| Library / Tipiṭaka / д̇ибидага • Tipiṭaka / махааваг̇г̇а-адтагат̇аа • Mahāvagga-aṭṭhakathā |
адтажийварамаад̇игаагат̇аа
Aṭṭhacīvaramātikākathā
379. ид̣̇аани аад̣̇ид̇о бадтааяа вуд̇д̇ажийвараанам̣ бадилаабхакзд̇д̇ам̣ д̣̇ассзд̇ум̣ ‘‘адтимаа бхигкавз маад̇игаа’’д̇иаад̣̇имааха. сиймааяа д̣̇зд̇ийд̇иаад̣̇и буг̇г̇алаад̇хидтаананаязна вуд̇д̇ам̣. зд̇т̇а бана сиймааяа д̣̇аанам̣ згаа маад̇игаа, гад̇игааяа д̣̇аанам̣ д̣̇уд̇ияаа…бз… буг̇г̇аласса д̣̇аанам̣ адтамаа. д̇ад̇т̇а сиймааяа д̣̇аммийд̇и звам̣ сиймам̣ бараамасид̇ваа д̣̇знд̇о сиймааяа д̣̇зд̇и наама. зса наяо саб̣б̣ад̇т̇а.
379. Idāni ādito paṭṭhāya vuttacīvarānaṃ paṭilābhakhettaṃ dassetuṃ ‘‘aṭṭhimā bhikkhave mātikā’’tiādimāha. Sīmāya detītiādi puggalādhiṭṭhānanayena vuttaṃ. Ettha pana sīmāya dānaṃ ekā mātikā, katikāya dānaṃ dutiyā…pe… puggalassa dānaṃ aṭṭhamā. Tattha sīmāya dammīti evaṃ sīmaṃ parāmasitvā dento sīmāya deti nāma. Esa nayo sabbattha.
сиймааяа д̣̇зд̇и, яаавад̇игаа бхигкуу анд̇осиймаг̇ад̇аа д̇зхи бхааж̇зд̇аб̣б̣анд̇иаад̣̇имхи бана маад̇игаанид̣̇д̣̇зсз сиймааяа д̣̇зд̇ийд̇и зд̇т̇а д̇аава кан̣д̣асиймаа, убажаарасиймаа, самаанасам̣ваасасиймаа, авиббаваасасиймаа, лаабхасиймаа, г̇аамасиймаа, ниг̇амасиймаа, наг̇арасиймаа, аб̣бханд̇арасиймаа, уд̣̇агугкзбасиймаа, ж̇анабад̣̇асиймаа, радтасиймаа, раж̇ж̇асиймаа, д̣̇ийбасиймаа, жаггаваал̣асиймаад̇и баннараса сиймаа взд̣̇ид̇аб̣б̣аа.
Sīmāya deti, yāvatikā bhikkhū antosīmagatā tehi bhājetabbantiādimhi pana mātikāniddese sīmāya detīti ettha tāva khaṇḍasīmā, upacārasīmā, samānasaṃvāsasīmā, avippavāsasīmā, lābhasīmā, gāmasīmā, nigamasīmā, nagarasīmā, abbhantarasīmā, udakukkhepasīmā, janapadasīmā, raṭṭhasīmā, rajjasīmā, dīpasīmā, cakkavāḷasīmāti pannarasa sīmā veditabbā.
д̇ад̇т̇а кан̣д̣асиймаа сиймаагат̇ааяам̣ вуд̇д̇аава. убажаарасиймаа баригкид̇д̇асса вихаарасса баригкзбзна абаригкид̇д̇асса баригкзбаарахадтаанзна барижчиннаа ход̇и. абижа бхигкуунам̣ д̇хувасаннибаад̇адтаанад̇о ваа барияанд̇з тид̇абхож̇анасаалад̇о ваа ниб̣ад̣̇д̇хавасанагаааваасад̇о ваа т̇аамамаж̇жхимасса бурисасса д̣̇виннам̣ лзд̣д̣убаад̇аанам̣ анд̇о убажаарасиймаа взд̣̇ид̇аб̣б̣аа, саа бана ааваасзсу вад̣дханд̇зсу вад̣дхад̇и, барихааяанд̇зсу барихааяад̇и. махаабажжарияам̣ бана ‘‘бхигкуусуби вад̣дханд̇зсу вад̣дхад̇ий’’д̇и вуд̇д̇ам̣. д̇асмаа сажз вихаарз саннибад̇ид̇абхигкуухи сад̣̇д̇хим̣ згааб̣ад̣̇д̇хаа худ̇ваа яож̇анасад̇амби буурзд̇ваа нисийд̣̇анд̇и, яож̇анасад̇амби убажаарасиймаава ход̇и, саб̣б̣зсам̣ лаабхо баабун̣аад̇и. самаанасам̣ваасаавиббаваасасиймаад̣̇ваяамби вуд̇д̇амзва.
Tattha khaṇḍasīmā sīmākathāyaṃ vuttāva. Upacārasīmā parikkhittassa vihārassa parikkhepena aparikkhittassa parikkhepārahaṭṭhānena paricchinnā hoti. Apica bhikkhūnaṃ dhuvasannipātaṭṭhānato vā pariyante ṭhitabhojanasālato vā nibaddhavasanakaāvāsato vā thāmamajjhimassa purisassa dvinnaṃ leḍḍupātānaṃ anto upacārasīmā veditabbā, sā pana āvāsesu vaḍḍhantesu vaḍḍhati, parihāyantesu parihāyati. Mahāpaccariyaṃ pana ‘‘bhikkhūsupi vaḍḍhantesu vaḍḍhatī’’ti vuttaṃ. Tasmā sace vihāre sannipatitabhikkhūhi saddhiṃ ekābaddhā hutvā yojanasatampi pūretvā nisīdanti, yojanasatampi upacārasīmāva hoti, sabbesaṃ lābho pāpuṇāti. Samānasaṃvāsaavippavāsasīmādvayampi vuttameva.
лаабхасиймаа наама нзва саммаасамб̣уд̣̇д̇хзна анун̃н̃аад̇аа, на д̇хаммасан̇г̇аахагад̇т̇зрзхи табид̇аа; абижа ко рааж̇арааж̇амахаамад̇д̇аа вихаарам̣ гаарзд̇ваа г̇аавуд̇ам̣ ваа ад̣дхаяож̇анам̣ ваа яож̇анам̣ ваа саманд̇ад̇о барижчинд̣̇ид̇ваа ‘‘аяам̣ амхаагам̣ вихаарасса лаабхасиймаа’’д̇и наамаликид̇агз т̇амбхз никан̣ид̇ваа ‘‘яам̣ зд̇т̇анд̇арз уббаж̇ж̇ад̇и, саб̣б̣ам̣ д̇ам̣ амхаагам̣ вихаарасса д̣̇змаа’’д̇и сиймам̣ табзнд̇и, аяам̣ лаабхасиймаа наама. г̇ааманиг̇аманаг̇арааб̣бханд̇арауд̣̇агугкзбасиймааби вуд̇д̇аа зва. ж̇анабад̣̇асиймаа наама – гаасигосаларадтаад̣̇ийнам̣ анд̇о б̣ахуу ж̇анабад̣̇аа хонд̇и, д̇ад̇т̇а згзго ж̇анабад̣̇абарижчзд̣̇о ж̇анабад̣̇асиймаа. радтасиймаа наама гаасигосалаад̣̇ирадтабарижчзд̣̇о. раж̇ж̇асиймаа наама ‘‘жол̣абхог̇о гзрал̣абхог̇о’’д̇и звам̣ згзгасса ран̃н̃о аан̣аабавад̇д̇идтаанам̣. д̣̇ийбасиймаа наама самуд̣̇д̣̇анд̇зна барижчиннамахаад̣̇ийбаа жа анд̇арад̣̇ийбаа жа. жаггаваал̣асиймаа наама жаггаваал̣абаб̣б̣ад̇знзва барижчиннаа.
Lābhasīmā nāma neva sammāsambuddhena anuññātā, na dhammasaṅgāhakattherehi ṭhapitā; apica kho rājarājamahāmattā vihāraṃ kāretvā gāvutaṃ vā aḍḍhayojanaṃ vā yojanaṃ vā samantato paricchinditvā ‘‘ayaṃ amhākaṃ vihārassa lābhasīmā’’ti nāmalikhitake thambhe nikhaṇitvā ‘‘yaṃ etthantare uppajjati, sabbaṃ taṃ amhākaṃ vihārassa demā’’ti sīmaṃ ṭhapenti, ayaṃ lābhasīmā nāma. Gāmanigamanagaraabbhantaraudakukkhepasīmāpi vuttā eva. Janapadasīmā nāma – kāsikosalaraṭṭhādīnaṃ anto bahū janapadā honti, tattha ekeko janapadaparicchedo janapadasīmā. Raṭṭhasīmā nāma kāsikosalādiraṭṭhaparicchedo. Rajjasīmā nāma ‘‘coḷabhogo keraḷabhogo’’ti evaṃ ekekassa rañño āṇāpavattiṭṭhānaṃ. Dīpasīmā nāma samuddantena paricchinnamahādīpā ca antaradīpā ca. Cakkavāḷasīmā nāma cakkavāḷapabbateneva paricchinnā.
