அனநுகி³த்³தோ⁴ அனேஜோ ஸப்³ப³தி⁴ ஸமோதி இமங் தஸ்மிங் புக்³க³லே சதுப்³பி³த⁴மானிஸங்ஸங் ப்³ரூமீதி.
958-9. Kiñca bhiyyo – yassa natthīti gāthā. Tattha kiñcananti kiñci rūpādidhammajātaṃ. Kiñca bhiyyo – aniṭṭhurīti gāthā. Tattha aniṭṭhurīti anissukī. ‘‘Aniddhurī’’tipi keci paṭhanti. Sabbadhī samoti sabbattha samo, upekkhakoti adhippāyo. Kiṃ vuttaṃ hoti? Yo so ‘‘natthi me’’ti na socati, tamahaṃ avikampinaṃ puggalaṃ puṭṭho samāno aniṭṭhurī ananugiddho anejo sabbadhi samoti imaṃ tasmiṃ puggale catubbidhamānisaṃsaṃ brūmīti.
960. கிஞ்ச பி⁴ய்யோ – அனேஜஸ்ஸாதி கா³தா². தத்த² நிஸங்க²தீதி புஞ்ஞாபி⁴ஸங்கா²ராதீ³ஸு யோ கோசி ஸங்கா²ரோ. ஸோ ஹி யஸ்மா நிஸங்க²ரியதி நிஸங்க²ரோதி வா, தஸ்மா ‘‘நிஸங்க²தீ’’தி வுச்சதி. வியாரம்பா⁴தி விவிதா⁴ புஞ்ஞாபி⁴ஸங்கா²ராதி³கா ஆரம்பா⁴. கே²மங் பஸ்ஸதி ஸப்³ப³தீ⁴தி ஸப்³ப³த்த² அப⁴யமேவ பஸ்ஸதி.
960. Kiñca bhiyyo – anejassāti gāthā. Tattha nisaṅkhatīti puññābhisaṅkhārādīsu yo koci saṅkhāro. So hi yasmā nisaṅkhariyati nisaṅkharoti vā, tasmā ‘‘nisaṅkhatī’’ti vuccati. Viyārambhāti vividhā puññābhisaṅkhārādikā ārambhā. Khemaṃ passati sabbadhīti sabbattha abhayameva passati.
961. ஏவங் பஸ்ஸந்தோ ந ஸமேஸூதி கா³தா². தத்த² ந வத³தேதி ‘‘ஸதி³ஸோஹமஸ்மீ’’திஆதி³னா மானவஸேன ஸமேஸுபி அத்தானங் ந வத³தி ஓமேஸுபி உஸ்ஸேஸுபி. நாதே³தி ந நிரஸ்ஸதீதி ரூபாதீ³ஸு கஞ்சி த⁴ம்மங் ந க³ண்ஹாதி; ந நிஸ்ஸஜ்ஜதி. ஸேஸங் ஸப்³ப³த்த² பாகடமேவ. ஏவங் அரஹத்தனிகூடேன தே³ஸனங் நிட்டா²பேஸி, தே³ஸனாபரியோஸானே பஞ்சஸதா ஸாகியகுமாரா ச கோலியகுமாரா ச ஏஹிபி⁴க்கு²பப்³ப³ஜ்ஜாய பப்³ப³ஜிதா, தே க³ஹெத்வா ப⁴க³வா மஹாவனங் பாவிஸீதி.
961. Evaṃ passanto na samesūti gāthā. Tattha na vadateti ‘‘sadisohamasmī’’tiādinā mānavasena samesupi attānaṃ na vadati omesupi ussesupi. Nādeti na nirassatīti rūpādīsu kañci dhammaṃ na gaṇhāti; na nissajjati. Sesaṃ sabbattha pākaṭameva. Evaṃ arahattanikūṭena desanaṃ niṭṭhāpesi, desanāpariyosāne pañcasatā sākiyakumārā ca koliyakumārā ca ehibhikkhupabbajjāya pabbajitā, te gahetvā bhagavā mahāvanaṃ pāvisīti.
பரமத்த²ஜோதிகாய கு²த்³த³க-அட்ட²கதா²ய
Paramatthajotikāya khuddaka-aṭṭhakathāya
ஸுத்தனிபாத-அட்ட²கதா²ய அத்தத³ண்ட³ஸுத்தவண்ணனா நிட்டி²தா.
Suttanipāta-aṭṭhakathāya attadaṇḍasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / ஸுத்தனிபாதபாளி • Suttanipātapāḷi / 15. அத்தத³ண்ட³ஸுத்தங் • 15. Attadaṇḍasuttaṃ
