| Library / Tipiṭaka / ཏིཔིཊཀ • Tipiṭaka / བྷིཀྑུནཱིཝིབྷངྒ • Bhikkhunīvibhaṅga |
༨. ཨཊྛམསིཀྑཱཔདཾ
8. Aṭṭhamasikkhāpadaṃ
༨༦༩. ཏེན སམཡེན བུདྡྷོ བྷགཝཱ སཱཝཏྠིཡཾ ཝིཧརཏི ཛེཏཝནེ ཨནཱཐཔིཎྜིཀསྶ ཨཱརཱམེ། ཏེན ཁོ པན སམཡེན བྷདྡཱཡ ཀཱཔིལཱནིཡཱ ཨནྟེཝཱསིནཱི བྷིཀྑུནཱི བྷདྡཾ ཀཱཔིལཱནིཾ སཀྐཙྩཾ ཨུཔཊྛེཏི། བྷདྡཱ ཀཱཔིལཱནཱི བྷིཀྑུནིཡོ ཨེཏདཝོཙ – ‘‘ཨཡཾ མཾ, ཨཡྻེ, བྷིཀྑུནཱི སཀྐཙཾ ཨུཔཊྛེཏི, ཨིམིསྶཱཧཾ ཙཱིཝརཾ དསྶཱམཱི’’ཏི། ཨཐ ཁོ སཱ བྷིཀྑུནཱི དུགྒཧིཏེན དཱུཔདྷཱརིཏེན པརཾ ཨུཛ྄ཛྷཱཔེསི – ‘‘ཨཧཾ ཀིརཱཡྻེ, ཨཡྻཾ ན སཀྐཙྩཾ ཨུཔཊྛེམི, ན ཀིར མེ ཨཡྻཱ ཙཱིཝརཾ དསྶཏཱི’’ཏི། ཡཱ ཏཱ བྷིཀྑུནིཡོ ཨཔྤིཙྪཱ…པེ॰… ཏཱ ཨུཛ྄ཛྷཱཡནྟི ཁིཡྻནྟི ཝིཔཱཙེནྟི – ‘‘ཀཐཉྷི ནཱམ བྷིཀྑུནཱི དུགྒཧིཏེན དཱུཔདྷཱརིཏེན པརཾ ཨུཛ྄ཛྷཱཔེསྶཏཱི’’ཏི…པེ॰… སཙྩཾ ཀིར, བྷིཀྑཝེ, བྷིཀྑུནཱི དུགྒཧིཏེན དཱུཔདྷཱརིཏེན པརཾ ཨུཛ྄ཛྷཱཔེཏཱིཏི 1? ‘‘སཙྩཾ, བྷགཝཱ’’ཏི། ཝིགརཧི བུདྡྷོ བྷགཝཱ…པེ॰… ཀཐཉྷི ནཱམ, བྷིཀྑཝེ, བྷིཀྑུནཱི དུགྒཧིཏེན དཱུཔདྷཱརིཏེན པརཾ ཨུཛ྄ཛྷཱཔེསྶཏི! ནེཏཾ, བྷིཀྑཝེ, ཨཔྤསནྣཱནཾ ཝཱ པསཱདཱཡ…པེ॰… ཨེཝཉྩ པན, བྷིཀྑཝེ, བྷིཀྑུནིཡོ ཨིམཾ སིཀྑཱཔདཾ ཨུདྡིསནྟུ –
869. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena bhaddāya kāpilāniyā antevāsinī bhikkhunī bhaddaṃ kāpilāniṃ sakkaccaṃ upaṭṭheti. Bhaddā kāpilānī bhikkhuniyo etadavoca – ‘‘ayaṃ maṃ, ayye, bhikkhunī sakkacaṃ upaṭṭheti, imissāhaṃ cīvaraṃ dassāmī’’ti. Atha kho sā bhikkhunī duggahitena dūpadhāritena paraṃ ujjhāpesi – ‘‘ahaṃ kirāyye, ayyaṃ na sakkaccaṃ upaṭṭhemi, na kira me ayyā cīvaraṃ dassatī’’ti. Yā tā bhikkhuniyo appicchā…pe… tā ujjhāyanti khiyyanti vipācenti – ‘‘kathañhi nāma bhikkhunī duggahitena dūpadhāritena paraṃ ujjhāpessatī’’ti…pe… saccaṃ kira, bhikkhave, bhikkhunī duggahitena dūpadhāritena paraṃ ujjhāpetīti 2? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma, bhikkhave, bhikkhunī duggahitena dūpadhāritena paraṃ ujjhāpessati! Netaṃ, bhikkhave, appasannānaṃ vā pasādāya…pe… evañca pana, bhikkhave, bhikkhuniyo imaṃ sikkhāpadaṃ uddisantu –
༨༧༠. ‘‘ཡཱ པན བྷིཀྑུནཱི དུགྒཧིཏེན དཱུཔདྷཱརིཏེན པརཾ ཨུཛ྄ཛྷཱཔེཡྻ, པཱཙིཏྟིཡ’’ནྟི།
870.‘‘Yā pana bhikkhunī duggahitena dūpadhāritena paraṃ ujjhāpeyya, pācittiya’’nti.
