| Library / Tipiṭaka / д̇ибидага • Tipiṭaka / бан̃жабагаран̣а-мууладийгаа • Pañcapakaraṇa-mūlaṭīkā |
3. ааяад̇анаяамагам̣
3. Āyatanayamakaṃ
1. бан̣н̣ад̇д̇ивааро
1. Paṇṇattivāro
уд̣̇д̣̇зсаваараван̣н̣анаа
Uddesavāravaṇṇanā
1-9. ааяад̇анаяамагаад̣̇ийсу жа бан̣н̣ад̇д̇иваарз бад̣̇асод̇ханаваараад̣̇ийнам̣ важанз гааран̣ам̣ канд̇хаяамагз вуд̇д̇анаязнзва взд̣̇ид̇аб̣б̣ам̣. ‘‘згаад̣̇аса згаад̣̇аса гад̇ваа д̇зд̇д̇им̣сасад̇ам̣ яамагааний’’д̇иаад̣̇инаа гзсужи бод̇т̇агзсу г̇ан̣анаа ликид̇аа, саа д̇ат̇аа на ход̇и. ‘‘д̣̇вад̇д̇им̣сасад̇а’’нд̇иаад̣̇инаа ан̃н̃ад̇т̇а ликид̇аа.
1-9. Āyatanayamakādīsu ca paṇṇattivāre padasodhanavārādīnaṃ vacane kāraṇaṃ khandhayamake vuttanayeneva veditabbaṃ. ‘‘Ekādasa ekādasa katvā tettiṃsasataṃ yamakānī’’tiādinā kesuci potthakesu gaṇanā likhitā, sā tathā na hoti. ‘‘Dvattiṃsasata’’ntiādinā aññattha likhitā.
уд̣̇д̣̇зсаваараван̣н̣анаа нидтид̇аа.
Uddesavāravaṇṇanā niṭṭhitā.
нид̣̇д̣̇зсаваараван̣н̣анаа
Niddesavāravaṇṇanā
10-17. вааяанадтзнаад̇и басааран̣адтзна, баагадабхаавадтзна ваа. ‘‘гааяо д̇хаммо’’д̇и жа вужжамаанам̣ саб̣б̣ам̣ сасабхаавам̣ ааяад̇анамзваад̇и ‘‘гааяо ааяад̇ана’’нд̇и, ‘‘д̇хаммо ааяад̇ана’’нд̇и жа зд̇т̇а ‘‘ааманд̇аа’’д̇и вуд̇д̇ам̣. гааяаважанзна бана д̇хаммаважанзна жа авужжамаанам̣ ган̃жи сасабхаавам̣ над̇т̇ийд̇и ‘‘на гааяо нааяад̇анам̣, на д̇хаммо нааяад̇ана’’нд̇и зд̇т̇а ‘‘ааманд̇аа’’ижжзва вуд̇д̇ам̣.
10-17. Vāyanaṭṭhenāti pasāraṇaṭṭhena, pākaṭabhāvaṭṭhena vā. ‘‘Kāyo dhammo’’ti ca vuccamānaṃ sabbaṃ sasabhāvaṃ āyatanamevāti ‘‘kāyo āyatana’’nti, ‘‘dhammo āyatana’’nti ca ettha ‘‘āmantā’’ti vuttaṃ. Kāyavacanena pana dhammavacanena ca avuccamānaṃ kañci sasabhāvaṃ natthīti ‘‘na kāyo nāyatanaṃ, na dhammo nāyatana’’nti ettha ‘‘āmantā’’icceva vuttaṃ.
нид̣̇д̣̇зсаваараван̣н̣анаа нидтид̇аа.
Niddesavāravaṇṇanā niṭṭhitā.
2. бавад̇д̇ивааро
2. Pavattivāro
1. уббаад̣̇аваараван̣н̣анаа
1. Uppādavāravaṇṇanā
18-21. бавад̇д̇иваарз жагкааяад̇анамуулагаани згаад̣̇асаад̇и бадисанд̇хижуд̇ивасзна убаад̣̇иннабавад̇д̇асса уббаад̣̇анирод̇хаважанз зд̇асмим̣ алаб̣бхамаанависсаж̇ж̇анамби сад̣̇д̣̇ааяад̇анзна сад̣̇д̇хим̣ яамагам̣ бужчаамад̇д̇алаабхзна сан̇г̇ан̣хид̇ваа вад̣̇ад̇ийд̇и д̣̇адтаб̣б̣ам̣. часадти яамагаанийд̇и зд̇т̇а жагкусод̇агхаанаж̇ивхаагааяаруубааяад̇анамуулагзсу згзгам̣ сад̣̇д̣̇ааяад̇анамуулагаани бан̃жаад̇и згаад̣̇аса яамагаани виссаж̇ж̇анавасзна хаабзд̇аб̣б̣аани. вагкад̇и хи ‘‘сад̣̇д̣̇ааяад̇анасса бадисанд̇хигкан̣з ануббад̇д̇ид̇о д̇зна сад̣̇д̇хим̣ яамагасса виссаж̇ж̇анамзва над̇т̇ий’’д̇и (яама. адта. ааяад̇анаяамага 18-21).
18-21. Pavattivāre cakkhāyatanamūlakāni ekādasāti paṭisandhicutivasena upādinnapavattassa uppādanirodhavacane etasmiṃ alabbhamānavissajjanampi saddāyatanena saddhiṃ yamakaṃ pucchāmattalābhena saṅgaṇhitvā vadatīti daṭṭhabbaṃ. Chasaṭṭhi yamakānīti ettha cakkhusotaghānajivhākāyarūpāyatanamūlakesu ekekaṃ saddāyatanamūlakāni pañcāti ekādasa yamakāni vissajjanavasena hāpetabbāni. Vakkhati hi ‘‘saddāyatanassa paṭisandhikkhaṇe anuppattito tena saddhiṃ yamakassa vissajjanameva natthī’’ti (yama. aṭṭha. āyatanayamaka 18-21).