звамзд̇аасу сиймаасу кан̣д̣асиймааяа гзнажи гаммзна саннибад̇ид̇ам̣ сан̇гхам̣ д̣̇исваа ‘‘зд̇т̇зва сиймааяа сан̇гхасса д̣̇змий’’д̇и вуд̇д̇з яаавад̇игаа бхигкуу анд̇окан̣д̣асиймаг̇ад̇аа, д̇зхи бхааж̇зд̇аб̣б̣ам̣. д̇зсам̣язва хи д̇ам̣ баабун̣аад̇и. ан̃н̃зсам̣ сийманд̇аригааяа ваа убажаарасиймааяа ваа тид̇аанамби на баабун̣аад̇и. кан̣д̣асиймааяа тид̇з бана ругкз ваа баб̣б̣ад̇з ваа тид̇асса хздтаа ваа бат̇авийвзмаж̇жхаг̇ад̇асса баабун̣аад̇иязва. ‘‘имиссаа убажаарасиймааяа сан̇гхасса д̣̇аммий’’д̇и д̣̇иннам̣ бана кан̣д̣асиймаасийманд̇аригаасу тид̇аанамби баабун̣аад̇и. ‘‘самаанасам̣ваасасиймааяа д̣̇аммий’’д̇и д̣̇иннам̣ бана кан̣д̣асиймаасийманд̇аригаасу тид̇аанам̣ на баабун̣аад̇и. авиббаваасасиймаалаабхасиймаасу д̣̇иннам̣ д̇аасу сиймаасу анд̇ог̇ад̇аанам̣ баабун̣аад̇и. г̇аамасиймаад̣̇ийсу д̣̇иннам̣ д̇аасам̣ сиймаанам̣ аб̣бханд̇арз б̣ад̣̇д̇хасиймааяа тид̇аанамби баабун̣аад̇и. аб̣бханд̇арасиймаауд̣̇агугкзбасиймаасу д̣̇иннам̣ д̇ад̇т̇а анд̇ог̇ад̇аанам̣язва баабун̣аад̇и. ж̇анабад̣̇арадтараж̇ж̇ад̣̇ийбажаггаваал̣асиймаасуби г̇аамасиймаад̣̇ийсу вуд̇д̇асад̣̇исоязва винижчаяо.
Evametāsu sīmāsu khaṇḍasīmāya kenaci kammena sannipatitaṃ saṅghaṃ disvā ‘‘ettheva sīmāya saṅghassa demī’’ti vutte yāvatikā bhikkhū antokhaṇḍasīmagatā, tehi bhājetabbaṃ. Tesaṃyeva hi taṃ pāpuṇāti. Aññesaṃ sīmantarikāya vā upacārasīmāya vā ṭhitānampi na pāpuṇāti. Khaṇḍasīmāya ṭhite pana rukkhe vā pabbate vā ṭhitassa heṭṭhā vā pathavīvemajjhagatassa pāpuṇātiyeva. ‘‘Imissā upacārasīmāya saṅghassa dammī’’ti dinnaṃ pana khaṇḍasīmāsīmantarikāsu ṭhitānampi pāpuṇāti. ‘‘Samānasaṃvāsasīmāya dammī’’ti dinnaṃ pana khaṇḍasīmāsīmantarikāsu ṭhitānaṃ na pāpuṇāti. Avippavāsasīmālābhasīmāsu dinnaṃ tāsu sīmāsu antogatānaṃ pāpuṇāti. Gāmasīmādīsu dinnaṃ tāsaṃ sīmānaṃ abbhantare baddhasīmāya ṭhitānampi pāpuṇāti. Abbhantarasīmāudakukkhepasīmāsu dinnaṃ tattha antogatānaṃyeva pāpuṇāti. Janapadaraṭṭharajjadīpacakkavāḷasīmāsupi gāmasīmādīsu vuttasadisoyeva vinicchayo.
сажз бана ж̇амб̣уд̣̇ийбз тид̇о ‘‘д̇амб̣абан̣н̣ид̣̇ийбз сан̇гхасса д̣̇аммий’’д̇и д̣̇зд̇и, д̇амб̣абан̣н̣ид̣̇ийбад̇о згоби г̇анд̇ваа саб̣б̣зсам̣ г̇ан̣хид̇ум̣ лабхад̇и. сажзби д̇ад̇рзва зго сабхааг̇абхигку сабхааг̇аанам̣ бхааг̇ам̣ г̇ан̣хаад̇и, на ваарзд̇аб̣б̣о. звам̣ д̇аава яо сиймам̣ бараамасид̇ваа д̣̇зд̇и, д̇асса д̣̇аанз винижчаяо взд̣̇ид̇аб̣б̣о.
Sace pana jambudīpe ṭhito ‘‘tambapaṇṇidīpe saṅghassa dammī’’ti deti, tambapaṇṇidīpato ekopi gantvā sabbesaṃ gaṇhituṃ labhati. Sacepi tatreva eko sabhāgabhikkhu sabhāgānaṃ bhāgaṃ gaṇhāti, na vāretabbo. Evaṃ tāva yo sīmaṃ parāmasitvā deti, tassa dāne vinicchayo veditabbo.
яо бана асугасиймааяаад̇и вад̇д̇ум̣ на ж̇аанаад̇и, гзвалам̣ сиймаад̇и важанамад̇д̇амзва ж̇аананд̇о вихаарам̣ г̇анд̇ваа ‘‘сиймааяа д̣̇аммий’’д̇и ваа ‘‘сиймадтагасан̇гхасса д̣̇аммий’’д̇и ваа бхан̣ад̇и, со бужчид̇аб̣б̣о – ‘‘сиймаа наама б̣ахувид̇хаа, гад̇арасиймам̣ санд̇хааяа бхан̣асий’’д̇и ? сажз вад̣̇ад̇и – ‘‘ахам̣ асугасиймаад̇и на ж̇аанаами, сиймадтагасан̇гхо бхааж̇зд̇ваа г̇ан̣хаад̇уу’’д̇и гад̇арасиймааяа бхааж̇зд̇аб̣б̣ам̣? махаасийвад̇т̇зро гирааха – ‘‘авиббаваасасиймааяаа’’д̇и. д̇ад̇о нам̣ аахам̣су – ‘‘авиббаваасасиймаа наама д̇ияож̇анааби ход̇и, звам̣ санд̇з д̇ияож̇анз тид̇аа лаабхам̣ г̇ан̣хиссанд̇и, д̇ияож̇анз тад̇ваа ааг̇анд̇угавад̇д̇ам̣ буурзд̇ваа аараамам̣ бависид̇аб̣б̣ам̣ бхависсад̇и, г̇амиго д̇ияож̇анам̣ г̇анд̇ваа сзнаасанам̣ аабужчиссад̇и, ниссаяабадибаннасса д̇ияож̇анаад̇иггамз ниссаяо бадиббассамбхиссад̇и, баариваасигзна д̇ияож̇анам̣ ад̇иггамид̇ваа арун̣ам̣ удтаабзд̇аб̣б̣ам̣ бхависсад̇и, бхигкунияаа д̇ияож̇анз тад̇ваа аараамаббавзсанам̣ аабужчид̇аб̣б̣ам̣ бхависсад̇и, саб̣б̣амбзд̇ам̣ убажаарасиймааяа барижчзд̣̇авасзнзва гаад̇ум̣ ваддад̇и. д̇асмаа убажаарасиймааяамзва бхааж̇зд̇аб̣б̣а’’нд̇и.
Yo pana asukasīmāyāti vattuṃ na jānāti, kevalaṃ sīmāti vacanamattameva jānanto vihāraṃ gantvā ‘‘sīmāya dammī’’ti vā ‘‘sīmaṭṭhakasaṅghassa dammī’’ti vā bhaṇati, so pucchitabbo – ‘‘sīmā nāma bahuvidhā, katarasīmaṃ sandhāya bhaṇasī’’ti ? Sace vadati – ‘‘ahaṃ asukasīmāti na jānāmi, sīmaṭṭhakasaṅgho bhājetvā gaṇhātū’’ti katarasīmāya bhājetabbaṃ? Mahāsīvatthero kirāha – ‘‘avippavāsasīmāyā’’ti. Tato naṃ āhaṃsu – ‘‘avippavāsasīmā nāma tiyojanāpi hoti, evaṃ sante tiyojane ṭhitā lābhaṃ gaṇhissanti, tiyojane ṭhatvā āgantukavattaṃ pūretvā ārāmaṃ pavisitabbaṃ bhavissati, gamiko tiyojanaṃ gantvā senāsanaṃ āpucchissati, nissayapaṭipannassa tiyojanātikkame nissayo paṭippassambhissati, pārivāsikena tiyojanaṃ atikkamitvā aruṇaṃ uṭṭhāpetabbaṃ bhavissati, bhikkhuniyā tiyojane ṭhatvā ārāmappavesanaṃ āpucchitabbaṃ bhavissati, sabbampetaṃ upacārasīmāya paricchedavaseneva kātuṃ vaṭṭati. Tasmā upacārasīmāyameva bhājetabba’’nti.
гад̇игааяаад̇и самааналаабхагад̇игааяа. д̇знзвааха – ‘‘самб̣ахулаа ааваасаа самааналаабхаа хонд̇ий’’д̇и. д̇ад̇рзвам̣ гад̇игаа гаад̇аб̣б̣аа, згасмим̣ вихаарз саннибад̇ид̇зхи бхигкуухи яам̣ вихаарам̣ сан̇г̇ан̣хид̇угаамаа самааналаабхам̣ гаад̇ум̣ ижчанд̇и, д̇асса наамам̣ г̇ахзд̇ваа асуго наама вихааро бораан̣агод̇и ваа б̣уд̣̇д̇хаад̇хивуд̇т̇од̇и ваа аббалаабход̇и ваа яам̣гин̃жи гааран̣ам̣ вад̇ваа д̇ам̣ вихаарам̣ иминаа вихаарзна сад̣̇д̇хим̣ згалаабхам̣ гаад̇ум̣ сан̇гхасса ружжад̇ийд̇и д̇игкад̇д̇ум̣ саавзд̇аб̣б̣ам̣. зд̇д̇аавад̇аа д̇асмим̣ вихаарз нисинноби ид̇ха нисиннова ход̇и, д̇асмим̣ вихаарзби сан̇гхзна звамзва гаад̇аб̣б̣ам̣. зд̇д̇аавад̇аа ид̇ха нисинноби д̇асмим̣ нисиннова ход̇и. згасмим̣ лаабхз бхааж̇ияамаанз ид̇арасмим̣ тид̇асса бхааг̇ам̣ г̇ахзд̇ум̣ ваддад̇и. звам̣ згзна вихаарзна сад̣̇д̇хим̣ б̣ахууби ааваасаа згалаабхаа гаад̇аб̣б̣аа.
