| Library / Tipiṭaka / તિપિટક • Tipiṭaka / અઙ્ગુત્તરનિકાય • Aṅguttaranikāya |
૫. અટ્ઠઙ્ગિકસુત્તં
5. Aṭṭhaṅgikasuttaṃ
૨૦૫. ‘‘અસપ્પુરિસઞ્ચ વો, ભિક્ખવે, દેસેસ્સામિ, અસપ્પુરિસેન અસપ્પુરિસતરઞ્ચ; સપ્પુરિસઞ્ચ, સપ્પુરિસેન સપ્પુરિસતરઞ્ચ. તં સુણાથ…પે॰….
205. ‘‘Asappurisañca vo, bhikkhave, desessāmi, asappurisena asappurisatarañca; sappurisañca, sappurisena sappurisatarañca. Taṃ suṇātha…pe….
‘‘કતમો ચ, ભિક્ખવે, અસપ્પુરિસો? ઇધ, ભિક્ખવે, એકચ્ચો મિચ્છાદિટ્ઠિકો હોતિ, મિચ્છાસઙ્કપ્પો હોતિ, મિચ્છાવાચો હોતિ, મિચ્છાકમ્મન્તો હોતિ, મિચ્છાઆજીવો હોતિ, મિચ્છાવાયામો હોતિ, મિચ્છાસતિ હોતિ, મિચ્છાસમાધિ હોતિ. અયં વુચ્ચતિ, ભિક્ખવે, અસપ્પુરિસો.
‘‘Katamo ca, bhikkhave, asappuriso? Idha, bhikkhave, ekacco micchādiṭṭhiko hoti, micchāsaṅkappo hoti, micchāvāco hoti, micchākammanto hoti, micchāājīvo hoti, micchāvāyāmo hoti, micchāsati hoti, micchāsamādhi hoti. Ayaṃ vuccati, bhikkhave, asappuriso.
‘‘કતમો ચ, ભિક્ખવે, અસપ્પુરિસેન અસપ્પુરિસતરો? ઇધ ભિક્ખવે, એકચ્ચો અત્તના ચ મિચ્છાદિટ્ઠિકો હોતિ, પરઞ્ચ મિચ્છાદિટ્ઠિયા સમાદપેતિ; અત્તના ચ મિચ્છાસઙ્કપ્પો હોતિ, પરઞ્ચ મિચ્છાસઙ્કપ્પે સમાદપેતિ; અત્તના ચ મિચ્છાવાચો હોતિ, પરઞ્ચ મિચ્છાવાચાય સમાદપેતિ; અત્તના ચ મિચ્છાકમ્મન્તો હોતિ, પરઞ્ચ મિચ્છાકમ્મન્તે સમાદપેતિ; અત્તના ચ મિચ્છાઆજીવો હોતિ, પરઞ્ચ મિચ્છાઆજીવે સમાદપેતિ; અત્તના ચ મિચ્છાવાયામો હોતિ, પરઞ્ચ મિચ્છાવાયામે સમાદપેતિ; અત્તના ચ મિચ્છાસતિ હોતિ, પરઞ્ચ મિચ્છાસતિયા સમાદપેતિ; અત્તના ચ મિચ્છાસમાધિ હોતિ, પરઞ્ચ મિચ્છાસમાધિમ્હિ સમાદપેતિ. અયં વુચ્ચતિ, ભિક્ખવે, અસપ્પુરિસેન અસપ્પુરિસતરો.
‘‘Katamo ca, bhikkhave, asappurisena asappurisataro? Idha bhikkhave, ekacco attanā ca micchādiṭṭhiko hoti, parañca micchādiṭṭhiyā samādapeti; attanā ca micchāsaṅkappo hoti, parañca micchāsaṅkappe samādapeti; attanā ca micchāvāco hoti, parañca micchāvācāya samādapeti; attanā ca micchākammanto hoti, parañca micchākammante samādapeti; attanā ca micchāājīvo hoti, parañca micchāājīve samādapeti; attanā ca micchāvāyāmo hoti, parañca micchāvāyāme samādapeti; attanā ca micchāsati hoti, parañca micchāsatiyā samādapeti; attanā ca micchāsamādhi hoti, parañca micchāsamādhimhi samādapeti. Ayaṃ vuccati, bhikkhave, asappurisena asappurisataro.