д̣̇уд̇ияам̣ гин̃жааби батамзна сад̣̇исависсаж̇ж̇ананд̇иаад̣̇и буг̇г̇алаваарамзва санд̇хааяа вуд̇д̇анд̇и д̣̇адтаб̣б̣ам̣. огаасаваарз бана асад̣̇исависсаж̇ж̇анад̇д̇аа вуд̇д̇ам̣, на д̇ам̣ саб̣б̣ад̇т̇а сад̣̇исависсаж̇ж̇ананд̇и н̃аабзд̇ум̣ буг̇г̇алаваарзби виссаж̇ж̇ид̇анд̇и. г̇анд̇харасаподтаб̣б̣ааяад̇анзхи сад̣̇д̇хим̣ д̇ийн̣и яамагаани сад̣̇исависсаж̇ж̇анаанийд̇и руубааважарасад̇д̇з санд̇хааяа ‘‘сажагкугаанам̣ аг̇анд̇хагаана’’нд̇иаад̣̇инаа виссаж̇ж̇ид̇аб̣б̣ад̇д̇аа вуд̇д̇ам̣. д̇зсан̃хи вирад̇д̇агаамагамманиб̣б̣ад̇д̇асса бадисанд̇хиб̣ийж̇асса звам̣сабхаавад̇д̇аа гхаанаад̣̇ийни г̇анд̇хаад̣̇аяо жа на санд̇ийд̇и. гхаанааяад̇анаяамагзна сад̣̇исависсаж̇ж̇анад̇д̇аад̇и жагкааяад̇анамуулагзсу гхаанааяад̇анаяамагзна сад̣̇д̇хим̣ сад̣̇исависсаж̇ж̇анад̇д̇аад̇и ад̇т̇о. нану д̇ад̇т̇а ‘‘сажагкугаанам̣ агхаанагаанам̣ убабаж̇ж̇анд̇аана’’нд̇иаад̣̇инаа виссаж̇ж̇анам̣ бавад̇д̇ам̣, ид̇ха бана гхаанааяад̇анамуулагзсу ‘‘яасса гхаанааяад̇анам̣ уббаж̇ж̇ад̇и, д̇асса ж̇ивхааяад̇анам̣ уббаж̇ж̇ад̇ийд̇и? ааманд̇аа’’д̇и виссаж̇ж̇анзна бхавид̇аб̣б̣анд̇и над̇т̇и сад̣̇исависсаж̇ж̇анад̇аад̇и? сажжам̣, яат̇аа бана д̇ад̇т̇а гхаанааяад̇анаяамагзна ж̇ивхаагааяааяад̇анаяамагаани сад̣̇исависсаж̇ж̇анаани, звамид̇хааби ж̇ивхаагаааяааяад̇анаяамагаани сад̣̇исависсаж̇ж̇анаани, д̇асмаа д̇ад̇т̇а д̇ад̇т̇зва сад̣̇исависсаж̇ж̇анад̇аа баал̣ияам̣ анаарул̣хад̇ааяа гааран̣анд̇и. нид̣̇ассанабхаавзна бана г̇ахид̇ам̣ жагкааяад̇анамуулагаанам̣ сад̣̇исависсаж̇ж̇анагаанам̣ сад̣̇исависсаж̇ж̇анам̣ нид̣̇ассанабхаавзнзва гааран̣анд̇и д̣̇ассзнд̇о ‘‘гхаанааяад̇анаяамагзна сад̣̇исависсаж̇ж̇анад̇д̇аа’’д̇и ааха. сад̣̇исависсаж̇ж̇анад̇аа жзд̇т̇а гхаанааяад̇анамуулагзсу язбхуяяад̇ааяа д̣̇адтаб̣б̣аа. д̇зсу хи ж̇ивхаагааяааяад̇анаяамагзсу д̇ин̣н̣ам̣ бужчаанам̣ ‘‘ааманд̇аа’’д̇и виссаж̇ж̇анзна бхавид̇аб̣б̣ам̣ , бажчимабужчааяа ‘‘сагааяагаанам̣ агхаанагаанам̣ убабаж̇ж̇анд̇аана’’нд̇иаад̣̇инаад̇и.
Dutiyaṃ kiñcāpi paṭhamena sadisavissajjanantiādi puggalavārameva sandhāya vuttanti daṭṭhabbaṃ. Okāsavāre pana asadisavissajjanattā vuttaṃ, na taṃ sabbattha sadisavissajjananti ñāpetuṃ puggalavārepi vissajjitanti. Gandharasaphoṭṭhabbāyatanehi saddhiṃ tīṇi yamakāni sadisavissajjanānīti rūpāvacarasatte sandhāya ‘‘sacakkhukānaṃ agandhakāna’’ntiādinā vissajjitabbattā vuttaṃ. Tesañhi virattakāmakammanibbattassa paṭisandhibījassa evaṃsabhāvattā ghānādīni gandhādayo ca na santīti. Ghānāyatanayamakena sadisavissajjanattāti cakkhāyatanamūlakesu ghānāyatanayamakena saddhiṃ sadisavissajjanattāti attho. Nanu tattha ‘‘sacakkhukānaṃ aghānakānaṃ upapajjantāna’’ntiādinā vissajjanaṃ pavattaṃ, idha pana ghānāyatanamūlakesu ‘‘yassa ghānāyatanaṃ uppajjati, tassa jivhāyatanaṃ uppajjatīti? Āmantā’’ti vissajjanena bhavitabbanti natthi sadisavissajjanatāti? Saccaṃ, yathā pana tattha ghānāyatanayamakena jivhākāyāyatanayamakāni sadisavissajjanāni, evamidhāpi jivhākaāyāyatanayamakāni sadisavissajjanāni, tasmā tattha tattheva sadisavissajjanatā pāḷiyaṃ anāruḷhatāya kāraṇanti. Nidassanabhāvena pana gahitaṃ cakkhāyatanamūlakānaṃ sadisavissajjanakānaṃ sadisavissajjanaṃ nidassanabhāveneva kāraṇanti dassento ‘‘ghānāyatanayamakena sadisavissajjanattā’’ti āha. Sadisavissajjanatā cettha ghānāyatanamūlakesu yebhuyyatāya daṭṭhabbā. Tesu hi jivhākāyāyatanayamakesu tiṇṇaṃ pucchānaṃ ‘‘āmantā’’ti vissajjanena bhavitabbaṃ , pacchimapucchāya ‘‘sakāyakānaṃ aghānakānaṃ upapajjantāna’’ntiādināti.
