| Library / Tipiṭaka / д̇ибидага • Tipiṭaka / сам̣яуд̇д̇анигааяа (адтагат̇аа) • Saṃyuttanikāya (aṭṭhakathā) |
5. авиж̇ж̇аабажжаяасуд̇д̇аван̣н̣анаа
5. Avijjāpaccayasuttavaṇṇanā
35. бан̃жамз самуд̣̇аяо ход̇ийд̇и сад̇т̇аа ид̇хзва д̣̇зсанам̣ осаабзси. гим̣гааран̣аад̇и? д̣̇идтиг̇ад̇игасса огаасад̣̇аанад̇т̇ам̣. д̇ассан̃хи барисад̇и убаарамбхажид̇д̇о д̣̇идтиг̇ад̇иго ад̇т̇и, со бан̃хам̣ бужчиссад̇и, ат̇ассаахам̣ виссаж̇ж̇зссаамийд̇и д̇асса огаасад̣̇аанад̇т̇ам̣ д̣̇зсанам̣ осаабзси. но галло бан̃ход̇и аяуд̇д̇о бан̃хо. д̣̇уббан̃хо зсод̇и ад̇т̇о. нану жа ‘‘гад̇амам̣ ну ко, бханд̇з, ж̇араамаран̣а’’нд̇и? ид̣̇ам̣ субужчид̇анд̇и. гин̃жааби субужчид̇ам̣, яат̇аа бана сад̇асахассаг̇гханигз суван̣н̣ат̇аалз вад̣дхид̇асса субхож̇анасса мад̇т̇агз аамалагамад̇д̇зби г̇уут̇абин̣д̣з табид̇з саб̣б̣ам̣ бхож̇анам̣ д̣̇уб̣бхож̇анам̣ ход̇и чад̣д̣зд̇аб̣б̣ам̣, звамзва ‘‘гасса жа банид̣̇ам̣ ж̇араамаран̣а’’нд̇и? иминаа сад̇д̇уубалад̣̇д̇хиваад̣̇абад̣̇зна г̇уут̇абин̣д̣зна д̇ам̣ бхож̇анам̣ д̣̇уб̣бхож̇анам̣ вияа аяамби саб̣б̣о д̣̇уббан̃хова ж̇аад̇од̇и.
35. Pañcame samudayo hotīti satthā idheva desanaṃ osāpesi. Kiṃkāraṇāti? Diṭṭhigatikassa okāsadānatthaṃ. Tassañhi parisati upārambhacitto diṭṭhigatiko atthi, so pañhaṃ pucchissati, athassāhaṃ vissajjessāmīti tassa okāsadānatthaṃ desanaṃ osāpesi. No kallo pañhoti ayutto pañho. Duppañho esoti attho. Nanu ca ‘‘katamaṃ nu kho, bhante, jarāmaraṇa’’nti? Idaṃ supucchitanti. Kiñcāpi supucchitaṃ, yathā pana satasahassagghanike suvaṇṇathāle vaḍḍhitassa subhojanassa matthake āmalakamattepi gūthapiṇḍe ṭhapite sabbaṃ bhojanaṃ dubbhojanaṃ hoti chaḍḍetabbaṃ, evameva ‘‘kassa ca panidaṃ jarāmaraṇa’’nti? Iminā sattūpaladdhivādapadena gūthapiṇḍena taṃ bhojanaṃ dubbhojanaṃ viya ayampi sabbo duppañhova jātoti.
б̣рахмажарияаваасод̇и арияамаг̇г̇аваасо. д̇ам̣ ж̇ийвам̣ д̇ам̣ сарийранд̇и яасса хи аяам̣ д̣̇идти, со ‘‘ж̇ийвз ужчиж̇ж̇амаанз сарийрам̣ ужчиж̇ж̇ад̇и, сарийрз ужчиж̇ж̇анд̇з ж̇ийвид̇ам̣ ужчиж̇ж̇ад̇ий’’д̇и г̇ан̣хаад̇и. звам̣ г̇ан̣хад̇о саа д̣̇идти ‘‘сад̇д̇о ужчиж̇ж̇ад̇ий’’д̇и г̇ахид̇ад̇д̇аа ужчзд̣̇ад̣̇идти наама ход̇и . сажз бана сан̇каараава уббаж̇ж̇анд̇и жзва нируж̇жханд̇и жаад̇и г̇ан̣хзяяа, саасанааважараа саммаад̣̇идти наама бхавзяяа. арияамаг̇г̇о жа наамзсо ваддам̣ нирод̇хзнд̇о ваддам̣ самужчинд̣̇анд̇о уббаж̇ж̇ад̇и , д̇ад̣̇зва д̇ам̣ ваддам̣ ужчзд̣̇ад̣̇идтияаа г̇ахид̇аагаарасса самбхавз сад̇и винаава маг̇г̇абхааванааяа нируж̇жхад̇ийд̇и маг̇г̇абхааванаа нирад̇т̇агаа ход̇и. д̇зна вуд̇д̇ам̣ ‘‘б̣рахмажарияаваасо на ход̇ий’’д̇и.
Brahmacariyavāsoti ariyamaggavāso. Taṃ jīvaṃ taṃ sarīranti yassa hi ayaṃ diṭṭhi, so ‘‘jīve ucchijjamāne sarīraṃ ucchijjati, sarīre ucchijjante jīvitaṃ ucchijjatī’’ti gaṇhāti. Evaṃ gaṇhato sā diṭṭhi ‘‘satto ucchijjatī’’ti gahitattā ucchedadiṭṭhi nāma hoti . Sace pana saṅkhārāva uppajjanti ceva nirujjhanti cāti gaṇheyya, sāsanāvacarā sammādiṭṭhi nāma bhaveyya. Ariyamaggo ca nāmeso vaṭṭaṃ nirodhento vaṭṭaṃ samucchindanto uppajjati , tadeva taṃ vaṭṭaṃ ucchedadiṭṭhiyā gahitākārassa sambhave sati vināva maggabhāvanāya nirujjhatīti maggabhāvanā niratthakā hoti. Tena vuttaṃ ‘‘brahmacariyavāso na hotī’’ti.
