| Library / Tipiṭaka / ਤਿਪਿਟਕ • Tipiṭaka / ਇਤਿવੁਤ੍ਤਕ-ਅਟ੍ਠਕਥਾ • Itivuttaka-aṭṭhakathā |
੬. ਅવੁਟ੍ਠਿਕਸੁਤ੍ਤવਣ੍ਣਨਾ
6. Avuṭṭhikasuttavaṇṇanā
੭੫. ਛਟ੍ਠੇ ਅવੁਟ੍ਠਿਕਸਮੋਤਿ ਅવੁਟ੍ਠਿਕਮੇਘਸਮੋ। ਏਕਚ੍ਚੋ ਹਿ ਮੇਘੋ ਸਤਪਟਲਸਹਸ੍ਸਪਟਲੋ ਹੁਤ੍વਾ ਉਟ੍ਠਹਿਤ੍વਾ ਥਨਨ੍ਤੋ ਗਜ੍ਜਨ੍ਤੋ વਿਜ੍ਜੋਤਨ੍ਤੋ ਏਕਂ ਉਦਕਬਿਨ੍ਦੁਮ੍ਪਿ ਅਪਾਤੇਤ੍વਾ વਿਗਚ੍ਛਤਿ, ਤਥੂਪਮੋ ਏਕਚ੍ਚੋ ਪੁਗ੍ਗਲੋਤਿ ਦਸ੍ਸੇਨ੍ਤੋ ਆਹ ‘‘ਅવੁਟ੍ਠਿਕਸਮੋ’’ਤਿ। ਪਦੇਸવਸ੍ਸੀਤਿ ਏਕਦੇਸવਸ੍ਸਿਮੇਘਸਮੋ। ਪਦੇਸવਸ੍ਸੀ વਿਯਾਤਿ ਹਿ ਪਦੇਸવਸ੍ਸੀ। ਏਕਚ੍ਚੋ ਏਕਸ੍ਮਿਂਯੇવ ਠਾਨੇ ਠਿਤੇਸੁ ਮਨੁਸ੍ਸੇਸੁ ਯਥਾ ਏਕਚ੍ਚੇ ਤੇਮੇਨ੍ਤਿ, ਏਕਚ੍ਚੇ ਨ ਤੇਮੇਨ੍ਤਿ, ਏવਂ ਮਨ੍ਦਂ વਸ੍ਸਤਿ, ਤਥੂਪਮਂ ਏਕਚ੍ਚਂ ਪੁਗ੍ਗਲਂ ਦਸ੍ਸੇਤਿ ‘‘ਪਦੇਸવਸ੍ਸੀ’’ਤਿ। ਸਬ੍ਬਤ੍ਥਾਭਿવਸ੍ਸੀਤਿ ਸਬ੍ਬਸ੍ਮਿਂ ਪਥવੀਪਬ੍ਬਤਸਮੁਦ੍ਦਾਦਿਕੇ ਜਗਤਿਪ੍ਪਦੇਸੇ ਅਭਿવਸ੍ਸਿਮੇਘਸਮੋ। ਏਕਚ੍ਚੋ ਹਿ ਸਕਲਚਕ੍ਕવਾਲ਼ਗਬ੍ਭਂ ਪਤ੍ਥਰਿਤ੍વਾ ਸਬ੍ਬਤ੍ਥਕਮੇવ ਅਭਿવਸ੍ਸਤਿ, ਤਂ ਚਾਤੁਦ੍ਦੀਪਿਕਮਹਾਮੇਘਂ ਏਕਚ੍ਚਸ੍ਸ ਪੁਗ੍ਗਲਸ੍ਸ ਉਪਮਂ ਕਤ੍વਾ વੁਤ੍ਤਂ ‘‘ਸਬ੍ਬਤ੍ਥਾਭਿવਸ੍ਸੀ’’ਤਿ।
75. Chaṭṭhe avuṭṭhikasamoti avuṭṭhikameghasamo. Ekacco hi megho satapaṭalasahassapaṭalo hutvā uṭṭhahitvā thananto gajjanto vijjotanto ekaṃ udakabindumpi apātetvā vigacchati, tathūpamo ekacco puggaloti dassento āha ‘‘avuṭṭhikasamo’’ti. Padesavassīti ekadesavassimeghasamo. Padesavassī viyāti hi padesavassī. Ekacco ekasmiṃyeva ṭhāne ṭhitesu manussesu yathā ekacce tementi, ekacce na tementi, evaṃ mandaṃ vassati, tathūpamaṃ ekaccaṃ puggalaṃ dasseti ‘‘padesavassī’’ti. Sabbatthābhivassīti sabbasmiṃ pathavīpabbatasamuddādike jagatippadese abhivassimeghasamo. Ekacco hi sakalacakkavāḷagabbhaṃ pattharitvā sabbatthakameva abhivassati, taṃ cātuddīpikamahāmeghaṃ ekaccassa puggalassa upamaṃ katvā vuttaṃ ‘‘sabbatthābhivassī’’ti.
