| Library / Tipiṭaka / တိပိဋက • Tipiṭaka / ဝဇိရဗုဒ္ဓိ-ဋီကာ • Vajirabuddhi-ṭīkā |
၄. အတ္တကာမပာရိစရိယသိက္ခာပဒဝဏ္ဏနာ
4. Attakāmapāricariyasikkhāpadavaṇṇanā
၂၉၀. စတုတ္ထေ တယော သင္ဃာဒိသေသဝာရာ အာဂတာ, သေသာ သတ္တပညာသ ဝာရာ ထုလ္လစ္စယဒုက္ကဋာပတ္တိကာယ သံခိတ္တာတိ ဝေဒိတဗ္ဗာ, တတော အညတရော အသမ္ဘဝတော ဣဓ န ဥဒ္ဓဋော။ သေသယောဇနက္ကမော ဝုတ္တနယေန ဝေဒိတဗ္ဗော။ နဂရပရိက္ခာရေဟီတိ ပာကာရပရိခာဒီဟိ နဂရပရိဝာရေဟိ။ သေတပရိက္ခာရောတိ သေတာလင္ကာရော, သီလာလင္ကာရောတိ အတ္ထော (သံ. နိ. အဋ္ဌ. ၃.၅.၄)။ စက္ကဝီရိယောတိ ဝီရိယစက္ကော။ ဝသလံ ဒုဂ္ဂန္ဓန္တိ နိမိတ္တံ သန္ဓာယာဟ, တဒေဝ သန္ဓာယ ‘‘ကိံ မေ ပာပကံ, ကိံ မေ ဒုဂ္ဂန္ဓ’’န္တိ ဝုတ္တံ။
290. Catutthe tayo saṅghādisesavārā āgatā, sesā sattapaññāsa vārā thullaccayadukkaṭāpattikāya saṃkhittāti veditabbā, tato aññataro asambhavato idha na uddhaṭo. Sesayojanakkamo vuttanayena veditabbo. Nagaraparikkhārehīti pākāraparikhādīhi nagaraparivārehi. Setaparikkhāroti setālaṅkāro, sīlālaṅkāroti attho (saṃ. ni. aṭṭha. 3.5.4). Cakkavīriyoti vīriyacakko. Vasalaṃ duggandhanti nimittaṃ sandhāyāha, tadeva sandhāya ‘‘kiṃ me pāpakaṃ, kiṃ me duggandha’’nti vuttaṃ.
၂၉၁. သန္တိကေတိ ယတ္ထ ဌိတော ဝိညာပေတိ။ ‘‘ပဌမဝိဂ္ဂဟေ သစေ ပာဠိဝသေန ယောဇေတီတိ ကာမဟေတုပာရိစရိယာအတ္ထော။ သေသန္တိ ‘အဓိပ္ပာယော’တိ ပဒံ ဗ္ယဉ္ဇနံ အတ္ထာဘာဝတော။ ဒုတိယေ ပာဠိဝသေန ကာမဟေတု-ပဒာနိ ဗ္ယဉ္ဇနာနိ တေသံ တတ္ထ အတ္ထာဘာဝတော။ ဧဝံ စတ္တာရိ ပဒာနိ ဒ္ဝိန္နံ ဝိဂ္ဂဟာနံ ဝသေန ယောဇိတာနီတိ အပရေ ဝဒန္တီ’’တိ ဝုတ္တံ။
291.Santiketi yattha ṭhito viññāpeti. ‘‘Paṭhamaviggahe sace pāḷivasena yojetīti kāmahetupāricariyāattho. Sesanti ‘adhippāyo’ti padaṃ byañjanaṃ atthābhāvato. Dutiye pāḷivasena kāmahetu-padāni byañjanāni tesaṃ tattha atthābhāvato. Evaṃ cattāri padāni dvinnaṃ viggahānaṃ vasena yojitānīti apare vadantī’’ti vuttaṃ.