ат̇а ваа яат̇аа взд̣̇анаагканд̇хаад̣̇имуулагаанам̣ сан̃н̃аагканд̇хаад̣̇ияамагаанам̣ амиссагагаалабхзд̣̇зсу д̇ийсу ‘‘ааманд̇аа’’д̇и бадиважанависсаж̇ж̇анзна яат̇аавуд̇д̇аважанасса виссаж̇ж̇анабхааваануж̇аананам̣ гад̇д̇аб̣б̣анд̇и абуб̣б̣асса вад̇д̇аб̣б̣асса абхааваа виссаж̇ж̇анам̣ на гад̇ам̣, звамид̇хааби гхаанааяад̇анамуулагам̣ ж̇ивхааяад̇анаяамагам̣ абуб̣б̣асса вад̇д̇аб̣б̣асса абхааваа баал̣им̣ анаарул̣ханд̇и баагадояамад̇т̇о. гааяааяад̇анаяамагам̣ бана д̣̇уд̇ияабужчааяа васзна виссаж̇ж̇ид̇аб̣б̣ам̣ сияаа, саа жа жагкааяад̇анамуулагзсу гхаанааяад̇анаяамагзна сад̣̇исависсаж̇ж̇анаа, д̇асмаа яассаа бужчааяа виссаж̇ж̇анаа гаад̇аб̣б̣аа, д̇ассаа гхаанааяад̇анаяамагзна сад̣̇исависсаж̇ж̇анад̇д̇аа д̇ам̣сзсаани баал̣им̣ анаарул̣хаанийд̇и звамзд̇т̇а ад̇т̇о д̣̇адтаб̣б̣о. д̇ат̇аад̇и ид̣̇ам̣ баал̣ианаарул̣хад̇аасааман̃н̃знзва вуд̇д̇ам̣, на гааран̣асааман̃н̃зна. гхаанаж̇ивхаагааяааяад̇анаанам̣ бана аг̇аб̣бхасзяяагзсу бавад̇д̇амаанаанам̣ г̇аб̣бхасзяяагзсу жа ааяад̇анабаарибууригаалз сахажаарид̇ааяа ависзсад̇д̇аа жа аббависзсад̇д̇аа жа згасмим̣ гхаанааяад̇анаяамагз виссаж̇ж̇ид̇з ид̇араани д̣̇вз, гхаанааяад̇анамуулагзсу жа виссаж̇ж̇ид̇зсу ид̇арад̣̇ваяамуулагаани на виссаж̇ж̇ийяанд̇ийд̇и взд̣̇ид̇аб̣б̣аани. руубааяад̇анаманааяад̇анзхи сад̣̇д̇хинд̇и ‘‘яасса руубааяад̇анам̣ уббаж̇ж̇ад̇и, д̇асса манааяад̇анам̣ уббаж̇ж̇ад̇ий’’д̇и зд̇иссаа бужчааяа вуд̇д̇зхи руубааяад̇анаманааяад̇анзхи сад̣̇д̇хинд̇и ад̇хиббааяо. руубааяад̇анамуулагзсу хи манааяад̇анаяамагз аад̣̇ибужчааяа г̇анд̇харасаподтаб̣б̣аяамагзсу аад̣̇ибужчаанам̣ сад̣̇исависсаж̇ж̇анад̇аа яамагаанам̣ ависсаж̇ж̇анз гааран̣абхаавзна вуд̇д̇аа. д̣̇уд̇ияабужчаанан̃хи бадиважанависсаж̇ж̇анзна бхавид̇аб̣б̣анд̇и буб̣б̣з вуд̇д̇анаязна виссаж̇ж̇анам̣ на гаад̇аб̣б̣ам̣, аад̣̇ибужчаанан̃жа на гаад̇аб̣б̣анд̇и.
Atha vā yathā vedanākkhandhādimūlakānaṃ saññākkhandhādiyamakānaṃ amissakakālabhedesu tīsu ‘‘āmantā’’ti paṭivacanavissajjanena yathāvuttavacanassa vissajjanabhāvānujānanaṃ kattabbanti apubbassa vattabbassa abhāvā vissajjanaṃ na kataṃ, evamidhāpi ghānāyatanamūlakaṃ jivhāyatanayamakaṃ apubbassa vattabbassa abhāvā pāḷiṃ anāruḷhanti pākaṭoyamattho. Kāyāyatanayamakaṃ pana dutiyapucchāya vasena vissajjitabbaṃ siyā, sā ca cakkhāyatanamūlakesu ghānāyatanayamakena sadisavissajjanā, tasmā yassā pucchāya vissajjanā kātabbā, tassā ghānāyatanayamakena sadisavissajjanattā taṃsesāni pāḷiṃ anāruḷhānīti evamettha attho daṭṭhabbo. Tathāti idaṃ pāḷianāruḷhatāsāmaññeneva vuttaṃ, na kāraṇasāmaññena. Ghānajivhākāyāyatanānaṃ pana agabbhaseyyakesu pavattamānānaṃ gabbhaseyyakesu ca āyatanapāripūrikāle sahacāritāya avisesattā ca appavisesattā ca ekasmiṃ ghānāyatanayamake vissajjite itarāni dve, ghānāyatanamūlakesu ca vissajjitesu itaradvayamūlakāni na vissajjīyantīti veditabbāni. Rūpāyatanamanāyatanehi saddhinti ‘‘yassa rūpāyatanaṃ uppajjati, tassa manāyatanaṃ uppajjatī’’ti etissā pucchāya vuttehi rūpāyatanamanāyatanehi saddhinti adhippāyo. Rūpāyatanamūlakesu hi manāyatanayamake ādipucchāya gandharasaphoṭṭhabbayamakesu ādipucchānaṃ sadisavissajjanatā yamakānaṃ avissajjane kāraṇabhāvena vuttā. Dutiyapucchānañhi paṭivacanavissajjanena bhavitabbanti pubbe vuttanayena vissajjanaṃ na kātabbaṃ, ādipucchānañca na kātabbanti.
хздтимзхи сад̣̇исависсаж̇ж̇анад̇д̇аад̇и зд̇т̇а г̇анд̇хааяад̇анамуулагаанам̣ расаподтаб̣б̣аяамагаанам̣ расааяад̇анамуулагасса жа подтаб̣б̣аяамагасса бадиважанависсаж̇ж̇анзнзва бхавид̇аб̣б̣анд̇и буб̣б̣з вуд̇д̇анаязнзва виссаж̇ж̇анам̣ на гаад̇аб̣б̣анд̇и язсам̣ гаад̇аб̣б̣ам̣, д̇зсам̣ г̇анд̇харасаподтаб̣б̣амуулагаанам̣ манааяад̇анад̇хаммааяад̇анаяамагаанам̣ жагкаад̣̇ибан̃жааяад̇анамуулагзхи манааяад̇анад̇хаммааяад̇анаяамагзхи сад̣̇исависсаж̇ж̇анад̇д̇аад̇и ад̇т̇о. жагкааяад̇анаад̣̇имуулагаани сад̣̇д̣̇ааяад̇анаяамагаани сад̣̇д̣̇ааяад̇анамуулагаани саб̣б̣аани ависсаж̇ж̇анзнзва алаб̣бхамаанависсаж̇ж̇анад̇аад̣̇ассанзна виссаж̇ж̇ид̇аани наама хонд̇ийд̇и ааха ‘‘часадти яамагаани виссаж̇ж̇ид̇аани наама хонд̇ий’’д̇и.
