| Library / Tipiṭaka / ತಿಪಿಟಕ • Tipiṭaka / ಅಙ್ಗುತ್ತರನಿಕಾಯ • Aṅguttaranikāya |
೮. ಅತ್ತಕಾರೀಸುತ್ತಂ
8. Attakārīsuttaṃ
೩೮. ಅಥ ಖೋ ಅಞ್ಞತರೋ ಬ್ರಾಹ್ಮಣೋ ಯೇನ ಭಗವಾ ತೇನುಪಸಙ್ಕಮಿ; ಉಪಸಙ್ಕಮಿತ್ವಾ ಭಗವತಾ ಸದ್ಧಿಂ ಸಮ್ಮೋದಿ। ಸಮ್ಮೋದನೀಯಂ ಕಥಂ ಸಾರಣೀಯಂ ವೀತಿಸಾರೇತ್ವಾ ಏಕಮನ್ತಂ ನಿಸೀದಿ। ಏಕಮನ್ತಂ ನಿಸಿನ್ನೋ ಖೋ ಸೋ ಬ್ರಾಹ್ಮಣೋ ಭಗವನ್ತಂ ಏತದವೋಚ – ‘‘ಅಹಞ್ಹಿ, ಭೋ ಗೋತಮ, ಏವಂವಾದೀ ಏವಂದಿಟ್ಠಿ – ‘ನತ್ಥಿ ಅತ್ತಕಾರೋ, ನತ್ಥಿ ಪರಕಾರೋ’’’ತಿ। ‘‘ಮಾಹಂ, ಬ್ರಾಹ್ಮಣ, ಏವಂವಾದಿಂ ಏವಂದಿಟ್ಠಿಂ ಅದ್ದಸಂ ವಾ ಅಸ್ಸೋಸಿಂ ವಾ। ಕಥಞ್ಹಿ ನಾಮ ಸಯಂ ಅಭಿಕ್ಕಮನ್ತೋ, ಸಯಂ ಪಟಿಕ್ಕಮನ್ತೋ ಏವಂ ವಕ್ಖತಿ – ‘ನತ್ಥಿ ಅತ್ತಕಾರೋ, ನತ್ಥಿ ಪರಕಾರೋ’’’ತಿ!
38. Atha kho aññataro brāhmaṇo yena bhagavā tenupasaṅkami; upasaṅkamitvā bhagavatā saddhiṃ sammodi. Sammodanīyaṃ kathaṃ sāraṇīyaṃ vītisāretvā ekamantaṃ nisīdi. Ekamantaṃ nisinno kho so brāhmaṇo bhagavantaṃ etadavoca – ‘‘ahañhi, bho gotama, evaṃvādī evaṃdiṭṭhi – ‘natthi attakāro, natthi parakāro’’’ti. ‘‘Māhaṃ, brāhmaṇa, evaṃvādiṃ evaṃdiṭṭhiṃ addasaṃ vā assosiṃ vā. Kathañhi nāma sayaṃ abhikkamanto, sayaṃ paṭikkamanto evaṃ vakkhati – ‘natthi attakāro, natthi parakāro’’’ti!
‘‘ತಂ ಕಿಂ ಮಞ್ಞಸಿ, ಬ್ರಾಹ್ಮಣ, ಅತ್ಥಿ ಆರಬ್ಭಧಾತೂ’’ತಿ? ‘‘ಏವಂ, ಭೋ’’। ‘‘ಆರಬ್ಭಧಾತುಯಾ ಸತಿ ಆರಬ್ಭವನ್ತೋ ಸತ್ತಾ ಪಞ್ಞಾಯನ್ತೀ’’ತಿ? ‘‘ಏವಂ, ಭೋ’’। ‘‘ಯಂ ಖೋ, ಬ್ರಾಹ್ಮಣ, ಆರಬ್ಭಧಾತುಯಾ ಸತಿ ಆರಬ್ಭವನ್ತೋ ಸತ್ತಾ ಪಞ್ಞಾಯನ್ತಿ, ಅಯಂ ಸತ್ತಾನಂ ಅತ್ತಕಾರೋ ಅಯಂ ಪರಕಾರೋ’’।
‘‘Taṃ kiṃ maññasi, brāhmaṇa, atthi ārabbhadhātū’’ti? ‘‘Evaṃ, bho’’. ‘‘Ārabbhadhātuyā sati ārabbhavanto sattā paññāyantī’’ti? ‘‘Evaṃ, bho’’. ‘‘Yaṃ kho, brāhmaṇa, ārabbhadhātuyā sati ārabbhavanto sattā paññāyanti, ayaṃ sattānaṃ attakāro ayaṃ parakāro’’.
