| Library / Tipiṭaka / ཏིཔིཊཀ • Tipiṭaka / སཾཡུཏྟནིཀཱཡ (ཊཱིཀཱ) • Saṃyuttanikāya (ṭīkā) |
༨. ལཀྑཎསཾཡུཏྟཾ
8. Lakkhaṇasaṃyuttaṃ
༡. པཋམཝགྒོ
1. Paṭhamavaggo
༡. ཨཊྛིསུཏྟཝཎྞནཱ
1. Aṭṭhisuttavaṇṇanā
༢༠༢. ཨཱཡསྨཱ ཙ ལཀྑཎོཏིཨཱདཱིསུ ‘‘ཀོ ནཱམཱཡསྨཱ ལཀྑཎོ, ཀསྨཱ ཙ ‘ལཀྑཎོ’ཏི ནཱམཾ ཨཧོསི, ཀོ ཙཱཡསྨཱ མོགྒལླཱནོ, ཀསྨཱ ཙ སིཏཾ པཱཏྭཱཀཱསཱི’’ཏི ཏཾ སབྦཾ པཀཱསེཏུཾ ‘‘ཡྭཱཡ’’ནྟིཨཱདི ཨཱརདྡྷཾ། ལཀྑཎསམྤནྣེནཱཏི པུརིསལཀྑཎསམྤནྣེན།
202.Āyasmāca lakkhaṇotiādīsu ‘‘ko nāmāyasmā lakkhaṇo, kasmā ca ‘lakkhaṇo’ti nāmaṃ ahosi, ko cāyasmā moggallāno, kasmā ca sitaṃ pātvākāsī’’ti taṃ sabbaṃ pakāsetuṃ ‘‘yvāya’’ntiādi āraddhaṃ. Lakkhaṇasampannenāti purisalakkhaṇasampannena.
ཨཱིསཾ ཧསིཏཾ ‘‘སིཏ’’ནྟི ཝུཙྩཏཱིཏི ཨཱཧ ‘‘མནྡཧསིཏ’’ནྟི། ཨཊྛིསངྑལིཀནྟི ནཡིདཾ ཨཝིཉྙཱཎཀཾ ཨཊྛིསངྑལིཀམཏྟཾ, ཨཐ ཁོ ཨེཀོ པེཏོཏི ཨཱཧ ‘‘པེཏལོཀེ ནིབྦཏྟ’’ནྟི། ཨེཏེ ཨཏྟབྷཱཝཱཏི པེཏཏྟབྷཱཝཱ། ན ཨཱཔཱཐཾ ཨཱགཙྪནྟཱིཏི དེཝཏྟབྷཱཝཱ ཝིཡ ན ཨཱཔཱཐཾ ཨཱགཙྪནྟི པཀཏིཡཱ། ཏེསཾ པན རུཙིཡཱ ཨཱཔཱཐཾ ཨཱགཙྪེཡྻུཾ མནུསྶཱནཾ། དུཀྑཱབྷིབྷཱུཏཱནཾ ཨནཱཐབྷཱཝདསྶནཔདཊྛཱནཱ ཀརུཎཱཏི ཨཱཧ ‘‘ཀཱརུཉྙེ ཀཏྟབྦེ’’ཏི། ཨཏྟནོ ཙ སམྤཏྟིཾ བུདྡྷཉཱཎསྶ ཙ སམྤཏྟིནྟི པཙྩེཀཾ སམྤཏྟིསདྡོ ཡོཛེཏབྦོ། ཏདུབྷཡཾ ཝིབྷཱཝེཏུཾ ‘‘ཏཾ ཧཱི’’ཏིཨཱདི ཝུཏྟཾ། ཏཏྠ ཨཏྟནོ སམྤཏྟིཾ ཨནུསྶརིཏྭཱ སིཏཾ པཱཏྭཱཀཱསཱིཏི པདཾ ཨཱནེཏྭཱ སམྦནྡྷིཏབྦཾ། དྷམྨདྷཱཏཱུཏི སབྦཉྙུཏཉྙཱཎཾ སནྡྷཱཡ ཝདཏི། དྷམྨདྷཱཏཱུཏི ཝཱ དྷམྨཱནཾ སབྷཱཝོ།
Īsaṃ hasitaṃ ‘‘sita’’nti vuccatīti āha ‘‘mandahasita’’nti. Aṭṭhisaṅkhalikanti nayidaṃ aviññāṇakaṃ aṭṭhisaṅkhalikamattaṃ, atha kho eko petoti āha ‘‘petaloke nibbatta’’nti. Ete attabhāvāti petattabhāvā. Na āpāthaṃ āgacchantīti devattabhāvā viya na āpāthaṃ āgacchanti pakatiyā. Tesaṃ pana ruciyā āpāthaṃ āgaccheyyuṃ manussānaṃ. Dukkhābhibhūtānaṃ anāthabhāvadassanapadaṭṭhānā karuṇāti āha ‘‘kāruññe kattabbe’’ti. Attano ca sampattiṃ buddhañāṇassa ca sampattinti paccekaṃ sampattisaddo yojetabbo. Tadubhayaṃ vibhāvetuṃ ‘‘taṃ hī’’tiādi vuttaṃ. Tattha attano sampattiṃ anussaritvā sitaṃ pātvākāsīti padaṃ ānetvā sambandhitabbaṃ. Dhammadhātūti sabbaññutaññāṇaṃ sandhāya vadati. Dhammadhātūti vā dhammānaṃ sabhāvo.