Heṭṭhimehi sadisavissajjanattāti ettha gandhāyatanamūlakānaṃ rasaphoṭṭhabbayamakānaṃ rasāyatanamūlakassa ca phoṭṭhabbayamakassa paṭivacanavissajjaneneva bhavitabbanti pubbe vuttanayeneva vissajjanaṃ na kātabbanti yesaṃ kātabbaṃ, tesaṃ gandharasaphoṭṭhabbamūlakānaṃ manāyatanadhammāyatanayamakānaṃ cakkhādipañcāyatanamūlakehi manāyatanadhammāyatanayamakehi sadisavissajjanattāti attho. Cakkhāyatanādimūlakāni saddāyatanayamakāni saddāyatanamūlakāni sabbāni avissajjaneneva alabbhamānavissajjanatādassanena vissajjitāni nāma hontīti āha ‘‘chasaṭṭhi yamakāni vissajjitāni nāma hontī’’ti.
ж̇ажжанд̇хамби ж̇ажжаб̣ад̇хирамбийд̇и зд̇т̇а жа ж̇ажжаб̣ад̇хираг̇г̇ахан̣зна ж̇ажжанд̇хаб̣ад̇хиро г̇ахид̇од̇и взд̣̇ид̇аб̣б̣о. сагхаанагаанам̣ сажагкугаананд̇и барибун̣н̣ааяад̇анамзва обабаад̇игам̣ санд̇хааяа вуд̇д̇анд̇и зд̇т̇а зва-сад̣̇д̣̇ам̣ вуд̇д̇анд̇и-зд̇асса барад̇о яож̇зд̇ваа яат̇аа ‘‘сагхаанагаанам̣ ажагкугаана’’нд̇и ид̣̇ам̣ абарибун̣н̣ааяад̇анам̣ санд̇хааяа вуд̇д̇ам̣, на звам̣ ‘‘сагхаанагаанам̣ сажагкугаана’’нд̇и зд̇ам̣. зд̇ам̣ бана барибун̣н̣ааяад̇анам̣ санд̇хааяа вуд̇д̇амзваад̇и ад̇т̇о д̣̇адтаб̣б̣о. д̇зна ж̇ажжаб̣ад̇хирамби санд̇хааяа вуд̇д̇ад̇аа на ваарид̇аа ход̇ийд̇и.
Jaccandhampi jaccabadhirampīti ettha ca jaccabadhiraggahaṇena jaccandhabadhiro gahitoti veditabbo. Saghānakānaṃ sacakkhukānanti paripuṇṇāyatanameva opapātikaṃ sandhāya vuttanti ettha eva-saddaṃ vuttanti-etassa parato yojetvā yathā ‘‘saghānakānaṃ acakkhukāna’’nti idaṃ aparipuṇṇāyatanaṃ sandhāya vuttaṃ, na evaṃ ‘‘saghānakānaṃ sacakkhukāna’’nti etaṃ. Etaṃ pana paripuṇṇāyatanaṃ sandhāya vuttamevāti attho daṭṭhabbo. Tena jaccabadhirampi sandhāya vuttatā na vāritā hotīti.
22-254. яад̇т̇а жагкааяад̇ананд̇и руубийб̣рахмалогам̣ бужчад̇ийд̇и нияамад̇о д̇ад̇т̇а жагкусод̇аанам̣ сахуббад̇д̇имад̇д̇ам̣ бассанд̇о вад̣̇ад̇и, огаасаваарз бана д̇асмим̣ буг̇г̇аласса анаамадтад̇д̇аа яад̇т̇а гаамад̇хаад̇уяам̣ руубад̇хаад̇уяан̃жа жагкааяад̇анам̣ уббаж̇ж̇ад̇и, д̇ад̇т̇а сод̇ааяад̇анамби зганд̇зна уббаж̇ж̇ад̇ийд̇и ‘‘ааманд̇аа’’д̇и (яама. 1.ааяад̇анаяамага.22) вуд̇д̇ам̣.
22-254. Yattha cakkhāyatananti rūpībrahmalokaṃ pucchatīti niyamato tattha cakkhusotānaṃ sahuppattimattaṃ passanto vadati, okāsavāre pana tasmiṃ puggalassa anāmaṭṭhattā yattha kāmadhātuyaṃ rūpadhātuyañca cakkhāyatanaṃ uppajjati, tattha sotāyatanampi ekantena uppajjatīti ‘‘āmantā’’ti (yama. 1.āyatanayamaka.22) vuttaṃ.
‘‘яасса ваа бана руубааяад̇анам̣ уббаж̇ж̇иссад̇и, д̇асса жагкааяад̇анам̣ уббаж̇ж̇иссад̇ийд̇и? ааманд̇аа’’д̇и гасмаа бадин̃н̃аад̇ам̣, нану яо г̇аб̣бхасзяяагабхаавам̣ г̇анд̇ваа бариниб̣б̣ааяиссад̇и, д̇асса руубааяад̇анам̣ бадисанд̇хияам̣ уббаж̇ж̇иссад̇и, на бана жагкааяад̇ананд̇и? яасса руубааяад̇анам̣ уббаж̇ж̇иссад̇и, д̇асса д̇ад̣̇авад̇т̇асса буг̇г̇аласса руубааяад̇ануббаад̣̇ад̇о уд̣̇д̇хам̣ жагкааяад̇анасанд̇аануббаад̣̇асса бавад̇д̇ияамби бхависсанд̇асса бадин̃н̃аад̇аб̣б̣ад̇д̇аа. ат̇а гасмаа ‘‘яасса ваа бана руубааяад̇анам̣ нуббаж̇ж̇иссад̇и, д̇асса жагкааяад̇анам̣ нуббаж̇ж̇иссад̇ийд̇и? ааманд̇аа’’д̇и бадин̃н̃аад̇ам̣, нану г̇аб̣бхасзяяагасса бажчимабхавигасса убабаж̇ж̇анд̇асса згаад̣̇асамасад̇д̇аахаа орад̇о тид̇асса руубааяад̇анам̣ нуббаж̇ж̇иссад̇и но жа жагкааяад̇анам̣ нуббаж̇ж̇иссад̇ийд̇и? д̇асмим̣ бхавз