| Library / Tipiṭaka / ತಿಪಿಟಕ • Tipiṭaka / ಅಪದಾನ-ಅಟ್ಠಕಥಾ • Apadāna-aṭṭhakathā |
೨. ಅವೋಪುಪ್ಫಿಯತ್ಥೇರಅಪದಾನವಣ್ಣನಾ
2. Avopupphiyattheraapadānavaṇṇanā
ವಿಹಾರಾ ಅಭಿನಿಕ್ಖಮ್ಮಾತಿಆದಿಕಂ ಆಯಸ್ಮತೋ ಅವೋಪುಪ್ಫಿಯತ್ಥೇರಸ್ಸ ಅಪದಾನಂ। ಅಯಮ್ಪಿ ಪುರಿಮಬುದ್ಧೇಸು ಕತಾಧಿಕಾರೋ ತತ್ಥ ತತ್ಥ ಭವೇ ವಿವಟ್ಟೂಪನಿಸ್ಸಯಾನಿ ಪುಞ್ಞಾನಿ ಉಪಚಿನನ್ತೋ ಸಿಖಿಸ್ಸ ಭಗವತೋ ಕಾಲೇ ಕುಲಗೇಹೇ ನಿಬ್ಬತ್ತೋ ವಿಞ್ಞುತಂ ಪತ್ತೋ ಸದ್ಧಾಸಮ್ಪನ್ನೋ ಧಮ್ಮಂ ಸುತ್ವಾ ಸೋಮನಸ್ಸಪ್ಪತ್ತೋ ನಾನಾಪುಪ್ಫಾನಿ ಉಭೋಹಿ ಹತ್ಥೇಹಿ ಗಹೇತ್ವಾ ಬುದ್ಧಸ್ಸ ಉಪರಿ ಅಬ್ಭುಕ್ಕಿರಿ। ಸೋ ತೇನ ಪುಞ್ಞೇನ ದೇವಮನುಸ್ಸೇಸು ಸಂಸರನ್ತೋ ಸಗ್ಗಸಮ್ಪತ್ತಿಞ್ಚ ಚಕ್ಕವತ್ತಿಸಮ್ಪತ್ತಿಞ್ಚ ಅನುಭವಿತ್ವಾ ಸಬ್ಬತ್ಥ ಪೂಜಿತೋ ಇಮಸ್ಮಿಂ ಬುದ್ಧುಪ್ಪಾದೇ ಏಕಸ್ಮಿಂ ಕುಲಗೇಹೇ ನಿಬ್ಬತೋ ವುದ್ಧಿಪ್ಪತ್ತೋ ಸಾಸನೇ ಪಸೀದಿತ್ವಾ ಪಬ್ಬಜಿತ್ವಾ ನಚಿರಸ್ಸೇವ ಅರಹಾ ಅಹೋಸಿ। ಆ ಸಮನ್ತತೋ ಕಾಸತಿ ದಿಪ್ಪತೀತಿ ಆಕಾಸೋ, ತಸ್ಮಿಂ ಆಕಾಸೇ ಪುಪ್ಫಾನಂ ಅವಕಿರಿತತ್ತಾ ಅವೋಪುಪ್ಫಿಯತ್ಥೇರೋತಿ ಪಾಕಟೋ।
Vihārā abhinikkhammātiādikaṃ āyasmato avopupphiyattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto sikhissa bhagavato kāle kulagehe nibbatto viññutaṃ patto saddhāsampanno dhammaṃ sutvā somanassappatto nānāpupphāni ubhohi hatthehi gahetvā buddhassa upari abbhukkiri. So tena puññena devamanussesu saṃsaranto saggasampattiñca cakkavattisampattiñca anubhavitvā sabbattha pūjito imasmiṃ buddhuppāde ekasmiṃ kulagehe nibbato vuddhippatto sāsane pasīditvā pabbajitvā nacirasseva arahā ahosi. Ā samantato kāsati dippatīti ākāso, tasmiṃ ākāse pupphānaṃ avakiritattā avopupphiyattheroti pākaṭo.
