| Library / Tipiṭaka / તિપિટક • Tipiṭaka / અઙ્ગુત્તરનિકાય • Aṅguttaranikāya |
૫. અયોનિસોસુત્તં
5. Ayonisosuttaṃ
૫. ‘‘તીહિ, ભિક્ખવે, ધમ્મેહિ સમન્નાગતો બાલો વેદિતબ્બો. કતમેહિ તીહિ? અયોનિસો પઞ્હં કત્તા હોતિ, અયોનિસો પઞ્હં વિસ્સજ્જેતા હોતિ, પરસ્સ ખો પન યોનિસો પઞ્હં વિસ્સજ્જિતં પરિમણ્ડલેહિ પદબ્યઞ્જનેહિ સિલિટ્ઠેહિ ઉપગતેહિ નાબ્ભનુમોદિતા હોતિ. ઇમેહિ ખો, ભિક્ખવે, તીહિ ધમ્મેહિ સમન્નાગતો બાલો વેદિતબ્બો.
5. ‘‘Tīhi, bhikkhave, dhammehi samannāgato bālo veditabbo. Katamehi tīhi? Ayoniso pañhaṃ kattā hoti, ayoniso pañhaṃ vissajjetā hoti, parassa kho pana yoniso pañhaṃ vissajjitaṃ parimaṇḍalehi padabyañjanehi siliṭṭhehi upagatehi nābbhanumoditā hoti. Imehi kho, bhikkhave, tīhi dhammehi samannāgato bālo veditabbo.
‘‘તીહિ, ભિક્ખવે, ધમ્મેહિ સમન્નાગતો પણ્ડિતો વેદિતબ્બો. કતમેહિ તીહિ? યોનિસો પઞ્હં કત્તા હોતિ, યોનિસો પઞ્હં વિસ્સજ્જેતા હોતિ, પરસ્સ ખો પન યોનિસો પઞ્હં વિસ્સજ્જિતં પરિમણ્ડલેહિ પદબ્યઞ્જનેહિ સિલિટ્ઠેહિ ઉપગતેહિ અબ્ભનુમોદિતા હોતિ. ઇમેહિ ખો, ભિક્ખવે, તીહિ ધમ્મેહિ સમન્નાગતો પણ્ડિતો વેદિતબ્બો. તસ્માતિહ…. પઞ્ચમં.
‘‘Tīhi, bhikkhave, dhammehi samannāgato paṇḍito veditabbo. Katamehi tīhi? Yoniso pañhaṃ kattā hoti, yoniso pañhaṃ vissajjetā hoti, parassa kho pana yoniso pañhaṃ vissajjitaṃ parimaṇḍalehi padabyañjanehi siliṭṭhehi upagatehi abbhanumoditā hoti. Imehi kho, bhikkhave, tīhi dhammehi samannāgato paṇḍito veditabbo. Tasmātiha…. Pañcamaṃ.
Related texts:
અટ્ઠકથા • Aṭṭhakathā / સુત્તપિટક (અટ્ઠકથા) • Suttapiṭaka (aṭṭhakathā) / અઙ્ગુત્તરનિકાય (અટ્ઠકથા) • Aṅguttaranikāya (aṭṭhakathā) / ૫. અયોનિસોસુત્તવણ્ણના • 5. Ayonisosuttavaṇṇanā
ટીકા • Tīkā / સુત્તપિટક (ટીકા) • Suttapiṭaka (ṭīkā) / અઙ્ગુત્તરનિકાય (ટીકા) • Aṅguttaranikāya (ṭīkā) / ૫-૧૦. અયોનિસોસુત્તાદિવણ્ણના • 5-10. Ayonisosuttādivaṇṇanā
