| Library / Tipiṭaka / തിപിടക • Tipiṭaka / കഥാവത്ഥുപാളി • Kathāvatthupāḷi |
(൨൬) ൬. അട്ഠമകസ്സഇന്ദ്രിയകഥാ
(26) 6. Aṭṭhamakassaindriyakathā
൩൭൧. അട്ഠമകസ്സ പുഗ്ഗലസ്സ നത്ഥി സദ്ധിന്ദ്രിയന്തി? ആമന്താ. അട്ഠമകസ്സ പുഗ്ഗലസ്സ നത്ഥി സദ്ധാതി? ന ഹേവം വത്തബ്ബേ. അട്ഠമകസ്സ പുഗ്ഗലസ്സ നത്ഥി വീരിയിന്ദ്രിയം…പേ॰… നത്ഥി സതിന്ദ്രിയം…പേ॰… നത്ഥി സമാധിന്ദ്രിയം…പേ॰… നത്ഥി പഞ്ഞിന്ദ്രിയന്തി? ആമന്താ. അട്ഠമകസ്സ പുഗ്ഗലസ്സ നത്ഥി പഞ്ഞാതി? ന ഹേവം വത്തബ്ബേ…പേ॰….
371. Aṭṭhamakassa puggalassa natthi saddhindriyanti? Āmantā. Aṭṭhamakassa puggalassa natthi saddhāti? Na hevaṃ vattabbe. Aṭṭhamakassa puggalassa natthi vīriyindriyaṃ…pe… natthi satindriyaṃ…pe… natthi samādhindriyaṃ…pe… natthi paññindriyanti? Āmantā. Aṭṭhamakassa puggalassa natthi paññāti? Na hevaṃ vattabbe…pe….
അട്ഠമകസ്സ പുഗ്ഗലസ്സ അത്ഥി സദ്ധാതി? ആമന്താ. അട്ഠമകസ്സ പുഗ്ഗലസ്സ അത്ഥി സദ്ധിന്ദ്രിയന്തി? ന ഹേവം വത്തബ്ബേ…പേ॰… അട്ഠമകസ്സ പുഗ്ഗലസ്സ അത്ഥി വീരിയം…പേ॰… അത്ഥി സതി… അത്ഥി സമാധി… അത്ഥി പഞ്ഞാതി? ആമന്താ. അട്ഠമകസ്സ പുഗ്ഗലസ്സ അത്ഥി പഞ്ഞിന്ദ്രിയന്തി? ന ഹേവം വത്തബ്ബേ…പേ॰….
Aṭṭhamakassa puggalassa atthi saddhāti? Āmantā. Aṭṭhamakassa puggalassa atthi saddhindriyanti? Na hevaṃ vattabbe…pe… aṭṭhamakassa puggalassa atthi vīriyaṃ…pe… atthi sati… atthi samādhi… atthi paññāti? Āmantā. Aṭṭhamakassa puggalassa atthi paññindriyanti? Na hevaṃ vattabbe…pe….
അട്ഠമകസ്സ പുഗ്ഗലസ്സ അത്ഥി മനോ, അത്ഥി മനിന്ദ്രിയന്തി? ആമന്താ. അട്ഠമകസ്സ പുഗ്ഗലസ്സ അത്ഥി സദ്ധാ, അത്ഥി സദ്ധിന്ദ്രിയന്തി? ന ഹേവം വത്തബ്ബേ…പേ॰… അട്ഠമകസ്സ പുഗ്ഗലസ്സ അത്ഥി മനോ, അത്ഥി മനിന്ദ്രിയന്തി? ആമന്താ. അട്ഠമകസ്സ പുഗ്ഗലസ്സ അത്ഥി പഞ്ഞാ, അത്ഥി പഞ്ഞിന്ദ്രിയന്തി? ന ഹേവം വത്തബ്ബേ…പേ॰….
Aṭṭhamakassa puggalassa atthi mano, atthi manindriyanti? Āmantā. Aṭṭhamakassa puggalassa atthi saddhā, atthi saddhindriyanti? Na hevaṃ vattabbe…pe… aṭṭhamakassa puggalassa atthi mano, atthi manindriyanti? Āmantā. Aṭṭhamakassa puggalassa atthi paññā, atthi paññindriyanti? Na hevaṃ vattabbe…pe….
