| Library / Tipiṭaka / တိပိဋက • Tipiṭaka / သံယုတ္တနိကာယ • Saṃyuttanikāya |
၃. အာဝေဏိကဒုက္ခသုတ္တံ
3. Āveṇikadukkhasuttaṃ
၂၈၂. ‘‘ပဉ္စိမာနိ, ဘိက္ခဝေ, မာတုဂာမသ္သ အာဝေဏိကာနိ ဒုက္ခာနိ, ယာနိ မာတုဂာမော ပစ္စနုဘောတိ, အညတ္ရေဝ ပုရိသေဟိ။ ကတမာနိ ပဉ္စ? ဣဓ, ဘိက္ခဝေ , မာတုဂာမော ဒဟရောဝ သမာနော ပတိကုလံ ဂစ္ဆတိ, ဉာတကေဟိ ဝိနာ ဟောတိ။ ဣဒံ, ဘိက္ခဝေ, မာတုဂာမသ္သ ပဌမံ အာဝေဏိကံ ဒုက္ခံ, ယံ မာတုဂာမော ပစ္စနုဘောတိ, အညတ္ရေဝ ပုရိသေဟိ။ ပုန စပရံ, ဘိက္ခဝေ, မာတုဂာမော ဥတုနီ ဟောတိ။ ဣဒံ, ဘိက္ခဝေ, မာတုဂာမသ္သ ဒုတိယံ အာဝေဏိကံ ဒုက္ခံ, ယံ မာတုဂာမော ပစ္စနုဘောတိ, အညတ္ရေဝ ပုရိသေဟိ။ ပုန စပရံ, ဘိက္ခဝေ, မာတုဂာမော ဂဗ္ဘိနီ ဟောတိ။ ဣဒံ, ဘိက္ခဝေ, မာတုဂာမသ္သ တတိယံ အာဝေဏိကံ ဒုက္ခံ, ယံ မာတုဂာမော ပစ္စနုဘောတိ, အညတ္ရေဝ ပုရိသေဟိ။ ပုန စပရံ, ဘိက္ခဝေ, မာတုဂာမော ဝိဇာယတိ။ ဣဒံ, ဘိက္ခဝေ, မာတုဂာမသ္သ စတုတ္ထံ အာဝေဏိကံ ဒုက္ခံ, ယံ မာတုဂာမော ပစ္စနုဘောတိ, အညတ္ရေဝ ပုရိသေဟိ။ ပုန စပရံ, ဘိက္ခဝေ, မာတုဂာမော ပုရိသသ္သ ပာရိစရိယံ ဥပေတိ။ ဣဒံ ခော, ဘိက္ခဝေ, မာတုဂာမသ္သ ပဉ္စမံ အာဝေဏိကံ ဒုက္ခံ, ယံ မာတုဂာမော ပစ္စနုဘောတိ, အညတ္ရေဝ ပုရိသေဟိ။ ဣမာနိ ခော, ဘိက္ခဝေ, ပဉ္စ မာတုဂာမသ္သ အာဝေဏိကာနိ ဒုက္ခာနိ, ယာနိ မာတုဂာမော ပစ္စနုဘောတိ, အညတ္ရေဝ ပုရိသေဟီ’’တိ။ တတိယံ။
282. ‘‘Pañcimāni, bhikkhave, mātugāmassa āveṇikāni dukkhāni, yāni mātugāmo paccanubhoti, aññatreva purisehi. Katamāni pañca? Idha, bhikkhave , mātugāmo daharova samāno patikulaṃ gacchati, ñātakehi vinā hoti. Idaṃ, bhikkhave, mātugāmassa paṭhamaṃ āveṇikaṃ dukkhaṃ, yaṃ mātugāmo paccanubhoti, aññatreva purisehi. Puna caparaṃ, bhikkhave, mātugāmo utunī hoti. Idaṃ, bhikkhave, mātugāmassa dutiyaṃ āveṇikaṃ dukkhaṃ, yaṃ mātugāmo paccanubhoti, aññatreva purisehi. Puna caparaṃ, bhikkhave, mātugāmo gabbhinī hoti. Idaṃ, bhikkhave, mātugāmassa tatiyaṃ āveṇikaṃ dukkhaṃ, yaṃ mātugāmo paccanubhoti, aññatreva purisehi. Puna caparaṃ, bhikkhave, mātugāmo vijāyati. Idaṃ, bhikkhave, mātugāmassa catutthaṃ āveṇikaṃ dukkhaṃ, yaṃ mātugāmo paccanubhoti, aññatreva purisehi. Puna caparaṃ, bhikkhave, mātugāmo purisassa pāricariyaṃ upeti. Idaṃ kho, bhikkhave, mātugāmassa pañcamaṃ āveṇikaṃ dukkhaṃ, yaṃ mātugāmo paccanubhoti, aññatreva purisehi. Imāni kho, bhikkhave, pañca mātugāmassa āveṇikāni dukkhāni, yāni mātugāmo paccanubhoti, aññatreva purisehī’’ti. Tatiyaṃ.
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၃. အာဝေဏိကဒုက္ခသုတ္တဝဏ္ဏနာ • 3. Āveṇikadukkhasuttavaṇṇanā
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၃. အာဝေဏိကဒုက္ခသုတ္တဝဏ္ဏနာ • 3. Āveṇikadukkhasuttavaṇṇanā
