| Library / Tipiṭaka / તિપિટક • Tipiṭaka / પાચિત્યાદિયોજનાપાળિ • Pācityādiyojanāpāḷi |
૮. અટ્ઠમસિક્ખાપદં
8. Aṭṭhamasikkhāpadaṃ
૯૧૬. અટ્ઠમે યે નાટકં નાટેન્તિ, તે નટા નામાતિ યોજના. ઇમિના નટકં નાટેન્તીતિ નટાતિ વચનત્થં દસ્સેતિ. યે નચ્ચન્તિ, તે નાટકા નામાતિ યોજના. ઇમિના સયં નટન્તીતિ નાટકાતિ વચનત્થં દીપેતિ. વંસવરત્તાદીસૂતિ એત્થ વંસો નામ વેણુ. વરત્તા નામ નદ્ધિકા. આદિસદ્દેન રજ્જુઆદયો સઙ્ગણ્હાતિ. યે લઙ્ઘનકમ્મં કરોન્તિ, તે લઙ્ઘકા નામાતિ યોજના. માયાકારાતિ એત્થ માયા નામ મયનામકેન અસુરેન સુરે ચલયિતું કતત્તા મયસ્સ એસાતિ માયા, તં કરોતીતિ માયાકારો, મયનામકો અસુરોયેવ. અઞ્ઞે પન રૂળ્હીવસેન ‘‘માયાકારા’’તિ વુચ્ચન્તિ. સોકેન ઝાયનં ડય્હનં સોકજ્ઝાયં, સુરાનં સોકજ્ઝાયં કરોતીતિ સોકજ્ઝાયિકો, મયનામકો અસુરોયેવ. અઞ્ઞે પન રૂળ્હીવસેન ‘‘સોકજ્ઝાયિકા’’તિ વુચ્ચન્તિ. ઇતિ ઇમમત્થં દસ્સેતું વુત્તં ‘‘સોકજ્ઝાયિકા નામ માયાકારા’’તિ. કુમ્ભથુણિકા નામાતિ એત્થ વિસ્સટ્ઠત્તા થવીયતીતિ થુણો, સદ્દો. કુમ્ભસ્સ થુણો કુમ્ભથુણો. તેન કીળન્તીતિ કુમ્ભથુણિકા, ઇતિ ઇમમત્થં દસ્સેતિ ‘‘ઘટકેન કીળનકા’’તિ ઇમિના. બિમ્બિસકન્તિ ચતુરસ્સઅમ્બણતાળનં, તં વાદેન્તીતિ બિમ્બિસકવાદકાતિ. અટ્ઠમં.
916. Aṭṭhame ye nāṭakaṃ nāṭenti, te naṭā nāmāti yojanā. Iminā naṭakaṃ nāṭentīti naṭāti vacanatthaṃ dasseti. Ye naccanti, te nāṭakā nāmāti yojanā. Iminā sayaṃ naṭantīti nāṭakāti vacanatthaṃ dīpeti. Vaṃsavarattādīsūti ettha vaṃso nāma veṇu. Varattā nāma naddhikā. Ādisaddena rajjuādayo saṅgaṇhāti. Ye laṅghanakammaṃ karonti, te laṅghakā nāmāti yojanā. Māyākārāti ettha māyā nāma mayanāmakena asurena sure calayituṃ katattā mayassa esāti māyā, taṃ karotīti māyākāro, mayanāmako asuroyeva. Aññe pana rūḷhīvasena ‘‘māyākārā’’ti vuccanti. Sokena jhāyanaṃ ḍayhanaṃ sokajjhāyaṃ, surānaṃ sokajjhāyaṃ karotīti sokajjhāyiko, mayanāmako asuroyeva. Aññe pana rūḷhīvasena ‘‘sokajjhāyikā’’ti vuccanti. Iti imamatthaṃ dassetuṃ vuttaṃ ‘‘sokajjhāyikā nāma māyākārā’’ti. Kumbhathuṇikā nāmāti ettha vissaṭṭhattā thavīyatīti thuṇo, saddo. Kumbhassa thuṇo kumbhathuṇo. Tena kīḷantīti kumbhathuṇikā, iti imamatthaṃ dasseti ‘‘ghaṭakena kīḷanakā’’ti iminā. Bimbisakanti caturassaambaṇatāḷanaṃ, taṃ vādentīti bimbisakavādakāti. Aṭṭhamaṃ.
Related texts:
તિપિટક (મૂલ) • Tipiṭaka (Mūla) / વિનયપિટક • Vinayapiṭaka / ભિક્ખુનીવિભઙ્ગ • Bhikkhunīvibhaṅga / ૮. અટ્ઠમસિક્ખાપદં • 8. Aṭṭhamasikkhāpadaṃ
અટ્ઠકથા • Aṭṭhakathā / વિનયપિટક (અટ્ઠકથા) • Vinayapiṭaka (aṭṭhakathā) / ભિક્ખુનીવિભઙ્ગ-અટ્ઠકથા • Bhikkhunīvibhaṅga-aṭṭhakathā / ૮. અટ્ઠમસિક્ખાપદવણ્ણના • 8. Aṭṭhamasikkhāpadavaṇṇanā
ટીકા • Tīkā / વિનયપિટક (ટીકા) • Vinayapiṭaka (ṭīkā) / સારત્થદીપની-ટીકા • Sāratthadīpanī-ṭīkā / ૩. નગ્ગવગ્ગવણ્ણના • 3. Naggavaggavaṇṇanā
ટીકા • Tīkā / વિનયપિટક (ટીકા) • Vinayapiṭaka (ṭīkā) / વજિરબુદ્ધિ-ટીકા • Vajirabuddhi-ṭīkā / ૮. અટ્ઠમસિક્ખાપદવણ્ણના • 8. Aṭṭhamasikkhāpadavaṇṇanā
ટીકા • Tīkā / વિનયપિટક (ટીકા) • Vinayapiṭaka (ṭīkā) / વિમતિવિનોદની-ટીકા • Vimativinodanī-ṭīkā / ૧. પઠમાદિસિક્ખાપદવણ્ણના • 1. Paṭhamādisikkhāpadavaṇṇanā