Katikāyāti samānalābhakatikāya. Tenevāha – ‘‘sambahulā āvāsā samānalābhā hontī’’ti. Tatrevaṃ katikā kātabbā, ekasmiṃ vihāre sannipatitehi bhikkhūhi yaṃ vihāraṃ saṅgaṇhitukāmā samānalābhaṃ kātuṃ icchanti, tassa nāmaṃ gahetvā asuko nāma vihāro porāṇakoti vā buddhādhivutthoti vā appalābhoti vā yaṃkiñci kāraṇaṃ vatvā taṃ vihāraṃ iminā vihārena saddhiṃ ekalābhaṃ kātuṃ saṅghassa ruccatīti tikkhattuṃ sāvetabbaṃ. Ettāvatā tasmiṃ vihāre nisinnopi idha nisinnova hoti, tasmiṃ vihārepi saṅghena evameva kātabbaṃ. Ettāvatā idha nisinnopi tasmiṃ nisinnova hoti. Ekasmiṃ lābhe bhājiyamāne itarasmiṃ ṭhitassa bhāgaṃ gahetuṃ vaṭṭati. Evaṃ ekena vihārena saddhiṃ bahūpi āvāsā ekalābhā kātabbā.
бхигкаабан̃н̃ад̇д̇ияаад̇и ад̇д̇ано барижжааг̇абан̃н̃аабанадтаанз. д̇знзвааха – ‘‘яад̇т̇а сан̇гхасса д̇хувагаараа гарияанд̇ий’’д̇и. д̇ассад̇т̇о – яасмим̣ вихаарз имасса жийварад̣̇ааяагасса санд̇агам̣ сан̇гхасса баагаваддам̣ ваа вад̇д̇ад̇и, яасмим̣ ваа вихаарз бхигкуу ад̇д̇ано бхаарам̣ гад̇ваа сад̣̇аа г̇зхз бхож̇зд̇и, яад̇т̇а ваа анзна ааваасо гаарид̇о, салаагабхад̇д̇аад̣̇ийни ваа ниб̣ад̣̇д̇хаани, язна бана сагалоби вихааро бад̇идтаабид̇о, д̇ад̇т̇а вад̇д̇аб̣б̣амзва над̇т̇и, имз д̇хувагаараа наама. д̇асмаа сажз со ‘‘яад̇т̇а маяхам̣ д̇хувагаараа гарийяанд̇и, д̇ад̇т̇а д̣̇аммий’’д̇и ваа ‘‘д̇ад̇т̇а д̣̇зт̇аа’’д̇и ваа бхан̣ад̇и, б̣ахуусу жзби таанзсу д̇хувагаараа хонд̇и, саб̣б̣ад̇т̇а д̣̇иннамзва ход̇и.
Bhikkhāpaññattiyāti attano pariccāgapaññāpanaṭṭhāne. Tenevāha – ‘‘yattha saṅghassa dhuvakārā kariyantī’’ti. Tassattho – yasmiṃ vihāre imassa cīvaradāyakassa santakaṃ saṅghassa pākavaṭṭaṃ vā vattati, yasmiṃ vā vihāre bhikkhū attano bhāraṃ katvā sadā gehe bhojeti, yattha vā anena āvāso kārito, salākabhattādīni vā nibaddhāni, yena pana sakalopi vihāro patiṭṭhāpito, tattha vattabbameva natthi, ime dhuvakārā nāma. Tasmā sace so ‘‘yattha mayhaṃ dhuvakārā karīyanti, tattha dammī’’ti vā ‘‘tattha dethā’’ti vā bhaṇati, bahūsu cepi ṭhānesu dhuvakārā honti, sabbattha dinnameva hoti.
сажз бана згасмим̣ вихаарз бхигкуу б̣ахуд̇араа хонд̇и, д̇зхи вад̇д̇аб̣б̣ам̣ – ‘‘д̇умхаагам̣ д̇хувагаарз згад̇т̇а бхигкуу б̣ахуу згад̇т̇а аббагаа’’д̇и. сажз ‘‘бхигкуг̇ан̣анааяа г̇ан̣хат̇аа’’д̇и бхан̣ад̇и, д̇ат̇аа бхааж̇зд̇ваа г̇ан̣хид̇ум̣ ваддад̇и. зд̇т̇а жа вад̇т̇абхзсаж̇ж̇аад̣̇и аббагамби сукзна бхааж̇ияад̇и. яад̣̇и бана ман̃жо ваа бийтагам̣ ваа згамзва ход̇и, д̇ам̣ бужчид̇ваа яасса ваа вихаарасса згавихаарзби ваа яасса сзнаасанасса со вижаарзд̇и, д̇ад̇т̇а д̣̇аад̇аб̣б̣ам̣. сажз ‘‘асугабхигку г̇ан̣хаад̇уу’’д̇и вад̣̇ад̇и, ваддад̇и. ат̇а ‘‘маяхам̣ д̇хувагаарз д̣̇зт̇аа’’д̇и вад̇ваа авижаарзд̇ваава г̇ажчад̇и, сан̇гхассааби вижаарзд̇ум̣ ваддад̇и. звам̣ бана вижаарзд̇аб̣б̣ам̣ – ‘‘сан̇гхад̇т̇зрасса васанадтаанз д̣̇зт̇аа’’д̇и вад̇д̇аб̣б̣ам̣. сажз д̇асса сзнаасанам̣ барибун̣н̣ам̣ ход̇и, яад̇т̇а наббаход̇и, д̇ад̇т̇а д̣̇аад̇аб̣б̣ам̣. сажз зго бхигку ‘‘маяхам̣ васанадтаанз сзнаасанабарибхог̇абхан̣д̣ам̣ над̇т̇ий’’д̇и вад̣̇ад̇и, д̇ад̇т̇а д̣̇аад̇аб̣б̣ам̣.
Sace pana ekasmiṃ vihāre bhikkhū bahutarā honti, tehi vattabbaṃ – ‘‘tumhākaṃ dhuvakāre ekattha bhikkhū bahū ekattha appakā’’ti. Sace ‘‘bhikkhugaṇanāya gaṇhathā’’ti bhaṇati, tathā bhājetvā gaṇhituṃ vaṭṭati. Ettha ca vatthabhesajjādi appakampi sukhena bhājiyati. Yadi pana mañco vā pīṭhakaṃ vā ekameva hoti, taṃ pucchitvā yassa vā vihārassa ekavihārepi vā yassa senāsanassa so vicāreti, tattha dātabbaṃ. Sace ‘‘asukabhikkhu gaṇhātū’’ti vadati, vaṭṭati. Atha ‘‘mayhaṃ dhuvakāre dethā’’ti vatvā avicāretvāva gacchati, saṅghassāpi vicāretuṃ vaṭṭati. Evaṃ pana vicāretabbaṃ – ‘‘saṅghattherassa vasanaṭṭhāne dethā’’ti vattabbaṃ. Sace tassa senāsanaṃ paripuṇṇaṃ hoti, yattha nappahoti, tattha dātabbaṃ. Sace eko bhikkhu ‘‘mayhaṃ vasanaṭṭhāne senāsanaparibhogabhaṇḍaṃ natthī’’ti vadati, tattha dātabbaṃ.
сан̇гхасса д̣̇зд̇ийд̇и вихаарам̣ бависид̇ваа ‘‘имаани жийвараани сан̇гхасса д̣̇аммий’’д̇и д̣̇зд̇и. саммукийбхууд̇знаад̇и убажаарасиймааяа тид̇зна сан̇гхзна гхан̣дим̣ бахарид̇ваа гаалам̣ гхосзд̇ваа бхааж̇зд̇аб̣б̣ам̣. сиймадтасса асамбад̇д̇ассааби бхааг̇ам̣ г̇ан̣ханд̇о на ваарзд̇аб̣б̣о. вихааро махаа ход̇и, т̇зраасанад̇о бадтааяа вад̇т̇зсу д̣̇ияяамаанзсу аласаж̇аад̇игаа махаат̇зраа бажчаа ааг̇ажчанд̇и, ‘‘бханд̇з вийсад̇ивассаанам̣ д̣̇ияяад̇и, д̇умхаагам̣ тид̇игаа ад̇игганд̇аа’’д̇и на вад̇д̇аб̣б̣аа, тид̇игам̣ табзд̇ваа д̇зсам̣ д̣̇ад̇ваа бажчаа тид̇игааяа д̣̇аад̇аб̣б̣ам̣.
Saṅghassa detīti vihāraṃ pavisitvā ‘‘imāni cīvarāni saṅghassa dammī’’ti deti. Sammukhībhūtenāti upacārasīmāya ṭhitena saṅghena ghaṇṭiṃ paharitvā kālaṃ ghosetvā bhājetabbaṃ. Sīmaṭṭhassa asampattassāpi bhāgaṃ gaṇhanto na vāretabbo. Vihāro mahā hoti, therāsanato paṭṭhāya vatthesu diyyamānesu alasajātikā mahātherā pacchā āgacchanti, ‘‘bhante vīsativassānaṃ diyyati, tumhākaṃ ṭhitikā atikkantā’’ti na vattabbā, ṭhitikaṃ ṭhapetvā tesaṃ datvā pacchā ṭhitikāya dātabbaṃ.
асугавихаарз гира б̣ахум̣ жийварам̣ уббаннанд̇и суд̇ваа яож̇ананд̇аригавихаарад̇оби бхигкуу ааг̇ажчанд̇и, самбад̇д̇асамбад̇д̇аанам̣ тид̇адтаанад̇о бадтааяа д̣̇аад̇аб̣б̣ам̣. асамбад̇д̇аанамби убажаарасиймам̣ бавидтаанам̣ анд̇зваасигаад̣̇ийсу г̇ан̣ханд̇зсу д̣̇аад̇аб̣б̣амзва. ‘‘б̣ахиубажаарасиймааяа тид̇аанам̣ д̣̇зт̇аа’’д̇и вад̣̇анд̇и, на д̣̇аад̇аб̣б̣ам̣. сажз бана убажаарасиймам̣ огганд̇зхи згааб̣ад̣̇д̇хаа худ̇ваа ад̇д̇ано вихаарад̣̇ваарз ваа анд̇овихаарзязва ваа хонд̇и, барисавасзна вад̣дхид̇аа наама ход̇и сиймаа , д̇асмаа д̣̇аад̇аб̣б̣ам̣. сан̇гханавагасса д̣̇иннзби бажчаа ааг̇ад̇аанам̣ д̣̇аад̇аб̣б̣амзва. д̣̇уд̇ияабхааг̇з бана т̇зраасанам̣ аарул̣хз ааг̇ад̇аанам̣ батамабхааг̇о на баабун̣аад̇и, д̣̇уд̇ияабхааг̇ад̇о вассаг̇г̇зна д̣̇аад̇аб̣б̣ам̣.