അട്ഠമകസ്സ പുഗ്ഗലസ്സ അത്ഥി സോമനസ്സം, അത്ഥി സോമനസ്സിന്ദ്രിയം, അത്ഥി ജീവിതം, അത്ഥി ജീവിതിന്ദ്രിയന്തി? ആമന്താ. അട്ഠമകസ്സ പുഗ്ഗലസ്സ അത്ഥി സദ്ധാ, അത്ഥി സദ്ധിന്ദ്രിയന്തി? ന ഹേവം വത്തബ്ബേ…പേ॰… അട്ഠമകസ്സ പുഗ്ഗലസ്സ അത്ഥി ജീവിതം, അത്ഥി ജീവിതിന്ദ്രിയന്തി? ആമന്താ. അട്ഠമകസ്സ പുഗ്ഗലസ്സ…പേ॰… അത്ഥി പഞ്ഞാ, അത്ഥി പഞ്ഞിന്ദ്രിയന്തി? ന ഹേവം വത്തബ്ബേ…പേ॰….
Aṭṭhamakassa puggalassa atthi somanassaṃ, atthi somanassindriyaṃ, atthi jīvitaṃ, atthi jīvitindriyanti? Āmantā. Aṭṭhamakassa puggalassa atthi saddhā, atthi saddhindriyanti? Na hevaṃ vattabbe…pe… aṭṭhamakassa puggalassa atthi jīvitaṃ, atthi jīvitindriyanti? Āmantā. Aṭṭhamakassa puggalassa…pe… atthi paññā, atthi paññindriyanti? Na hevaṃ vattabbe…pe….
അട്ഠമകസ്സ പുഗ്ഗലസ്സ അത്ഥി സദ്ധാ, നത്ഥി സദ്ധിന്ദ്രിയന്തി? ആമന്താ. അട്ഠമകസ്സ പുഗ്ഗലസ്സ അത്ഥി മനോ, നത്ഥി മനിന്ദ്രിയന്തി? ന ഹേവം വത്തബ്ബേ…പേ॰….
Aṭṭhamakassa puggalassa atthi saddhā, natthi saddhindriyanti? Āmantā. Aṭṭhamakassa puggalassa atthi mano, natthi manindriyanti? Na hevaṃ vattabbe…pe….
അട്ഠമകസ്സ പുഗ്ഗലസ്സ അത്ഥി സദ്ധാ, നത്ഥി സദ്ധിന്ദ്രിയന്തി? ആമന്താ. അട്ഠമകസ്സ പുഗ്ഗലസ്സ അത്ഥി സോമനസ്സം, നത്ഥി സോമനസ്സിന്ദ്രിയന്തി…പേ॰… അത്ഥി ജീവിതം, നത്ഥി ജീവിതിന്ദ്രിയന്തി? ന ഹേവം വത്തബ്ബേ…പേ॰… അട്ഠമകസ്സ പുഗ്ഗലസ്സ അത്ഥി പഞ്ഞാ, നത്ഥി പഞ്ഞിന്ദ്രിയന്തി? ആമന്താ. അട്ഠമകസ്സ പുഗ്ഗലസ്സ അത്ഥി മനോ, നത്ഥി മനിന്ദ്രിയന്തി? അത്ഥി സോമനസ്സം, നത്ഥി സോമനസ്സിന്ദ്രിയന്തി? അത്ഥി ജീവിതം, നത്ഥി ജീവിതിന്ദ്രിയന്തി? ന ഹേവം വത്തബ്ബേ…പേ॰….
Aṭṭhamakassa puggalassa atthi saddhā, natthi saddhindriyanti? Āmantā. Aṭṭhamakassa puggalassa atthi somanassaṃ, natthi somanassindriyanti…pe… atthi jīvitaṃ, natthi jīvitindriyanti? Na hevaṃ vattabbe…pe… aṭṭhamakassa puggalassa atthi paññā, natthi paññindriyanti? Āmantā. Aṭṭhamakassa puggalassa atthi mano, natthi manindriyanti? Atthi somanassaṃ, natthi somanassindriyanti? Atthi jīvitaṃ, natthi jīvitindriyanti? Na hevaṃ vattabbe…pe….
