| Library / Tipiṭaka / திபிடக • Tipiṭaka / நெத்திப்பகரண-அட்ட²கதா² • Nettippakaraṇa-aṭṭhakathā |
7. ஆவட்டஹாரவிப⁴ங்க³வண்ணனா
7. Āvaṭṭahāravibhaṅgavaṇṇanā
29. தத்த² கதமோ ஆவட்டோ ஹாரோதி ஆவட்டஹாரவிப⁴ங்கோ³. தத்த² ஆரம்ப⁴தா²தி ஆரம்ப⁴தா⁴துஸங்கா²தங் வீரியங் கரோத². நிக்கமதா²தி கோஸஜ்ஜபக்க²தோ நிக்க²ந்தத்தா நிக்கமதா⁴துஸங்கா²தங் தது³த்தரிவீரியங் கரோத². யுஞ்ஜத² பு³த்³த⁴ஸாஸனேதி யஸ்மா ஸீலஸங்வரோ இந்த்³ரியேஸு கு³த்தத்³வாரதா போ⁴ஜனே மத்தஞ்ஞுதா ஸதிஸம்பஜஞ்ஞந்தி இமேஸு த⁴ம்மேஸு பதிட்டி²தானங் ஜாக³ரியானுயோக³வஸேன ஆரம்ப⁴னிக்கமதா⁴துயோ ஸம்பஜ்ஜந்தி, தஸ்மா ததா²பூ⁴தஸமத²விபஸ்ஸனாஸங்கா²தே ப⁴க³வதோ ஸாஸனே யுத்தப்பயுத்தா ஹோத². து⁴னாத² மச்சுனோ ஸேனங், நளாகா³ரங்வ குஞ்ஜரோதி ஏவங் படிபஜ்ஜந்தா ச தேதா⁴துஇஸ்ஸரஸ்ஸ மச்சுராஜஸ்ஸ வஸங் ஸத்தே நேதீதி தஸ்ஸ ஸேனாஸங்கா²தங் அப³லங் து³ப்³ப³லங் யதா² நாம ப³லூபபன்னோ குஞ்ஜரோ நளேஹி கதங் அகா³ரங் க²ணேனேவ வித்³த⁴ங்ஸேதி, ஏவமேவ கிலேஸக³ணங் து⁴னாத² வித⁴மத² வித்³த⁴ங்ஸேதா²தி அத்தோ² (ஸங்॰ நி॰ அட்ட²॰ 1.1.185).
29.Tatthakatamo āvaṭṭo hāroti āvaṭṭahāravibhaṅgo. Tattha ārambhathāti ārambhadhātusaṅkhātaṃ vīriyaṃ karotha. Nikkamathāti kosajjapakkhato nikkhantattā nikkamadhātusaṅkhātaṃ taduttarivīriyaṃ karotha. Yuñjatha buddhasāsaneti yasmā sīlasaṃvaro indriyesu guttadvāratā bhojane mattaññutā satisampajaññanti imesu dhammesu patiṭṭhitānaṃ jāgariyānuyogavasena ārambhanikkamadhātuyo sampajjanti, tasmā tathābhūtasamathavipassanāsaṅkhāte bhagavato sāsane yuttappayuttā hotha. Dhunātha maccuno senaṃ, naḷāgāraṃva kuñjaroti evaṃ paṭipajjantā ca tedhātuissarassa maccurājassa vasaṃ satte netīti tassa senāsaṅkhātaṃ abalaṃ dubbalaṃ yathā nāma balūpapanno kuñjaro naḷehi kataṃ agāraṃ khaṇeneva viddhaṃseti, evameva kilesagaṇaṃ dhunātha vidhamatha viddhaṃsethāti attho (saṃ. ni. aṭṭha. 1.1.185).
இதா³னி யத³த்த²ங் அயங் கா³தா² நிக்கி²த்தா, தங் யோஜெத்வா த³ஸ்ஸேதுங் ‘‘ஆரம்ப⁴த² நிக்கமதா²தி வீரியஸ்ஸ பத³ட்டா²ன’’ந்திஆதி³ வுத்தங். தத்த² ஆரம்ப⁴த² நிக்கமதா²தி இத³ங் வசனங் வீரியஸ்ஸ பத³ட்டா²னங் வீரியபயோக³ஸ்ஸ காரணங் வீரியாரம்பே⁴ நியோஜனதோ, ‘‘யோகா³ வே ஜாயதீ பூ⁴ரீ’’தி (த⁴॰ ப॰ 282) வசனதோ யோகோ³ பா⁴வனா. தத்த² விபஸ்ஸனாபா⁴வனாய வக்க²மானத்தா ஸமாதி⁴பா⁴வனா இதா⁴தி⁴ப்பேதாதி வுத்தங் – ‘‘யுஞ்ஜத² பு³த்³த⁴ஸாஸனேதி ஸமாதி⁴ஸ்ஸ பத³ட்டா²ன’’ந்தி. ‘‘மச்சுனோ ஸேன’’ந்தி வுத்தாய கிலேஸஸேனாய ஸம்மா து⁴னநங் ஞாணேனேவ ஹோதீதி ஆஹ – ‘‘து⁴னாத²…பே॰… பத³ட்டா²ன’’ந்தி. புன யதா²வுத்தவீரியஸமாதி⁴பஞ்ஞாஸம்பயுத்தேஸு ஆதி⁴பச்சகிச்சதாய பபஞ்சப்பஹானஸமத்தா² வட்டமூலங் சி²ந்தி³த்வா விவட்டங் பாபெந்தி சாதி த³ஸ்ஸனத்த²ங் ‘‘ஆரம்ப⁴த² நிக்கமதா²தி வீரியிந்த்³ரியஸ்ஸ பத³ட்டா²ன’’ந்திஆதி³ வுத்தங். இமானி பத³ட்டா²னானி தே³ஸனாதி ‘‘யானிமானி வீரியஸ்ஸ பத³ட்டா²ன’’ந்திஆதி³னா வீரியாதீ³னங் பத³ட்டா²னானி வுத்தானி, ஸா ஆரம்ப⁴த² நிக்கமதா²தி ஆதி³தே³ஸனா, ந வீரியாரம்ப⁴வத்து²ஆதீ³னீதி அத்தோ². ததா² சேவ ஸங்வண்ணிதங்.