༨༧༡. ཡཱ པནཱཏི ཡཱ ཡཱདིསཱ…པེ॰… བྷིཀྑུནཱིཏི…པེ॰… ཨཡཾ ཨིམསྨིཾ ཨཏྠེ ཨདྷིཔྤེཏཱ བྷིཀྑུནཱིཏི།
871.Yāpanāti yā yādisā…pe… bhikkhunīti…pe… ayaṃ imasmiṃ atthe adhippetā bhikkhunīti.
དཱུཔདྷཱརིཏེནཱཏི ཨཉྙཐཱ ཨུཔདྷཱརིཏེན།
Dūpadhāritenāti aññathā upadhāritena.
པརནྟི ཨུཔསམྤནྣཾ ཨུཛ྄ཛྷཱཔེཏི, ཨཱཔཏྟི པཱཙིཏྟིཡསྶ།
Paranti upasampannaṃ ujjhāpeti, āpatti pācittiyassa.
༨༧༢. ཨུཔསམྤནྣཱཡ ཨུཔསམྤནྣསཉྙཱ ཨུཛ྄ཛྷཱཔེཏི, ཨཱཔཏྟི པཱཙིཏྟིཡསྶ། ཨུཔསམྤནྣཱཡ ཝེམཏིཀཱ ཨུཛ྄ཛྷཱཔེཏི, ཨཱཔཏྟི པཱཙིཏྟིཡསྶ། ཨུཔསམྤནྣཱཡ ཨནུཔསམྤནྣསཉྙཱ ཨུཛ྄ཛྷཱཔེཏི, ཨཱཔཏྟི པཱཙིཏྟིཡསྶ།
872. Upasampannāya upasampannasaññā ujjhāpeti, āpatti pācittiyassa. Upasampannāya vematikā ujjhāpeti, āpatti pācittiyassa. Upasampannāya anupasampannasaññā ujjhāpeti, āpatti pācittiyassa.
ཨནུཔསམྤནྣཾ ཨུཛ྄ཛྷཱཔེཏི, ཨཱཔཏྟི དུཀྐཊསྶ། ཨནུཔསམྤནྣཱཡ ཨུཔསམྤནྣསཉྙཱ, ཨཱཔཏྟི དུཀྐཊསྶ། ཨནུཔསམྤནྣཱཡ ཝེམཏིཀཱ, ཨཱཔཏྟི དུཀྐཊསྶ། ཨནུཔསམྤནྣཱཡ ཨནུཔསམྤནྣསཉྙཱ, ཨཱཔཏྟི དུཀྐཊསྶ།
Anupasampannaṃ ujjhāpeti, āpatti dukkaṭassa. Anupasampannāya upasampannasaññā, āpatti dukkaṭassa. Anupasampannāya vematikā, āpatti dukkaṭassa. Anupasampannāya anupasampannasaññā, āpatti dukkaṭassa.
༨༧༣. ཨནཱཔཏྟི ཨུམྨཏྟིཀཱཡ, ཨཱདིཀམྨིཀཱཡཱཏི།
873. Anāpatti ummattikāya, ādikammikāyāti.
ཨཊྛམསིཀྑཱཔདཾ ནིཊྛིཏཾ།
Aṭṭhamasikkhāpadaṃ niṭṭhitaṃ.
Footnotes:
Related texts:
ཨཊྛཀཐཱ • Aṭṭhakathā / ཝིནཡཔིཊཀ (ཨཊྛཀཐཱ) • Vinayapiṭaka (aṭṭhakathā) / བྷིཀྑུནཱིཝིབྷངྒ-ཨཊྛཀཐཱ • Bhikkhunīvibhaṅga-aṭṭhakathā / ༨. ཨཊྛམསིཀྑཱཔདཝཎྞནཱ • 8. Aṭṭhamasikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝཛིརབུདྡྷི-ཊཱིཀཱ • Vajirabuddhi-ṭīkā / ༨. ཨཊྛམསིཀྑཱཔདཝཎྞནཱ • 8. Aṭṭhamasikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝིམཏིཝིནོདནཱི-ཊཱིཀཱ • Vimativinodanī-ṭīkā / ༡. པཋམཱདིསིཀྑཱཔདཝཎྞནཱ • 1. Paṭhamādisikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / པཱཙིཏྱཱདིཡོཛནཱཔཱལི༹ • Pācityādiyojanāpāḷi / ༨. ཨཊྛམསིཀྑཱཔདཾ • 8. Aṭṭhamasikkhāpadaṃ