Asukavihāre kira bahuṃ cīvaraṃ uppannanti sutvā yojanantarikavihāratopi bhikkhū āgacchanti, sampattasampattānaṃ ṭhitaṭṭhānato paṭṭhāya dātabbaṃ. Asampattānampi upacārasīmaṃ paviṭṭhānaṃ antevāsikādīsu gaṇhantesu dātabbameva. ‘‘Bahiupacārasīmāya ṭhitānaṃ dethā’’ti vadanti, na dātabbaṃ. Sace pana upacārasīmaṃ okkantehi ekābaddhā hutvā attano vihāradvāre vā antovihāreyeva vā honti, parisavasena vaḍḍhitā nāma hoti sīmā , tasmā dātabbaṃ. Saṅghanavakassa dinnepi pacchā āgatānaṃ dātabbameva. Dutiyabhāge pana therāsanaṃ āruḷhe āgatānaṃ paṭhamabhāgo na pāpuṇāti, dutiyabhāgato vassaggena dātabbaṃ.
згасмим̣ вихаарз д̣̇аса бхигкуу хонд̇и, ‘‘д̣̇аса вад̇т̇аани сан̇гхасса д̣̇змаа’’д̇и д̣̇знд̇и, баадзггам̣ бхааж̇зд̇аб̣б̣аани . сажз ‘‘саб̣б̣аанзва амхаагам̣ баабун̣анд̇ий’’д̇и г̇ахзд̇ваа г̇ажчанд̇и, д̣̇уббаабид̇аани жзва д̣̇уг̇г̇ахид̇аани жа г̇ад̇аг̇ад̇адтаанз сан̇гхигаанзва хонд̇и. згам̣ бана уд̣̇д̇харид̇ваа ‘‘ид̣̇ам̣ д̇умхаагам̣ баабун̣аад̇ий’’д̇и сан̇гхад̇т̇зрасса д̣̇ад̇ваа ‘‘сзсаани амхаагам̣ баабун̣анд̇ий’’д̇и г̇ахзд̇ум̣ ваддад̇и.
Ekasmiṃ vihāre dasa bhikkhū honti, ‘‘dasa vatthāni saṅghassa demā’’ti denti, pāṭekkaṃ bhājetabbāni . Sace ‘‘sabbāneva amhākaṃ pāpuṇantī’’ti gahetvā gacchanti, duppāpitāni ceva duggahitāni ca gatagataṭṭhāne saṅghikāneva honti. Ekaṃ pana uddharitvā ‘‘idaṃ tumhākaṃ pāpuṇātī’’ti saṅghattherassa datvā ‘‘sesāni amhākaṃ pāpuṇantī’’ti gahetuṃ vaṭṭati.
згамзва вад̇т̇ам̣ сан̇гхасса д̣̇змаад̇и аахаранд̇и, абхааж̇зд̇ваава амхаагам̣ баабун̣анд̇ийд̇и г̇ан̣ханд̇и, д̣̇уббаабид̇ан̃жзва д̣̇уг̇г̇ахид̇ан̃жа. сад̇т̇агзна бана халид̣̇д̣̇иаад̣̇инаа ваа лзкам̣ гад̇ваа згам̣ годтаасам̣ ‘‘имам̣ таанам̣ д̇умхаагам̣ баабун̣аад̇ий’’д̇и сан̇гхад̇т̇зрасса баабзд̇ваа ‘‘сзсам̣ амхаагам̣ баабун̣аад̇ий’’д̇и г̇ахзд̇ум̣ ваддад̇и. яам̣ бана вад̇т̇ассзва бубпам̣ ваа вали ваа, д̇зна барижчзд̣̇ам̣ гаад̇ум̣ на ваддад̇и. сажз згам̣ д̇анд̇ам̣ уд̣̇д̇харид̇ваа ‘‘ид̣̇ам̣ таанам̣ д̇умхаагам̣ баабун̣аад̇ий’’д̇и сан̇гхад̇т̇зрасса д̣̇ад̇ваа ‘‘сзсам̣ амхаагам̣ баабун̣аад̇ий’’д̇и г̇ан̣ханд̇и, ваддад̇и. кан̣д̣ам̣ кан̣д̣ам̣ чинд̣̇ид̇ваа бхааж̇ияамаанам̣ ваддад̇иязва.
Ekameva vatthaṃ saṅghassa demāti āharanti, abhājetvāva amhākaṃ pāpuṇantīti gaṇhanti, duppāpitañceva duggahitañca. Satthakena pana haliddiādinā vā lekhaṃ katvā ekaṃ koṭṭhāsaṃ ‘‘imaṃ ṭhānaṃ tumhākaṃ pāpuṇātī’’ti saṅghattherassa pāpetvā ‘‘sesaṃ amhākaṃ pāpuṇātī’’ti gahetuṃ vaṭṭati. Yaṃ pana vatthasseva pupphaṃ vā vali vā, tena paricchedaṃ kātuṃ na vaṭṭati. Sace ekaṃ tantaṃ uddharitvā ‘‘idaṃ ṭhānaṃ tumhākaṃ pāpuṇātī’’ti saṅghattherassa datvā ‘‘sesaṃ amhākaṃ pāpuṇātī’’ti gaṇhanti, vaṭṭati. Khaṇḍaṃ khaṇḍaṃ chinditvā bhājiyamānaṃ vaṭṭatiyeva.
згабхигкугз вихаарз сан̇гхасса жийварзсу уббаннзсу сажз буб̣б̣з вуд̇д̇анаязнзва со бхигку ‘‘саб̣б̣аани маяхам̣ баабун̣анд̇ий’’д̇и г̇ан̣хаад̇и, суг̇г̇ахид̇аани, тид̇игаа бана на д̇идтад̇и. сажз згзгам̣ уд̣̇д̇харид̇ваа ‘‘ид̣̇ам̣ маяхам̣ баабун̣аад̇ий’’д̇и г̇ан̣хаад̇и, тид̇игаа д̇идтад̇и. д̇ад̇т̇а адтид̇ааяа тид̇игааяа буна ан̃н̃асмим̣ жийварз уббаннз сажз зго бхигку ааг̇ажчад̇и, маж̇жхз чинд̣̇ид̇ваа д̣̇вийхиби г̇ахзд̇аб̣б̣ам̣. тид̇ааяа тид̇игааяа буна ан̃н̃асмим̣ жийварз уббаннз сажз навагад̇аро ааг̇ажчад̇и, тид̇игаа хздтаа орохад̇и. сажз вуд̣дхад̇аро ааг̇ажчад̇и, тид̇игаа уд̣̇д̇хам̣ аарохад̇и. ат̇ан̃н̃о над̇т̇и, буна ад̇д̇ано баабзд̇ваа г̇ахзд̇аб̣б̣ам̣.
Ekabhikkhuke vihāre saṅghassa cīvaresu uppannesu sace pubbe vuttanayeneva so bhikkhu ‘‘sabbāni mayhaṃ pāpuṇantī’’ti gaṇhāti, suggahitāni, ṭhitikā pana na tiṭṭhati. Sace ekekaṃ uddharitvā ‘‘idaṃ mayhaṃ pāpuṇātī’’ti gaṇhāti, ṭhitikā tiṭṭhati. Tattha aṭṭhitāya ṭhitikāya puna aññasmiṃ cīvare uppanne sace eko bhikkhu āgacchati, majjhe chinditvā dvīhipi gahetabbaṃ. Ṭhitāya ṭhitikāya puna aññasmiṃ cīvare uppanne sace navakataro āgacchati, ṭhitikā heṭṭhā orohati. Sace vuḍḍhataro āgacchati, ṭhitikā uddhaṃ ārohati. Athañño natthi, puna attano pāpetvā gahetabbaṃ.
‘‘сан̇гхасса д̣̇змаа’’д̇и ваа ‘‘бхигкусан̇гхасса д̣̇змаа’’д̇и ваа язна гзнажи аагаарзна сан̇гхам̣ аамасид̇ваа д̣̇иннам̣ бана бам̣сугуулигаанам̣ на ваддад̇и, ‘‘г̇ахабад̇ижийварам̣ бадигкибаами бам̣сугуулиган̇г̇ам̣ самаад̣̇ияаамий’’д̇и вуд̇д̇ад̇д̇аа, на бана агаббияад̇д̇аа . бхигкусан̇гхзна абалогзд̇ваа д̣̇иннамби на г̇ахзд̇аб̣б̣ам̣. яам̣ бана бхигку ад̇д̇ано санд̇агам̣ д̣̇зд̇и, д̇ам̣ бхигкуд̣̇ад̇д̇ияам̣ наама ваддад̇и, бам̣сугуулам̣ бана на ход̇и. звам̣ санд̇зби д̇худ̇ан̇г̇ам̣ на бхиж̇ж̇ад̇и. ‘‘бхигкуунам̣ д̣̇зма, т̇зраанам̣ д̣̇змаа’’д̇и вуд̇д̇з бана бам̣сугуулигаанамби ваддад̇и. ‘‘ид̣̇ам̣ вад̇т̇ам̣ сан̇гхасса д̣̇зма, иминаа убааханад̇т̇авигабад̇д̇ад̇т̇авигаааяог̇аам̣саб̣ад̣̇д̇хагаад̣̇ийни гаронд̇уу’’д̇и д̣̇иннамби ваддад̇и.
