| Library / Tipiṭaka / திபிடக • Tipiṭaka / வஜிரபு³த்³தி⁴-டீகா • Vajirabuddhi-ṭīkā |
பா³ஹிரனிதா³னகதா²வண்ணனா
Bāhiranidānakathāvaṇṇanā
தத³ங்க³வினயாதி³பே⁴தே³ன வினயஸ்ஸப³ஹுத்தா வினயோ தாவ வவத்த²பேதப்³போ³. ‘‘பு³த்³தே⁴ன த⁴ம்மோ வினயோ ச வுத்தோ’’தி புப்³பே³ வுத்தத்தா இதா³னி ‘‘வுத்தங் யேனா’’தி ந வத்தப்³ப³ந்தி சே? தஸ்ஸ ஏவமாதி³வசனங் ஸந்தா⁴ய வுத்தந்தி ஸம்ப³ந்தோ⁴. தா⁴ரிதங் யேன சாப⁴தங். யத்த²ப்பதிட்டி²தஞ்சேதந்தி வசனங் ஸகலம்பி வினயபிடகங் ஸந்தா⁴ய வுத்தங். அத்தபச்சக்க²வசனங் ந ஹோதீதி ஆஹச்ச பா⁴ஸிதங் ந ஹோதீதி அதி⁴ப்பாயோ. ந ஹி ப⁴க³வதோ அதீதாதீ³ஸு அப்பச்சக்க²ங் கிஞ்சி அத்தி². யதி³ அத்தபச்சக்க²வசனங் ந ஹோதி, பத³ஸோத⁴ம்மாபத்திங் ந ஜனெய்யாதி சே? ந, ஸாவகபா⁴ஸிதஸ்ஸபி பத³ஸோத⁴ம்மாபத்திஜனநதோ. நியமாபா⁴வா அதிப்பஸங்கோ³தி சே? ந, பத³ஸோத⁴ம்மஸிக்கா²பத³ட்ட²கதா²யங் ‘‘ஸங்கீ³தித்தயங் ஆருள்ஹோ’’தி விஸேஸிதத்தா. ததா² அட்ட²கதா²யம்பி ஸங்கீ³திங் ஆருள்ஹத்தா ‘‘க²ந்தா⁴னஞ்ச படிபாடி…பே॰… ஸங்ஸாரோதி பவுச்சதீ’’தி (த⁴॰ ஸ॰ அட்ட²॰ நிதா³னகதா²; விப⁴॰ அட்ட²॰ 226 ஸங்கா²ரபத³னித்³தே³ஸ) ஏவமாதி³வசனங், யஞ்ச ஸங்கீ³திஆருள்ஹக்கமானுக³தங், தங் பத³ஸோத⁴ம்மாபத்திங் ஜனேதீதி ஆயஸ்மா உபதிஸ்ஸோ.
Tadaṅgavinayādibhedena vinayassabahuttā vinayo tāva vavatthapetabbo. ‘‘Buddhena dhammo vinayo ca vutto’’ti pubbe vuttattā idāni ‘‘vuttaṃ yenā’’ti na vattabbanti ce? Tassa evamādivacanaṃ sandhāya vuttanti sambandho. Dhāritaṃ yena cābhataṃ. Yatthappatiṭṭhitañcetanti vacanaṃ sakalampi vinayapiṭakaṃ sandhāya vuttaṃ. Attapaccakkhavacanaṃ na hotīti āhacca bhāsitaṃ na hotīti adhippāyo. Na hi bhagavato atītādīsu appaccakkhaṃ kiñci atthi. Yadi attapaccakkhavacanaṃ na hoti, padasodhammāpattiṃ na janeyyāti ce? Na, sāvakabhāsitassapi padasodhammāpattijananato. Niyamābhāvā atippasaṅgoti ce? Na, padasodhammasikkhāpadaṭṭhakathāyaṃ ‘‘saṅgītittayaṃ āruḷho’’ti visesitattā. Tathā aṭṭhakathāyampi saṅgītiṃ āruḷhattā ‘‘khandhānañca paṭipāṭi…pe… saṃsāroti pavuccatī’’ti (dha. sa. aṭṭha. nidānakathā; vibha. aṭṭha. 226 saṅkhārapadaniddesa) evamādivacanaṃ, yañca saṅgītiāruḷhakkamānugataṃ, taṃ padasodhammāpattiṃ janetīti āyasmā upatisso.