‘‘ತಂ ಕಿಂ ಮಞ್ಞಸಿ, ಬ್ರಾಹ್ಮಣ, ಅತ್ಥಿ ನಿಕ್ಕಮಧಾತು…ಪೇ॰… ಅತ್ಥಿ ಪರಕ್ಕಮಧಾತು… ಅತ್ಥಿ ಥಾಮಧಾತು… ಅತ್ಥಿ ಠಿತಿಧಾತು… ಅತ್ಥಿ ಉಪಕ್ಕಮಧಾತೂ’’ತಿ? ‘‘ಏವಂ, ಭೋ’’। ‘‘ಉಪಕ್ಕಮಧಾತುಯಾ ಸತಿ ಉಪಕ್ಕಮವನ್ತೋ ಸತ್ತಾ ಪಞ್ಞಾಯನ್ತೀ’’ತಿ? ‘‘ಏವಂ, ಭೋ’’। ‘‘ಯಂ ಖೋ, ಬ್ರಾಹ್ಮಣ, ಉಪಕ್ಕಮಧಾತುಯಾ ಸತಿ ಉಪಕ್ಕಮವನ್ತೋ ಸತ್ತಾ ಪಞ್ಞಾಯನ್ತಿ, ಅಯಂ ಸತ್ತಾನಂ ಅತ್ತಕಾರೋ ಅಯಂ ಪರಕಾರೋ’’।
‘‘Taṃ kiṃ maññasi, brāhmaṇa, atthi nikkamadhātu…pe… atthi parakkamadhātu… atthi thāmadhātu… atthi ṭhitidhātu… atthi upakkamadhātū’’ti? ‘‘Evaṃ, bho’’. ‘‘Upakkamadhātuyā sati upakkamavanto sattā paññāyantī’’ti? ‘‘Evaṃ, bho’’. ‘‘Yaṃ kho, brāhmaṇa, upakkamadhātuyā sati upakkamavanto sattā paññāyanti, ayaṃ sattānaṃ attakāro ayaṃ parakāro’’.
‘‘ಮಾಹಂ, ಬ್ರಾಹ್ಮಣ 1, ಏವಂವಾದಿಂ ಏವಂದಿಟ್ಠಿಂ ಅದ್ದಸಂ ವಾ ಅಸ್ಸೋಸಿಂ ವಾ। ಕಥಞ್ಹಿ ನಾಮ ಸಯಂ ಅಭಿಕ್ಕಮನ್ತೋ ಸಯಂ ಪಟಿಕ್ಕಮನ್ತೋ ಏವಂ ವಕ್ಖತಿ – ‘ನತ್ಥಿ ಅತ್ತಕಾರೋ ನತ್ಥಿ ಪರಕಾರೋ’’’ತಿ।
‘‘Māhaṃ, brāhmaṇa 2, evaṃvādiṃ evaṃdiṭṭhiṃ addasaṃ vā assosiṃ vā. Kathañhi nāma sayaṃ abhikkamanto sayaṃ paṭikkamanto evaṃ vakkhati – ‘natthi attakāro natthi parakāro’’’ti.
‘‘ಅಭಿಕ್ಕನ್ತಂ, ಭೋ ಗೋತಮ…ಪೇ॰… ಅಜ್ಜತಗ್ಗೇ ಪಾಣುಪೇತಂ ಸರಣಂ ಗತ’’ನ್ತಿ! ಅಟ್ಠಮಂ।
‘‘Abhikkantaṃ, bho gotama…pe… ajjatagge pāṇupetaṃ saraṇaṃ gata’’nti! Aṭṭhamaṃ.
Footnotes:
Related texts:
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಅಙ್ಗುತ್ತರನಿಕಾಯ (ಅಟ್ಠಕಥಾ) • Aṅguttaranikāya (aṭṭhakathā) / ೮. ಅತ್ತಕಾರೀಸುತ್ತವಣ್ಣನಾ • 8. Attakārīsuttavaṇṇanā
ಟೀಕಾ • Tīkā / ಸುತ್ತಪಿಟಕ (ಟೀಕಾ) • Suttapiṭaka (ṭīkā) / ಅಙ್ಗುತ್ತರನಿಕಾಯ (ಟೀಕಾ) • Aṅguttaranikāya (ṭīkā) / ೮-೧೧. ಅತ್ತಕಾರೀಸುತ್ತಾದಿವಣ್ಣನಾ • 8-11. Attakārīsuttādivaṇṇanā
