Library / Tipiṭaka / ཏིཔིཊཀ • Tipiṭaka / སཾཡུཏྟནིཀཱཡ (ཊཱིཀཱ) • Saṃyuttanikāya (ṭīkā) |
༢-༡༠. ཨཊྛསཏསུཏྟཱདིཝཎྞནཱ
2-10. Aṭṭhasatasuttādivaṇṇanā
༢༧༠-༢༧༨. ཝེདནཱནཾ ཨཊྛཱདྷིཀཾ སཏཾ, ཏསྶ ཨཊྛསཏསྶ ཏབྦྷཱཝསྶ པརིཡཱཡོ ཀཱརཎཾ ཨེཏྠ ཨཏྠཱིཏི ཨཊྛསཏཔརིཡཱཡོ, སུཏྟཾ། ཏེནཱཧ ‘‘ཨཊྛསཏསྶ ཀཱརཎབྷཱུཏ’’ནྟི། དྷམྨཀཱརཎནྟི པརིཡཏྟིདྷམྨབྷཱུཏཾ ཀཱརཎཾ། ཀཱཡིཀཱཏི པཉྩདྭཱརཀཱཡིཀཱ། ཏེནཱཧ ‘‘ཀཱམཱཝཙརེཡེཝ ལབྦྷནྟཱི’’ཏི, ཀཱམབྷཱུམིཀཱཏི ཨཏྠོ། ཨརཱུཔཱཝཙརེ ནཏྠི, ཏིབྷཱུམིཀཱཏི ཨཏྠོ། ཏེནཱཧ – ‘‘ཨརཱུཔེ ཏིཀཙཏུཀྐཛ྄ཛྷཱནཾ ཨུཔྤཛྫཏི, ཏཉྩ ཁོ ལོཀུཏྟརཾ, ན ལོཀིཡ’’ནྟི། ཨིཏརཱ ཨུཔེཀྑཱཝེདནཱ། ཨུཔཝིཙརནྟི ཨུཔེཙྩ པཛྫནྟཱིཏི ཨཏྠོ། ཏཾསམྤཡུཏྟཱནནྟི ཝིཙཱརསམྤཡུཏྟཱནཾ།
270-278. Vedanānaṃ aṭṭhādhikaṃ sataṃ, tassa aṭṭhasatassa tabbhāvassa pariyāyo kāraṇaṃ ettha atthīti aṭṭhasatapariyāyo, suttaṃ. Tenāha ‘‘aṭṭhasatassa kāraṇabhūta’’nti. Dhammakāraṇanti pariyattidhammabhūtaṃ kāraṇaṃ. Kāyikāti pañcadvārakāyikā. Tenāha ‘‘kāmāvacareyeva labbhantī’’ti, kāmabhūmikāti attho. Arūpāvacare natthi, tibhūmikāti attho. Tenāha – ‘‘arūpe tikacatukkajjhānaṃ uppajjati, tañca kho lokuttaraṃ, na lokiya’’nti. Itarā upekkhāvedanā. Upavicaranti upecca pajjantīti attho. Taṃsampayuttānanti vicārasampayuttānaṃ.
པཊིལཱབྷཏོཏི པཊིལདྡྷབྷཱཝཏོ། སམནུཔསྶཏོཏི པཙྩཝེཀྑཏོ པསྶཏོ། ཨཏཱིཏཾ ཁཎཏྟཡཱཏིཀྐམེན ཨཏིཀྐནྟཾ, ནིརུདྡྷཔྤཏྟིཡཱ ནིརུདྡྷཾ, པཀཏིཝིཛཧནེན ཝིཔརིཎཏཾ། སམནུསྶརཏོཏི ཙིནྟཡཏོ། གེཧསྶིཏནྟི ཀཱམགུཎནིསྶིཏཾ། ཀཱམགུཎཱ ཧི ཨིདྷ གེཧནིསྶིཏདྷམྨེན གེཧཔརིཡཱཡེན ཝུཏྟཱ།
Paṭilābhatoti paṭiladdhabhāvato. Samanupassatoti paccavekkhato passato. Atītaṃ khaṇattayātikkamena atikkantaṃ, niruddhappattiyā niruddhaṃ, pakativijahanena vipariṇataṃ. Samanussaratoti cintayato. Gehassitanti kāmaguṇanissitaṃ. Kāmaguṇā hi idha gehanissitadhammena gehapariyāyena vuttā.