ਸਬ੍ਬੇਸਾਨਨ੍ਤਿ ਸਬ੍ਬੇਸਂ, ਅਯਮੇવ વਾ ਪਾਠੋ। ਨ ਦਾਤਾ ਹੋਤੀਤਿ ਅਦਾਨਸੀਲੋ ਹੋਤਿ, ਥਦ੍ਧਮਚ੍ਛਰਿਤਾਯ ਨ ਕਸ੍ਸਚਿ ਕਿਞ੍ਚਿ ਦੇਤੀਤਿ ਅਤ੍ਥੋ। ਇਦਾਨਿ ਦਾਨਸ੍ਸ ਖੇਤ੍ਤਂ ਦੇਯ੍ਯਧਮ੍ਮਞ੍ਚ વਿਭਾਗੇਨ ਦਸ੍ਸੇਤੁਂ ‘‘ਸਮਣਬ੍ਰਾਹ੍ਮਣਾ’’ਤਿਆਦਿਮਾਹ। ਤਤ੍ਥ ਸਮਿਤਪਾਪਸਮਣਾ ਚੇવ ਪਬ੍ਬਜ੍ਜਮਤ੍ਤਸਮਣਾ ਚ ਬਾਹਿਤਪਾਪਬ੍ਰਾਹ੍ਮਣਾ ਚੇવ ਜਾਤਿਮਤ੍ਤਬ੍ਰਾਹ੍ਮਣਾ ਚ ਇਧ ‘‘ਸਮਣਬ੍ਰਾਹ੍ਮਣਾ’’ਤਿ ਅਧਿਪ੍ਪੇਤਾ। ਕਪਣਾ ਨਾਮ ਦੁਗ੍ਗਤਾ ਦਲਿਦ੍ਦਮਨੁਸ੍ਸਾ। ਅਦ੍ਧਿਕਾ ਨਾਮ ਪਥਾવਿਨੋ ਪਰਿਬ੍ਬਯવਿਹੀਨਾ। વਨਿਬ੍ਬਕਾ ਨਾਮ ਯੇ ‘‘ਇਟ੍ਠਂ ਦੇਥ ਕਨ੍ਤਂ ਮਨਾਪਂ ਕਾਲੇਨ ਅਨવਜ੍ਜਂ ਉਦਗ੍ਗਚਿਤ੍ਤਾ ਪਸਨ੍ਨਚਿਤ੍ਤਾ, ਏવਂ ਦੇਨ੍ਤਾ ਗਚ੍ਛਥ ਸੁਗਤਿਂ, ਗਚ੍ਛਥ ਬ੍ਰਹ੍ਮਲੋਕ’’ਨ੍ਤਿਆਦਿਨਾ ਨਯੇਨ ਦਾਨੇ ਨਿਯੋਜੇਨ੍ਤਾ ਦਾਨਸ੍ਸ વਣ੍ਣਂ ਥੋਮੇਨ੍ਤਾ વਿਚਰਨ੍ਤਿ। ਯਾਚਕਾ ਨਾਮ ਯੇ ਕੇવਲਂ ‘‘ਮੁਟ੍ਠਿਮਤ੍ਤਂ ਦੇਥ, ਪਸਤਮਤ੍ਤਂ ਦੇਥ, ਸਰਾવਮਤ੍ਤਂ ਦੇਥਾ’’ਤਿ ਅਪ੍ਪਕਮ੍ਪਿ ਯਾਚਮਾਨਾ વਿਚਰਨ੍ਤਿ। ਤਤ੍ਥ ਸਮਣਬ੍ਰਾਹ੍ਮਣਗ੍ਗਹਣੇਨ ਗੁਣਖੇਤ੍ਤਂ ਉਪਕਾਰਿਖੇਤ੍ਤਞ੍ਚ ਦਸ੍ਸੇਤਿ, ਕਪਣਾਦਿਗ੍ਗਹਣੇਨ ਕਰੁਣਾਖੇਤ੍ਤਂ। ਅਨ੍ਨਨ੍ਤਿ ਯਂਕਿਞ੍ਚਿ ਖਾਦਨੀਯਂ ਭੋਜਨੀਯਂ। ਪਾਨਨ੍ਤਿ ਅਮ੍ਬਪਾਨਾਦਿਪਾਨਕਂ। વਤ੍ਥਨ੍ਤਿ ਨਿવਾਸਨਪਾਰੁਪਨਾਦਿਅਚ੍ਛਾਦਨਂ। ਯਾਨਨ੍ਤਿ ਰਥવਯ੍ਹਾਦਿ ਅਨ੍ਤਮਸੋ ਉਪਾਹਨਂ ਉਪਾਦਾਯ ਗਮਨਸਾਧਨਂ। ਮਾਲਾਤਿ ਗਨ੍ਥਿਤਾਗਨ੍ਥਿਤਭੇਦਂ ਸਬ੍ਬਂ ਪੁਪ੍ਫਂ। ਗਨ੍ਧਨ੍ਤਿ ਯਂਕਿਞ੍ਚਿ ਗਨ੍ਧਜਾਤਂ ਪਿਸਿਤਂ ਅਪਿਸਿਤਂ ਗਨ੍ਧੂਪਕਰਣਞ੍ਚ। વਿਲੇਪਨਨ੍ਤਿ ਛવਿਰਾਗਕਰਣਂ। ਸੇਯ੍ਯਾਤਿ ਮਞ੍ਚਪੀਠਾਦਿ ਚੇવ ਪਾવਾਰਕੋਜવਾਦਿ ਚ ਸਯਿਤਬ੍ਬવਤ੍ਥੁ। ਸੇਯ੍ਯਗ੍ਗਹਣੇਨ ਚੇਤ੍ਥ ਆਸਨਮ੍ਪਿ ਗਹਿਤਨ੍ਤਿ ਦਟ੍ਠਬ੍ਬਂ। ਆવਸਥਨ੍ਤਿ વਾਤਾਤਪਾਦਿਪਰਿਸ੍ਸਯવਿਨੋਦਨਂ ਪਤਿਸ੍ਸਯਂ। ਪਦੀਪੇਯ੍ਯਨ੍ਤਿ ਦੀਪਕਪਲ੍ਲਿਕਾਦਿਪਦੀਪੂਪਕਰਣਂ।