അട്ഠമകസ്സ പുഗ്ഗലസ്സ നത്ഥി സദ്ധിന്ദ്രിയന്തി? ആമന്താ. അട്ഠമകോ പുഗ്ഗലോ അസ്സദ്ധോതി? ന ഹേവം വത്തബ്ബേ…പേ॰… അട്ഠമകസ്സ പുഗ്ഗലസ്സ നത്ഥി വീരിയിന്ദ്രിയന്തി? ആമന്താ. അട്ഠമകോ പുഗ്ഗലോ കുസീതോ ഹീനവീരിയോതി? ന ഹേവം വത്തബ്ബേ…പേ॰… അട്ഠമകസ്സ പുഗ്ഗലസ്സ നത്ഥി സതിന്ദ്രിയന്തി? ആമന്താ. അട്ഠമകോ പുഗ്ഗലോ മുട്ഠസ്സതി അസമ്പജാനോതി? ന ഹേവം വത്തബ്ബേ…പേ॰… അട്ഠമകസ്സ പുഗ്ഗലസ്സ നത്ഥി സമാധിന്ദ്രിയന്തി? ആമന്താ. അട്ഠമകോ പുഗ്ഗലോ അസമാഹിതോ വിബ്ഭന്തചിത്തോതി? ന ഹേവം വത്തബ്ബേ…പേ॰… അട്ഠമകസ്സ പുഗ്ഗലസ്സ നത്ഥി പഞ്ഞിന്ദ്രിയന്തി? ആമന്താ. അട്ഠമകോ പുഗ്ഗലോ ദുപ്പഞ്ഞോ ഏലമൂഗോതി? ന ഹേവം വത്തബ്ബേ…പേ॰….
Aṭṭhamakassa puggalassa natthi saddhindriyanti? Āmantā. Aṭṭhamako puggalo assaddhoti? Na hevaṃ vattabbe…pe… aṭṭhamakassa puggalassa natthi vīriyindriyanti? Āmantā. Aṭṭhamako puggalo kusīto hīnavīriyoti? Na hevaṃ vattabbe…pe… aṭṭhamakassa puggalassa natthi satindriyanti? Āmantā. Aṭṭhamako puggalo muṭṭhassati asampajānoti? Na hevaṃ vattabbe…pe… aṭṭhamakassa puggalassa natthi samādhindriyanti? Āmantā. Aṭṭhamako puggalo asamāhito vibbhantacittoti? Na hevaṃ vattabbe…pe… aṭṭhamakassa puggalassa natthi paññindriyanti? Āmantā. Aṭṭhamako puggalo duppañño elamūgoti? Na hevaṃ vattabbe…pe….
അട്ഠമകസ്സ പുഗ്ഗലസ്സ അത്ഥി സദ്ധാ, സാ ച സദ്ധാ നിയ്യാനികാതി? ആമന്താ. ഹഞ്ചി അട്ഠമകസ്സ പുഗ്ഗലസ്സ അത്ഥി സദ്ധാ, സാ ച സദ്ധാ നിയ്യാനികാ, നോ ച വത രേ വത്തബ്ബേ – ‘‘അട്ഠമകസ്സ പുഗ്ഗലസ്സ നത്ഥി സദ്ധിന്ദ്രിയ’’ന്തി. അട്ഠമകസ്സ പുഗ്ഗലസ്സ അത്ഥി വീരിയം, തഞ്ച വീരിയം നിയ്യാനികം; അത്ഥി സതി, സാ ച സതി നിയ്യാനികാ; അത്ഥി സമാധി, സോ ച സമാധി നിയ്യാനികോ; അത്ഥി പഞ്ഞാ, സാ ച പഞ്ഞാ നിയ്യാനികാതി? ആമന്താ . ഹഞ്ചി അട്ഠമകസ്സ പുഗ്ഗലസ്സ അത്ഥി പഞ്ഞാ, സാ ച പഞ്ഞാ നിയ്യാനികാ, നോ ച വത രേ വത്തബ്ബേ – ‘‘അട്ഠമകസ്സ പുഗ്ഗലസ്സ നത്ഥി പഞ്ഞിന്ദ്രിയ’’ന്തി.
