| Library / Tipiṭaka / တိပိဋက • Tipiṭaka / ကင္ခာဝိတရဏီ-ပုရာဏ-ဋီကာ • Kaṅkhāvitaraṇī-purāṇa-ṭīkā |
၈. အဋ္ဌမဝဂ္ဂဝဏ္ဏနာ
8. Aṭṭhamavaggavaṇṇanā
ပဌမဒုတိယတတိယေသု ‘‘ဂိဟိဂတာ’’တိ ဝာ ‘‘ကုမာရိဘူတာ’’တိ ဝာ န ဝတ္တဗ္ဗာ။ ဝဒန္တိ စေ, ကမ္မံ ကုပ္ပတိ။
Paṭhamadutiyatatiyesu ‘‘gihigatā’’ti vā ‘‘kumāribhūtā’’ti vā na vattabbā. Vadanti ce, kammaṃ kuppati.
ဧကာဒသမေ ဆန္ဒံ အဝိသ္သဇ္ဇေတ္ဝာတိ ‘‘ယထာသုခ’’န္တိ အဝတ္ဝာ။ ဧတ္ထ ပန အယံ ဝိနိစ္ဆယော – ‘‘ပာရိဝာသိကဆန္ဒဒာနေနာ’’တိ ဣဒံ ဥဒ္ဓရိတ္ဝာ ‘‘ဝုဋ္ဌိတာယ ပရိသာယာ’’တိ (ပာစိ. ၁၁၆၈) ပဒဘာဇနံ ဝုတ္တံ။ ဧတသ္သ ပန သမန္တပာသာဒိကာယံ ‘‘ဝုဋ္ဌိတာယ ပရိသာယာတိ ဆန္ဒံ ဝိသ္သဇ္ဇေတ္ဝာ ကာယေန ဝာ ဝာစာယ ဝာ ဆန္ဒဝိသ္သဇ္ဇနမတ္တေန ဝာ ဝုဋ္ဌိတာယာ’’တိ (ပာစိ. အဋ္ဌ. ၁၁၆၇) ဝုတ္တံ။ ဣဓ ဆန္ဒသ္သ ပန အဝိသ္သဋ္ဌတ္တာ ကမ္မံ ကာတုံ ဝဋ္ဋတီတိ ဝုတ္တံ။ တသ္မာ ဆန္ဒံ အဝိသ္သဇ္ဇေတ္ဝာဝ ဒ္ဝာဒသဟတ္ထပာသေ ဝိဟရိတ္ဝာ ပုန သန္နိပာတကရဏဉ္စ ဝဋ္ဋတီတိ လိခိတံ။
Ekādasame chandaṃ avissajjetvāti ‘‘yathāsukha’’nti avatvā. Ettha pana ayaṃ vinicchayo – ‘‘pārivāsikachandadānenā’’ti idaṃ uddharitvā ‘‘vuṭṭhitāya parisāyā’’ti (pāci. 1168) padabhājanaṃ vuttaṃ. Etassa pana samantapāsādikāyaṃ ‘‘vuṭṭhitāya parisāyāti chandaṃ vissajjetvā kāyena vā vācāya vā chandavissajjanamattena vā vuṭṭhitāyā’’ti (pāci. aṭṭha. 1167) vuttaṃ. Idha chandassa pana avissaṭṭhattā kammaṃ kātuṃ vaṭṭatīti vuttaṃ. Tasmā chandaṃ avissajjetvāva dvādasahatthapāse viharitvā puna sannipātakaraṇañca vaṭṭatīti likhitaṃ.
အဋ္ဌမဝဂ္ဂဝဏ္ဏနာ နိဋ္ဌိတာ။
Aṭṭhamavaggavaṇṇanā niṭṭhitā.