Sabbesānanti sabbesaṃ, ayameva vā pāṭho. Na dātā hotīti adānasīlo hoti, thaddhamaccharitāya na kassaci kiñci detīti attho. Idāni dānassa khettaṃ deyyadhammañca vibhāgena dassetuṃ ‘‘samaṇabrāhmaṇā’’tiādimāha. Tattha samitapāpasamaṇā ceva pabbajjamattasamaṇā ca bāhitapāpabrāhmaṇā ceva jātimattabrāhmaṇā ca idha ‘‘samaṇabrāhmaṇā’’ti adhippetā. Kapaṇā nāma duggatā daliddamanussā. Addhikā nāma pathāvino paribbayavihīnā. Vanibbakā nāma ye ‘‘iṭṭhaṃ detha kantaṃ manāpaṃ kālena anavajjaṃ udaggacittā pasannacittā, evaṃ dentā gacchatha sugatiṃ, gacchatha brahmaloka’’ntiādinā nayena dāne niyojentā dānassa vaṇṇaṃ thomentā vicaranti. Yācakā nāma ye kevalaṃ ‘‘muṭṭhimattaṃ detha, pasatamattaṃ detha, sarāvamattaṃ dethā’’ti appakampi yācamānā vicaranti. Tattha samaṇabrāhmaṇaggahaṇena guṇakhettaṃ upakārikhettañca dasseti, kapaṇādiggahaṇena karuṇākhettaṃ. Annanti yaṃkiñci khādanīyaṃ bhojanīyaṃ. Pānanti ambapānādipānakaṃ. Vatthanti nivāsanapārupanādiacchādanaṃ. Yānanti rathavayhādi antamaso upāhanaṃ upādāya gamanasādhanaṃ. Mālāti ganthitāganthitabhedaṃ sabbaṃ pupphaṃ. Gandhanti yaṃkiñci gandhajātaṃ pisitaṃ apisitaṃ gandhūpakaraṇañca. Vilepananti chavirāgakaraṇaṃ. Seyyāti mañcapīṭhādi ceva pāvārakojavādi ca sayitabbavatthu. Seyyaggahaṇena cettha āsanampi gahitanti daṭṭhabbaṃ. Āvasathanti vātātapādiparissayavinodanaṃ patissayaṃ. Padīpeyyanti dīpakapallikādipadīpūpakaraṇaṃ.