Idāni yadatthaṃ ayaṃ gāthā nikkhittā, taṃ yojetvā dassetuṃ ‘‘ārambhatha nikkamathāti vīriyassa padaṭṭhāna’’ntiādi vuttaṃ. Tattha ārambhatha nikkamathāti idaṃ vacanaṃ vīriyassa padaṭṭhānaṃ vīriyapayogassa kāraṇaṃ vīriyārambhe niyojanato, ‘‘yogā ve jāyatī bhūrī’’ti (dha. pa. 282) vacanato yogo bhāvanā. Tattha vipassanābhāvanāya vakkhamānattā samādhibhāvanā idhādhippetāti vuttaṃ – ‘‘yuñjatha buddhasāsaneti samādhissa padaṭṭhāna’’nti. ‘‘Maccuno sena’’nti vuttāya kilesasenāya sammā dhunanaṃ ñāṇeneva hotīti āha – ‘‘dhunātha…pe… padaṭṭhāna’’nti. Puna yathāvuttavīriyasamādhipaññāsampayuttesu ādhipaccakiccatāya papañcappahānasamatthā vaṭṭamūlaṃ chinditvā vivaṭṭaṃ pāpenti cāti dassanatthaṃ ‘‘ārambhatha nikkamathāti vīriyindriyassa padaṭṭhāna’’ntiādi vuttaṃ. Imāni padaṭṭhānāni desanāti ‘‘yānimāni vīriyassa padaṭṭhāna’’ntiādinā vīriyādīnaṃ padaṭṭhānāni vuttāni, sā ārambhatha nikkamathāti ādidesanā, na vīriyārambhavatthuādīnīti attho. Tathā ceva saṃvaṇṇitaṃ.
ஏவங் யதா²னிக்கி²த்தாய தே³ஸனாய பத³ட்டா²னவஸேன அத்த²ங் நித்³தா⁴ரெத்வா இதா³னி தங் ஸபா⁴க³விஸபா⁴க³த⁴ம்மவஸேன ஆவட்டேதுகாமோ தஸ்ஸ பூ⁴மிங் த³ஸ்ஸேதுங் ‘‘அயுஞ்ஜந்தானங் வா ஸத்தானங் யோகே³ யுஞ்ஜந்தானங் வா ஆரம்போ⁴’’திஆதி³மாஹ. தஸ்ஸத்தோ² – யோகே³ பா⁴வனாயங் தங் அயுஞ்ஜந்தானங் வா ஸத்தானங் அபரிபக்கஞாணானங் வாஸனாபா⁴கே³ன ஆயதிங் விஜானநத்த²ங் அயங் தே³ஸனாரம்போ⁴ யுஞ்ஜந்தானங் வா பரிபக்கஞாணானந்தி.
Evaṃ yathānikkhittāya desanāya padaṭṭhānavasena atthaṃ niddhāretvā idāni taṃ sabhāgavisabhāgadhammavasena āvaṭṭetukāmo tassa bhūmiṃ dassetuṃ ‘‘ayuñjantānaṃ vā sattānaṃ yoge yuñjantānaṃ vā ārambho’’tiādimāha. Tassattho – yoge bhāvanāyaṃ taṃ ayuñjantānaṃ vā sattānaṃ aparipakkañāṇānaṃ vāsanābhāgena āyatiṃ vijānanatthaṃ ayaṃ desanārambho yuñjantānaṃ vā paripakkañāṇānanti.
ஸோ பமாதோ³ து³விதோ⁴தி யேன பமாதே³ன பா⁴வனங் நானுயுஞ்ஜந்தி, ஸோ பமாதோ³ அத்தனோ காரணபே⁴தே³ன து³விதோ⁴. அஞ்ஞாணேனாதி பஞ்சன்னங் க²ந்தா⁴னங் ஸலக்க²ணஸாமஞ்ஞலக்க²ணபடிச்சா²த³கேன ஸம்மோஹேன. நிவுதோதி சா²தி³தோ. ஞெய்யட்டா²னந்தி ஞெய்யஞ்ச தங் ‘‘இதி ரூபங், இதி ரூபஸ்ஸ ஸமுத³யோ’’திஆதி³னா ஞாணஸ்ஸ பவத்தனட்டா²னஞ்சாதி ஞெய்யட்டா²னங். அனேகபே⁴த³த்தா பாபத⁴ம்மானங் தப்³ப³ஸேன அனேகபே⁴தோ³பி பமாதோ³ மூலபூ⁴தாய அவிஜ்ஜாய வஸேன ஏகோ ஏவாதி ஆஹ – ‘‘ஏகவிதோ⁴ அவிஜ்ஜாயா’’தி. லாப⁴வினிச்ச²யபரிக்³க³ஹமச்ச²ரியானி பரியேஸனாஆரக்கா²பரிபோ⁴கே³ஸு அந்தோக³தா⁴னி. ச²ந்த³ராக³ஜ்ஜோ²ஸானா தண்ஹா ஏவாதி தண்ஹாமூலகேபி த⁴ம்மே எத்தே²வ பக்கி²பித்வா ‘‘திவிதோ⁴ தண்ஹாயா’’தி வுத்தங்.
So pamādo duvidhoti yena pamādena bhāvanaṃ nānuyuñjanti, so pamādo attano kāraṇabhedena duvidho. Aññāṇenāti pañcannaṃ khandhānaṃ salakkhaṇasāmaññalakkhaṇapaṭicchādakena sammohena. Nivutoti chādito. Ñeyyaṭṭhānanti ñeyyañca taṃ ‘‘iti rūpaṃ, iti rūpassa samudayo’’tiādinā ñāṇassa pavattanaṭṭhānañcāti ñeyyaṭṭhānaṃ. Anekabhedattā pāpadhammānaṃ tabbasena anekabhedopi pamādo mūlabhūtāya avijjāya vasena eko evāti āha – ‘‘ekavidho avijjāyā’’ti. Lābhavinicchayapariggahamacchariyāni pariyesanāārakkhāparibhogesu antogadhāni. Chandarāgajjhosānā taṇhā evāti taṇhāmūlakepi dhamme ettheva pakkhipitvā ‘‘tividho taṇhāyā’’ti vuttaṃ.
ரூபீஸு ப⁴வேஸூதி ரூபத⁴ம்மேஸு. அஜ்ஜோ²ஸானந்தி தண்ஹாபி⁴னிவேஸோ. ஏதேன ‘‘தண்ஹாய ரூபகாயோ பத³ட்டா²ன’’ந்தி பத³ஸ்ஸ அத்த²ங் விவரதி. அனாதி³மதி ஹி ஸங்ஸாரே இத்தி²புரிஸா அஞ்ஞமஞ்ஞரூபாபி⁴ராமா, அயஞ்சத்தோ² சித்தபரியாதா³னஸுத்தேன (அ॰ நி॰ 1.1-10) தீ³பேதப்³போ³. அரூபீஸு ஸம்மோஹோதி ப²ஸ்ஸாதீ³னங் அதிஸுகு²மஸபா⁴வத்தா ஸந்ததிஸமூஹகிச்சாரம்மணக⁴னவினிப்³போ⁴க³ஸ்ஸ து³க்கரத்தா ச அரூபத⁴ம்மேஸு ஸம்மோஹோ, ஸத்தானங் பதிட்டி²தோதி வசனஸேஸோ. ஏவங் நித்³தா⁴ரிதே ரூபகாயனாமகாயஸங்கா²தே உபாதா³னக்க²ந்த⁴பஞ்சகே ஆரம்மணகரணவஸேன பவத்தங் தண்ஹஞ்ச அவிஜ்ஜஞ்ச அவிஸேஸேன வுத்தங் சதுபாதா³னானங் வஸேன விப⁴ஜித்வா தேஸங் க²ந்தா⁴னங் உபாதா³னானஞ்ச து³க்க²ஸமுத³யபா⁴வேன ஸஹபரிஞ்ஞெய்யபஹாதப்³ப³பா⁴வங் த³ஸ்ஸேதி ‘‘தத்த² ரூபகாயோ’’திஆதி³னா.