Aṭṭhamakassa puggalassa atthi saddhā, sā ca saddhā niyyānikāti? Āmantā. Hañci aṭṭhamakassa puggalassa atthi saddhā, sā ca saddhā niyyānikā, no ca vata re vattabbe – ‘‘aṭṭhamakassa puggalassa natthi saddhindriya’’nti. Aṭṭhamakassa puggalassa atthi vīriyaṃ, tañca vīriyaṃ niyyānikaṃ; atthi sati, sā ca sati niyyānikā; atthi samādhi, so ca samādhi niyyāniko; atthi paññā, sā ca paññā niyyānikāti? Āmantā . Hañci aṭṭhamakassa puggalassa atthi paññā, sā ca paññā niyyānikā, no ca vata re vattabbe – ‘‘aṭṭhamakassa puggalassa natthi paññindriya’’nti.
൩൭൨. സകദാഗാമിഫലസച്ഛികിരിയായ പടിപന്നസ്സ പുഗ്ഗലസ്സ അത്ഥി സദ്ധാ, അത്ഥി സദ്ധിന്ദ്രിയന്തി? ആമന്താ. അട്ഠമകസ്സ പുഗ്ഗലസ്സ അത്ഥി സദ്ധാ, അത്ഥി സദ്ധിന്ദ്രിയന്തി? ന ഹേവം വത്തബ്ബേ…പേ॰… സകദാഗാമിഫലസച്ഛികിരിയായ പടിപന്നസ്സ പുഗ്ഗലസ്സ അത്ഥി പഞ്ഞാ, അത്ഥി പഞ്ഞിന്ദ്രിയന്തി? ആമന്താ. അട്ഠമകസ്സ പുഗ്ഗലസ്സ അത്ഥി പഞ്ഞാ, അത്ഥി പഞ്ഞിന്ദ്രിയന്തി? ന ഹേവം വത്തബ്ബേ…പേ॰….
372. Sakadāgāmiphalasacchikiriyāya paṭipannassa puggalassa atthi saddhā, atthi saddhindriyanti? Āmantā. Aṭṭhamakassa puggalassa atthi saddhā, atthi saddhindriyanti? Na hevaṃ vattabbe…pe… sakadāgāmiphalasacchikiriyāya paṭipannassa puggalassa atthi paññā, atthi paññindriyanti? Āmantā. Aṭṭhamakassa puggalassa atthi paññā, atthi paññindriyanti? Na hevaṃ vattabbe…pe….
അനാഗാമിഫലസച്ഛികിരിയായ പടിപന്നസ്സ പുഗ്ഗലസ്സ… അരഹത്തസച്ഛികിരിയായ പടിപന്നസ്സ പുഗ്ഗലസ്സ അത്ഥി സദ്ധാ, അത്ഥി സദ്ധിന്ദ്രിയം…പേ॰… അത്ഥി പഞ്ഞാ, അത്ഥി പഞ്ഞിന്ദ്രിയന്തി? ആമന്താ. അട്ഠമകസ്സ പുഗ്ഗലസ്സ അത്ഥി പഞ്ഞാ, അത്ഥി പഞ്ഞിന്ദ്രിയന്തി? ന ഹേവം വത്തബ്ബേ…പേ॰….
Anāgāmiphalasacchikiriyāya paṭipannassa puggalassa… arahattasacchikiriyāya paṭipannassa puggalassa atthi saddhā, atthi saddhindriyaṃ…pe… atthi paññā, atthi paññindriyanti? Āmantā. Aṭṭhamakassa puggalassa atthi paññā, atthi paññindriyanti? Na hevaṃ vattabbe…pe….