‘‘Saṅghassa demā’’ti vā ‘‘bhikkhusaṅghassa demā’’ti vā yena kenaci ākārena saṅghaṃ āmasitvā dinnaṃ pana paṃsukūlikānaṃ na vaṭṭati, ‘‘gahapaticīvaraṃ paṭikkhipāmi paṃsukūlikaṅgaṃ samādiyāmī’’ti vuttattā, na pana akappiyattā . Bhikkhusaṅghena apaloketvā dinnampi na gahetabbaṃ. Yaṃ pana bhikkhu attano santakaṃ deti, taṃ bhikkhudattiyaṃ nāma vaṭṭati, paṃsukūlaṃ pana na hoti. Evaṃ santepi dhutaṅgaṃ na bhijjati. ‘‘Bhikkhūnaṃ dema, therānaṃ demā’’ti vutte pana paṃsukūlikānampi vaṭṭati. ‘‘Idaṃ vatthaṃ saṅghassa dema, iminā upāhanatthavikapattatthavikaāyogaaṃsabaddhakādīni karontū’’ti dinnampi vaṭṭati.
бад̇д̇ад̇т̇авигаад̣̇ийнам̣ ад̇т̇ааяа д̣̇иннаани б̣ахууниби хонд̇и, жийварад̇т̇ааяаби бахонд̇и, д̇ад̇о жийварам̣ гад̇ваа баарубид̇ум̣ ваддад̇и. сажз бана сан̇гхо бхааж̇ид̇аад̇ирид̇д̇аани вад̇т̇аани чинд̣̇ид̇ваа убааханад̇т̇авигаад̣̇ийнам̣ ад̇т̇ааяа бхааж̇зд̇и, д̇ад̇о г̇ахзд̇ум̣ на ваддад̇и. саамигзхи вижаарид̇амзва хи ваддад̇и, на ид̇арам̣.
Pattatthavikādīnaṃ atthāya dinnāni bahūnipi honti, cīvaratthāyapi pahonti, tato cīvaraṃ katvā pārupituṃ vaṭṭati. Sace pana saṅgho bhājitātirittāni vatthāni chinditvā upāhanatthavikādīnaṃ atthāya bhājeti, tato gahetuṃ na vaṭṭati. Sāmikehi vicāritameva hi vaṭṭati, na itaraṃ.
‘‘бам̣сугуулигасан̇гхасса д̇хамагаран̣абадаад̣̇ийнам̣ ад̇т̇ааяа д̣̇змаа’’д̇и вуд̇д̇зби г̇ахзд̇ум̣ ваддад̇и, баригкааро наама бам̣сугуулигаанамби ижчид̇аб̣б̣о. яам̣ д̇ад̇т̇а ад̇ирзгам̣ ход̇и, д̇ам̣ жийварзби убанзд̇ум̣ ваддад̇и. суд̇д̇ам̣ сан̇гхасса д̣̇знд̇и, бам̣сугуулигзхиби г̇ахзд̇аб̣б̣ам̣. аяам̣ д̇аава вихаарам̣ бависид̇ваа ‘‘имаани жийвараани сан̇гхасса д̣̇аммий’’д̇и д̣̇иннзсу винижчаяо.
‘‘Paṃsukūlikasaṅghassa dhamakaraṇapaṭādīnaṃ atthāya demā’’ti vuttepi gahetuṃ vaṭṭati, parikkhāro nāma paṃsukūlikānampi icchitabbo. Yaṃ tattha atirekaṃ hoti, taṃ cīvarepi upanetuṃ vaṭṭati. Suttaṃ saṅghassa denti, paṃsukūlikehipi gahetabbaṃ. Ayaṃ tāva vihāraṃ pavisitvā ‘‘imāni cīvarāni saṅghassa dammī’’ti dinnesu vinicchayo.
сажз бана б̣ахиубажаарасиймааяам̣ ад̣̇д̇хаанаббадибаннз бхигкуу д̣̇исваа ‘‘сан̇гхасса д̣̇аммий’’д̇и сан̇гхад̇т̇зрасса ваа сан̇гханавагасса ваа аарожзд̇и, сажзби яож̇анам̣ парид̇ваа барисаа тид̇аа ход̇и, згаб̣ад̣̇д̇хаа жз, саб̣б̣зсам̣ баабун̣аад̇и. яз бана д̣̇ваад̣̇асахи хад̇т̇зхи барисам̣ асамбад̇д̇аа, д̇зсам̣ на баабун̣аад̇и.
Sace pana bahiupacārasīmāyaṃ addhānappaṭipanne bhikkhū disvā ‘‘saṅghassa dammī’’ti saṅghattherassa vā saṅghanavakassa vā āroceti, sacepi yojanaṃ pharitvā parisā ṭhitā hoti, ekabaddhā ce, sabbesaṃ pāpuṇāti. Ye pana dvādasahi hatthehi parisaṃ asampattā, tesaṃ na pāpuṇāti.
убхад̇осан̇гхасса д̣̇зд̇ийд̇и зд̇т̇а ‘‘убхад̇осан̇гхасса д̣̇аммий’’д̇и вуд̇д̇зби ‘‘д̣̇вид̇хаа сан̇гхасса д̣̇амми, д̣̇виннам̣ сан̇гхаанам̣ д̣̇амми, бхигкусан̇гхасса жа бхигкунисан̇гхасса жа д̣̇аммий’’д̇и вуд̇д̇зби убхад̇осан̇гхасса д̣̇иннамзва ход̇и. убад̣дхам̣ д̣̇аад̇аб̣б̣анд̇и д̣̇взбхааг̇з самз гад̇ваа зго д̣̇аад̇аб̣б̣о. ‘‘убхад̇осан̇гхасса жа д̇уяхан̃жа д̣̇аммий’’д̇и вуд̇д̇з сажз д̣̇аса д̣̇аса бхигкуу жа бхигкунияо жа хонд̇и, згавийсад̇и бадивийсз гад̇ваа зго буг̇г̇аласса д̣̇аад̇аб̣б̣о, д̣̇аса бхигкусан̇гхасса, д̣̇аса бхигкунисан̇гхасса язна буг̇г̇алиго лад̣̇д̇хо со сан̇гхад̇оби ад̇д̇ано вассаг̇г̇зна г̇ахзд̇ум̣ лабхад̇и. гасмаа? убхад̇осан̇гхаг̇г̇ахан̣зна г̇ахид̇ад̇д̇аа.
Ubhatosaṅghassa detīti ettha ‘‘ubhatosaṅghassa dammī’’ti vuttepi ‘‘dvidhā saṅghassa dammi, dvinnaṃ saṅghānaṃ dammi, bhikkhusaṅghassa ca bhikkhunisaṅghassa ca dammī’’ti vuttepi ubhatosaṅghassa dinnameva hoti. Upaḍḍhaṃ dātabbanti dvebhāge same katvā eko dātabbo. ‘‘Ubhatosaṅghassa ca tuyhañca dammī’’ti vutte sace dasa dasa bhikkhū ca bhikkhuniyo ca honti, ekavīsati paṭivīse katvā eko puggalassa dātabbo, dasa bhikkhusaṅghassa, dasa bhikkhunisaṅghassa yena puggaliko laddho so saṅghatopi attano vassaggena gahetuṃ labhati. Kasmā? Ubhatosaṅghaggahaṇena gahitattā.
‘‘убхад̇осан̇гхасса жа жзд̇ияасса жа д̣̇аммий’’д̇и вуд̇д̇зби зсзва наяо. ид̇ха бана жзд̇ияасса сан̇гхад̇о баабун̣анагодтаасо наама над̇т̇и, згабуг̇г̇аласса бад̇д̇агодтаасасамова годтаасо ход̇и.
‘‘Ubhatosaṅghassa ca cetiyassa ca dammī’’ti vuttepi eseva nayo. Idha pana cetiyassa saṅghato pāpuṇanakoṭṭhāso nāma natthi, ekapuggalassa pattakoṭṭhāsasamova koṭṭhāso hoti.
‘‘убхад̇осан̇гхасса жа д̇уяхан̃жа жзд̇ияасса жаа’’д̇и вуд̇д̇з бана д̣̇ваавийсад̇и годтаасз гад̇ваа д̣̇аса бхигкуунам̣, д̣̇аса бхигкунийнам̣, зго буг̇г̇аласса, зго жзд̇ияасса д̣̇аад̇аб̣б̣о. д̇ад̇т̇а буг̇г̇ало сан̇гхад̇оби ад̇д̇ано вассаг̇г̇зна буна г̇ахзд̇ум̣ лабхад̇и, жзд̇ияасса згоязва.
‘‘Ubhatosaṅghassa ca tuyhañca cetiyassa cā’’ti vutte pana dvāvīsati koṭṭhāse katvā dasa bhikkhūnaṃ, dasa bhikkhunīnaṃ, eko puggalassa, eko cetiyassa dātabbo. Tattha puggalo saṅghatopi attano vassaggena puna gahetuṃ labhati, cetiyassa ekoyeva.
‘‘бхигкусан̇гхасса жа бхигкунийнан̃жа д̣̇аммий’’д̇и вуд̇д̇з бана на маж̇жхз бхинд̣̇ид̇ваа д̣̇аад̇аб̣б̣ам̣, бхигкуу жа бхигкунияо жа г̇ан̣зд̇ваа д̣̇аад̇аб̣б̣ам̣. ‘‘бхигкусан̇гхасса жа бхигкунийнан̃жа д̇уяхан̃жаа’’д̇и вуд̇д̇з бана буг̇г̇ало висум̣ на лабхад̇и, баабун̣анадтаанад̇о згамзва лабхад̇и. гасмаа? бхигкусан̇гхаг̇г̇ахан̣зна г̇ахид̇ад̇д̇аа. ‘‘бхигкусан̇гхасса жа бхигкунийнан̃жа д̇уяхан̃жа жзд̇ияасса жаа’’д̇и вуд̇д̇зби жзд̇ияасса згабуг̇г̇алабадивийсо лаб̣бхад̇и, буг̇г̇аласса висум̣ на лаб̣бхад̇и, д̇асмаа згам̣ жзд̇ияасса д̣̇ад̇ваа авасзсам̣ бхигкуу жа бхигкунияо жа г̇ан̣зд̇ваа бхааж̇зд̇аб̣б̣ам̣.