Rūpīsu bhavesūti rūpadhammesu. Ajjhosānanti taṇhābhiniveso. Etena ‘‘taṇhāya rūpakāyo padaṭṭhāna’’nti padassa atthaṃ vivarati. Anādimati hi saṃsāre itthipurisā aññamaññarūpābhirāmā, ayañcattho cittapariyādānasuttena (a. ni. 1.1-10) dīpetabbo. Arūpīsu sammohoti phassādīnaṃ atisukhumasabhāvattā santatisamūhakiccārammaṇaghanavinibbhogassa dukkarattā ca arūpadhammesu sammoho, sattānaṃ patiṭṭhitoti vacanaseso. Evaṃ niddhārite rūpakāyanāmakāyasaṅkhāte upādānakkhandhapañcake ārammaṇakaraṇavasena pavattaṃ taṇhañca avijjañca avisesena vuttaṃ catupādānānaṃ vasena vibhajitvā tesaṃ khandhānaṃ upādānānañca dukkhasamudayabhāvena sahapariññeyyapahātabbabhāvaṃ dasseti ‘‘tattha rūpakāyo’’tiādinā.
30. ஏவங் பமாத³முகே²ன புரிமஸச்சத்³வயங் நித்³தா⁴ரெத்வா பமாத³முகே²னேவ அபரம்பி ஸச்சத்³வயங் நித்³தா⁴ரேதுங் ‘‘தத்த² யோ’’திஆதி³ வுத்தங். தத்த² தஸ்ஸாதி தஸ்ஸ பமாத³ஸ்ஸ. ஸம்படிவேதே⁴னாதி ஸம்மா பரிஜானநேன அஸ்ஸாதா³தீ³னங் ஜானநேன. ரக்க²ணா படிஸங்ஹரணாதி அத்தனோ சித்தஸ்ஸ ரக்க²ணஸங்கா²தா பமாத³ஸ்ஸ படிஸங்ஹரணா, தப்படிபக்கே²ன ஸங்கோசனா அப்பமாதா³னுயோகே³ன யா கே²பனா. அயங் ஸமதோ²தி கிச்சேன ஸமாதி⁴ங் த³ஸ்ஸேதி. அயங் வோதா³னபக்க²விஸபா⁴க³த⁴ம்மவஸேன ஆவட்டனா. ‘‘யதா³ ஜானாதி காமானங்…பே॰… ஆனிஸங்ஸ’’ந்தி இமினா ஸமதா²தி⁴க³மஸ்ஸ உபாயங் த³ஸ்ஸேதி.
30. Evaṃ pamādamukhena purimasaccadvayaṃ niddhāretvā pamādamukheneva aparampi saccadvayaṃ niddhāretuṃ ‘‘tattha yo’’tiādi vuttaṃ. Tattha tassāti tassa pamādassa. Sampaṭivedhenāti sammā parijānanena assādādīnaṃ jānanena. Rakkhaṇā paṭisaṃharaṇāti attano cittassa rakkhaṇasaṅkhātā pamādassa paṭisaṃharaṇā, tappaṭipakkhena saṅkocanā appamādānuyogena yā khepanā. Ayaṃ samathoti kiccena samādhiṃ dasseti. Ayaṃ vodānapakkhavisabhāgadhammavasena āvaṭṭanā. ‘‘Yadā jānāti kāmānaṃ…pe… ānisaṃsa’’nti iminā samathādhigamassa upāyaṃ dasseti.
தத்த² காமானந்தி வத்து²காமானஞ்ச கிலேஸகாமானஞ்ச. அஸ்ஸாத³ஞ்ச அஸ்ஸாத³தோதி காமே படிச்ச உப்பஜ்ஜமானங் ஸுக²ஸோமனஸ்ஸஸங்கா²தங் அஸ்ஸாத³ங் அஸ்ஸாத³தாய அஸ்ஸாத³மத்ததோ. ஆதீ³னவந்தி ‘‘அப்பஸ்ஸாதா³ காமா ப³ஹுது³க்கா²’’திஆதி³னா (ம॰ நி॰ 1.236) வுத்தங் ஆதீ³னவங் தோ³ஸங். நிஸ்ஸரணந்தி பட²மஜ்ஜா²னங். வுத்தஞ்ஹேதங் – ‘‘காமானமேதங் நிஸ்ஸரணங் யதி³த³ங் நெக்க²ம்ம’’ந்தி (இதிவு॰ 72). ஓகாரந்தி லாமகபா⁴வங். ஸங்கிலேஸந்தி ஸங்கிலிஸ்ஸனங். காமஹேது ஹி ஸத்தா ஸங்கிலிஸ்ஸந்தி. வோதா³னந்தி விஸுஜ்ஜ²னங். நெக்க²ம்மே ச ஆனிஸங்ஸந்தி நீவரணப்பஹானாதி³கு³ணவிஸேஸயோக³ங். தத்தா²தி தஸ்மிங் யதா²வுத்தே ஸமதே² ஸதி. யா வீமங்ஸாதி யா பஞ்ஞா. ‘‘ஸமாஹிதோ, பி⁴க்க²வே, பி⁴க்கு² யதா²பூ⁴தங் பஜானாதீ’’தி (ஸங்॰ நி॰ 5.1071) ஹி வுத்தங். யதா² தண்ஹாஸஹிதாவ அவிஜ்ஜா ஸங்கா²ரானங் பச்சயோ, ஏவங் அவிஜ்ஜாஸஹிதாவ தண்ஹா உபாதா³னானங் பச்சயோ. தாஸு நிருத்³தா⁴ஸு உபாதா³னாதீ³னங் அபா⁴வோ ஏவாதி தண்ஹாஅவிஜ்ஜாபஹானேன ஸகலவட்டது³க்க²னிரோத⁴ங் த³ஸ்ஸெந்தோ ‘‘இமேஸு த்³வீஸு த⁴ம்மேஸு பஹீனேஸூ’’திஆதி³மாஹ. இமானி சத்தாரி ஸச்சானி விஸபா⁴க³ஸபா⁴க³த⁴ம்மாவட்டனவஸேன நித்³தா⁴ரிதானீதி அதி⁴ப்பாயோ.