ཨིཏརོཏི ལཀྑཎཏྠེརོ། ཨུཔཔཏྟཱིཏི ཛཱཏི། ཨུཔཔཏྟིསཱིསེན ཧི ཏཐཱརཱུཔཾ ཨཏྟབྷཱཝཾ ཝདཏི། ལོཧཏུཎྜཀེཧཱིཏི ལོཧམཡེཧེཝ ཏུཎྜཀེཧི། ཙརནྟཱིཏི ཨཱཀཱསེན གཙྪནྟི། ཨཙྪརིཡཾ ཝཏཱཏི གརཧཙྪརིཡཾ ནཱམེཏཾ། ཙཀྑུབྷཱུཏཱཏི སམྤཏྟདིབྦཙཀྑུཀཱ, ལོཀསྶ ཙཀྑུབྷཱུཏཱཏི ཨེཝཾ ཝཱ ཨེཏྠ ཨཏྠོ དཊྛབྦོ།
Itaroti lakkhaṇatthero. Upapattīti jāti. Upapattisīsena hi tathārūpaṃ attabhāvaṃ vadati. Lohatuṇḍakehīti lohamayeheva tuṇḍakehi. Carantīti ākāsena gacchanti. Acchariyaṃ vatāti garahacchariyaṃ nāmetaṃ. Cakkhubhūtāti sampattadibbacakkhukā, lokassa cakkhubhūtāti evaṃ vā ettha attho daṭṭhabbo.
ཡཏྲཱཏི ཧེཏུཨཏྠེ ནིཔཱཏོཏི ཨཱཧ ‘‘ཡཏྲཱཏི ཀཱརཎཝཙན’’ནྟི། ཨཉྙཏྲ ཧི ‘‘ཡཏྲ ཧི ནཱམཱ’’ཏི ཨཏྠོ ཝུཙྩཏི། ཨཔྤམཱཎེ སཏྟནིཀཱཡེ ཏེ ཙ ཁོ ཝིབྷཱགེན ཀཱམབྷཝཱདིབྷེདེ བྷཝེ, ནིརཡཱདིབྷེདཱ གཏིཡོ, ནཱནཏྟཀཱཡནཱནཏྟསཉྙིཨཱདིཝིཉྙཱཎཊྛིཏིཡོ, ཏཐཱརཱུཔེ སཏྟཱཝཱསེ ཙ སབྦཉྙུཏཉྙཱཎཉྩ མེ ཨུཔནེཏུཾ པཙྩཀྑཾ ཀརོནྟེན།
Yatrāti hetuatthe nipātoti āha ‘‘yatrāti kāraṇavacana’’nti. Aññatra hi ‘‘yatra hi nāmā’’ti attho vuccati. Appamāṇe sattanikāye te ca kho vibhāgena kāmabhavādibhede bhave, nirayādibhedā gatiyo, nānattakāyanānattasaññiādiviññāṇaṭṭhitiyo, tathārūpe sattāvāse ca sabbaññutaññāṇañca me upanetuṃ paccakkhaṃ karontena.