‘‘Bhikkhusaṅghassa ca bhikkhunīnañca dammī’’ti vutte pana na majjhe bhinditvā dātabbaṃ, bhikkhū ca bhikkhuniyo ca gaṇetvā dātabbaṃ. ‘‘Bhikkhusaṅghassa ca bhikkhunīnañca tuyhañcā’’ti vutte pana puggalo visuṃ na labhati, pāpuṇanaṭṭhānato ekameva labhati. Kasmā? Bhikkhusaṅghaggahaṇena gahitattā. ‘‘Bhikkhusaṅghassa ca bhikkhunīnañca tuyhañca cetiyassa cā’’ti vuttepi cetiyassa ekapuggalapaṭivīso labbhati, puggalassa visuṃ na labbhati, tasmā ekaṃ cetiyassa datvā avasesaṃ bhikkhū ca bhikkhuniyo ca gaṇetvā bhājetabbaṃ.
‘‘бхигкуунан̃жа бхигкунийнан̃жа д̣̇аммий’’д̇и вуд̇д̇зби маж̇жхз бхинд̣̇ид̇ваа на д̣̇аад̇аб̣б̣ам̣, буг̇г̇алаг̇ан̣анааяа зва вибхаж̇ид̇аб̣б̣ам̣. ‘‘бхигкуунан̃жа бхигкунийнан̃жа д̇уяхан̃жа жзд̇ияасса жаа’’д̇и звам̣ вуд̇д̇зби жзд̇ияасса згабуг̇г̇алабадивийсо лаб̣бхад̇и, буг̇г̇аласса висум̣ над̇т̇и, бхигкуу жа бхигкунияо жа г̇ан̣зд̇ваа зва бхааж̇зд̇аб̣б̣ам̣. яат̇аа жа бхигкусан̇гхам̣ аад̣̇им̣ гад̇ваа наяо нийд̇о, звам̣ бхигкунисан̇гхам̣ аад̣̇им̣ гад̇вааби нзд̇аб̣б̣о. ‘‘бхигкусан̇гхасса жа д̇уяхан̃жаа’’д̇и вуд̇д̇з буг̇г̇аласса висум̣ на лаб̣бхад̇и, вассаг̇г̇знзва г̇ахзд̇аб̣б̣ам̣. ‘‘бхигкусан̇гхасса жа жзд̇ияасса жаа’’д̇и вуд̇д̇з бана жзд̇ияасса висум̣ бадивийсо лаб̣бхад̇и. ‘‘бхигкусан̇гхасса жа д̇уяхан̃жа жзд̇ияасса жаа’’д̇и вуд̇д̇зби жзд̇ияассзва лаб̣бхад̇и, на буг̇г̇аласса.
‘‘Bhikkhūnañca bhikkhunīnañca dammī’’ti vuttepi majjhe bhinditvā na dātabbaṃ, puggalagaṇanāya eva vibhajitabbaṃ. ‘‘Bhikkhūnañca bhikkhunīnañca tuyhañca cetiyassa cā’’ti evaṃ vuttepi cetiyassa ekapuggalapaṭivīso labbhati, puggalassa visuṃ natthi, bhikkhū ca bhikkhuniyo ca gaṇetvā eva bhājetabbaṃ. Yathā ca bhikkhusaṅghaṃ ādiṃ katvā nayo nīto, evaṃ bhikkhunisaṅghaṃ ādiṃ katvāpi netabbo. ‘‘Bhikkhusaṅghassa ca tuyhañcā’’ti vutte puggalassa visuṃ na labbhati, vassaggeneva gahetabbaṃ. ‘‘Bhikkhusaṅghassa ca cetiyassa cā’’ti vutte pana cetiyassa visuṃ paṭivīso labbhati. ‘‘Bhikkhusaṅghassa ca tuyhañca cetiyassa cā’’ti vuttepi cetiyasseva labbhati, na puggalassa.
‘‘бхигкуунан̃жа д̇уяхан̃жаа’’д̇и вуд̇д̇зби висум̣ на лаб̣бхад̇и. ‘‘бхигкуунан̃жа жзд̇ияасса жаа’’д̇и вуд̇д̇з бана жзд̇ияасса лаб̣бхад̇и. ‘‘бхигкуунан̃жа д̇уяхан̃жа жзд̇ияасса жаа’’д̇и вуд̇д̇зби жзд̇ияассзва висум̣ лаб̣бхад̇и, на буг̇г̇аласса. бхигкунисан̇гхам̣ аад̣̇им̣ гад̇вааби звамзва яож̇зд̇аб̣б̣ам̣.
‘‘Bhikkhūnañca tuyhañcā’’ti vuttepi visuṃ na labbhati. ‘‘Bhikkhūnañca cetiyassa cā’’ti vutte pana cetiyassa labbhati. ‘‘Bhikkhūnañca tuyhañca cetiyassa cā’’ti vuttepi cetiyasseva visuṃ labbhati, na puggalassa. Bhikkhunisaṅghaṃ ādiṃ katvāpi evameva yojetabbaṃ.
буб̣б̣з б̣уд̣̇д̇хаббамукасса убхад̇осан̇гхасса д̣̇аанам̣ д̣̇знд̇и, бхаг̇аваа маж̇жхз нисийд̣̇ад̇и, д̣̇агкин̣ад̇о бхигкуу ваамад̇о бхигкунияо нисийд̣̇анд̇и, бхаг̇аваа убхиннам̣ сан̇гхад̇т̇зро , д̇ад̣̇аа бхаг̇аваа ад̇д̇анаа лад̣̇д̇хабажжаяз ад̇д̇анааби барибхун̃ж̇ад̇и, бхигкуунамби д̣̇аабзд̇и. зд̇арахи бана бан̣д̣ид̇амануссаа сад̇хаад̇угам̣ бадимам̣ ваа жзд̇ияам̣ ваа табзд̇ваа б̣уд̣̇д̇хаббамукасса убхад̇осан̇гхасса д̣̇аанам̣ д̣̇знд̇и. бадимааяа ваа жзд̇ияасса ваа бурад̇о аад̇хаарагз бад̇д̇ам̣ табзд̇ваа д̣̇агкин̣од̣̇агам̣ д̣̇ад̇ваа б̣уд̣̇д̇хаанам̣ д̣̇змаад̇и, д̇ад̇т̇а яам̣ батамам̣ каад̣̇анийяам̣ бхож̇анийяам̣ д̣̇знд̇и, вихаарам̣ ваа аахарид̇ваа ид̣̇ам̣ жзд̇ияасса д̣̇змаад̇и бин̣д̣абаад̇ан̃жа маалааг̇анд̇хаад̣̇ийни жа д̣̇знд̇и, д̇ад̇т̇а гат̇ам̣ бадибаж̇ж̇ид̇аб̣б̣анд̇и? маалааг̇анд̇хаад̣̇ийни д̇аава жзд̇ияз ааробзд̇аб̣б̣аани, вад̇т̇зхи бадаагаа, д̇злзна бад̣̇ийбаа гаад̇аб̣б̣аа, бин̣д̣абаад̇амад̇хупаан̣ид̇аад̣̇ийни бана яо ниб̣ад̣̇д̇хажзд̇ияаж̇аг̇г̇аго ход̇и баб̣б̣аж̇ид̇о ваа г̇ахадто ваа, д̇ассзва д̣̇аад̇аб̣б̣аани. ниб̣ад̣̇д̇хаж̇аг̇г̇агз асад̇и аахадабхад̇д̇ам̣ табзд̇ваа вад̇д̇ам̣ гад̇ваа барибхун̃ж̇ид̇ум̣ ваддад̇и. убагадтз гаалз бхун̃ж̇ид̇ваа бажчааби вад̇д̇ам̣ гаад̇ум̣ ваддад̇иязва.
Pubbe buddhappamukhassa ubhatosaṅghassa dānaṃ denti, bhagavā majjhe nisīdati, dakkhiṇato bhikkhū vāmato bhikkhuniyo nisīdanti, bhagavā ubhinnaṃ saṅghatthero , tadā bhagavā attanā laddhapaccaye attanāpi paribhuñjati, bhikkhūnampi dāpeti. Etarahi pana paṇḍitamanussā sadhātukaṃ paṭimaṃ vā cetiyaṃ vā ṭhapetvā buddhappamukhassa ubhatosaṅghassa dānaṃ denti. Paṭimāya vā cetiyassa vā purato ādhārake pattaṃ ṭhapetvā dakkhiṇodakaṃ datvā buddhānaṃ demāti, tattha yaṃ paṭhamaṃ khādanīyaṃ bhojanīyaṃ denti, vihāraṃ vā āharitvā idaṃ cetiyassa demāti piṇḍapātañca mālāgandhādīni ca denti, tattha kathaṃ paṭipajjitabbanti? Mālāgandhādīni tāva cetiye āropetabbāni, vatthehi paṭākā, telena padīpā kātabbā, piṇḍapātamadhuphāṇitādīni pana yo nibaddhacetiyajaggako hoti pabbajito vā gahaṭṭho vā, tasseva dātabbāni. Nibaddhajaggake asati āhaṭabhattaṃ ṭhapetvā vattaṃ katvā paribhuñjituṃ vaṭṭati. Upakaṭṭhe kāle bhuñjitvā pacchāpi vattaṃ kātuṃ vaṭṭatiyeva.
маалааг̇анд̇хаад̣̇ийсу жа яам̣ гин̃жи ‘‘ид̣̇ам̣ харид̇ваа жзд̇ияассабууж̇ам̣ гарот̇аа’’д̇и вуд̇д̇з д̣̇уурамби харид̇ваа бууж̇зд̇аб̣б̣ам̣. ‘‘бхигкам̣ сан̇гхасса хараа’’д̇и вуд̇д̇зби харид̇аб̣б̣ам̣. сажз бана ‘‘ахам̣ бин̣д̣ааяа жараами, аасанасаалааяа бхигкуу ад̇т̇и, д̇з аахариссанд̇ий’’д̇и вуд̇д̇з ‘‘бханд̇з д̇уяхам̣язва д̣̇аммий’’д̇и вад̣̇ад̇и, бхун̃ж̇ид̇ум̣ ваддад̇и. ат̇а бана ‘‘бхигкусан̇гхасса д̣̇ассаамий’’д̇и харанд̇асса г̇ажчад̇о анд̇араава гаало убагадто ход̇и, ад̇д̇ано баабзд̇ваа бхун̃ж̇ид̇ум̣ ваддад̇и.