Tattha kāmānanti vatthukāmānañca kilesakāmānañca. Assādañca assādatoti kāme paṭicca uppajjamānaṃ sukhasomanassasaṅkhātaṃ assādaṃ assādatāya assādamattato. Ādīnavanti ‘‘appassādā kāmā bahudukkhā’’tiādinā (ma. ni. 1.236) vuttaṃ ādīnavaṃ dosaṃ. Nissaraṇanti paṭhamajjhānaṃ. Vuttañhetaṃ – ‘‘kāmānametaṃ nissaraṇaṃ yadidaṃ nekkhamma’’nti (itivu. 72). Okāranti lāmakabhāvaṃ. Saṃkilesanti saṃkilissanaṃ. Kāmahetu hi sattā saṃkilissanti. Vodānanti visujjhanaṃ. Nekkhamme ca ānisaṃsanti nīvaraṇappahānādiguṇavisesayogaṃ. Tatthāti tasmiṃ yathāvutte samathe sati. Yā vīmaṃsāti yā paññā. ‘‘Samāhito, bhikkhave, bhikkhu yathābhūtaṃ pajānātī’’ti (saṃ. ni. 5.1071) hi vuttaṃ. Yathā taṇhāsahitāva avijjā saṅkhārānaṃ paccayo, evaṃ avijjāsahitāva taṇhā upādānānaṃ paccayo. Tāsu niruddhāsu upādānādīnaṃ abhāvo evāti taṇhāavijjāpahānena sakalavaṭṭadukkhanirodhaṃ dassento ‘‘imesu dvīsu dhammesu pahīnesū’’tiādimāha. Imāni cattāri saccāni visabhāgasabhāgadhammāvaṭṭanavasena niddhāritānīti adhippāyo.
ஏவங் வோதா³னபக்க²ங் நிக்கி²பித்வா தஸ்ஸ விஸபா⁴க³த⁴ம்மவஸேன ஸபா⁴க³த⁴ம்மவஸேன ச ஆவட்டனங் த³ஸ்ஸெத்வா இதா³னி ஸங்கிலேஸபக்க²ங் நிக்கி²பித்வா தஸ்ஸ விஸபா⁴க³த⁴ம்மவஸேன ஸபா⁴க³த⁴ம்மவஸேன ச ஆவட்டனங் த³ஸ்ஸேதுங் ‘‘யதா²பி மூலே’’தி கா³த²மாஹ. தஸ்ஸத்தோ² – யதா² நாம பதிட்டா²ஹேதுபா⁴வேன மூலந்தி லத்³த⁴வோஹாரே பூ⁴மிக³தே ருக்க²ஸ்ஸ அவயவே ப²ரஸுசே²தா³தி³அந்தராயாபா⁴வேன அனுபத்³த³வே ததோ ஏவ த³ள்ஹே தி²ரே ஸதி க²ந்தே⁴ சி²ன்னேபி அஸ்ஸத்தா²தி³ருக்கோ² ருஹதி, ஏவமேவ தண்ஹானுஸயஸங்கா²தே அத்தபா⁴வருக்க²ஸ்ஸ மூலே மக்³க³ஞாணப²ரஸுனா அனுபச்சி²ன்னே தயித³ங் து³க்க²ங் புனப்புனங் அபராபரபா⁴வேன நிப்³ப³த்ததி ந நிருஜ்ஜ²தீதி. காமதண்ஹாதி³னிவத்தனத்த²ங் ‘‘ப⁴வதண்ஹாயா’’தி வுத்தங். ஏதஸ்ஸ த⁴ம்மஸ்ஸ பச்சயோதி ஏதஸ்ஸ ப⁴வதண்ஹாஸங்கா²தஸ்ஸ த⁴ம்மஸ்ஸ ப⁴வேஸு ஆதீ³னவப்படிச்சா²த³னாதி³வஸேன அஸ்ஸாத³க்³க³ஹணஸ்ஸ பச்சயோ. வுத்தஞ்ஹேதங் – ‘‘ஸங்யோஜனீயேஸு, பி⁴க்க²வே, த⁴ம்மேஸு அஸ்ஸாதா³னுபஸ்ஸினோ தண்ஹா பவட்³ட⁴தீ’’தி (ஸங்॰ நி॰ 2.57). தேனேவாஹ – ‘‘அவிஜ்ஜாபச்சயா ஹி ப⁴வதண்ஹா’’தி. இத⁴ ஸமதோ² விபஸ்ஸனா ச மக்³க³ஸமாதி⁴ மக்³க³பஞ்ஞா ச அதி⁴ப்பேதாதி ஆஹ – ‘‘யேன தண்ஹானுஸயங் ஸமூஹனதீ’’திஆதி³. இமானி சத்தாரி ஸச்சானீதி விஸபா⁴க³ஸபா⁴க³த⁴ம்மாவட்டனவஸேன நித்³தா⁴ரிதானீதி. ஸேஸங் வுத்தனயமேவ.
Evaṃ vodānapakkhaṃ nikkhipitvā tassa visabhāgadhammavasena sabhāgadhammavasena ca āvaṭṭanaṃ dassetvā idāni saṃkilesapakkhaṃ nikkhipitvā tassa visabhāgadhammavasena sabhāgadhammavasena ca āvaṭṭanaṃ dassetuṃ ‘‘yathāpi mūle’’ti gāthamāha. Tassattho – yathā nāma patiṭṭhāhetubhāvena mūlanti laddhavohāre bhūmigate rukkhassa avayave pharasuchedādiantarāyābhāvena anupaddave tato eva daḷhe thire sati khandhe chinnepi assatthādirukkho ruhati, evameva taṇhānusayasaṅkhāte attabhāvarukkhassa mūle maggañāṇapharasunā anupacchinne tayidaṃ dukkhaṃ punappunaṃ aparāparabhāvena nibbattati na nirujjhatīti. Kāmataṇhādinivattanatthaṃ ‘‘bhavataṇhāyā’’ti vuttaṃ. Etassa dhammassa paccayoti etassa bhavataṇhāsaṅkhātassa dhammassa bhavesu ādīnavappaṭicchādanādivasena assādaggahaṇassa paccayo. Vuttañhetaṃ – ‘‘saṃyojanīyesu, bhikkhave, dhammesu assādānupassino taṇhā pavaḍḍhatī’’ti (saṃ. ni. 2.57). Tenevāha – ‘‘avijjāpaccayā hi bhavataṇhā’’ti. Idha samatho vipassanā ca maggasamādhi maggapaññā ca adhippetāti āha – ‘‘yena taṇhānusayaṃ samūhanatī’’tiādi. Imāni cattāri saccānīti visabhāgasabhāgadhammāvaṭṭanavasena niddhāritānīti. Sesaṃ vuttanayameva.