ཝིཔརིཎཱམཝིརཱགནིརོདྷནྟི ཝིཔརིཎཱམནཾ ཝིརཛྫནལཀྑཎཾ ནིརུཛ྄ཛྷནཉྩ ཝིདིཏྭཱ། པུབྦེཏི ཨཏཱིཏེ། ཨེཏརཧཱིཏི ཨིདཱནི ཝཏྟམཱནཱ། སམྨཔྤཉྙཱཡ པསྶཏོཏི ཝིཔསྶནཱཔཉྙཱཡ ཙེཝ མགྒཔཉྙཱཡ ཙ ཡཱཐཱཝཏོ པསྶཏོ། ཨུསྶུཀྐཱཔེཏུནྟི ཝིཔསྶནཾ པཊྛཔེཏྭཱ མགྒཔཊིཝེདྷཾ པཱཔེཏུཾ། ནིབྦཱནཾ ཨུདྡིསྶ པཝཏྟིཏཏྟཱ ནེཀྑམྨསྶིཏསོམནསྶཱནི ནཱམ། ལོཀཱམིསཔཊིསཾཡུཏྟཱནནྟི ཀཱམགུཎནིསྶིཏཱནཾ། ཏདཱཡཏནནྟི ཏཾ ཨཱཡཏནཾ ཏཾ ཀཱརཎཾ ཨརཧཏྟཾ། ཨནུཏྟརེསུ ཝིམོཀྑེསཱུཏི ཨརིཡཕལདྷམྨེསུ། པིཧནྟི ཨདྷིགམིཙྪཾ།
Vipariṇāmavirāganirodhanti vipariṇāmanaṃ virajjanalakkhaṇaṃ nirujjhanañca viditvā. Pubbeti atīte. Etarahīti idāni vattamānā. Sammappaññāya passatoti vipassanāpaññāya ceva maggapaññāya ca yāthāvato passato. Ussukkāpetunti vipassanaṃ paṭṭhapetvā maggapaṭivedhaṃ pāpetuṃ. Nibbānaṃ uddissa pavattitattā nekkhammassitasomanassāni nāma. Lokāmisapaṭisaṃyuttānanti kāmaguṇanissitānaṃ. Tadāyatananti taṃ āyatanaṃ taṃ kāraṇaṃ arahattaṃ. Anuttaresu vimokkhesūti ariyaphaladhammesu. Pihanti adhigamicchaṃ.
ཨུཔེཀྑཱཏི སོམནསྶརཧིཏཨཉྙཱཎུཔེཀྑཱ། བཱལྱཡོགཏོ བཱལསྶ, ཏཏོ ཨེཝ མཱུལ༹ྷསྶ པུཐུཛྫནསྶ། ཀིལེསོདྷཱིནཾ མགྒོདྷཱིཧི ཨཛིཏཏྟཱ ཨནོདྷིཛིནསྶ། སཏྟམབྷཝཱདིཏོ ཨུདྡྷཾ པཝཏྟནཝིཔཱཀསྶ ཨཛིཏཏྟཱ ཨཝིཔཱཀཛིནསྶ། ཨནེཀཱདཱིནཝེ ཝཊྚེ ཨཱདཱིནཝསྶ ཨཛཱནནེན ཨནཱདཱིནཝདསྶཱཝིནོ། པཊིཔཏྟིཔཊིཝེདྷབཱཧུསཙྩཱབྷཱཝེན ཨསྶུཏཝཏོ པུཐུཛྫནསྶ། རཱུཔཾ སཱ ནཱཏིཝཏྟཏི ན ཨཏིཀྐམཏི ཉཱཎསམྤཡུཏྟཱབྷཱཝཏོ། སབྦསངྒཱཧཀོཏི སབྦདྷམྨེ སངྒཎྷནཀོ། ཏཏིཡཱདཱིནི ཡཱཝ དསམཱ ཧེཊྛཱ ཝུཏྟནཡཏྟཱ ཨུཏྟཱནཏྠཱནེཝ།
Upekkhāti somanassarahitaaññāṇupekkhā. Bālyayogato bālassa, tato eva mūḷhassa puthujjanassa. Kilesodhīnaṃ maggodhīhi ajitattā anodhijinassa. Sattamabhavādito uddhaṃ pavattanavipākassa ajitattā avipākajinassa. Anekādīnave vaṭṭe ādīnavassa ajānanena anādīnavadassāvino. Paṭipattipaṭivedhabāhusaccābhāvena assutavato puthujjanassa. Rūpaṃ sā nātivattati na atikkamati ñāṇasampayuttābhāvato. Sabbasaṅgāhakoti sabbadhamme saṅgaṇhanako. Tatiyādīni yāva dasamā heṭṭhā vuttanayattā uttānatthāneva.
ཨཊྛསཏསུཏྟཱདིཝཎྞནཱ ནིཊྛིཏཱ།
Aṭṭhasatasuttādivaṇṇanā niṭṭhitā.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / སཾཡུཏྟནིཀཱཡ • Saṃyuttanikāya
༢. ཨཊྛསཏསུཏྟཾ • 2. Aṭṭhasatasuttaṃ
༣. ཨཉྙཏརབྷིཀྑུསུཏྟཾ • 3. Aññatarabhikkhusuttaṃ
༤. པུབྦསུཏྟཾ • 4. Pubbasuttaṃ
༥. ཉཱཎསུཏྟཾ • 5. Ñāṇasuttaṃ
༦. སམྦཧུལབྷིཀྑུསུཏྟཾ • 6. Sambahulabhikkhusuttaṃ
༧. པཋམསམཎབྲཱཧྨཎསུཏྟཾ • 7. Paṭhamasamaṇabrāhmaṇasuttaṃ
༨. དུཏིཡསམཎབྲཱཧྨཎསུཏྟཾ • 8. Dutiyasamaṇabrāhmaṇasuttaṃ
༩. ཏཏིཡསམཎབྲཱཧྨཎསུཏྟཾ • 9. Tatiyasamaṇabrāhmaṇasuttaṃ
༡༠. སུདྡྷིཀསུཏྟཾ • 10. Suddhikasuttaṃ
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / སཾཡུཏྟནིཀཱཡ (ཨཊྛཀཐཱ) • Saṃyuttanikāya (aṭṭhakathā) / ༢-༡༠. ཨཊྛསཏསུཏྟཱདིཝཎྞནཱ • 2-10. Aṭṭhasatasuttādivaṇṇanā