Mālāgandhādīsu ca yaṃ kiñci ‘‘idaṃ haritvā cetiyassapūjaṃ karothā’’ti vutte dūrampi haritvā pūjetabbaṃ. ‘‘Bhikkhaṃ saṅghassa harā’’ti vuttepi haritabbaṃ. Sace pana ‘‘ahaṃ piṇḍāya carāmi, āsanasālāya bhikkhū atthi, te āharissantī’’ti vutte ‘‘bhante tuyhaṃyeva dammī’’ti vadati, bhuñjituṃ vaṭṭati. Atha pana ‘‘bhikkhusaṅghassa dassāmī’’ti harantassa gacchato antarāva kālo upakaṭṭho hoti, attano pāpetvā bhuñjituṃ vaṭṭati.
вассам̣вудтасан̇гхасса д̣̇зд̇ийд̇и вихаарам̣ бависид̇ваа ‘‘имаани жийвараани вассам̣вудтасан̇гхасса д̣̇аммий’’д̇и д̣̇зд̇и. яаавад̇игаа бхигкуу д̇асмим̣ ааваасз вассам̣вудтаад̇и яад̇д̇агаа вассажчзд̣̇ам̣ агад̇ваа буримавассам̣вудтаа, д̇зхи бхааж̇зд̇аб̣б̣ам̣, ан̃н̃зсам̣ на баабун̣аад̇и. д̣̇исаабагганд̇ассааби сад̇и бадиг̇г̇аахагз яаава гат̇инассуб̣бхаараа д̣̇аад̇аб̣б̣ам̣, анад̇т̇ад̇з бана гат̇инз анд̇охзманд̇з зван̃жа вад̇ваа д̣̇иннам̣, бажчимавассам̣вудтаанамби баабун̣аад̇ийд̇и лагкан̣ан̃н̃уу вад̣̇анд̇и. адтагат̇аасу банзд̇ам̣ на вижаарид̇ам̣.
Vassaṃvuṭṭhasaṅghassa detīti vihāraṃ pavisitvā ‘‘imāni cīvarāni vassaṃvuṭṭhasaṅghassa dammī’’ti deti. Yāvatikā bhikkhū tasmiṃ āvāse vassaṃvuṭṭhāti yattakā vassacchedaṃ akatvā purimavassaṃvuṭṭhā, tehi bhājetabbaṃ, aññesaṃ na pāpuṇāti. Disāpakkantassāpi sati paṭiggāhake yāva kathinassubbhārā dātabbaṃ, anatthate pana kathine antohemante evañca vatvā dinnaṃ, pacchimavassaṃvuṭṭhānampi pāpuṇātīti lakkhaṇaññū vadanti. Aṭṭhakathāsu panetaṃ na vicāritaṃ.
сажз бана б̣ахиубажаарасиймааяам̣ тид̇о ‘‘вассам̣вудтасан̇гхасса д̣̇аммий’’д̇и вад̣̇ад̇и, самбад̇д̇аанам̣ саб̣б̣зсам̣ баабун̣аад̇и. ат̇а ‘‘асугавихаарз вассам̣вудтасан̇гхассаа’’д̇и вад̣̇ад̇и, д̇ад̇ра вассам̣вудтаанамзва яаава гат̇инассуб̣бхаараа баабун̣аад̇и. сажз бана г̇имхаанам̣ батамад̣̇ивасад̇о бадтааяа звам̣ вад̣̇ад̇и, д̇ад̇ра саммукийбхууд̇аанам̣ саб̣б̣зсам̣ баабун̣аад̇и. гасмаа? бидтисамаяз уббаннад̇д̇аа. анд̇овассзязва ‘‘вассам̣ васанд̇аанам̣ д̣̇аммий’’д̇и вуд̇д̇з чиннавассаа на лабханд̇и, вассам̣ васанд̇аава лабханд̇и. жийварамаасз бана ‘‘вассам̣ васанд̇аанам̣ д̣̇аммий’’д̇и вуд̇д̇з бажчимигааяа вассуубаг̇ад̇аанам̣язва баабун̣аад̇и, буримигааяа вассуубаг̇ад̇аанан̃жа чиннавассаанан̃жа на баабун̣аад̇и.
Sace pana bahiupacārasīmāyaṃ ṭhito ‘‘vassaṃvuṭṭhasaṅghassa dammī’’ti vadati, sampattānaṃ sabbesaṃ pāpuṇāti. Atha ‘‘asukavihāre vassaṃvuṭṭhasaṅghassā’’ti vadati, tatra vassaṃvuṭṭhānameva yāva kathinassubbhārā pāpuṇāti. Sace pana gimhānaṃ paṭhamadivasato paṭṭhāya evaṃ vadati, tatra sammukhībhūtānaṃ sabbesaṃ pāpuṇāti. Kasmā? Piṭṭhisamaye uppannattā. Antovasseyeva ‘‘vassaṃ vasantānaṃ dammī’’ti vutte chinnavassā na labhanti, vassaṃ vasantāva labhanti. Cīvaramāse pana ‘‘vassaṃ vasantānaṃ dammī’’ti vutte pacchimikāya vassūpagatānaṃyeva pāpuṇāti, purimikāya vassūpagatānañca chinnavassānañca na pāpuṇāti.
жийварамаасад̇о бадтааяа яаава хзманд̇асса бажчимо д̣̇ивасо, д̇аава вассааваасигам̣ д̣̇змаад̇и вуд̇д̇з гат̇инам̣ ад̇т̇ад̇ам̣ ваа ход̇у анад̇т̇ад̇ам̣ ваа ад̇ийд̇авассам̣вудтаанамзва баабун̣аад̇и. г̇имхаанам̣ батамад̣̇ивасад̇о бадтааяа вуд̇д̇з бана маад̇игаа ааробзд̇аб̣б̣аа – ‘‘ад̇ийд̇авассааваасасса бан̃жа маасаа ад̇игганд̇аа, анааг̇ад̇о жад̇умаасажжаязна бхависсад̇и, гад̇аравассааваасасса д̣̇зд̇ий’’д̇и? сажз ‘‘ад̇ийд̇авассам̣вудтаанам̣ д̣̇аммий’’д̇и вад̣̇ад̇и, д̇ам̣анд̇овассам̣вудтаанамзва баабун̣аад̇и, д̣̇исаабагганд̇аанамби сабхааг̇аа г̇ан̣хид̇ум̣ лабханд̇и.
Cīvaramāsato paṭṭhāya yāva hemantassa pacchimo divaso, tāva vassāvāsikaṃ demāti vutte kathinaṃ atthataṃ vā hotu anatthataṃ vā atītavassaṃvuṭṭhānameva pāpuṇāti. Gimhānaṃ paṭhamadivasato paṭṭhāya vutte pana mātikā āropetabbā – ‘‘atītavassāvāsassa pañca māsā atikkantā, anāgato catumāsaccayena bhavissati, kataravassāvāsassa detī’’ti? Sace ‘‘atītavassaṃvuṭṭhānaṃ dammī’’ti vadati, taṃantovassaṃvuṭṭhānameva pāpuṇāti, disāpakkantānampi sabhāgā gaṇhituṃ labhanti.
сажз ‘‘анааг̇ад̇з вассааваасигам̣ д̣̇аммий’’д̇и вад̣̇ад̇и, д̇ам̣ табзд̇ваа вассуубанааяигад̣̇ивасз г̇ахзд̇аб̣б̣ам̣. ат̇а ‘‘аг̇уд̇д̇о вихааро, жорабхаяам̣ ад̇т̇и, на саггаа табзд̇ум̣, г̇ан̣хид̇ваа ваа аахин̣д̣ид̇у’’нд̇и вуд̇д̇з ‘‘самбад̇д̇аанам̣ д̣̇аммий’’д̇и вад̣̇ад̇и, бхааж̇зд̇ваа г̇ахзд̇аб̣б̣ам̣. сажз вад̣̇ад̇и ‘‘ид̇о мз бханд̇з д̇ад̇ияз вассз вассааваасигам̣ на д̣̇иннам̣, д̇ам̣ д̣̇аммий’’д̇и, д̇асмим̣ анд̇овассз вудтабхигкуунам̣ баабун̣аад̇и. сажз д̇з д̣̇исаа багганд̇аа, ан̃н̃о виссаасиго г̇ан̣хаад̇и, д̣̇аад̇аб̣б̣ам̣. ат̇а згоязва авасидто, сзсаа гаалан̇гад̇аа, саб̣б̣ам̣ згассзва баабун̣аад̇и. сажз згоби над̇т̇и, сан̇гхигам̣ ход̇и, саммукийбхууд̇зхи бхааж̇зд̇аб̣б̣ам̣.
Sace ‘‘anāgate vassāvāsikaṃ dammī’’ti vadati, taṃ ṭhapetvā vassūpanāyikadivase gahetabbaṃ. Atha ‘‘agutto vihāro, corabhayaṃ atthi, na sakkā ṭhapetuṃ, gaṇhitvā vā āhiṇḍitu’’nti vutte ‘‘sampattānaṃ dammī’’ti vadati, bhājetvā gahetabbaṃ. Sace vadati ‘‘ito me bhante tatiye vasse vassāvāsikaṃ na dinnaṃ, taṃ dammī’’ti, tasmiṃ antovasse vuṭṭhabhikkhūnaṃ pāpuṇāti. Sace te disā pakkantā, añño vissāsiko gaṇhāti, dātabbaṃ. Atha ekoyeva avasiṭṭho, sesā kālaṅkatā, sabbaṃ ekasseva pāpuṇāti. Sace ekopi natthi, saṅghikaṃ hoti, sammukhībhūtehi bhājetabbaṃ.