இதா³னி ந கேவலங் நித்³தா⁴ரிதேஹேவ விஸபா⁴க³ஸபா⁴க³த⁴ம்மேஹி ஆவட்டனங், அத² கோ² பாளிஆக³தேஹிபி தேஹி ஆவட்டனங் ஆவட்டஹாரோதி த³ஸ்ஸனத்த²ங் ‘‘ஸப்³ப³பாபஸ்ஸ அகரண’’ந்தி கா³த²மாஹ . தத்த² ஸப்³ப³பாபஸ்ஸாதி ஸப்³பா³குஸலஸ்ஸ. அகரணந்தி அனுப்பாத³னங். குஸலஸ்ஸாதி சதுபூ⁴மககுஸலஸ்ஸ. உபஸம்பதா³தி படிலாபோ⁴. ஸசித்தபரியோதா³பனந்தி அத்தனோ சித்தவோதா³னங், தங் பன அரஹத்தேன ஹோதி. இதி ஸீலஸங்வரேன ஸப்³ப³பாபங் பஹாய ஸமத²விபஸ்ஸனாஹி குஸலங் ஸம்பாதெ³த்வா அரஹத்தப²லேன சித்தங் பரியோத³பேதப்³ப³ந்தி ஏதங் பு³த்³தா⁴ன ஸாஸனங் ஓவாதோ³ அனுஸிட்டீ²தி அயங் ஸங்கே²பத்தோ², வித்தா²ரதோ பன அத்தோ² பாளிதோ ஏவ விஞ்ஞாயதி.
Idāni na kevalaṃ niddhāriteheva visabhāgasabhāgadhammehi āvaṭṭanaṃ, atha kho pāḷiāgatehipi tehi āvaṭṭanaṃ āvaṭṭahāroti dassanatthaṃ ‘‘sabbapāpassa akaraṇa’’nti gāthamāha . Tattha sabbapāpassāti sabbākusalassa. Akaraṇanti anuppādanaṃ. Kusalassāti catubhūmakakusalassa. Upasampadāti paṭilābho. Sacittapariyodāpananti attano cittavodānaṃ, taṃ pana arahattena hoti. Iti sīlasaṃvarena sabbapāpaṃ pahāya samathavipassanāhi kusalaṃ sampādetvā arahattaphalena cittaṃ pariyodapetabbanti etaṃ buddhāna sāsanaṃ ovādo anusiṭṭhīti ayaṃ saṅkhepattho, vitthārato pana attho pāḷito eva viññāyati.
தத்த² ‘‘ஸப்³ப³பாபங் நாமா’’திஆதீ³ஸு தோ³ஸஸமுட்டா²னந்தி தோ³ஸோ ஸமுட்டா²னமேவ ஏதஸ்ஸாதி தோ³ஸஸமுட்டா²னங், ந தோ³ஸோ ஏவ ஸமுட்டா²னந்தி. லோப⁴ஸமுட்டா²னாயபி பிஸுணவாசாய ஸம்ப⁴வதோ. காயது³ச்சரிதந்தி பத³ங் அபெக்கி²த்வா ‘‘தோ³ஸஸமுட்டா²ன’’ந்தி நபுங்ஸகனித்³தே³ஸோ. லோப⁴ஸமுட்டா²னங் மோஹஸமுட்டா²னந்தி எத்தா²பி ஏஸேவ நயோ. ஸம்ப²ப்பலாபோ உத்³த⁴ச்சசித்தேன பவத்தயதீதி அதி⁴ப்பாயேன தஸ்ஸ மோஹஸமுட்டா²னதா வுத்தா.
Tattha ‘‘sabbapāpaṃ nāmā’’tiādīsu dosasamuṭṭhānanti doso samuṭṭhānameva etassāti dosasamuṭṭhānaṃ, na doso eva samuṭṭhānanti. Lobhasamuṭṭhānāyapi pisuṇavācāya sambhavato. Kāyaduccaritanti padaṃ apekkhitvā ‘‘dosasamuṭṭhāna’’nti napuṃsakaniddeso. Lobhasamuṭṭhānaṃ mohasamuṭṭhānanti etthāpi eseva nayo. Samphappalāpo uddhaccacittena pavattayatīti adhippāyena tassa mohasamuṭṭhānatā vuttā.
ஏவங் து³ச்சரிதஅகுஸலகம்மபத²கம்மவிபா⁴கே³ன ‘‘ஸப்³ப³பாப’’ந்தி எத்த² வுத்தபாபங் விப⁴ஜித்வா இதா³னிஸ்ஸ அகுஸலமூலவஸேன அக³திக³மனவிபா⁴க³ம்பி த³ஸ்ஸேதுங் ‘‘அகுஸலமூல’’ந்திஆதி³ வுத்தங். தத்த² அகுஸலமூலங் பயோக³ங் க³ச்ச²ந்தந்தி லோபா⁴தி³அகுஸலானி காயவசீபயோக³ங் க³ச்ச²ந்தானி, காயவசீபயோக³ங் ஸமுட்டா²பெந்தானீதி அத்தோ². ச²ந்தா³தி ச²ந்த³ஹேது. யங் ச²ந்தா³ அக³திங் க³ச்ச²தி, இத³ங் லோப⁴ஸமுட்டா²னந்தி ச²ந்தா³ அக³திங் க³ச்ச²தீதி யதே³தங் அக³திக³மனங், இத³ங் லோப⁴ஸமுட்டா²னந்தி. ஏவங் ஸேஸேஸுபி அத்தோ² த³ட்ட²ப்³போ³. எத்தாவதா ‘‘ஸப்³ப³பாபஸ்ஸ அகரண’’ந்தி எத்த² பாபங் த³ஸ்ஸெத்வா இதா³னி தஸ்ஸ அகரணங் த³ஸ்ஸெந்தோ ‘‘லோபோ⁴…பே॰… பஞ்ஞாயா’’தி தீஹி குஸலமூலேஹி திண்ணங் அகுஸலமூலானங் பஹானவஸேன ஸப்³ப³பாபஸ்ஸ அகரணங் அனுப்பாத³னமாஹ. ததா² லோபோ⁴ உபெக்கா²யாதிஆதி³னா ப்³ரஹ்மவிஹாரேஹி. தத்த² அரதிங் வூபஸமெந்தீ முதி³தா தஸ்ஸா மூலபூ⁴தங் மோஹங் பஜஹதீதி கத்வா வுத்தங் – ‘‘மோஹோ முதி³தாய பஹானங் அப்³ப⁴த்த²ங் க³ச்ச²தீ’’தி.
Evaṃ duccaritaakusalakammapathakammavibhāgena ‘‘sabbapāpa’’nti ettha vuttapāpaṃ vibhajitvā idānissa akusalamūlavasena agatigamanavibhāgampi dassetuṃ ‘‘akusalamūla’’ntiādi vuttaṃ. Tattha akusalamūlaṃ payogaṃ gacchantanti lobhādiakusalāni kāyavacīpayogaṃ gacchantāni, kāyavacīpayogaṃ samuṭṭhāpentānīti attho. Chandāti chandahetu. Yaṃ chandā agatiṃ gacchati, idaṃ lobhasamuṭṭhānanti chandā agatiṃ gacchatīti yadetaṃ agatigamanaṃ, idaṃ lobhasamuṭṭhānanti. Evaṃ sesesupi attho daṭṭhabbo. Ettāvatā ‘‘sabbapāpassa akaraṇa’’nti ettha pāpaṃ dassetvā idāni tassa akaraṇaṃ dassento ‘‘lobho…pe… paññāyā’’ti tīhi kusalamūlehi tiṇṇaṃ akusalamūlānaṃ pahānavasena sabbapāpassa akaraṇaṃ anuppādanamāha. Tathā lobho upekkhāyātiādinā brahmavihārehi. Tattha aratiṃ vūpasamentī muditā tassā mūlabhūtaṃ mohaṃ pajahatīti katvā vuttaṃ – ‘‘moho muditāya pahānaṃ abbhatthaṃ gacchatī’’ti.