д̣̇уд̇ияанаяз ан̃н̃ам̣ ж̇ийвам̣ ан̃н̃ам̣ сарийранд̇и яасса аяам̣ д̣̇идти, со ‘‘сарийрам̣ ид̇хзва ужчиж̇ж̇ад̇и, на ж̇ийвид̇ам̣, ж̇ийвид̇ам̣ бана бан̃ж̇арад̇о сагун̣о вияа яат̇аасукам̣ г̇ажчад̇ий’’д̇и г̇ан̣хаад̇и. звам̣ г̇ан̣хад̇о саа д̣̇идти ‘‘имасмаа логаа ж̇ийвид̇ам̣ баралогам̣ г̇ад̇а’’нд̇и г̇ахид̇ад̇д̇аа сассад̇ад̣̇идти наама ход̇и. аяан̃жа арияамаг̇г̇о д̇збхуумагаваддам̣ виваддзнд̇о уббаж̇ж̇ад̇и, со згасан̇каарзби нижжз д̇хувз сассад̇з сад̇и уббанноби ваддам̣ виваддзд̇ум̣ на саггод̇ийд̇и маг̇г̇абхааванаа нирад̇т̇агаа ход̇и. д̇зна вуд̇д̇ам̣ ‘‘ан̃н̃ам̣ ж̇ийвам̣ ан̃н̃ам̣ сарийранд̇и ваа бхигку д̣̇идтияаа сад̇и б̣рахмажарияаваасо на ход̇ий’’д̇и.
Dutiyanaye aññaṃ jīvaṃ aññaṃ sarīranti yassa ayaṃ diṭṭhi, so ‘‘sarīraṃ idheva ucchijjati, na jīvitaṃ, jīvitaṃ pana pañjarato sakuṇo viya yathāsukhaṃ gacchatī’’ti gaṇhāti. Evaṃ gaṇhato sā diṭṭhi ‘‘imasmā lokā jīvitaṃ paralokaṃ gata’’nti gahitattā sassatadiṭṭhi nāma hoti. Ayañca ariyamaggo tebhūmakavaṭṭaṃ vivaṭṭento uppajjati, so ekasaṅkhārepi nicce dhuve sassate sati uppannopi vaṭṭaṃ vivaṭṭetuṃ na sakkotīti maggabhāvanā niratthakā hoti. Tena vuttaṃ ‘‘aññaṃ jīvaṃ aññaṃ sarīranti vā bhikkhu diṭṭhiyā sati brahmacariyavāso na hotī’’ti.
висуугааяигаанийд̇иаад̣̇и саб̣б̣ам̣ мижчаад̣̇идтивзважанамзва. саа хи саммаад̣̇идтияаа винивиж̇жханадтзна висуугамива ад̇д̇аанам̣ ааваран̣ад̇о висуугааяигам̣, саммаад̣̇идтим̣ ананувад̇д̇ид̇ваа д̇ассаа вирод̇хзна бавад̇д̇анад̇о висзвид̇ам̣, гад̣̇аажи ужчзд̣̇асса гад̣̇аажи сассад̇асса г̇ахан̣ад̇о вируубам̣ панд̣̇ид̇ам̣ вибпанд̣̇ид̇анд̇и вужжад̇и. д̇аалаавад̇т̇угад̇аанийд̇и д̇аалавад̇т̇у вияа гад̇аани, буна авирухан̣адтзна мад̇т̇агажчиннад̇аало вияа самуулам̣ д̇аалам̣ уд̣̇д̇харид̇ваа д̇асса бад̇идтид̇адтаанам̣ вияа жа гад̇аанийд̇и ад̇т̇о. анабхаавам̣гад̇аанийд̇и ануабхаавам̣ гад̇аанийд̇и. бан̃жамам̣.
Visūkāyikānītiādi sabbaṃ micchādiṭṭhivevacanameva. Sā hi sammādiṭṭhiyā vinivijjhanaṭṭhena visūkamiva attānaṃ āvaraṇato visūkāyikaṃ, sammādiṭṭhiṃ ananuvattitvā tassā virodhena pavattanato visevitaṃ, kadāci ucchedassa kadāci sassatassa gahaṇato virūpaṃ phanditaṃ vipphanditanti vuccati. Tālāvatthukatānīti tālavatthu viya katāni, puna aviruhaṇaṭṭhena matthakacchinnatālo viya samūlaṃ tālaṃ uddharitvā tassa patiṭṭhitaṭṭhānaṃ viya ca katānīti attho. Anabhāvaṃkatānīti anuabhāvaṃ katānīti. Pañcamaṃ.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / сам̣яуд̇д̇анигааяа • Saṃyuttanikāya / 5. авиж̇ж̇аабажжаяасуд̇д̇ам̣ • 5. Avijjāpaccayasuttaṃ
дийгаа • Tīkā / суд̇д̇абидага (дийгаа) • Suttapiṭaka (ṭīkā) / сам̣яуд̇д̇анигааяа (дийгаа) • Saṃyuttanikāya (ṭīkā) / 5. авиж̇ж̇аабажжаяасуд̇д̇аван̣н̣анаа • 5. Avijjāpaccayasuttavaṇṇanā
