| Library / Tipiṭaka / ತಿಪಿಟಕ • Tipiṭaka / ಪಟಿಸಮ್ಭಿದಾಮಗ್ಗಪಾಳಿ • Paṭisambhidāmaggapāḷi |
೩೯. ಅತ್ಥಸನ್ದಸ್ಸನಞಾಣನಿದ್ದೇಸೋ
39. Atthasandassanañāṇaniddeso
೯೦. ಕಥಂ ನಾನಾಧಮ್ಮಪ್ಪಕಾಸನತಾ ಪಞ್ಞಾ ಅತ್ಥಸನ್ದಸ್ಸನೇ ಞಾಣಂ? ನಾನಾಧಮ್ಮಾತಿ ಪಞ್ಚಕ್ಖನ್ಧಾ, ದ್ವಾದಸಾಯತನಾನಿ, ಅಟ್ಠಾರಸ ಧಾತುಯೋ, ಕುಸಲಾ ಧಮ್ಮಾ, ಅಕುಸಲಾ ಧಮ್ಮಾ, ಅಬ್ಯಾಕತಾ ಧಮ್ಮಾ, ಕಾಮಾವಚರಾ ಧಮ್ಮಾ, ರೂಪಾವಚರಾ ಧಮ್ಮಾ, ಅರೂಪಾವಚರಾ ಧಮ್ಮಾ, ಅಪರಿಯಾಪನ್ನಾ ಧಮ್ಮಾ।
90. Kathaṃ nānādhammappakāsanatā paññā atthasandassane ñāṇaṃ? Nānādhammāti pañcakkhandhā, dvādasāyatanāni, aṭṭhārasa dhātuyo, kusalā dhammā, akusalā dhammā, abyākatā dhammā, kāmāvacarā dhammā, rūpāvacarā dhammā, arūpāvacarā dhammā, apariyāpannā dhammā.
ಪಕಾಸನತಾತಿ ರೂಪಂ ಅನಿಚ್ಚತೋ ಪಕಾಸೇತಿ, ರೂಪಂ ದುಕ್ಖತೋ ಪಕಾಸೇತಿ, ರೂಪಂ ಅನತ್ತತೋ ಪಕಾಸೇತಿ। ವೇದನಂ…ಪೇ॰… ಸಞ್ಞಂ… ಸಙ್ಖಾರೇ… ವಿಞ್ಞಾಣಂ… ಚಕ್ಖುಂ…ಪೇ॰… ಜರಾಮರಣಂ ಅನಿಚ್ಚತೋ ಪಕಾಸೇತಿ, ಜರಾಮರಣಂ ದುಕ್ಖತೋ ಪಕಾಸೇತಿ, ಜರಾಮರಣಂ ಅನತ್ತತೋ ಪಕಾಸೇತಿ।
Pakāsanatāti rūpaṃ aniccato pakāseti, rūpaṃ dukkhato pakāseti, rūpaṃ anattato pakāseti. Vedanaṃ…pe… saññaṃ… saṅkhāre… viññāṇaṃ… cakkhuṃ…pe… jarāmaraṇaṃ aniccato pakāseti, jarāmaraṇaṃ dukkhato pakāseti, jarāmaraṇaṃ anattato pakāseti.
ಅತ್ಥಸನ್ದಸ್ಸನೇತಿ ಕಾಮಚ್ಛನ್ದಂ ಪಜಹನ್ತೋ ನೇಕ್ಖಮ್ಮತ್ಥಂ ಸನ್ದಸ್ಸೇತಿ। ಬ್ಯಾಪಾದಂ ಪಜಹನ್ತೋ ಅಬ್ಯಾಪಾದತ್ಥಂ ಸನ್ದಸ್ಸೇತಿ। ಥಿನಮಿದ್ಧಂ ಪಜಹನ್ತೋ ಆಲೋಕಸಞ್ಞತ್ಥಂ ಸನ್ದಸ್ಸೇತಿ। ಉದ್ಧಚ್ಚಂ ಪಜಹನ್ತೋ ಅವಿಕ್ಖೇಪತ್ಥಂ ಸನ್ದಸ್ಸೇತಿ। ವಿಚಿಕಿಚ್ಛಂ ಪಜಹನ್ತೋ ಧಮ್ಮವವತ್ಥಾನತ್ಥಂ ಸನ್ದಸ್ಸೇತಿ। ಅವಿಜ್ಜಂ ಪಜಹನ್ತೋ ಞಾಣತ್ಥಂ ಸನ್ದಸ್ಸೇತಿ। ಅರತಿಂ ಪಜಹನ್ತೋ ಪಾಮೋಜ್ಜತ್ಥಂ ಸನ್ದಸ್ಸೇತಿ। ನೀವರಣೇ ಪಜಹನ್ತೋ ಪಠಮಝಾನತ್ಥಂ ಸನ್ದಸ್ಸೇತಿ …ಪೇ॰… ಸಬ್ಬಕಿಲೇಸೇ ಪಜಹನ್ತೋ ಅರಹತ್ತಮಗ್ಗತ್ಥಂ ಸನ್ದಸ್ಸೇತಿ। ತಂ ಞಾತಟ್ಠೇನ ಞಾಣಂ, ಪಜಾನನಟ್ಠೇನ ಪಞ್ಞಾ। ತೇನ ವುಚ್ಚತಿ – ‘‘ನಾನಾಧಮ್ಮಪಕಾಸನತಾ ಪಞ್ಞಾ ಅತ್ಥಸನ್ದಸ್ಸನೇ ಞಾಣಂ’’।
Atthasandassaneti kāmacchandaṃ pajahanto nekkhammatthaṃ sandasseti. Byāpādaṃ pajahanto abyāpādatthaṃ sandasseti. Thinamiddhaṃ pajahanto ālokasaññatthaṃ sandasseti. Uddhaccaṃ pajahanto avikkhepatthaṃ sandasseti. Vicikicchaṃ pajahanto dhammavavatthānatthaṃ sandasseti. Avijjaṃ pajahanto ñāṇatthaṃ sandasseti. Aratiṃ pajahanto pāmojjatthaṃ sandasseti. Nīvaraṇe pajahanto paṭhamajhānatthaṃ sandasseti …pe… sabbakilese pajahanto arahattamaggatthaṃ sandasseti. Taṃ ñātaṭṭhena ñāṇaṃ, pajānanaṭṭhena paññā. Tena vuccati – ‘‘nānādhammapakāsanatā paññā atthasandassane ñāṇaṃ’’.
ಅತ್ಥಸನ್ದಸ್ಸನಞಾಣನಿದ್ದೇಸೋ ನವತಿಂಸತಿಮೋ।
Atthasandassanañāṇaniddeso navatiṃsatimo.
Related texts:
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಖುದ್ದಕನಿಕಾಯ (ಅಟ್ಠಕಥಾ) • Khuddakanikāya (aṭṭhakathā) / ಪಟಿಸಮ್ಭಿದಾಮಗ್ಗ-ಅಟ್ಠಕಥಾ • Paṭisambhidāmagga-aṭṭhakathā / ೩೯. ಅತ್ಥಸನ್ದಸ್ಸನಞಾಣನಿದ್ದೇಸವಣ್ಣನಾ • 39. Atthasandassanañāṇaniddesavaṇṇanā