31. இதா³னி அஞ்ஞேனபி பரியாயேன பாபங் தஸ்ஸ அகரணஞ்ச த³ஸ்ஸெத்வா ஸேஸபதா³னஞ்ச அத்த²விபா⁴வனமுகே²ன ஸபா⁴க³விஸபா⁴க³த⁴ம்மாவட்டனங் த³ஸ்ஸேதுங் ‘‘ஸப்³ப³பாபங் நாம அட்ட² மிச்ச²த்தானீ’’திஆதி³ வுத்தங். அகிரியா அகரணங் அனஜ்ஜா²சாரோதி தீஹிபி பதே³ஹி மிச்ச²த்தானங் அனுப்பாத³னமேவ வத³தி. ததா² கிரியா கரணங் அஜ்ஜா²சாரோதி தீஹிபி பதே³ஹி உப்பாத³னமேவ வத³தி. அஜ்ஜா²சாரோதி அதி⁴ட்ட²ஹித்வா ஆசரணங். அதீதஸ்ஸாதி சிரகாலப்பவத்திவஸேன புராணஸ்ஸ. மக்³க³ஸ்ஸாதி அரியமக்³க³ஸ்ஸ. வுத்தஞ்ஹேதங் – ‘‘புராணமக்³க³ங் புராணங் அஞ்ஜஸந்தி கோ² அரியஸ்ஸேதங் அட்ட²ங்கி³கஸ்ஸ மக்³க³ஸ்ஸ அதி⁴வசன’’ந்தி (ஸங்॰ நி॰ 2.65 அத்த²தோ ஸமானங்). அதீதேன வா விபஸ்ஸினா ப⁴க³வதா யதா²தி⁴க³தங் தே³ஸிதபா⁴வங் ஸந்தா⁴ய ‘‘அதீதஸ்ஸ மக்³க³ஸ்ஸா’’தி வுத்தங். விபஸ்ஸினோ ஹி அயங் ப⁴க³வதோ ஸம்மாஸம்பு³த்³த⁴ஸ்ஸ பாதிமொக்கு²த்³தே³ஸகா³தா²தி.
31. Idāni aññenapi pariyāyena pāpaṃ tassa akaraṇañca dassetvā sesapadānañca atthavibhāvanamukhena sabhāgavisabhāgadhammāvaṭṭanaṃ dassetuṃ ‘‘sabbapāpaṃ nāma aṭṭha micchattānī’’tiādi vuttaṃ. Akiriyā akaraṇaṃ anajjhācāroti tīhipi padehi micchattānaṃ anuppādanameva vadati. Tathā kiriyā karaṇaṃ ajjhācāroti tīhipi padehi uppādanameva vadati. Ajjhācāroti adhiṭṭhahitvā ācaraṇaṃ. Atītassāti cirakālappavattivasena purāṇassa. Maggassāti ariyamaggassa. Vuttañhetaṃ – ‘‘purāṇamaggaṃ purāṇaṃ añjasanti kho ariyassetaṃ aṭṭhaṅgikassa maggassa adhivacana’’nti (saṃ. ni. 2.65 atthato samānaṃ). Atītena vā vipassinā bhagavatā yathādhigataṃ desitabhāvaṃ sandhāya ‘‘atītassa maggassā’’ti vuttaṃ. Vipassino hi ayaṃ bhagavato sammāsambuddhassa pātimokkhuddesagāthāti.
யங் படிவேதே⁴னாதி யஸ்ஸ பரிஞ்ஞாபி⁴ஸமயேன. யங் பரியோதா³பிதங், அயங் நிரோதோ⁴தி யதி³பி அஸங்க²தா தா⁴து கேனசி ஸங்கிலேஸேன ந ஸங்கிலிஸ்ஸதி, அதி⁴க³ச்ச²ந்தஸ்ஸ பன புக்³க³லஸ்ஸ வஸேன ஏவங் வுத்தங். தஸ்ஸ ஹி யாவ ஸங்கிலேஸா ந விக³ச்ச²ந்தி, தாவ அஸங்க²தா தா⁴து அபரியோத³பிதாதி வுச்சதி. யதா² நிப்³பா³னாதி⁴க³மேன யே க²ந்தா⁴ வூபஸமேதப்³பா³, தேஸங் ஸேஸபா⁴வேன அஸேஸபா⁴வேன ச ‘‘ஸஉபாதி³ஸேஸா’’தி ச, ‘‘அனுபாதி³ஸேஸா’’தி ச வுச்சதி, ஏவங்ஸம்பத³மித³ங் த³ட்ட²ப்³ப³ங்.
Yaṃ paṭivedhenāti yassa pariññābhisamayena. Yaṃ pariyodāpitaṃ, ayaṃ nirodhoti yadipi asaṅkhatā dhātu kenaci saṃkilesena na saṃkilissati, adhigacchantassa pana puggalassa vasena evaṃ vuttaṃ. Tassa hi yāva saṃkilesā na vigacchanti, tāva asaṅkhatā dhātu apariyodapitāti vuccati. Yathā nibbānādhigamena ye khandhā vūpasametabbā, tesaṃ sesabhāvena asesabhāvena ca ‘‘saupādisesā’’ti ca, ‘‘anupādisesā’’ti ca vuccati, evaṃsampadamidaṃ daṭṭhabbaṃ.