၂၉၅. ဧတေသု သိက္ခာပဒေသု မေထုနရာဂေန ဝီတိက္ကမေ သတိ သင္ဃာဒိသေသေန အနာပတ္တိ။ တသ္မာ ‘‘ကိံ ဘန္တေ အဂ္ဂဒာနန္တိ။ မေထုနဓမ္မ’’န္တိ ဣဒံ ကေဝလံ မေထုနဓမ္မသ္သ ဝဏ္ဏဘဏနတ္ထံ ဝုတ္တံ, န မေထုနဓမ္မာဓိပ္ပာယေန တဒတ္ထိယာ ဝုတ္တန္တိ ဝေဒိတဗ္ဗံ, ပရသ္သ ဘိက္ခုနော ကာမပာရိစရိယာယ ဝဏ္ဏဘဏနေ ဒုက္ကဋံ။ ‘‘ယော တေ ဝိဟာရေ ဝသတိ, တသ္သ အဂ္ဂဒာနံ ဒေဟီ’’တိ ပရိယာယဝစနေနပိ ဒုက္ကဋံ။ ‘‘အတ္တကာမပာရိစရိယာယ ဝဏ္ဏံ ဘာသေယ္ယ။ ယာ မာဒိသံ သီလဝန္တ’’န္တိ စ ဝုတ္တတ္တာတိ ဧကေ။ ပဉ္စသု အင္ဂေသု သဗ္ဘာဝာ သင္ဃာဒိသေသောဝာတိ ဧကေ။ ဝိစာရေတ္ဝာ ဂဟေတဗ္ဗံ။ ဂဏ္ဌိပဒေ ပန ‘‘ဣမသ္မိံ သိက္ခာပဒဒ္ဝယေ ကာယသံသဂ္ဂေ ဝိယ ယက္ခိပေတီသု ဒုဋ္ဌုလ္လတ္တကာမဝစနေ ထုလ္လစ္စယ’န္တိ ဝဒန္တိ။ အဋ္ဌကထာသု ပန နာဂတ’’န္တိ လိခိတံ။ ‘‘ဥဘတောဗ္ယဉ္ဇနကော ပန ပဏ္ဍကဂတိကောဝာ’’တိ ဝဒန္တိ။
295. Etesu sikkhāpadesu methunarāgena vītikkame sati saṅghādisesena anāpatti. Tasmā ‘‘kiṃ bhante aggadānanti. Methunadhamma’’nti idaṃ kevalaṃ methunadhammassa vaṇṇabhaṇanatthaṃ vuttaṃ, na methunadhammādhippāyena tadatthiyā vuttanti veditabbaṃ, parassa bhikkhuno kāmapāricariyāya vaṇṇabhaṇane dukkaṭaṃ. ‘‘Yo te vihāre vasati, tassa aggadānaṃ dehī’’ti pariyāyavacanenapi dukkaṭaṃ. ‘‘Attakāmapāricariyāya vaṇṇaṃ bhāseyya. Yā mādisaṃ sīlavanta’’nti ca vuttattāti eke. Pañcasu aṅgesu sabbhāvā saṅghādisesovāti eke. Vicāretvā gahetabbaṃ. Gaṇṭhipade pana ‘‘imasmiṃ sikkhāpadadvaye kāyasaṃsagge viya yakkhipetīsu duṭṭhullattakāmavacane thullaccaya’nti vadanti. Aṭṭhakathāsu pana nāgata’’nti likhitaṃ. ‘‘Ubhatobyañjanako pana paṇḍakagatikovā’’ti vadanti.
အတ္တကာမပာရိစရိယသိက္ခာပဒဝဏ္ဏနာ နိဋ္ဌိတာ။
Attakāmapāricariyasikkhāpadavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / ဝိနယပိဋက • Vinayapiṭaka / မဟာဝိဘင္ဂ • Mahāvibhaṅga / ၄. အတ္တကာမပာရိစရိယသိက္ခာပဒံ • 4. Attakāmapāricariyasikkhāpadaṃ
အဋ္ဌကထာ • Aṭṭhakathā / ဝိနယပိဋက (အဋ္ဌကထာ) • Vinayapiṭaka (aṭṭhakathā) / မဟာဝိဘင္ဂ-အဋ္ဌကထာ • Mahāvibhaṅga-aṭṭhakathā / ၄. အတ္တကာမပာရိစရိယသိက္ခာပဒဝဏ္ဏနာ • 4. Attakāmapāricariyasikkhāpadavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / သာရတ္ထဒီပနီ-ဋီကာ • Sāratthadīpanī-ṭīkā / ၄. အတ္တကာမပာရိစရိယသိက္ခာပဒဝဏ္ဏနာ • 4. Attakāmapāricariyasikkhāpadavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝိမတိဝိနောဒနီ-ဋီကာ • Vimativinodanī-ṭīkā / ၄. အတ္တကာမပာရိစရိယသိက္ခာပဒဝဏ္ဏနာ • 4. Attakāmapāricariyasikkhāpadavaṇṇanā