бхависсанд̇асса уббаад̣̇асса анааг̇ад̇абхаавзна аважанад̇о. бхаванд̇арз хи д̇асса д̇асса ааяад̇анасанд̇аанасса яо аад̣̇иуббаад̣̇о бадисанд̇хияам̣ бавад̇д̇з жа бхависсад̇и, со анааг̇ад̇уббаад̣̇о д̇аб̣бхаавзна вужжад̇и ад̣̇д̇хаабажжуббаннаананд̇ог̇ад̇хад̇д̇аа. на бана яо д̇асмим̣язва бхавз бавад̇д̇з бхависсад̇и, со анааг̇ад̇уббаад̣̇абхаавзна вужжад̇и ад̣̇д̇хаабажжуббаннанд̇ог̇ад̇хад̇д̇аа. ад̣̇д̇хаавасзна хзд̇т̇а гаммаж̇абавад̇д̇асса бажжуббаннаад̣̇игаалабхзд̣̇о ад̇хиббзд̇о. зван̃жа гад̇ваа инд̣̇рияаяамагз (яама. 3.инд̣̇рияаяамага.368) ‘‘яасса ид̇т̇инд̣̇рияам̣ уббаж̇ж̇ад̇и , д̇асса бурисинд̣̇рияам̣ уббаж̇ж̇иссад̇ийд̇и? бажчимабхавигаанам̣ ид̇т̇ийнам̣ убабаж̇ж̇анд̇ийнам̣, яаа жа ид̇т̇ияо руубааважарам̣ аруубааважарам̣ убабаж̇ж̇ид̇ваа бариниб̣б̣ааяиссанд̇и, яаа жа ид̇т̇ияо зд̇знзва бхаавзна гад̇ижи бхавз д̣̇ассзд̇ваа бариниб̣б̣ааяиссанд̇и, д̇аасам̣ убабаж̇ж̇анд̇ийнам̣ д̇аасам̣ ид̇т̇инд̣̇рияам̣ уббаж̇ж̇ад̇и, но жа д̇аасам̣ бурисинд̣̇рияам̣ уббаж̇ж̇иссад̇ий’’д̇и вуд̇д̇ам̣. на хи д̇аасам̣ саб̣б̣аасам̣ д̇асмим̣ бхавз бавад̇д̇з бурисинд̣̇рияам̣ на уббаж̇ж̇иссад̇и лин̇г̇абаривад̇д̇анасаб̣бхааваа, бхаванд̇арз бана аад̣̇иуббаад̣̇асса абхаавам̣ санд̇хааяа ‘‘но жа д̇аасам̣ бурисинд̣̇рияам̣ уббаж̇ж̇иссад̇ий’’д̇и вуд̇д̇ам̣. бхаванд̇арз хи аад̣̇иуббаад̣̇асса анааг̇ад̇ад̇д̇ам̣ ад̇хиббзд̇анд̇и. зван̃жа гад̇ваа ‘‘гад̇ижи бхавз д̣̇ассзд̇ваа’’д̇и бхаваг̇г̇ахан̣ам̣ гад̇анд̇и.
‘‘Yassa vā pana rūpāyatanaṃ uppajjissati, tassa cakkhāyatanaṃ uppajjissatīti? Āmantā’’ti kasmā paṭiññātaṃ, nanu yo gabbhaseyyakabhāvaṃ gantvā parinibbāyissati, tassa rūpāyatanaṃ paṭisandhiyaṃ uppajjissati, na pana cakkhāyatananti? Yassa rūpāyatanaṃ uppajjissati, tassa tadavatthassa puggalassa rūpāyatanuppādato uddhaṃ cakkhāyatanasantānuppādassa pavattiyampi bhavissantassa paṭiññātabbattā. Atha kasmā ‘‘yassa vā pana rūpāyatanaṃ nuppajjissati, tassa cakkhāyatanaṃ nuppajjissatīti? Āmantā’’ti paṭiññātaṃ, nanu gabbhaseyyakassa pacchimabhavikassa upapajjantassa ekādasamasattāhā orato ṭhitassa rūpāyatanaṃ nuppajjissati no ca cakkhāyatanaṃ nuppajjissatīti? Tasmiṃ bhave bhavissantassa uppādassa anāgatabhāvena avacanato. Bhavantare hi tassa tassa āyatanasantānassa yo ādiuppādo paṭisandhiyaṃ pavatte ca bhavissati, so anāgatuppādo tabbhāvena vuccati addhāpaccuppannānantogadhattā. Na pana yo tasmiṃyeva bhave pavatte bhavissati, so anāgatuppādabhāvena vuccati addhāpaccuppannantogadhattā. Addhāvasena hettha kammajapavattassa paccuppannādikālabhedo adhippeto. Evañca katvā indriyayamake (yama. 3.indriyayamaka.368) ‘‘yassa itthindriyaṃ uppajjati , tassa purisindriyaṃ uppajjissatīti? Pacchimabhavikānaṃ itthīnaṃ upapajjantīnaṃ, yā ca itthiyo rūpāvacaraṃ arūpāvacaraṃ upapajjitvā parinibbāyissanti, yā ca itthiyo eteneva bhāvena katici bhave dassetvā parinibbāyissanti, tāsaṃ upapajjantīnaṃ tāsaṃ itthindriyaṃ uppajjati, no ca tāsaṃ purisindriyaṃ uppajjissatī’’ti vuttaṃ. Na hi tāsaṃ sabbāsaṃ tasmiṃ bhave pavatte purisindriyaṃ na uppajjissati liṅgaparivattanasabbhāvā, bhavantare pana ādiuppādassa abhāvaṃ sandhāya ‘‘no ca tāsaṃ purisindriyaṃ uppajjissatī’’ti vuttaṃ. Bhavantare hi ādiuppādassa anāgatattaṃ adhippetanti. Evañca katvā ‘‘katici bhave dassetvā’’ti bhavaggahaṇaṃ katanti.