‘‘કતમો ચ, ભિક્ખવે, સપ્પુરિસો? ઇધ, ભિક્ખવે, એકચ્ચો સમ્માદિટ્ઠિકો હોતિ, સમ્માસઙ્કપ્પો હોતિ, સમ્માવાચો હોતિ, સમ્માકમ્મન્તો હોતિ, સમ્માઆજીવો હોતિ, સમ્માવાયામો હોતિ, સમ્માસતિ હોતિ, સમ્માસમાધિ હોતિ. અયં વુચ્ચતિ, ભિક્ખવે, સપ્પુરિસો.
‘‘Katamo ca, bhikkhave, sappuriso? Idha, bhikkhave, ekacco sammādiṭṭhiko hoti, sammāsaṅkappo hoti, sammāvāco hoti, sammākammanto hoti, sammāājīvo hoti, sammāvāyāmo hoti, sammāsati hoti, sammāsamādhi hoti. Ayaṃ vuccati, bhikkhave, sappuriso.
‘‘કતમો ચ, ભિક્ખવે, સપ્પુરિસેન સપ્પુરિસતરો? ઇધ, ભિક્ખવે, એકચ્ચો અત્તના ચ સમ્માદિટ્ઠિકો હોતિ, પરઞ્ચ સમ્માદિટ્ઠિયા સમાદપેતિ; અત્તના ચ સમ્માસઙ્કપ્પો હોતિ, પરઞ્ચ સમ્માસઙ્કપ્પે સમાદપેતિ; અત્તના ચ સમ્માવાચો હોતિ, પરઞ્ચ સમ્માવાચાય સમાદપેતિ; અત્તના ચ સમ્માકમ્મન્તો હોતિ, પરઞ્ચ સમ્માકમ્મન્તે સમાદપેતિ; અત્તના ચ સમ્માઆજીવો હોતિ, પરઞ્ચ સમ્માઆજીવે સમાદપેતિ; અત્તના ચ સમ્માવાયામો હોતિ, પરઞ્ચ સમ્માવાયામે સમાદપેતિ; અત્તના ચ સમ્માસતિ હોતિ, પરઞ્ચ સમ્માસતિયા સમાદપેતિ; અત્તના ચ સમ્માસમાધિ હોતિ, પરઞ્ચ સમ્માસમાધિમ્હિ સમાદપેતિ. અયં વુચ્ચતિ, ભિક્ખવે, સપ્પુરિસેન સપ્પુરિસતરો’’તિ. પઞ્ચમં.
‘‘Katamo ca, bhikkhave, sappurisena sappurisataro? Idha, bhikkhave, ekacco attanā ca sammādiṭṭhiko hoti, parañca sammādiṭṭhiyā samādapeti; attanā ca sammāsaṅkappo hoti, parañca sammāsaṅkappe samādapeti; attanā ca sammāvāco hoti, parañca sammāvācāya samādapeti; attanā ca sammākammanto hoti, parañca sammākammante samādapeti; attanā ca sammāājīvo hoti, parañca sammāājīve samādapeti; attanā ca sammāvāyāmo hoti, parañca sammāvāyāme samādapeti; attanā ca sammāsati hoti, parañca sammāsatiyā samādapeti; attanā ca sammāsamādhi hoti, parañca sammāsamādhimhi samādapeti. Ayaṃ vuccati, bhikkhave, sappurisena sappurisataro’’ti. Pañcamaṃ.
Related texts:
ટીકા • Tīkā / સુત્તપિટક (ટીકા) • Suttapiṭaka (ṭīkā) / અઙ્ગુત્તરનિકાય (ટીકા) • Aṅguttaranikāya (ṭīkā) / ૧-૧૦. સિક્ખાપદસુત્તાદિવણ્ણના • 1-10. Sikkhāpadasuttādivaṇṇanā