೭. ಏವಂ ಪತ್ತಸನ್ತಿಪದೋ ಅತ್ತನೋ ಪುಬ್ಬಕಮ್ಮಂ ಸರಿತ್ವಾ ಸೋಮನಸ್ಸಜಾತೋ ಪುಬ್ಬಚರಿತಾಪದಾನಂ ಪಕಾಸೇನ್ತೋ ವಿಹಾರಾ ಅಭಿನಿಕ್ಖಮ್ಮಾತಿಆದಿಮಾಹ। ತತ್ಥ ವಿಹಾರಾತಿ ವಿಸೇಸೇನ ಹರತಿ ಚತೂಹಿ ಇರಿಯಾಪಥೇಹಿ ಅಪತನ್ತಂ ಅತ್ತಭಾವಂ ಆಹರತಿ ಪವತ್ತೇತಿ ಏತ್ಥಾತಿ ವಿಹಾರೋ, ತಸ್ಮಾ ವಿಹಾರಾ ಅಭಿ ವಿಸೇಸೇನ ನಿಕ್ಖಮ್ಮ ನಿಕ್ಖಮಿತ್ವಾ। ಅಬ್ಭುಟ್ಠಾಸಿ ಚ ಚಙ್ಕಮೇತಿ ಚಙ್ಕಮನತ್ಥಾಯ ಸಟ್ಠಿರತನೇ ಚಙ್ಕಮೇ ಅಭಿವಿಸೇಸೇನ ಉಟ್ಠಾಸಿ, ಅಭಿರುಹೀತಿ ಅತ್ಥೋ। ಚತುಸಚ್ಚಂ ಪಕಾಸೇನ್ತೋತಿ ತಸ್ಮಿಂ ಚಙ್ಕಮೇ ಚಙ್ಕಮನ್ತೋ ದುಕ್ಖಸಮುದಯನಿರೋಧಮಗ್ಗಸಚ್ಚಸಙ್ಖಾತಂ ಚತುಸಚ್ಚಂ ಪಕಾಸೇನ್ತೋ ಪಾಕಟಂ ಕರೋನ್ತೋ ಅಮತಂ ಪದಂ ನಿಬ್ಬಾನಂ ದೇಸೇನ್ತೋ ವಿಭಜನ್ತೋ ಉತ್ತಾನೀಕರೋನ್ತೋ ತಸ್ಮಿಂ ಚಙ್ಕಮೇತಿ ಸಮ್ಬನ್ಧೋ।
7. Evaṃ pattasantipado attano pubbakammaṃ saritvā somanassajāto pubbacaritāpadānaṃ pakāsento vihārā abhinikkhammātiādimāha. Tattha vihārāti visesena harati catūhi iriyāpathehi apatantaṃ attabhāvaṃ āharati pavatteti etthāti vihāro, tasmā vihārā abhi visesena nikkhamma nikkhamitvā. Abbhuṭṭhāsi ca caṅkameti caṅkamanatthāya saṭṭhiratane caṅkame abhivisesena uṭṭhāsi, abhiruhīti attho. Catusaccaṃpakāsentoti tasmiṃ caṅkame caṅkamanto dukkhasamudayanirodhamaggasaccasaṅkhātaṃ catusaccaṃ pakāsento pākaṭaṃ karonto amataṃ padaṃ nibbānaṃ desento vibhajanto uttānīkaronto tasmiṃ caṅkameti sambandho.