‘‘ааяад̇анаанам̣ бадилаабхо ж̇аад̇ий’’д̇и (д̣̇ий. ни. 2.388; вибха. 235) важанад̇о д̇ам̣д̇ам̣ааяад̇ананиб̣б̣ад̇д̇агагаммзна г̇ахид̇абадисанд̇хигасса авассам̣бхаавийааяад̇анасса яаава ааяад̇анабаарибуури, д̇аава уббаж̇ж̇ад̇ийд̇и бана ад̇т̇з г̇аяхамаанз бужчаад̣̇ваяависсаж̇ж̇анам̣ суубабаннам̣ ход̇и. зван̃жа сад̇и ‘‘яасса ваа бана сод̇ааяад̇анам̣ нуббаж̇ж̇иссад̇и, д̇асса жагкааяад̇анам̣ нуббаж̇ж̇ад̇ийд̇и? бажчимабхавигаанам̣ бан̃жавогаарам̣ убабаж̇ж̇анд̇аанам̣, яз жа аруубам̣ убабаж̇ж̇ид̇ваа бариниб̣б̣ааяиссанд̇и, д̇зсам̣ убабаж̇ж̇анд̇аанам̣ д̇зсам̣ сод̇ааяад̇анам̣ нуббаж̇ж̇иссад̇и, но жа д̇зсам̣ жагкааяад̇анам̣ нуббаж̇ж̇ад̇ий’’д̇и звамаад̣̇ийсу (яама. 1.ааяад̇анаяамага.95) г̇аб̣бхасзяяагааби бажчимабхавигаад̣̇аяо убабаж̇ж̇анд̇аа г̇ахид̇аа хонд̇и. зван̃жа гад̇ваа инд̣̇рияаяамагз (яама. 3.инд̣̇рияаяамага.186) ‘‘яасса ваа бана соманассинд̣̇рияам̣ уббаж̇ж̇ад̇и, д̇асса жагкунд̣̇рияам̣ уббаж̇ж̇ад̇ийд̇и? ааманд̇аа’’д̇и ид̣̇амби убабаннам̣ ход̇и. соманассинд̣̇рияуббаад̣̇агасса гаммасса зганд̇зна жагкунд̣̇рияуббаад̣̇анад̇о г̇аб̣бхзби яаава жагкунд̣̇рияуббад̇д̇и, д̇аава уббаж̇ж̇амаанад̇ааяа д̇ассаа абхинанд̣̇ид̇аб̣б̣ад̇д̇аа.
‘‘Āyatanānaṃ paṭilābho jātī’’ti (dī. ni. 2.388; vibha. 235) vacanato taṃtaṃāyatananibbattakakammena gahitapaṭisandhikassa avassaṃbhāvīāyatanassa yāva āyatanapāripūri, tāva uppajjatīti pana atthe gayhamāne pucchādvayavissajjanaṃ sūpapannaṃ hoti. Evañca sati ‘‘yassa vā pana sotāyatanaṃ nuppajjissati, tassa cakkhāyatanaṃ nuppajjatīti? Pacchimabhavikānaṃ pañcavokāraṃ upapajjantānaṃ, ye ca arūpaṃ upapajjitvā parinibbāyissanti, tesaṃ upapajjantānaṃ tesaṃ sotāyatanaṃ nuppajjissati, no ca tesaṃ cakkhāyatanaṃ nuppajjatī’’ti evamādīsu (yama. 1.āyatanayamaka.95) gabbhaseyyakāpi pacchimabhavikādayo upapajjantā gahitā honti. Evañca katvā indriyayamake (yama. 3.indriyayamaka.186) ‘‘yassa vā pana somanassindriyaṃ uppajjati, tassa cakkhundriyaṃ uppajjatīti? Āmantā’’ti idampi upapannaṃ hoti. Somanassindriyuppādakassa kammassa ekantena cakkhundriyuppādanato gabbhepi yāva cakkhundriyuppatti, tāva uppajjamānatāya tassā abhinanditabbattā.
яам̣ бана ‘‘яасса ваа бана яад̇т̇а руубааяад̇анам̣ уббаж̇ж̇ид̇т̇а, д̇асса д̇ад̇т̇а гхаанааяад̇анам̣ уббаж̇ж̇ад̇ийд̇и? гаамааважараа жаванд̇аанам̣, агхаанагаанам̣ гаамааважарам̣ убабаж̇ж̇анд̇аанам̣, руубааважараанам̣ д̇зсам̣ д̇ад̇т̇а руубааяад̇анам̣ уббаж̇ж̇ид̇т̇а, но жа д̇зсам̣ д̇ад̇т̇а гхаанааяад̇анам̣ уббаж̇ж̇ад̇ий’’д̇и зд̇т̇а ‘‘агхаанагаанам̣ гаамааважарам̣ убабаж̇ж̇анд̇аана’’нд̇и (яама. 1.ааяад̇анаяамага.76) вуд̇д̇ам̣, д̇ам̣ яз згаад̣̇асамасад̇д̇аахаа орад̇о гаалам̣ гариссанд̇и, д̇зсам̣ гхаанааяад̇анааниб̣б̣ад̇д̇агагаммзна г̇ахид̇абадисанд̇хигаанам̣ васзна вуд̇д̇анд̇и взд̣̇ид̇аб̣б̣ам̣. ‘‘яасса яад̇т̇а гхаанааяад̇анам̣ на нируж̇жхад̇и, д̇асса д̇ад̇т̇а руубааяад̇анам̣ на нируж̇жхиссад̇ийд̇и? гаамааважарам̣ убабаж̇ж̇анд̇аанам̣, агхаанагаанам̣ гаамааважараа жаванд̇аанам̣, руубааважараанам̣ д̇зсам̣ д̇ад̇т̇а гхаанааяад̇анам̣ на нируж̇жхад̇и, но жа д̇зсам̣ д̇ад̇т̇а руубааяад̇анам̣ на нируж̇жхиссад̇ий’’д̇и хи зд̇т̇а ‘‘агхаанагаанам̣ гаамааважараа жаванд̇аана’’нд̇и (яама. 1.ааяад̇анаяамага.181) важанам̣ ануббаннзязва гхаанааяад̇анз г̇аб̣бхасзяяагаанам̣ жуд̇и ад̇т̇ийд̇и д̣̇ийбзд̇и. на хи гаамааважарз г̇аб̣бхасзяяагад̇о ан̃н̃о агхаанаго ад̇т̇и д̇хаммахад̣̇аяавибхан̇г̇з (вибха. 978 аад̣̇аяо) ‘‘гаамад̇хаад̇уяаа убабад̇д̇игкан̣з гассажи адтааяад̇анаани баад̇убхаванд̇ий’’д̇и авуд̇д̇ад̇д̇аад̇и. ат̇а гасмаа обабаад̇игз зва санд̇хааяа ид̇ха, инд̣̇рияаяамагз жа яат̇аад̣̇ассид̇аасу бужчаасу ‘‘ааманд̇аа’’д̇и вуд̇д̇анд̇и на вин̃н̃ааяад̇ийд̇и? яамагз саннидтаанзна г̇ахид̇ад̇т̇асса згад̣̇зсз сам̣саяад̇т̇асамбхавзна бадиважанасса агаран̣ад̇о. бхинд̣̇ид̇аб̣б̣з хи на бадиважанависсаж̇ж̇анам̣ ход̇и. яад̣̇и сияаа, барибун̣н̣ависсаж̇ж̇анамзва на сияаад̇и. ат̇а гасмаа ‘‘яасса ваа бана соманассинд̣̇рияам̣ уббаж̇ж̇ад̇и, д̇асса жагкунд̣̇рияам̣ уббаж̇ж̇ад̇ийд̇и? ааманд̇аа’’д̇и (яама. 3.инд̣̇рияаяамага.186) иминаа ‘‘г̇аб̣бхасзяяагаанам̣ соманассабадисанд̇хи над̇т̇ий’’д̇и на вин̃н̃ааяад̇ийд̇и? ‘‘гаамад̇хаад̇уяаа убабад̇д̇игкан̣з гасса д̣̇асинд̣̇рияаани баад̇убхаванд̇и? г̇аб̣бхасзяяагаанам̣ сад̇д̇аанам̣ сахзд̇угаанам̣ н̃аан̣асамбаяуд̇д̇аанам̣ убабад̇д̇игкан̣з д̣̇асинд̣̇рияаани баад̇убхаванд̇и гааяинд̣̇рияам̣ манинд̣̇рияам̣ ид̇т̇инд̣̇рияам̣ ваа бурисинд̣̇рияам̣ ваа ж̇ийвид̇инд̣̇рияам̣ соманассинд̣̇рияам̣ ваа убзгкинд̣̇рияам̣ ваа сад̣̇д̇хинд̣̇рияа’’нд̇иаад̣̇иважанад̇о (вибха. 1012).
