| Library / Tipiṭaka / д̇ибидага • Tipiṭaka / ж̇аад̇ага-адтагат̇аа • Jātaka-aṭṭhakathā |
[405] 10. б̣агаж̇аад̇агаван̣н̣анаа
[405] 10. Bakajātakavaṇṇanā
д̣̇ваасад̇д̇ад̇ийд̇и ид̣̇ам̣ сад̇т̇аа ж̇зд̇аванз вихаранд̇о б̣агаб̣рахмаанам̣ аараб̣бха гат̇зси. д̇асса хи ‘‘ид̣̇ам̣ нижжам̣ д̇хувам̣ сассад̇ам̣ ажаванад̇хаммам̣, ид̇о ан̃н̃ам̣ логаниссаран̣ам̣ ниб̣б̣аанам̣ наама над̇т̇ий’’д̇и звам̣ д̣̇идти уббаж̇ж̇и. хздтуубабад̇д̇иго гирзса б̣рахмаа буб̣б̣з жхаанам̣ бхаавзд̇ваа взхабпалзсу ниб̣б̣ад̇д̇о, д̇ад̇т̇а бан̃жагаббасад̇абаримаан̣ам̣ ааяум̣ кзбзд̇ваа субхагин̣хзсу ниб̣б̣ад̇д̇ид̇ваа жад̇усадтигаббам̣ кзбзд̇ваа д̇ад̇о жуд̇о адтагаббааяугзсу аабхассарзсу ниб̣б̣ад̇д̇и, д̇ад̇расса зсаа д̣̇идти уббаж̇ж̇и. со хи нзва убариб̣рахмалогад̇о жуд̇им̣, на д̇ад̇т̇а убабад̇д̇им̣ ануссари, д̇ад̣̇убхаяамби абассанд̇о звам̣ д̣̇идтим̣ г̇ан̣хи. бхаг̇аваа д̇асса жзд̇асаа жзд̇обаривид̇аггаман̃н̃ааяа сзяяат̇ааби наама б̣алаваа бурисо самин̃ж̇ид̇ам̣ ваа б̣аахам̣ басаарзяяа, басаарид̇ам̣ ваа б̣аахам̣ самин̃ж̇зяяа, звамзва ж̇зд̇аванз анд̇арахид̇о д̇асмим̣ б̣рахмалогз баад̇урахоси. ат̇а б̣рахмаа бхаг̇аванд̇ам̣ д̣̇исваа ‘‘зхи ко, маариса, свааг̇ад̇ам̣ маариса, жирассам̣ ко, маариса, имам̣ барияааяамагааси, яад̣̇ид̣̇ам̣ ид̇хааг̇аманааяа. ид̣̇ан̃хи маариса, нижжам̣ ид̣̇ам̣ д̇хувам̣ ид̣̇ам̣ сассад̇ам̣ ид̣̇ам̣ гзвалам̣ ид̣̇ам̣ ажаванад̇хаммам̣, ид̣̇ан̃хи на жа ж̇ааяад̇и на ж̇ийяад̇и на мийяад̇и на жавад̇и на убабаж̇ж̇ад̇и, ид̇о жа банан̃н̃ам̣ уд̇д̇ари ниссаран̣ам̣ над̇т̇ий’’д̇и ааха.
Dvāsattatīti idaṃ satthā jetavane viharanto bakabrahmānaṃ ārabbha kathesi. Tassa hi ‘‘idaṃ niccaṃ dhuvaṃ sassataṃ acavanadhammaṃ, ito aññaṃ lokanissaraṇaṃ nibbānaṃ nāma natthī’’ti evaṃ diṭṭhi uppajji. Heṭṭhūpapattiko kiresa brahmā pubbe jhānaṃ bhāvetvā vehapphalesu nibbatto, tattha pañcakappasataparimāṇaṃ āyuṃ khepetvā subhakiṇhesu nibbattitvā catusaṭṭhikappaṃ khepetvā tato cuto aṭṭhakappāyukesu ābhassaresu nibbatti, tatrassa esā diṭṭhi uppajji. So hi neva uparibrahmalokato cutiṃ, na tattha upapattiṃ anussari, tadubhayampi apassanto evaṃ diṭṭhiṃ gaṇhi. Bhagavā tassa cetasā cetoparivitakkamaññāya seyyathāpi nāma balavā puriso samiñjitaṃ vā bāhaṃ pasāreyya, pasāritaṃ vā bāhaṃ samiñjeyya, evameva jetavane antarahito tasmiṃ brahmaloke pāturahosi. Atha brahmā bhagavantaṃ disvā ‘‘ehi kho, mārisa, svāgataṃ mārisa, cirassaṃ kho, mārisa, imaṃ pariyāyamakāsi, yadidaṃ idhāgamanāya. Idañhi mārisa, niccaṃ idaṃ dhuvaṃ idaṃ sassataṃ idaṃ kevalaṃ idaṃ acavanadhammaṃ, idañhi na ca jāyati na jīyati na mīyati na cavati na upapajjati, ito ca panaññaṃ uttari nissaraṇaṃ natthī’’ti āha.