இமானி பாளிஆக³தத⁴ம்மானங் ஸபா⁴க³விஸபா⁴க³த⁴ம்மாவட்டனவஸேன நித்³தா⁴ரிதானி சத்தாரி ஸச்சானி புனபி பாளிஆக³தத⁴ம்மானங் ஸபா⁴க³விஸபா⁴க³த⁴ம்மாவட்டனேன ஆவட்டஹாரங் த³ஸ்ஸேதுங் ‘‘த⁴ம்மோ ஹவே ரக்க²தீ’’தி கா³த²மாஹ. தஸ்ஸா பத³த்தோ² புப்³பே³ வுத்தோ ஏவ. த⁴ம்மோதி புஞ்ஞத⁴ம்மோ இதா⁴தி⁴ப்பேதோ. தங் விப⁴ஜித்வா த³ஸ்ஸெந்தோ ‘‘த⁴ம்மோ நாம து³விதோ⁴ இந்த்³ரியஸங்வரோ மக்³கோ³ சா’’தி ஆஹ. இந்த்³ரியஸங்வரஸீஸேன செத்த² ஸப்³ப³ம்பி ஸீலங் க³ஹிதந்தி த³ட்ட²ப்³ப³ங் . ஸப்³பா³ உபபத்தியோ து³க்³க³தி து³க்க²து³க்க²தாதி³யோகே³ன து³க்கா² க³தியோதி கத்வா. யதா²வுத்தே து³விதே⁴ த⁴ம்மே பட²மோ த⁴ம்மோ யதா² ஸுசிண்ணோ ஹோதி, யதோ ச ஸோ ரக்க²தி, யத்த² ச பதிட்டா²பேதி, தங் ஸப்³ப³ங் த³ஸ்ஸேதுங் ‘‘தத்த² யா ஸங்வரஸீலே அக²ண்ட³காரிதா’’திஆதி³ வுத்தங். இதா³னி தஸ்ஸ த⁴ம்மஸ்ஸ அபாயதோ ரக்க²ணே ஏகந்திகபா⁴வங் விபா⁴வேதுங் கா³மணிஸங்யுத்தே (ஸங்॰ நி॰ 4.358) அஸிப³ந்த⁴கபுத்தஸுத்தங் ஆப⁴தங்.
Imāni pāḷiāgatadhammānaṃ sabhāgavisabhāgadhammāvaṭṭanavasena niddhāritāni cattāri saccāni punapi pāḷiāgatadhammānaṃ sabhāgavisabhāgadhammāvaṭṭanena āvaṭṭahāraṃ dassetuṃ ‘‘dhammo have rakkhatī’’ti gāthamāha. Tassā padattho pubbe vutto eva. Dhammoti puññadhammo idhādhippeto. Taṃ vibhajitvā dassento ‘‘dhammo nāma duvidho indriyasaṃvaro maggo cā’’ti āha. Indriyasaṃvarasīsena cettha sabbampi sīlaṃ gahitanti daṭṭhabbaṃ . Sabbā upapattiyo duggati dukkhadukkhatādiyogena dukkhā gatiyoti katvā. Yathāvutte duvidhe dhamme paṭhamo dhammo yathā suciṇṇo hoti, yato ca so rakkhati, yattha ca patiṭṭhāpeti, taṃ sabbaṃ dassetuṃ ‘‘tattha yā saṃvarasīle akhaṇḍakāritā’’tiādi vuttaṃ. Idāni tassa dhammassa apāyato rakkhaṇe ekantikabhāvaṃ vibhāvetuṃ gāmaṇisaṃyutte (saṃ. ni. 4.358) asibandhakaputtasuttaṃ ābhataṃ.
தத்த² ஏவந்தி பகாரேன. ச-ஸத்³தோ³ ஸம்பிண்ட³னே, இமினாபி பகாரேன அயமத்தோ² வேதி³தப்³போ³தி அதி⁴ப்பாயோ. அஸிப³ந்த⁴கபுத்தோதி அஸிப³ந்த⁴கஸ்ஸ நாம புத்தோ. கா³மே ஜெட்ட²கதாய கா³மணீ. பச்சா²பூ⁴மகாதி பச்சா²பூ⁴மிவாஸினோ. காமண்ட³லுகாதி ஸகமண்ட³லுனோ. ஸேவாலமாலிகாதி பாதோவ உத³கதோ ஸேவாலஞ்சேவ உப்பலாதீ³னி ச க³ஹெத்வா உத³கஸுத்³தி⁴பா⁴வஜானநத்த²ங் மாலங் கத்வா பிளந்த⁴னகா. உத³கோரோஹகாதி ஸாயங் பாதங் உத³கங் ஓரோஹணகா. உய்யாபெந்தீதி உபரியாபெந்தி. ஸஞ்ஞாபெந்தீதி ஸம்மா யாபெந்தி. ஸக்³க³ங் நாம ஓக்காமெந்தீதி பரிவாரெத்வா டி²தாவ ‘‘க³ச்ச², போ⁴, ப்³ரஹ்மலோகங், க³ச்ச², போ⁴, ப்³ரஹ்மலோக’’ந்தி வத³ந்தா ஸக்³க³ங் பவேஸெந்தி.
Tattha evanti pakārena. Ca-saddo sampiṇḍane, imināpi pakārena ayamattho veditabboti adhippāyo. Asibandhakaputtoti asibandhakassa nāma putto. Gāme jeṭṭhakatāya gāmaṇī. Pacchābhūmakāti pacchābhūmivāsino. Kāmaṇḍalukāti sakamaṇḍaluno. Sevālamālikāti pātova udakato sevālañceva uppalādīni ca gahetvā udakasuddhibhāvajānanatthaṃ mālaṃ katvā piḷandhanakā. Udakorohakāti sāyaṃ pātaṃ udakaṃ orohaṇakā. Uyyāpentīti upariyāpenti. Saññāpentīti sammā yāpenti. Saggaṃ nāma okkāmentīti parivāretvā ṭhitāva ‘‘gaccha, bho, brahmalokaṃ, gaccha, bho, brahmaloka’’nti vadantā saggaṃ pavesenti.
அனுபரிஸக்கெய்யாதி அனுபரிக³ச்செ²ய்ய. உம்முஜ்ஜாதி உட்ட²ஹ. உப்லவாதி ஜலஸ்ஸ உபரிப்லவ. த²லமுப்லவாதி த²லங் அபி⁴ருஹ. தத்ர யாஸ்ஸாதி தத்ர யங் அஸ்ஸ, யங் ப⁴வெய்ய. ஸக்க²ரகட²லந்தி ஸக்க²ரா வா கட²லா வா. ஸா அதோ⁴கா³மீ அஸ்ஸாதி ஸா அதோ⁴ க³ச்செ²ய்ய, ஹெட்டா²கா³மீ ப⁴வெய்ய. அதோ⁴ க³ச்செ²ய்யாதி ஹெட்டா² க³ச்செ²ய்ய. மக்³க³ஸ்ஸாதி அரியமக்³க³ஸ்ஸ. திக்க²தாதி திகி²ணதா. ஸா ச கோ² ந ஸத்த²கஸ்ஸ விய நிஸிதகரணதா, அத² கோ² இந்த்³ரியானங் படுபா⁴வோதி த³ஸ்ஸேதுங் ‘‘அதி⁴மத்ததா’’தி ஆஹ. நனு ச அரியமக்³கோ³ அத்தனா பஹாதப்³ப³கிலேஸே அனவஸேஸங் ஸமுச்சி²ந்த³தீதி அதிகி²ணோ நாம நத்தீ²தி? ஸச்சமேதங், ததா²பி நோ ச கோ² ‘‘யதா² தி³ட்டி²ப்பத்தஸ்ஸா’’தி வசனதோ ஸத்³தா⁴விமுத்ததி³ட்டி²ப்பத்தானங் கிலேஸப்பஹானங் பதி அத்தி² காசி விஸேஸமத்தாதி ஸக்கா வத்துங். அயங் பன விஸேஸோ ந இதா⁴தி⁴ப்பேதோ, ஸப்³பு³பபத்திஸமதிக்கமனஸ்ஸ அதி⁴ப்பேதத்தா. யஸ்மா பன அரியமக்³கே³ன ஓதி⁴ஸோ கிலேஸா பஹீயந்தி, தஞ்ச நேஸங் ததா²பஹானங் மக்³க³த⁴ம்மேஸு இந்த்³ரியானங் அபாடவபாடவதரபாடவதமபா⁴வேன ஹோதீதி யோ வஜிரூபமத⁴ம்மேஸு மத்த²கப்பத்தானங் அக்³க³மக்³க³த⁴ம்மானங் படுதமபா⁴வோ. அயங் இத⁴ மக்³க³ஸ்ஸ திக்க²தாதி அதி⁴ப்பேதா. தேனேவாஹ – ‘‘அயங் த⁴ம்மோ ஸுசிண்ணோ ஸப்³பா³ஹி உபபத்தீஹி ரக்க²தீ’’தி. ‘‘தஸ்மா ரக்கி²தசித்தஸ்ஸா’’திஆதி³னா ஸுத்தந்தரேன (உதா³॰ 32) ஸுக³திஸஞ்ஞிதானம்பி உபபத்தீனங் து³க்³க³திபா⁴வங் ஸாதே⁴தி.