Yaṃ pana ‘‘yassa vā pana yattha rūpāyatanaṃ uppajjittha, tassa tattha ghānāyatanaṃ uppajjatīti? Kāmāvacarā cavantānaṃ, aghānakānaṃ kāmāvacaraṃ upapajjantānaṃ, rūpāvacarānaṃ tesaṃ tattha rūpāyatanaṃ uppajjittha, no ca tesaṃ tattha ghānāyatanaṃ uppajjatī’’ti ettha ‘‘aghānakānaṃ kāmāvacaraṃ upapajjantāna’’nti (yama. 1.āyatanayamaka.76) vuttaṃ, taṃ ye ekādasamasattāhā orato kālaṃ karissanti, tesaṃ ghānāyatanānibbattakakammena gahitapaṭisandhikānaṃ vasena vuttanti veditabbaṃ. ‘‘Yassa yattha ghānāyatanaṃ na nirujjhati, tassa tattha rūpāyatanaṃ na nirujjhissatīti? Kāmāvacaraṃ upapajjantānaṃ, aghānakānaṃ kāmāvacarā cavantānaṃ, rūpāvacarānaṃ tesaṃ tattha ghānāyatanaṃ na nirujjhati, no ca tesaṃ tattha rūpāyatanaṃ na nirujjhissatī’’ti hi ettha ‘‘aghānakānaṃ kāmāvacarā cavantāna’’nti (yama. 1.āyatanayamaka.181) vacanaṃ anuppanneyeva ghānāyatane gabbhaseyyakānaṃ cuti atthīti dīpeti. Na hi kāmāvacare gabbhaseyyakato añño aghānako atthi dhammahadayavibhaṅge (vibha. 978 ādayo) ‘‘kāmadhātuyā upapattikkhaṇe kassaci aṭṭhāyatanāni pātubhavantī’’ti avuttattāti. Atha kasmā opapātike eva sandhāya idha, indriyayamake ca yathādassitāsu pucchāsu ‘‘āmantā’’ti vuttanti na viññāyatīti? Yamake sanniṭṭhānena gahitatthassa ekadese saṃsayatthasambhavena paṭivacanassa akaraṇato. Bhinditabbe hi na paṭivacanavissajjanaṃ hoti. Yadi siyā, paripuṇṇavissajjanameva na siyāti. Atha kasmā ‘‘yassa vā pana somanassindriyaṃ uppajjati, tassa cakkhundriyaṃ uppajjatīti? Āmantā’’ti (yama. 3.indriyayamaka.186) iminā ‘‘gabbhaseyyakānaṃ somanassapaṭisandhi natthī’’ti na viññāyatīti? ‘‘Kāmadhātuyā upapattikkhaṇe kassa dasindriyāni pātubhavanti? Gabbhaseyyakānaṃ sattānaṃ sahetukānaṃ ñāṇasampayuttānaṃ upapattikkhaṇe dasindriyāni pātubhavanti kāyindriyaṃ manindriyaṃ itthindriyaṃ vā purisindriyaṃ vā jīvitindriyaṃ somanassindriyaṃ vā upekkhindriyaṃ vā saddhindriya’’ntiādivacanato (vibha. 1012).
нирод̇хаваарз анааг̇ад̇агаалабхзд̣̇з яат̇аа д̇ассзва жид̇д̇асса нирод̇хо анааг̇ад̇абхаавзна д̇асса уббад̇д̇игкан̣з вуд̇д̇о, звам̣ д̇ассзва гаммаж̇асанд̇аанасса нирод̇хо анааг̇ад̇абхаавзна д̇асса уббаад̣̇з вад̇д̇аб̣б̣од̇и саб̣б̣ад̇т̇а убабаж̇ж̇анд̇аанам̣ зва со д̇ат̇аа вуд̇д̇о, на уббаннаанам̣. уббаннаанам̣ бана ан̃н̃асса анааг̇ад̇асса санд̇аанасса нирод̇хо анааг̇ад̇абхаавзна вад̇д̇аб̣б̣о, на д̇ассзва. д̇асса хи уббаад̣̇аананд̇арам̣ нирод̇хо аарад̣̇д̇хо наама ход̇ийд̇и. д̇асмаа арахад̇ам̣ бавад̇д̇з сод̇асса жагкусса жа бхзд̣̇з сад̇иби анааг̇ад̇агаалаамасанавасзнзва ‘‘яасса жагкааяад̇анам̣ нируж̇жхиссад̇и, д̇асса сод̇ааяад̇анам̣ нируж̇жхиссад̇ийд̇и? ааманд̇аа. яасса ваа бана сод̇ааяад̇анам̣ нируж̇жхиссад̇и, д̇асса жагкааяад̇анам̣ нируж̇жхиссад̇ийд̇и? ааманд̇аа’’д̇и виссаж̇ж̇анад̣̇ваяам̣ убабаннамзва ход̇ийд̇и. яасмаа жа убабад̇д̇иананд̇арам̣ нирод̇хо аарад̣̇д̇хо наама ход̇и, д̇ам̣нидтаанабхаавад̇о бана жуд̇ияаа нирод̇хаважанам̣, д̇асмаа бавад̇д̇з нируд̣̇д̇хзби санд̇аанзгад̣̇зсз анируд̣̇д̇хам̣ убаад̣̇ааяа анидтид̇анирод̇ход̇и жуд̇ияаава д̇асса нирод̇ход̇и вужжад̇и. вагкад̇и хи ‘‘яасса ваа бана соманассинд̣̇рияам̣ нируж̇жхад̇и, д̇асса жагкунд̣̇рияам̣ нируж̇жхад̇ийд̇и? ааманд̇аа’’д̇и, д̇знзд̇т̇ааби жуд̇инирод̇хз зва жа ад̇хиббзд̇з яан̃жа бавад̇д̇з нируж̇жхиссад̇и, д̇ан̃жа нидтаанавасзна жуд̇ияаа зва нируж̇жхиссад̇ийд̇и вуд̇д̇анд̇и ‘‘ааманд̇аа’’д̇и яуд̇д̇ам̣ бадиважанам̣. ‘‘сажагкугаана’’нд̇иаад̣̇ийсу жа ‘‘бадилад̣̇д̇хажагкугаана’’нд̇иаад̣̇инаа ад̇т̇о вин̃н̃ааяад̇ийд̇и.