അട്ഠമകസ്സ പുഗ്ഗലസ്സ അത്ഥി സദ്ധാ, നത്ഥി സദ്ധിന്ദ്രിയന്തി? ആമന്താ. സകദാഗാമിഫലസച്ഛികിരിയായ പടിപന്നസ്സ പുഗ്ഗലസ്സ അത്ഥി സദ്ധാ, നത്ഥി സദ്ധിന്ദ്രിയന്തി? ന ഹേവം വത്തബ്ബേ…പേ॰… അട്ഠമകസ്സ പുഗ്ഗലസ്സ അത്ഥി പഞ്ഞാ, നത്ഥി പഞ്ഞിന്ദ്രിയന്തി? ആമന്താ. സകദാഗാമിഫലസച്ഛികിരിയായ പടിപന്നസ്സ പുഗ്ഗലസ്സ അത്ഥി പഞ്ഞാ, നത്ഥി പഞ്ഞിന്ദ്രിയന്തി? ന ഹേവം വത്തബ്ബേ…പേ॰….
Aṭṭhamakassa puggalassa atthi saddhā, natthi saddhindriyanti? Āmantā. Sakadāgāmiphalasacchikiriyāya paṭipannassa puggalassa atthi saddhā, natthi saddhindriyanti? Na hevaṃ vattabbe…pe… aṭṭhamakassa puggalassa atthi paññā, natthi paññindriyanti? Āmantā. Sakadāgāmiphalasacchikiriyāya paṭipannassa puggalassa atthi paññā, natthi paññindriyanti? Na hevaṃ vattabbe…pe….
അട്ഠമകസ്സ പുഗ്ഗലസ്സ അത്ഥി സദ്ധാ, നത്ഥി സദ്ധിന്ദ്രിയന്തി…പേ॰… അത്ഥി പഞ്ഞാ, നത്ഥി പഞ്ഞിന്ദ്രിയന്തി? ആമന്താ . അനാഗാമിഫലസച്ഛികിരിയായ പടിപന്നസ്സ പുഗ്ഗലസ്സ… അരഹത്തസച്ഛികിരിയായ പടിപന്നസ്സ പുഗ്ഗലസ്സ അത്ഥി പഞ്ഞാ, നത്ഥി പഞ്ഞിന്ദ്രിയന്തി? ന ഹേവം വത്തബ്ബേ…പേ॰….
Aṭṭhamakassa puggalassa atthi saddhā, natthi saddhindriyanti…pe… atthi paññā, natthi paññindriyanti? Āmantā . Anāgāmiphalasacchikiriyāya paṭipannassa puggalassa… arahattasacchikiriyāya paṭipannassa puggalassa atthi paññā, natthi paññindriyanti? Na hevaṃ vattabbe…pe….
അട്ഠമകസ്സ പുഗ്ഗലസ്സ നത്ഥി പഞ്ചിന്ദ്രിയാനീതി? ആമന്താ. നനു വുത്തം ഭഗവതാ – ‘‘പഞ്ചിമാനി, ഭിക്ഖവേ, ഇന്ദ്രിയാനി! കതമാനി പഞ്ച? സദ്ധിന്ദ്രിയം, വീരിയിന്ദ്രിയം, സതിന്ദ്രിയം, സമാധിന്ദ്രിയം, പഞ്ഞിന്ദ്രിയം – ഇമാനി ഖോ, ഭിക്ഖവേ, പഞ്ചിന്ദ്രിയാനി. ഇമേസം ഖോ, ഭിക്ഖവേ, പഞ്ചന്നം ഇന്ദ്രിയാനം സമത്താ പരിപൂരത്താ അരഹാ ഹോതി. തതോ മുദുതരേഹി അരഹത്തസച്ഛികിരിയായ പടിപന്നോ ഹോതി, തതോ മുദുതരേഹി അനാഗാമീ ഹോതി, തതോ മുദുതരേഹി അനാഗാമിഫലസച്ഛികിരിയായ പടിപന്നോ ഹോതി, തതോ മുദുതരേഹി സകദാഗാമീ ഹോതി, തതോ മുദുതരേഹി സകദാഗാമിഫലസച്ഛികിരിയായ പടിപന്നോ ഹോതി, തതോ മുദുതരേഹി സോതാപന്നോ ഹോതി, തതോ മുദുതരേഹി സോതാപത്തിഫലസച്ഛികിരിയായ പടിപന്നോ ഹോതി. യസ്സ ഖോ, ഭിക്ഖവേ, ഇമാനി പഞ്ചിന്ദ്രിയാനി സബ്ബേന സബ്ബം സബ്ബഥാ സബ്ബം നത്ഥി, തമഹം ‘ബാഹിരോ പുഥുജ്ജനപക്ഖേ ഠിതോ’തി വദാമീ’’തി 1. അത്ഥേവ സുത്തന്തോതി? ആമന്താ. അട്ഠമകോ പുഗ്ഗലോ ബാഹിരോ പുഥുജ്ജനപക്ഖേ ഠിതോതി? ന ഹേവം വത്തബ്ബേ…പേ॰… തേന ഹി അട്ഠമകസ്സ പുഗ്ഗലസ്സ അത്ഥി പഞ്ചിന്ദ്രിയാനീതി.