звам̣ вуд̇д̇з бхаг̇аваа б̣агам̣ б̣рахмаанам̣ зд̇ад̣̇авожа ‘‘авиж̇ж̇ааг̇ад̇о вад̇а бхо б̣аго б̣рахмаа, авиж̇ж̇ааг̇ад̇о вад̇а бхо б̣аго б̣рахмаа, яад̇ра хи наама анижжан̃н̃зва самаанам̣ нижжанд̇и вагкад̇и…бз… санд̇ан̃жа банан̃н̃ам̣ уд̇д̇ари ниссаран̣ам̣, над̇т̇ан̃н̃ам̣ уд̇д̇ари ниссаран̣анд̇и вагкад̇ий’’д̇и (сам̣. ни. 1.175). д̇ам̣ суд̇ваа б̣рахмаа ‘‘д̇вам̣ звам̣ гат̇зси, д̇вам̣ звам̣ гат̇зси, ид̇и мам̣ зса ануяун̃ж̇анд̇о ануб̣анд̇хад̇ий’’д̇и жинд̇зд̇ваа яат̇аа наама д̣̇уб̣б̣ало жоро гад̇ибаяз бахаарз лабхид̇ваа ‘‘гим̣ ахамзва жоро, асугоби жоро асугоби жоро’’д̇и саб̣б̣зби сахааяагз аажигкад̇и, д̇ат̇зва бхаг̇авад̇о ануяог̇абхаязна бхийд̇о ан̃н̃зби ад̇д̇ано сахааяагз аажигканд̇о батамам̣ г̇аат̇амааха –
Evaṃ vutte bhagavā bakaṃ brahmānaṃ etadavoca ‘‘avijjāgato vata bho bako brahmā, avijjāgato vata bho bako brahmā, yatra hi nāma aniccaññeva samānaṃ niccanti vakkhati…pe… santañca panaññaṃ uttari nissaraṇaṃ, natthaññaṃ uttari nissaraṇanti vakkhatī’’ti (saṃ. ni. 1.175). Taṃ sutvā brahmā ‘‘tvaṃ evaṃ kathesi, tvaṃ evaṃ kathesi, iti maṃ esa anuyuñjanto anubandhatī’’ti cintetvā yathā nāma dubbalo coro katipaye pahāre labhitvā ‘‘kiṃ ahameva coro, asukopi coro asukopi coro’’ti sabbepi sahāyake ācikkhati, tatheva bhagavato anuyogabhayena bhīto aññepi attano sahāyake ācikkhanto paṭhamaṃ gāthamāha –
68.
68.