Nirodhavāre anāgatakālabhede yathā tasseva cittassa nirodho anāgatabhāvena tassa uppattikkhaṇe vutto, evaṃ tasseva kammajasantānassa nirodho anāgatabhāvena tassa uppāde vattabboti sabbattha upapajjantānaṃ eva so tathā vutto, na uppannānaṃ. Uppannānaṃ pana aññassa anāgatassa santānassa nirodho anāgatabhāvena vattabbo, na tasseva. Tassa hi uppādānantaraṃ nirodho āraddho nāma hotīti. Tasmā arahataṃ pavatte sotassa cakkhussa ca bhede satipi anāgatakālāmasanavaseneva ‘‘yassa cakkhāyatanaṃ nirujjhissati, tassa sotāyatanaṃ nirujjhissatīti? Āmantā. Yassa vā pana sotāyatanaṃ nirujjhissati, tassa cakkhāyatanaṃ nirujjhissatīti? Āmantā’’ti vissajjanadvayaṃ upapannameva hotīti. Yasmā ca upapattianantaraṃ nirodho āraddho nāma hoti, taṃniṭṭhānabhāvato pana cutiyā nirodhavacanaṃ, tasmā pavatte niruddhepi santānekadese aniruddhaṃ upādāya aniṭṭhitanirodhoti cutiyāva tassa nirodhoti vuccati. Vakkhati hi ‘‘yassa vā pana somanassindriyaṃ nirujjhati, tassa cakkhundriyaṃ nirujjhatīti? Āmantā’’ti, tenetthāpi cutinirodhe eva ca adhippete yañca pavatte nirujjhissati, tañca niṭṭhānavasena cutiyā eva nirujjhissatīti vuttanti ‘‘āmantā’’ti yuttaṃ paṭivacanaṃ. ‘‘Sacakkhukāna’’ntiādīsu ca ‘‘paṭiladdhacakkhukāna’’ntiādinā attho viññāyatīti.
‘‘яасса жагкааяад̇анам̣ на нируж̇жхад̇и, д̇асса сод̇ааяад̇анам̣ на нируж̇жхиссад̇ийд̇и? саб̣б̣зсам̣ убабаж̇ж̇анд̇аанам̣, ажагкугаанам̣ жаванд̇аанам̣ д̇зсам̣ жагкааяад̇анам̣ на нируж̇жхад̇и, но жа д̇зсам̣ сод̇ааяад̇анам̣ на нируж̇жхиссад̇ий’’д̇и зд̇т̇а ааруббз бажчимабхавигз табзд̇ваа саб̣б̣з убабаж̇ж̇анд̇аа, ажагкугаа жаванд̇аа жа г̇ахид̇аад̇и д̣̇адтаб̣б̣аа. д̇з хи д̣̇уд̇ияагодтаасзна сан̇г̇аяханд̇ийд̇и д̇ад̣̇абзгкад̇д̇аа саавасзсамид̣̇ам̣ саб̣б̣аважанам̣ ажагкугаважанан̃жаад̇и. ‘‘ааруббз бажчимабхавигаана’’нд̇и зд̇т̇а жа аруубад̇о бан̃жавогаарам̣ аг̇ажчанд̇аа анан̃н̃уубабад̇д̇игааби ‘‘аруубз бажчимабхавигаа’’ижжзва сан̇г̇аяханд̇ийд̇и взд̣̇ид̇аб̣б̣аа. зса наяо ан̃н̃зсуби зваруубзсууд̇и.
‘‘Yassa cakkhāyatanaṃ na nirujjhati, tassa sotāyatanaṃ na nirujjhissatīti? Sabbesaṃ upapajjantānaṃ, acakkhukānaṃ cavantānaṃ tesaṃ cakkhāyatanaṃ na nirujjhati, no ca tesaṃ sotāyatanaṃ na nirujjhissatī’’ti ettha āruppe pacchimabhavike ṭhapetvā sabbe upapajjantā, acakkhukā cavantā ca gahitāti daṭṭhabbā. Te hi dutiyakoṭṭhāsena saṅgayhantīti tadapekkhattā sāvasesamidaṃ sabbavacanaṃ acakkhukavacanañcāti. ‘‘Āruppe pacchimabhavikāna’’nti ettha ca arūpato pañcavokāraṃ agacchantā anaññūpapattikāpi ‘‘arūpe pacchimabhavikā’’icceva saṅgayhantīti veditabbā. Esa nayo aññesupi evarūpesūti.
бавад̇д̇иваараван̣н̣анаа нидтид̇аа.
Pavattivāravaṇṇanā niṭṭhitā.
ааяад̇анаяамагаван̣н̣анаа нидтид̇аа.
Āyatanayamakavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / абхид̇хаммабидага • Abhidhammapiṭaka / яамагабаал̣и • Yamakapāḷi / 3. ааяад̇анаяамагам̣ • 3. Āyatanayamakaṃ
адтагат̇аа • Aṭṭhakathā / абхид̇хаммабидага (адтагат̇аа) • Abhidhammapiṭaka (aṭṭhakathā) / бан̃жабагаран̣а-адтагат̇аа • Pañcapakaraṇa-aṭṭhakathā / 3. ааяад̇анаяамагам̣ • 3. Āyatanayamakaṃ
дийгаа • Tīkā / абхид̇хаммабидага (дийгаа) • Abhidhammapiṭaka (ṭīkā) / бан̃жабагаран̣а-анудийгаа • Pañcapakaraṇa-anuṭīkā / 3. ааяад̇анаяамагам̣ • 3. Āyatanayamakaṃ