ਏવਂ ਖੋ, ਭਿਕ੍ਖવੇਤਿ વਿਜ੍ਜਮਾਨੇਪਿ ਦੇਯ੍ਯਧਮ੍ਮੇ ਪਟਿਗ੍ਗਾਹਕਾਨਂ ਏવਂ ਦਾਤਬ੍ਬવਤ੍ਥੁਂ ਸਬ੍ਬੇਨ ਸਬ੍ਬਂ ਅਦੇਨ੍ਤੋ ਪੁਗ੍ਗਲੋ ਅવਸ੍ਸਿਕਮੇਘਸਦਿਸੋ ਹੋਤਿ। ਇਦਂ વੁਤ੍ਤਂ ਹੋਤਿ – ਭਿਕ੍ਖવੇ, ਯਥਾ ਸੋ ਮੇਘੋ ਸਤਪਟਲਸਹਸ੍ਸਪਟਲੋ ਹੁਤ੍વਾ ਉਟ੍ਠਹਿਤ੍વਾ ਨ ਕਿਞ੍ਚਿ વਸ੍ਸਿ વਿਗਚ੍ਛਤਿ, ਏવਮੇવ ਯੋ ਉਲ਼ਾਰਂ વਿਪੁਲਞ੍ਚ ਭੋਗਂ ਸਂਹਰਿਤ੍વਾ ਗੇਹਂ ਆવਸਨ੍ਤੋ ਕਸ੍ਸਚਿ ਕਟਚ੍ਛੁਮਤ੍ਤਂ ਭਿਕ੍ਖਂ વਾ ਉਲ਼ੁਙ੍ਕਮਤ੍ਤਂ ਯਾਗੁਂ વਾ ਅਦਤ੍વਾ વਿਗਚ੍ਛਤਿ, વਿવਸੋ ਮਚ੍ਚੁવਸਂ ਗਚ੍ਛਤਿ, ਸੋ ਅવੁਟ੍ਠਿਕਸਮੋ ਨਾਮ ਹੋਤੀਤਿ। ਇਮਿਨਾ ਨਯੇਨ ਸੇਸੇਸੁਪਿ ਨਿਗਮਨਂ વੇਦਿਤਬ੍ਬਂ। ਇਮੇਸੁ ਚ ਤੀਸੁ ਪੁਗ੍ਗਲੇਸੁ ਪਠਮੋ ਏਕਂਸੇਨੇવ ਗਰਹਿਤਬ੍ਬੋ, ਦੁਤਿਯੋ ਪਸਂਸਨੀਯੋ, ਤਤਿਯੋ, ਪਸਂਸਨੀਯਤਰੋ। ਪਠਮੋ વਾ ਏਕਨ੍ਤੇਨੇવ ਸਬ੍ਬਨਿਹੀਨੋ, ਦੁਤਿਯੋ ਮਜ੍ਝਿਮੋ, ਤਤਿਯੋ ਉਤ੍ਤਮੋਤਿ વੇਦਿਤਬ੍ਬੋ।
Evaṃkho, bhikkhaveti vijjamānepi deyyadhamme paṭiggāhakānaṃ evaṃ dātabbavatthuṃ sabbena sabbaṃ adento puggalo avassikameghasadiso hoti. Idaṃ vuttaṃ hoti – bhikkhave, yathā so megho satapaṭalasahassapaṭalo hutvā uṭṭhahitvā na kiñci vassi vigacchati, evameva yo uḷāraṃ vipulañca bhogaṃ saṃharitvā gehaṃ āvasanto kassaci kaṭacchumattaṃ bhikkhaṃ vā uḷuṅkamattaṃ yāguṃ vā adatvā vigacchati, vivaso maccuvasaṃ gacchati, so avuṭṭhikasamo nāma hotīti. Iminā nayena sesesupi nigamanaṃ veditabbaṃ. Imesu ca tīsu puggalesu paṭhamo ekaṃseneva garahitabbo, dutiyo pasaṃsanīyo, tatiyo, pasaṃsanīyataro. Paṭhamo vā ekanteneva sabbanihīno, dutiyo majjhimo, tatiyo uttamoti veditabbo.
