| Library / Tipiṭaka / તિપિટક • Tipiṭaka / અઙ્ગુત્તરનિકાય • Aṅguttaranikāya |
૮. અત્તકારીસુત્તં
8. Attakārīsuttaṃ
૩૮. અથ ખો અઞ્ઞતરો બ્રાહ્મણો યેન ભગવા તેનુપસઙ્કમિ; ઉપસઙ્કમિત્વા ભગવતા સદ્ધિં સમ્મોદિ. સમ્મોદનીયં કથં સારણીયં વીતિસારેત્વા એકમન્તં નિસીદિ. એકમન્તં નિસિન્નો ખો સો બ્રાહ્મણો ભગવન્તં એતદવોચ – ‘‘અહઞ્હિ, ભો ગોતમ, એવંવાદી એવંદિટ્ઠિ – ‘નત્થિ અત્તકારો, નત્થિ પરકારો’’’તિ. ‘‘માહં, બ્રાહ્મણ, એવંવાદિં એવંદિટ્ઠિં અદ્દસં વા અસ્સોસિં વા. કથઞ્હિ નામ સયં અભિક્કમન્તો, સયં પટિક્કમન્તો એવં વક્ખતિ – ‘નત્થિ અત્તકારો, નત્થિ પરકારો’’’તિ!
38. Atha kho aññataro brāhmaṇo yena bhagavā tenupasaṅkami; upasaṅkamitvā bhagavatā saddhiṃ sammodi. Sammodanīyaṃ kathaṃ sāraṇīyaṃ vītisāretvā ekamantaṃ nisīdi. Ekamantaṃ nisinno kho so brāhmaṇo bhagavantaṃ etadavoca – ‘‘ahañhi, bho gotama, evaṃvādī evaṃdiṭṭhi – ‘natthi attakāro, natthi parakāro’’’ti. ‘‘Māhaṃ, brāhmaṇa, evaṃvādiṃ evaṃdiṭṭhiṃ addasaṃ vā assosiṃ vā. Kathañhi nāma sayaṃ abhikkamanto, sayaṃ paṭikkamanto evaṃ vakkhati – ‘natthi attakāro, natthi parakāro’’’ti!
‘‘તં કિં મઞ્ઞસિ, બ્રાહ્મણ, અત્થિ આરબ્ભધાતૂ’’તિ? ‘‘એવં, ભો’’. ‘‘આરબ્ભધાતુયા સતિ આરબ્ભવન્તો સત્તા પઞ્ઞાયન્તી’’તિ? ‘‘એવં, ભો’’. ‘‘યં ખો, બ્રાહ્મણ, આરબ્ભધાતુયા સતિ આરબ્ભવન્તો સત્તા પઞ્ઞાયન્તિ, અયં સત્તાનં અત્તકારો અયં પરકારો’’.
‘‘Taṃ kiṃ maññasi, brāhmaṇa, atthi ārabbhadhātū’’ti? ‘‘Evaṃ, bho’’. ‘‘Ārabbhadhātuyā sati ārabbhavanto sattā paññāyantī’’ti? ‘‘Evaṃ, bho’’. ‘‘Yaṃ kho, brāhmaṇa, ārabbhadhātuyā sati ārabbhavanto sattā paññāyanti, ayaṃ sattānaṃ attakāro ayaṃ parakāro’’.
‘‘તં કિં મઞ્ઞસિ, બ્રાહ્મણ, અત્થિ નિક્કમધાતુ…પે॰… અત્થિ પરક્કમધાતુ… અત્થિ થામધાતુ… અત્થિ ઠિતિધાતુ… અત્થિ ઉપક્કમધાતૂ’’તિ? ‘‘એવં, ભો’’. ‘‘ઉપક્કમધાતુયા સતિ ઉપક્કમવન્તો સત્તા પઞ્ઞાયન્તી’’તિ? ‘‘એવં, ભો’’. ‘‘યં ખો, બ્રાહ્મણ, ઉપક્કમધાતુયા સતિ ઉપક્કમવન્તો સત્તા પઞ્ઞાયન્તિ, અયં સત્તાનં અત્તકારો અયં પરકારો’’.
‘‘Taṃ kiṃ maññasi, brāhmaṇa, atthi nikkamadhātu…pe… atthi parakkamadhātu… atthi thāmadhātu… atthi ṭhitidhātu… atthi upakkamadhātū’’ti? ‘‘Evaṃ, bho’’. ‘‘Upakkamadhātuyā sati upakkamavanto sattā paññāyantī’’ti? ‘‘Evaṃ, bho’’. ‘‘Yaṃ kho, brāhmaṇa, upakkamadhātuyā sati upakkamavanto sattā paññāyanti, ayaṃ sattānaṃ attakāro ayaṃ parakāro’’.
‘‘માહં, બ્રાહ્મણ 1, એવંવાદિં એવંદિટ્ઠિં અદ્દસં વા અસ્સોસિં વા. કથઞ્હિ નામ સયં અભિક્કમન્તો સયં પટિક્કમન્તો એવં વક્ખતિ – ‘નત્થિ અત્તકારો નત્થિ પરકારો’’’તિ.
‘‘Māhaṃ, brāhmaṇa 2, evaṃvādiṃ evaṃdiṭṭhiṃ addasaṃ vā assosiṃ vā. Kathañhi nāma sayaṃ abhikkamanto sayaṃ paṭikkamanto evaṃ vakkhati – ‘natthi attakāro natthi parakāro’’’ti.
‘‘અભિક્કન્તં, ભો ગોતમ…પે॰… અજ્જતગ્ગે પાણુપેતં સરણં ગત’’ન્તિ! અટ્ઠમં.
‘‘Abhikkantaṃ, bho gotama…pe… ajjatagge pāṇupetaṃ saraṇaṃ gata’’nti! Aṭṭhamaṃ.
Footnotes:
Related texts:
અટ્ઠકથા • Aṭṭhakathā / સુત્તપિટક (અટ્ઠકથા) • Suttapiṭaka (aṭṭhakathā) / અઙ્ગુત્તરનિકાય (અટ્ઠકથા) • Aṅguttaranikāya (aṭṭhakathā) / ૮. અત્તકારીસુત્તવણ્ણના • 8. Attakārīsuttavaṇṇanā
ટીકા • Tīkā / સુત્તપિટક (ટીકા) • Suttapiṭaka (ṭīkā) / અઙ્ગુત્તરનિકાય (ટીકા) • Aṅguttaranikāya (ṭīkā) / ૮-૧૧. અત્તકારીસુત્તાદિવણ્ણના • 8-11. Attakārīsuttādivaṇṇanā
