| Library / Tipiṭaka / திபிடக • Tipiṭaka / பஞ்சபகரண-அட்ட²கதா² • Pañcapakaraṇa-aṭṭhakathā |
5. அட்ட²மககதா²வண்ணனா
5. Aṭṭhamakakathāvaṇṇanā
368. இதா³னி அட்ட²மககதா² நாம ஹோதி. தத்த² யேஸங் அனுலோமகொ³த்ரபு⁴மக்³க³க்க²ணே கிலேஸானங் ஸமுதா³சாராபா⁴வதோ அட்ட²மகஸ்ஸ ஸோதாபத்திமக்³க³ட்ட²புக்³க³லஸ்ஸ த்³வே பரியுட்டா²னா பஹீனாதி லத்³தி⁴, ஸெய்யதா²பி ஏதரஹி அந்த⁴கானஞ்சேவ ஸம்மிதியானஞ்ச; தேஸங் அஞ்ஞதரங் ஸந்தா⁴ய புச்சா² ஸகவாதி³ஸ்ஸ, மக்³க³க்க²ணதோ பட்டா²ய தி³ட்டி²யா அனுப்பத்திங் ஸந்தா⁴ய படிஞ்ஞா இதரஸ்ஸ. ததோ யஸ்மா தி³ட்டி² நாமேஸா ஸோதாபன்னஸ்ஸேவ பஹீனா, ந மக்³க³ட்ட²ஸ்ஸ, தஸ்மா அட்ட²மகோ புக்³க³லோ ஸோதாபன்னோதி அனுயோகோ³ ஸகவாதி³ஸ்ஸ. விசிகிச்சா²பஞ்ஹேபி ஏஸேவ நயோ. அனுஸயபஞ்ஹே பரியுட்டா²னதோ அஞ்ஞோ அனுஸயோதி தேஸங் லத்³தி⁴, தஸ்மா ‘‘ந ஹேவ’’ந்தி படிக்கி²த்தங்.
368. Idāni aṭṭhamakakathā nāma hoti. Tattha yesaṃ anulomagotrabhumaggakkhaṇe kilesānaṃ samudācārābhāvato aṭṭhamakassa sotāpattimaggaṭṭhapuggalassa dve pariyuṭṭhānā pahīnāti laddhi, seyyathāpi etarahi andhakānañceva sammitiyānañca; tesaṃ aññataraṃ sandhāya pucchā sakavādissa, maggakkhaṇato paṭṭhāya diṭṭhiyā anuppattiṃ sandhāya paṭiññā itarassa. Tato yasmā diṭṭhi nāmesā sotāpannasseva pahīnā, na maggaṭṭhassa, tasmā aṭṭhamako puggalo sotāpannoti anuyogo sakavādissa. Vicikicchāpañhepi eseva nayo. Anusayapañhe pariyuṭṭhānato añño anusayoti tesaṃ laddhi, tasmā ‘‘na heva’’nti paṭikkhittaṃ.
ஸீலப்³ப³தபராமாஸபஞ்ஹேபி ஸீலப்³ப³தபராமாஸபரியுட்டா²னந்தி வோஹாரங் ந பஸ்ஸதி, தஸ்மா படிக்கி²பதி. பரியுட்டா²னமேவஸ்ஸ பஹீனந்தி லத்³தி⁴.
Sīlabbataparāmāsapañhepi sīlabbataparāmāsapariyuṭṭhānanti vohāraṃ na passati, tasmā paṭikkhipati. Pariyuṭṭhānamevassa pahīnanti laddhi.
369. மக்³கோ³ பா⁴விதோதி பஞ்ஹே தஸ்மிங் க²ணே பா⁴வேதி, ந பா⁴விதோ. தஸ்மா படிக்கி²பதி. அமக்³கே³னாதிஆதி³அனுயோகே³ பட²மமக்³கே³னேவ பஹீனபா⁴வங் ஸந்தா⁴ய படிக்கி²பதி. யதி³ ஹி அமக்³கே³ன பஹீயேத², கொ³த்ரபு⁴புக்³க³லாதீ³னம்பி பஹீயேதா²தி ஆபஜ்ஜனதோ. உப்பஜ்ஜிஸ்ஸதீதி புச்சா² பரவாதி³ஸ்ஸ, விஸ்ஸஜ்ஜனங் ஸகவாதி³ஸ்ஸ. ஸேஸங் ஸப்³ப³த்த² உத்தானத்த²மேவாதி.
369. Maggo bhāvitoti pañhe tasmiṃ khaṇe bhāveti, na bhāvito. Tasmā paṭikkhipati. Amaggenātiādianuyoge paṭhamamaggeneva pahīnabhāvaṃ sandhāya paṭikkhipati. Yadi hi amaggena pahīyetha, gotrabhupuggalādīnampi pahīyethāti āpajjanato. Uppajjissatīti pucchā paravādissa, vissajjanaṃ sakavādissa. Sesaṃ sabbattha uttānatthamevāti.
அட்ட²மககதா²வண்ணனா.
Aṭṭhamakakathāvaṇṇanā.
Related texts:
திபிடக (மூல) • Tipiṭaka (Mūla) / அபி⁴த⁴ம்மபிடக • Abhidhammapiṭaka / கதா²வத்து²பாளி • Kathāvatthupāḷi / (25) 5. அட்ட²மககதா² • (25) 5. Aṭṭhamakakathā
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-மூலடீகா • Pañcapakaraṇa-mūlaṭīkā / 5. அட்ட²மககதா²வண்ணனா • 5. Aṭṭhamakakathāvaṇṇanā
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-அனுடீகா • Pañcapakaraṇa-anuṭīkā / 5. அட்ட²மககதா²வண்ணனா • 5. Aṭṭhamakakathāvaṇṇanā