ਗਾਥਾਸੁ ਸਮਣੇਤਿ ਉਪਯੋਗવਸੇਨ ਬਹੁવਚਨਂ ਤਥਾ ਸੇਸੇਸੁਪਿ। ਲਦ੍ਧਾਨਾਤਿ ਲਭਿਤ੍વਾ, ਸਮਣੇ ਦਕ੍ਖਿਣੇਯ੍ਯੇ ਪવਾਰੇਤ੍વਾ ਪੁਟ੍ਠੋ ਨ ਸਂવਿਭਜਤਿ। ਅਨ੍ਨਂ ਪਾਨਞ੍ਚ ਭੋਜਨਨ੍ਤਿ ਅਨ੍ਨਂ વਾ ਪਾਨਂ વਾ ਅਞ੍ਞਂ વਾ ਭੁਞ੍ਜਿਤਬ੍ਬਯੁਤ੍ਤਕਂ ਭੋਜਨਂ, ਤਂ ਨ ਸਂવਿਭਜਤਿ। ਅਯਞ੍ਹੇਤ੍ਥ ਸਙ੍ਖੇਪਤ੍ਥੋ – ਯੋ ਅਤ੍ਥਿਕਭਾવੇਨ ਉਪਗਤੇ ਸਮ੍ਪਟਿਗ੍ਗਾਹਕੇ ਲਭਿਤ੍વਾ ਅਨ੍ਨਾਦਿਨਾ ਸਂવਿਭਾਗਮਤ੍ਤਮ੍ਪਿ ਨ ਕਰੋਤਿ, ਕਿਂ ਸੋ ਅਞ੍ਞਂ ਦਾਨਂ ਦਸ੍ਸਤਿ, ਤਂ ਏવਰੂਪਂ ਥਦ੍ਧਮਚ੍ਛਰਿਯਂ ਪੁਰਿਸਾਧਮਂ ਨਿਹੀਨਪੁਗ੍ਗਲਂ ਪਣ੍ਡਿਤਾ ਅવੁਟ੍ਠਿਕਸਮੋਤਿ ਆਹੁ ਕਥਯਨ੍ਤੀਤਿ।
Gāthāsu samaṇeti upayogavasena bahuvacanaṃ tathā sesesupi. Laddhānāti labhitvā, samaṇe dakkhiṇeyye pavāretvā puṭṭho na saṃvibhajati. Annaṃ pānañca bhojananti annaṃ vā pānaṃ vā aññaṃ vā bhuñjitabbayuttakaṃ bhojanaṃ, taṃ na saṃvibhajati. Ayañhettha saṅkhepattho – yo atthikabhāvena upagate sampaṭiggāhake labhitvā annādinā saṃvibhāgamattampi na karoti, kiṃ so aññaṃ dānaṃ dassati, taṃ evarūpaṃ thaddhamacchariyaṃ purisādhamaṃ nihīnapuggalaṃ paṇḍitā avuṭṭhikasamoti āhu kathayantīti.