೮. ಸಿಖಿಸ್ಸ ಗಿರಮಞ್ಞಾಯ, ಬುದ್ಧಸೇಟ್ಠಸ್ಸ ತಾದಿನೋತಿ ಸೇಟ್ಠಸ್ಸ ತಾದಿಗುಣಸಮಙ್ಗಿಸ್ಸ ಸಿಖಿಸ್ಸ ಬುದ್ಧಸ್ಸ ಗಿರಂ ಸದ್ದಂ ಘೋಸಂ ಅಞ್ಞಾಯ ಜಾನಿತ್ವಾ। ನಾನಾಪುಪ್ಫಂ ಗಹೇತ್ವಾನಾತಿ ನಾಗಪುನ್ನಾಗಾದಿಅನೇಕಾನಿ ಪುಪ್ಫಾನಿ ಗಹೇತ್ವಾ ಆಹರಿತ್ವಾ। ಆಕಾಸಮ್ಹಿ ಸಮೋಕಿರಿನ್ತಿ ಚಙ್ಕಮನ್ತಸ್ಸ ಭಗವತೋ ಮುದ್ಧನಿ ಆಕಾಸೇ ಓಕಿರಿಂ ಪೂಜೇಸಿಂ।
8.Sikhissa giramaññāya, buddhaseṭṭhassa tādinoti seṭṭhassa tādiguṇasamaṅgissa sikhissa buddhassa giraṃ saddaṃ ghosaṃ aññāya jānitvā. Nānāpupphaṃ gahetvānāti nāgapunnāgādianekāni pupphāni gahetvā āharitvā. Ākāsamhi samokirinti caṅkamantassa bhagavato muddhani ākāse okiriṃ pūjesiṃ.
೯. ತೇನ ಕಮ್ಮೇನ ದ್ವಿಪದಿನ್ದಾತಿ ದ್ವಿಪದಾನಂ ದೇವಬ್ರಹ್ಮಮನುಸ್ಸಾನಂ ಇನ್ದ ಪಧಾನಭೂತ। ನರಾಸಭ ನರಾನಂ ಆಸಭಭೂತ। ಪತ್ತೋಮ್ಹಿ ಅಚಲಂ ಠಾನನ್ತಿ ತುಮ್ಹಾಕಂ ಸನ್ತಿಕೇ ಪಬ್ಬಜಿತ್ವಾ ಅಚಲಂ ಠಾನಂ ನಿಬ್ಬಾನಂ ಪತ್ತೋ ಅಮ್ಹಿ ಭವಾಮಿ। ಹಿತ್ವಾ ಜಯಪರಾಜಯನ್ತಿ ದಿಬ್ಬಮನುಸ್ಸಸಮ್ಪತ್ತಿಸಙ್ಖಾತಂ ಜಯಞ್ಚ ಚತುರಾಪಾಯದುಕ್ಖಸಙ್ಖಾತಂ ಪರಾಜಯಞ್ಚ ಹಿತ್ವಾ ಛಡ್ಡೇತ್ವಾ ನಿಬ್ಬಾನಂ ಪತ್ತೋಸ್ಮೀತಿ ಅತ್ಥೋ। ಸೇಸಂ ಸುವಿಞ್ಞೇಯ್ಯಮೇವಾತಿ।
9.Tena kammena dvipadindāti dvipadānaṃ devabrahmamanussānaṃ inda padhānabhūta. Narāsabha narānaṃ āsabhabhūta. Pattomhi acalaṃ ṭhānanti tumhākaṃ santike pabbajitvā acalaṃ ṭhānaṃ nibbānaṃ patto amhi bhavāmi. Hitvā jayaparājayanti dibbamanussasampattisaṅkhātaṃ jayañca caturāpāyadukkhasaṅkhātaṃ parājayañca hitvā chaḍḍetvā nibbānaṃ pattosmīti attho. Sesaṃ suviññeyyamevāti.
ಅವೋಪುಪ್ಫಿಯತ್ಥೇರಅಪದಾನವಣ್ಣನಾ ಸಮತ್ತೋ।
Avopupphiyattheraapadānavaṇṇanā samatto.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಖುದ್ದಕನಿಕಾಯ • Khuddakanikāya / ಅಪದಾನಪಾಳಿ • Apadānapāḷi / ೨. ಅವೋಪುಪ್ಫಿಯತ್ಥೇರಅಪದಾನಂ • 2. Avopupphiyattheraapadānaṃ