Aṭṭhamakassa puggalassa natthi pañcindriyānīti? Āmantā. Nanu vuttaṃ bhagavatā – ‘‘pañcimāni, bhikkhave, indriyāni! Katamāni pañca? Saddhindriyaṃ, vīriyindriyaṃ, satindriyaṃ, samādhindriyaṃ, paññindriyaṃ – imāni kho, bhikkhave, pañcindriyāni. Imesaṃ kho, bhikkhave, pañcannaṃ indriyānaṃ samattā paripūrattā arahā hoti. Tato mudutarehi arahattasacchikiriyāya paṭipanno hoti, tato mudutarehi anāgāmī hoti, tato mudutarehi anāgāmiphalasacchikiriyāya paṭipanno hoti, tato mudutarehi sakadāgāmī hoti, tato mudutarehi sakadāgāmiphalasacchikiriyāya paṭipanno hoti, tato mudutarehi sotāpanno hoti, tato mudutarehi sotāpattiphalasacchikiriyāya paṭipanno hoti. Yassa kho, bhikkhave, imāni pañcindriyāni sabbena sabbaṃ sabbathā sabbaṃ natthi, tamahaṃ ‘bāhiro puthujjanapakkhe ṭhito’ti vadāmī’’ti 2. Attheva suttantoti? Āmantā. Aṭṭhamako puggalo bāhiro puthujjanapakkhe ṭhitoti? Na hevaṃ vattabbe…pe… tena hi aṭṭhamakassa puggalassa atthi pañcindriyānīti.
അട്ഠമകസ്സ ഇന്ദ്രിയകഥാ നിട്ഠിതാ.
Aṭṭhamakassa indriyakathā niṭṭhitā.
൩. തതിയവഗ്ഗോ
3. Tatiyavaggo
Footnotes:
Related texts:
അട്ഠകഥാ • Aṭṭhakathā / അഭിധമ്മപിടക (അട്ഠകഥാ) • Abhidhammapiṭaka (aṭṭhakathā) / പഞ്ചപകരണ-അട്ഠകഥാ • Pañcapakaraṇa-aṭṭhakathā / ൬. അട്ഠമകസ്സ ഇന്ദ്രിയകഥാവണ്ണനാ • 6. Aṭṭhamakassa indriyakathāvaṇṇanā
ടീകാ • Tīkā / അഭിധമ്മപിടക (ടീകാ) • Abhidhammapiṭaka (ṭīkā) / പഞ്ചപകരണ-മൂലടീകാ • Pañcapakaraṇa-mūlaṭīkā / ൬. അട്ഠമകസ്സ ഇന്ദ്രിയകഥാവണ്ണനാ • 6. Aṭṭhamakassa indriyakathāvaṇṇanā
ടീകാ • Tīkā / അഭിധമ്മപിടക (ടീകാ) • Abhidhammapiṭaka (ṭīkā) / പഞ്ചപകരണ-അനുടീകാ • Pañcapakaraṇa-anuṭīkā / ൬. അട്ഠമകസ്സ ഇന്ദ്രിയകഥാവണ്ണനാ • 6. Aṭṭhamakassa indriyakathāvaṇṇanā