ਏਕਚ੍ਚਾਨਂ ਨ ਦਦਾਤੀਤਿ વਿਜ੍ਜਮਾਨੇਪਿ ਮਹਤਿ ਦਾਤਬ੍ਬਧਮ੍ਮੇ ਏਕੇਸਂ ਸਤ੍ਤਾਨਂ ਤੇਸੁ ਕੋਧવਸੇਨ વਾ, ਦੇਯ੍ਯਧਮ੍ਮੇ ਲੋਭવਸੇਨ વਾ ਨ ਦਦਾਤਿ। ਏਕਚ੍ਚਾਨਂ ਪવੇਚ੍ਛਤੀਤਿ ਏਕੇਸਂਯੇવ ਪਨ ਦਦਾਤਿ। ਮੇਧਾવਿਨੋਤਿ ਪਞ੍ਞવਨ੍ਤੋ ਪਣ੍ਡਿਤਾ ਜਨਾ।
Ekaccānaṃna dadātīti vijjamānepi mahati dātabbadhamme ekesaṃ sattānaṃ tesu kodhavasena vā, deyyadhamme lobhavasena vā na dadāti. Ekaccānaṃ pavecchatīti ekesaṃyeva pana dadāti. Medhāvinoti paññavanto paṇḍitā janā.
ਸੁਭਿਕ੍ਖવਾਚੋਤਿ ਯੋ ਉਪਗਤਾਨਂ ਯਾਚਕਾਨਂ ‘‘ਅਨ੍ਨਂ ਦੇਥ, ਪਾਨਂ ਦੇਥਾ’’ਤਿਆਦਿਨਾ ਤਂ ਤਂ ਦਾਪੇਤਿ, ਸੋ ਸੁਲਭਭਿਕ੍ਖਤਾਯ ਸੁਭਿਕ੍ਖਾ વਾਚਾ ਏਤਸ੍ਸਾਤਿ ਸੁਭਿਕ੍ਖવਾਚੋ। ‘‘ਸੁਭਿਕ੍ਖવਸ੍ਸੀ’’ਤਿਪਿ ਪਠਨ੍ਤਿ। ਯਥਾ ਲੋਕੋ ਸੁਭਿਕ੍ਖੋ ਹੋਤਿ, ਏવਂ ਸਬ੍ਬਤ੍ਥਾਭਿવਸ੍ਸਿਤਮਹਾਮੇਘੋ ਸੁਭਿਕ੍ਖવਸ੍ਸੀ ਨਾਮ ਹੋਤਿ। ਏવਮਯਮ੍ਪਿ ਮਹਾਦਾਨੇਹਿ ਸਬ੍ਬਤ੍ਥਾਭਿવਸ੍ਸੀ ਸੁਭਿਕ੍ਖવਸ੍ਸੀਤਿ। ਆਮੋਦਮਾਨੋ ਪਕਿਰੇਤੀਤਿ ਤੁਟ੍ਠਹਟ੍ਠਮਾਨਸੋ ਸਹਤ੍ਥੇਨ ਦਾਨਂ ਦੇਨ੍ਤੋ ਪਟਿਗ੍ਗਾਹਕਖੇਤ੍ਤੇ ਦੇਯ੍ਯਧਮ੍ਮਂ ਪਕਿਰੇਨ੍ਤੋ વਿਯ ਹੋਤਿ, વਾਚਾਯਪਿ ‘‘ਦੇਥ ਦੇਥਾ’’ਤਿ ਭਾਸਤਿ।
Subhikkhavācoti yo upagatānaṃ yācakānaṃ ‘‘annaṃ detha, pānaṃ dethā’’tiādinā taṃ taṃ dāpeti, so sulabhabhikkhatāya subhikkhā vācā etassāti subhikkhavāco. ‘‘Subhikkhavassī’’tipi paṭhanti. Yathā loko subhikkho hoti, evaṃ sabbatthābhivassitamahāmegho subhikkhavassī nāma hoti. Evamayampi mahādānehi sabbatthābhivassī subhikkhavassīti. Āmodamāno pakiretīti tuṭṭhahaṭṭhamānaso sahatthena dānaṃ dento paṭiggāhakakhette deyyadhammaṃ pakirento viya hoti, vācāyapi ‘‘detha dethā’’ti bhāsati.