གོགྷཱཏཀོཏི གུནྣཾ ཨབྷིཎྷཾ ཧནནཀོ། ཏེནཱཧ ‘‘ཝདྷིཏྭཱ ཝདྷིཏྭཱ’’ཏི། ཏསྶཱཏི གུནྣཾ ཝདྷཀཀམྨསྶ། ཨཔརཱཔརིཡཀམྨསྶཱཏི ཨཔརཱཔརིཡཝེདནཱིཡཀམྨསྶ། བལཝཏཱ གོགྷཱཏཀཀམྨེན ཝིཔཱཀེ དཱིཡམཱནེ ཨལདྡྷོཀཱསཾ ཨཔརཱཔརིཡཝེདནཱིཡཾ ཏསྨིཾ ཝིཔཀྐཝིཔཱཀེ ཨིདཱནི ལདྡྷོཀཱསཾ ‘‘ཨཝསེསཀམྨ’’ནྟི ཝུཏྟཾ། པཊིསནྡྷཱིཏི པཱཔཀམྨཛནིཏཱ པཊིསནྡྷི། ཀམྨསབྷཱགཏཱཡཱཏི ཀམྨསདིསབྷཱཝེན། ཨཱརམྨཎསབྷཱགཏཱཡཱཏི ཨཱརམྨཎསྶ སབྷཱགབྷཱཝེན སདིསབྷཱཝེན། ཡཱདིསེ ཧི ཨཱརམྨཎེ པུབྦེ ཏཾ ཀམྨཾ ཏསྶ ཙ ཝིཔཱཀོ པཝཏྟོ, ཏཱདིསེཡེཝ ཨཱརམྨཎེ ཨིདཾ ཀམྨཾ ཨིམསྶ ཝིཔཱཀོ ཙ པཝཏྟོཏི ཀཏྭཱ ཝུཏྟཾ ‘‘ཏསྶེཝ ཀམྨསྶ ཝིཔཱཀཱཝསེསེནཱ’’ཏི། བྷཝཏི ཧི ཏཾསདིསེཔི ཏབྦོཧཱརོ ཡཐཱ ‘‘སོ ཨེཝ ཏིཏྟིརོ, ཏཱནིཡེཝ ཨོསདྷཱནཱི’’ཏི། ནིམིཏྟཾ ཨཧོསཱིཏི པུབྦེ ཀཏཱུཔཙིཏསྶ པེཏཱུཔཔཏྟིནིབྦཏྟནཝསེན ཀཏོཀཱསསྶ ཏསྶ ཀམྨསྶ ནིམིཏྟབྷཱུཏཾ ཨིདཱནི ཏཐཱ ཨུཔཊྛཧནྟཾ ཏསྶ ཝིཔཱཀསྶ ནིམིཏྟཾ ཨཱརམྨཎཾ ཨཧོསི། སོཏི གོགྷཱཏཀོ། ཨཊྛིསངྑལིཀཔེཏོ ཛཱཏོ ཀམྨསརིཀྑཀཝིཔཱཀཏཱཝསེན།
Goghātakoti gunnaṃ abhiṇhaṃ hananako. Tenāha ‘‘vadhitvā vadhitvā’’ti. Tassāti gunnaṃ vadhakakammassa. Aparāpariyakammassāti aparāpariyavedanīyakammassa. Balavatā goghātakakammena vipāke dīyamāne aladdhokāsaṃ aparāpariyavedanīyaṃ tasmiṃ vipakkavipāke idāni laddhokāsaṃ ‘‘avasesakamma’’nti vuttaṃ. Paṭisandhīti pāpakammajanitā paṭisandhi. Kammasabhāgatāyāti kammasadisabhāvena. Ārammaṇasabhāgatāyāti ārammaṇassa sabhāgabhāvena sadisabhāvena. Yādise hi ārammaṇe pubbe taṃ kammaṃ tassa ca vipāko pavatto, tādiseyeva ārammaṇe idaṃ kammaṃ imassa vipāko ca pavattoti katvā vuttaṃ ‘‘tasseva kammassa vipākāvasesenā’’ti. Bhavati hi taṃsadisepi tabbohāro yathā ‘‘so eva tittiro, tāniyeva osadhānī’’ti. Nimittaṃ ahosīti pubbe katūpacitassa petūpapattinibbattanavasena katokāsassa tassa kammassa nimittabhūtaṃ idāni tathā upaṭṭhahantaṃ tassa vipākassa nimittaṃ ārammaṇaṃ ahosi. Soti goghātako. Aṭṭhisaṅkhalikapeto jāto kammasarikkhakavipākatāvasena.
ཨཊྛིསུཏྟཝཎྞནཱ ནིཊྛིཏཱ།
Aṭṭhisuttavaṇṇanā niṭṭhitā.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / སཾཡུཏྟནིཀཱཡ • Saṃyuttanikāya / ༡. ཨཊྛིསུཏྟཾ • 1. Aṭṭhisuttaṃ
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / སཾཡུཏྟནིཀཱཡ (ཨཊྛཀཐཱ) • Saṃyuttanikāya (aṭṭhakathā) / ༡. ཨཊྛིསུཏྟཝཎྞནཱ • 1. Aṭṭhisuttavaṇṇanā