аад̣̇исса д̣̇зд̇ийд̇и аад̣̇исид̇ваа барижчинд̣̇ид̇ваа д̣̇зд̇и; яааг̇уяаа ваад̇иаад̣̇ийсу аяамад̇т̇о – яааг̇уяаа ваа…бз… бхзсаж̇ж̇з ваа аад̣̇исса д̣̇зд̇и. д̇ад̇рааяам̣ яож̇анаа – бхигкуу аж̇ж̇ад̇анааяа ваа сваад̇анааяа ваа яааг̇уяаа ниманд̇зд̇ваа д̇зсам̣ гхарам̣ бавидтаанам̣ яааг̇ум̣ д̣̇зд̇и, яааг̇ум̣ д̣̇ад̇ваа бийд̇ааяа яааг̇уяаа ‘‘имаани жийвараани, язхи маяхам̣ яааг̇у бийд̇аа, д̇зсам̣ д̣̇аммий’’д̇и д̣̇зд̇и, язхи ниманд̇ид̇зхи яааг̇у бийд̇аа, д̇зсам̣язва баабун̣аад̇и. язхи бана бхигкаажааравад̇д̇зна гхарад̣̇ваарзна г̇ажчанд̇зхи ваа гхарам̣ бавидтзхи ваа яааг̇у лад̣̇д̇хаа, язсам̣ ваа аасанасаалад̇о бад̇д̇ам̣ аахарид̇ваа мануссзхи нийд̇аа, язсам̣ ваа т̇зрзхи бзсид̇аа, д̇зсам̣ на баабун̣аад̇и. сажз бана ниманд̇ид̇абхигкуухи сад̣̇д̇хим̣ ан̃н̃зби б̣ахуу ааг̇анд̇ваа анд̇ог̇зхан̃жа б̣ахиг̇зхан̃жа буурзд̇ваа нисиннаа, д̣̇ааяаго жа звам̣ вад̣̇ад̇и – ‘‘ниманд̇ид̇аа ваа хонд̇у аниманд̇ид̇аа ваа, язсам̣ маяаа яааг̇у д̣̇иннаа, саб̣б̣зсам̣ имаани вад̇т̇аани хонд̇уу’’д̇и саб̣б̣зсам̣ баабун̣анд̇и. язхи бана т̇зраанам̣ хад̇т̇ад̇о яааг̇у лад̣̇д̇хаа , д̇зсам̣ на баабун̣анд̇и. ат̇а со ‘‘язхи маяхам̣ яааг̇у бийд̇аа, саб̣б̣зсам̣ хонд̇уу’’д̇и вад̣̇ад̇и, саб̣б̣зсам̣ баабун̣анд̇и. бхад̇д̇акаад̣̇анийязсуби зсзва наяо.
Ādissa detīti ādisitvā paricchinditvā deti; yāguyā vātiādīsu ayamattho – yāguyā vā…pe… bhesajje vā ādissa deti. Tatrāyaṃ yojanā – bhikkhū ajjatanāya vā svātanāya vā yāguyā nimantetvā tesaṃ gharaṃ paviṭṭhānaṃ yāguṃ deti, yāguṃ datvā pītāya yāguyā ‘‘imāni cīvarāni, yehi mayhaṃ yāgu pītā, tesaṃ dammī’’ti deti, yehi nimantitehi yāgu pītā, tesaṃyeva pāpuṇāti. Yehi pana bhikkhācāravattena gharadvārena gacchantehi vā gharaṃ paviṭṭhehi vā yāgu laddhā, yesaṃ vā āsanasālato pattaṃ āharitvā manussehi nītā, yesaṃ vā therehi pesitā, tesaṃ na pāpuṇāti. Sace pana nimantitabhikkhūhi saddhiṃ aññepi bahū āgantvā antogehañca bahigehañca pūretvā nisinnā, dāyako ca evaṃ vadati – ‘‘nimantitā vā hontu animantitā vā, yesaṃ mayā yāgu dinnā, sabbesaṃ imāni vatthāni hontū’’ti sabbesaṃ pāpuṇanti. Yehi pana therānaṃ hatthato yāgu laddhā , tesaṃ na pāpuṇanti. Atha so ‘‘yehi mayhaṃ yāgu pītā, sabbesaṃ hontū’’ti vadati, sabbesaṃ pāpuṇanti. Bhattakhādanīyesupi eseva nayo.
жийварз ваад̇и буб̣б̣зби язна вассам̣ ваасзд̇ваа бхигкуунам̣ жийварам̣ д̣̇иннабуб̣б̣ам̣ ход̇и, со жз бхигкуу бхож̇зд̇ваа вад̣̇ад̇и – ‘‘язсам̣ маяаа буб̣б̣з жийварам̣ д̣̇иннам̣, д̇зсам̣язва имам̣ жийварам̣ ваа суд̇д̇ам̣ ваа саббимад̇хупаан̣ид̇аад̣̇ийни ваа хонд̇уу’’д̇и, саб̣б̣ам̣ д̇зсам̣язва баабун̣аад̇и. сзнаасанз ваад̇и яо маяаа гаарид̇з вихаарз ваа баривзн̣з ваа васад̇и, д̇ассид̣̇ам̣ ход̇уу’’д̇и вуд̇д̇з д̇ассзва ход̇и. бхзсаж̇ж̇з ваад̇и ‘‘маяам̣ гаалзна гаалам̣ т̇зраанам̣ саббиаад̣̇ийни бхзсаж̇ж̇аани д̣̇зма, язхи д̇аани лад̣̇д̇хаани, д̇зсам̣язвид̣̇ам̣ ход̇уу’’д̇и вуд̇д̇з д̇зсам̣язва ход̇и.
Cīvare vāti pubbepi yena vassaṃ vāsetvā bhikkhūnaṃ cīvaraṃ dinnapubbaṃ hoti, so ce bhikkhū bhojetvā vadati – ‘‘yesaṃ mayā pubbe cīvaraṃ dinnaṃ, tesaṃyeva imaṃ cīvaraṃ vā suttaṃ vā sappimadhuphāṇitādīni vā hontū’’ti, sabbaṃ tesaṃyeva pāpuṇāti. Senāsane vāti yo mayā kārite vihāre vā pariveṇe vā vasati, tassidaṃ hotū’’ti vutte tasseva hoti. Bhesajje vāti ‘‘mayaṃ kālena kālaṃ therānaṃ sappiādīni bhesajjāni dema, yehi tāni laddhāni, tesaṃyevidaṃ hotū’’ti vutte tesaṃyeva hoti.
буг̇г̇аласса д̣̇зд̇ийд̇и ‘‘имам̣ жийварам̣ ид̇т̇аннаамасса д̣̇аммий’’д̇и звам̣ бараммукаа ваа баад̣̇амуулз табзд̇ваа ‘‘имам̣ бханд̇з д̇умхаагам̣ д̣̇аммий’’д̇и звам̣ саммукаа ваа д̣̇зд̇и. сажз бана ‘‘ид̣̇ам̣ д̇умхааган̃жа д̇умхаагам̣ анд̇зваасигаанан̃жа д̣̇аммий’’д̇и звам̣ вад̣̇ад̇и, т̇зрасса жа анд̇зваасигаанан̃жа баабун̣аад̇и. уд̣̇д̣̇зсам̣ г̇ахзд̇ум̣ ааг̇ад̇о г̇ахзд̇ваа г̇ажчанд̇о жа ад̇т̇и, д̇ассааби баабун̣аад̇и. ‘‘д̇умхзхи сад̣̇д̇хим̣ ниб̣ад̣̇д̇хажааригабхигкуунам̣ д̣̇аммий’’д̇и вуд̇д̇з уд̣̇д̣̇зсанд̇зваасигаанам̣ вад̇д̇ам̣ гад̇ваа уд̣̇д̣̇зсабарибужчаад̣̇ийни г̇ахзд̇ваа вижаранд̇аанам̣ саб̣б̣зсам̣ баабун̣аад̇и. аяам̣ буг̇г̇аласса д̣̇зд̇ийд̇и имасмим̣ бад̣̇з винижчаяо. сзсам̣ саб̣б̣ад̇т̇а уд̇д̇аанамзваад̇и.
Puggalassa detīti ‘‘imaṃ cīvaraṃ itthannāmassa dammī’’ti evaṃ parammukhā vā pādamūle ṭhapetvā ‘‘imaṃ bhante tumhākaṃ dammī’’ti evaṃ sammukhā vā deti. Sace pana ‘‘idaṃ tumhākañca tumhākaṃ antevāsikānañca dammī’’ti evaṃ vadati, therassa ca antevāsikānañca pāpuṇāti. Uddesaṃ gahetuṃ āgato gahetvā gacchanto ca atthi, tassāpi pāpuṇāti. ‘‘Tumhehi saddhiṃ nibaddhacārikabhikkhūnaṃ dammī’’ti vutte uddesantevāsikānaṃ vattaṃ katvā uddesaparipucchādīni gahetvā vicarantānaṃ sabbesaṃ pāpuṇāti. Ayaṃ puggalassa detīti imasmiṃ pade vinicchayo. Sesaṃ sabbattha uttānamevāti.
жийварагканд̇хагаван̣н̣анаа нидтид̇аа.
Cīvarakkhandhakavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / винаяабидага • Vinayapiṭaka / махааваг̇г̇абаал̣и • Mahāvaggapāḷi / 232. адтажийварамаад̇игаа • 232. Aṭṭhacīvaramātikā
дийгаа • Tīkā / винаяабидага (дийгаа) • Vinayapiṭaka (ṭīkā) / саарад̇т̇ад̣̇ийбаний-дийгаа • Sāratthadīpanī-ṭīkā / адтажийварамаад̇игаагат̇ааван̣н̣анаа • Aṭṭhacīvaramātikākathāvaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / важ̇ираб̣уд̣̇д̇хи-дийгаа • Vajirabuddhi-ṭīkā / адтажийварамаад̇игаагат̇ааван̣н̣анаа • Aṭṭhacīvaramātikākathāvaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / вимад̇ивинод̣̇аний-дийгаа • Vimativinodanī-ṭīkā / адтажийварамаад̇игаагат̇ааван̣н̣анаа • Aṭṭhacīvaramātikākathāvaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / баажид̇яаад̣̇ияож̇анаабаал̣и • Pācityādiyojanāpāḷi / 232. адтажийварамаад̇игаагат̇аа • 232. Aṭṭhacīvaramātikākathā