ਇਦਾਨਿ ਨਂ ਸੁਭਿਕ੍ਖવਸ੍ਸਿਤਭਾવਂ ਦਸ੍ਸੇਤੁਂ ‘‘ਯਥਾਪਿ ਮੇਘੋ’’ਤਿਆਦਿ વੁਤ੍ਤਂ। ਤਤ੍ਰਾਯਂ ਸਙ੍ਖੇਪਤ੍ਥੋ – ਯਥਾ ਮਹਾਮੇਘੋ ਪਠਮਂ ਮਨ੍ਦਨਿਗ੍ਘੋਸੇਨ ਥਨਯਿਤ੍વਾ ਪੁਨ ਸਕਲਨਦੀਕਨ੍ਦਰਾਨਿ ਏਕਨਿਨ੍ਨਾਦਂ ਕਰੋਨ੍ਤੋ ਗਜ੍ਜਯਿਤ੍વਾ ਪવਸ੍ਸਤਿ, ਸਬ੍ਬਤ੍ਥਕਮੇવ વਾਰਿਨਾ ਉਦਕੇਨ ਥਲਂ ਨਿਨ੍ਨਞ੍ਚ ਅਭਿਸਨ੍ਦਨ੍ਤੋ ਪੂਰੇਤਿ ਏਕੋਘਂ ਕਰੋਤਿ, ਏવਮੇવ ਇਧ ਇਮਸ੍ਮਿਂ ਸਤ੍ਤਲੋਕੇ ਏਕਚ੍ਚੋ ਉਲ਼ਾਰਪੁਗ੍ਗਲੋ ਸਬ੍ਬਸਮਤਾਯ ਸੋ ਮਹਾਮੇਘੋ વਿਯ વਸ੍ਸਿਤਬ੍ਬਤ੍ਤਾ ਤਾਦਿਸੋ ਯਥਾ ਧਨਂ ਉਟ੍ਠਾਨਾਧਿਗਤਂ ਅਤ੍ਤਨੋ ਉਟ੍ਠਾਨવੀਰਿਯਾਭਿਨਿਬ੍ਬਤ੍ਤਂ ਹੋਤਿ, ਏવਂ ਅਨਲਸੋ ਹੁਤ੍વਾ ਤਞ੍ਚ ਧਮ੍ਮੇਨ ਞਾਯੇਨ ਸਂਹਰਿਤ੍વਾ ਤਨ੍ਨਿਬ੍ਬਤ੍ਤੇਨ ਅਨ੍ਨੇਨ ਪਾਨੇਨ ਅਞ੍ਞੇਨ ਚ ਦੇਯ੍ਯਧਮ੍ਮੇਨ ਪਤ੍ਤੇ ਸਮ੍ਪਤ੍ਤੇ વਨਿਬ੍ਬਕੇ ਸਮ੍ਮਾ ਸਮ੍ਮਦੇવ ਦੇਸਕਾਲਾਨੁਰੂਪਞ੍ਚੇવ ਇਚ੍ਛਾਨੁਰੂਪਞ੍ਚ ਤਪ੍ਪੇਤਿ ਸਮ੍ਪવਾਰੇਤੀਤਿ।
Idāni naṃ subhikkhavassitabhāvaṃ dassetuṃ ‘‘yathāpi megho’’tiādi vuttaṃ. Tatrāyaṃ saṅkhepattho – yathā mahāmegho paṭhamaṃ mandanigghosena thanayitvā puna sakalanadīkandarāni ekaninnādaṃ karonto gajjayitvā pavassati, sabbatthakameva vārinā udakena thalaṃ ninnañca abhisandanto pūreti ekoghaṃ karoti, evameva idha imasmiṃ sattaloke ekacco uḷārapuggalo sabbasamatāya so mahāmegho viya vassitabbattā tādiso yathā dhanaṃ uṭṭhānādhigataṃ attano uṭṭhānavīriyābhinibbattaṃ hoti, evaṃ analaso hutvā tañca dhammena ñāyena saṃharitvā tannibbattena annena pānena aññena ca deyyadhammena patte sampatte vanibbake sammā sammadeva desakālānurūpañceva icchānurūpañca tappeti sampavāretīti.
ਛਟ੍ਠਸੁਤ੍ਤવਣ੍ਣਨਾ ਨਿਟ੍ਠਿਤਾ।
Chaṭṭhasuttavaṇṇanā niṭṭhitā.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਸੁਤ੍ਤਪਿਟਕ • Suttapiṭaka / ਖੁਦ੍ਦਕਨਿਕਾਯ • Khuddakanikāya / ਇਤਿવੁਤ੍ਤਕਪਾਲ਼ਿ • Itivuttakapāḷi / ੬. ਅવੁਟ੍ਠਿਕਸੁਤ੍ਤਂ • 6. Avuṭṭhikasuttaṃ