Anuparisakkeyyāti anuparigaccheyya. Ummujjāti uṭṭhaha. Uplavāti jalassa upariplava. Thalamuplavāti thalaṃ abhiruha. Tatra yāssāti tatra yaṃ assa, yaṃ bhaveyya. Sakkharakaṭhalanti sakkharā vā kaṭhalā vā. Sā adhogāmī assāti sā adho gaccheyya, heṭṭhāgāmī bhaveyya. Adho gaccheyyāti heṭṭhā gaccheyya. Maggassāti ariyamaggassa. Tikkhatāti tikhiṇatā. Sā ca kho na satthakassa viya nisitakaraṇatā, atha kho indriyānaṃ paṭubhāvoti dassetuṃ ‘‘adhimattatā’’ti āha. Nanu ca ariyamaggo attanā pahātabbakilese anavasesaṃ samucchindatīti atikhiṇo nāma natthīti? Saccametaṃ, tathāpi no ca kho ‘‘yathā diṭṭhippattassā’’ti vacanato saddhāvimuttadiṭṭhippattānaṃ kilesappahānaṃ pati atthi kāci visesamattāti sakkā vattuṃ. Ayaṃ pana viseso na idhādhippeto, sabbupapattisamatikkamanassa adhippetattā. Yasmā pana ariyamaggena odhiso kilesā pahīyanti, tañca nesaṃ tathāpahānaṃ maggadhammesu indriyānaṃ apāṭavapāṭavatarapāṭavatamabhāvena hotīti yo vajirūpamadhammesu matthakappattānaṃ aggamaggadhammānaṃ paṭutamabhāvo. Ayaṃ idha maggassa tikkhatāti adhippetā. Tenevāha – ‘‘ayaṃ dhammo suciṇṇo sabbāhi upapattīhi rakkhatī’’ti. ‘‘Tasmā rakkhitacittassā’’tiādinā suttantarena (udā. 32) sugatisaññitānampi upapattīnaṃ duggatibhāvaṃ sādheti.
32. இதா³னி யதா²வுத்தஸ்ஸ த⁴ம்மஸ்ஸ விஸபா⁴க³த⁴ம்மானங் தண்ஹாவிஜ்ஜாதீ³னங் ஸபா⁴க³த⁴ம்மானஞ்ச ஸமத²விபஸ்ஸனாதீ³னங் நித்³தா⁴ரணவஸேன ஆவட்டஹாரங் யோஜெத்வா த³ஸ்ஸேதுங் ‘‘தத்த² து³க்³க³தீனங் ஹேது தண்ஹா ச அவிஜ்ஜா சா’’திஆதி³மாஹ. தங் புப்³பே³ வுத்தனயத்தா ஸுவிஞ்ஞெய்யமேவ. இத³ங் வுச்சதி ப்³ரஹ்மசரியந்தி இத³ங் அரியங் ஸமத²விபஸ்ஸனாஸங்கா²தங் மக்³க³ப்³ரஹ்மசரியந்தி வுச்சதி. யங் ரக்க²தீதி ஸப்³பா³ஹி து³க்³க³தீஹி ரக்க²ந்தஸ்ஸ அரியமக்³க³ஸ்ஸ ஆரம்மணபூ⁴தோ நிரோதோ⁴ ரக்க²ந்தோ விய வுத்தோ, நிமித்தஸ்ஸ கத்துபா⁴வேன உபசரிதத்தா. இமானி சத்தாரி ஸச்சானி விஸபா⁴க³ஸபா⁴க³த⁴ம்மாவட்டனவஸேன நித்³தா⁴ரிதானீதி அதி⁴ப்பாயோ.
32. Idāni yathāvuttassa dhammassa visabhāgadhammānaṃ taṇhāvijjādīnaṃ sabhāgadhammānañca samathavipassanādīnaṃ niddhāraṇavasena āvaṭṭahāraṃ yojetvā dassetuṃ ‘‘tattha duggatīnaṃ hetu taṇhā ca avijjā cā’’tiādimāha. Taṃ pubbe vuttanayattā suviññeyyameva. Idaṃ vuccati brahmacariyanti idaṃ ariyaṃ samathavipassanāsaṅkhātaṃ maggabrahmacariyanti vuccati. Yaṃ rakkhatīti sabbāhi duggatīhi rakkhantassa ariyamaggassa ārammaṇabhūto nirodho rakkhanto viya vutto, nimittassa kattubhāvena upacaritattā. Imāni cattāri saccāni visabhāgasabhāgadhammāvaṭṭanavasena niddhāritānīti adhippāyo.
ஆவட்டஹாரவிப⁴ங்க³வண்ணனா நிட்டி²தா.
Āvaṭṭahāravibhaṅgavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / நெத்திப்பகரணபாளி • Nettippakaraṇapāḷi / 7. ஆவட்டஹாரவிப⁴ங்கோ³ • 7. Āvaṭṭahāravibhaṅgo
டீகா • Tīkā / ஸுத்தபிடக (டீகா) • Suttapiṭaka (ṭīkā) / கு²த்³த³கனிகாய (டீகா) • Khuddakanikāya (ṭīkā) / நெத்திப்பகரண-டீகா • Nettippakaraṇa-ṭīkā / 7. ஆவட்டஹாரவிப⁴ங்க³வண்ணனா • 7. Āvaṭṭahāravibhaṅgavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / கு²த்³த³கனிகாய (டீகா) • Khuddakanikāya (ṭīkā) / நெத்திவிபா⁴வினீ • Nettivibhāvinī / 7. ஆவட்டஹாரவிப⁴ங்க³விபா⁴வனா • 7. Āvaṭṭahāravibhaṅgavibhāvanā