‘‘д̣̇ваасад̇д̇ад̇и г̇од̇ама бун̃н̃агаммаа, васавад̇д̇ино ж̇аад̇иж̇арам̣ ад̇ийд̇аа;
‘‘Dvāsattati gotama puññakammā, vasavattino jātijaraṃ atītā;
аяаманд̇имаа взд̣̇аг̇уу б̣рахмабад̇д̇и, асмаабхиж̇аббанд̇и ж̇анаа анзгаа’’д̇и. (сам̣. ни. 1.175);
Ayamantimā vedagū brahmapatti, asmābhijappanti janā anekā’’ti. (saṃ. ni. 1.175);
д̇ад̇т̇а д̣̇ваасад̇д̇ад̇ийд̇и на гзвалам̣ бхо г̇од̇ама, ахамзва, ат̇а ко имасмим̣ б̣рахмалогз маяам̣ д̣̇ваасад̇д̇ад̇и ж̇анаа бун̃н̃агаммаа ан̃н̃зсам̣ убари ад̇т̇ано васам̣ вад̇д̇анзна васавад̇д̇ино ж̇аад̇ин̃жа ж̇аран̃жа ад̇ийд̇аа, аяам̣ но взд̣̇зхи г̇ад̇ад̇д̇аа взд̣̇аг̇уу, аяам̣ бхо г̇од̇ама анд̇имаа б̣рахмабад̇д̇и, бажчимагодиббад̇д̇и сздтабхааваббад̇д̇и. асмаабхиж̇аббанд̇и ж̇анаа анзгаад̇и амхз ан̃н̃з б̣ахуу ж̇анаа бан̃ж̇алигаа худ̇ваа – ‘‘аяам̣ ко бхавам̣ б̣рахмаа махааб̣рахмаа’’д̇иаад̣̇ийни вад̣̇анд̇аа намассанд̇и бад̇т̇знд̇и бихаяанд̇и, ‘‘ахо вад̇а маяамби зваруубаа бхавзяяаамаа’’д̇и ижчанд̇ийд̇и ад̇т̇о.
Tattha dvāsattatīti na kevalaṃ bho gotama, ahameva, atha kho imasmiṃ brahmaloke mayaṃ dvāsattati janā puññakammā aññesaṃ upari atthano vasaṃ vattanena vasavattino jātiñca jarañca atītā, ayaṃ no vedehi gatattā vedagū, ayaṃ bho gotama antimā brahmapatti, pacchimakoṭippatti seṭṭhabhāvappatti. Asmābhijappanti janā anekāti amhe aññe bahū janā pañjalikā hutvā – ‘‘ayaṃ kho bhavaṃ brahmā mahābrahmā’’tiādīni vadantā namassanti patthenti pihayanti, ‘‘aho vata mayampi evarūpā bhaveyyāmā’’ti icchantīti attho.
д̇асса важанам̣ суд̇ваа сад̇т̇аа д̣̇уд̇ияам̣ г̇аат̇амааха –
Tassa vacanaṃ sutvā satthā dutiyaṃ gāthamāha –
69.
69.
‘‘аббам̣ хи зд̇ам̣ на хи д̣̇ийгхамааяу, яам̣ д̇вам̣ б̣ага ман̃н̃аси д̣̇ийгхамааяум̣;
‘‘Appaṃ hi etaṃ na hi dīghamāyu, yaṃ tvaṃ baka maññasi dīghamāyuṃ;
сад̇ам̣ сахассаани нираб̣б̣уд̣̇аанам̣, ааяум̣ баж̇аанаами д̇авааха б̣рахмз’’д̇и. (сам̣. ни. 1.175);
Sataṃ sahassāni nirabbudānaṃ, āyuṃ pajānāmi tavāha brahme’’ti. (saṃ. ni. 1.175);
д̇ад̇т̇а сад̇ам̣ сахассаани нираб̣б̣уд̣̇аананд̇и нираб̣б̣уд̣̇асан̇каад̇аанам̣ г̇ан̣анаанам̣ сад̇асахассаани. вассаанан̃хи д̣̇асад̣̇асагам̣ сад̇ам̣, д̣̇аса сад̇аанам̣ сахассам̣, сад̇ам̣ сахассаанам̣ сад̇асахассам̣, сад̇ам̣ сад̇асахассаанам̣ годи наама, сад̇ам̣ годисад̇асахассаанам̣ багоди наама, сад̇ам̣ багодисад̇асахассаанам̣ годибагоди наама, сад̇ам̣ годибагодисад̇асахассаанам̣ згам̣ нахуд̇ам̣ наама, сад̇ам̣ нахуд̇асад̇асахассаанам̣ згам̣ ниннахуд̇ам̣ наама. чзго г̇ан̣аго зд̇д̇агам̣ г̇ан̣зд̇ум̣ саггод̇и, д̇ад̇о барам̣ г̇ан̣анаа наама б̣уд̣̇д̇хаанамзва висаяо. д̇ад̇т̇а сад̇ам̣ ниннахуд̇асад̇асахассаанам̣ згам̣ аб̣б̣уд̣̇ам̣, вийсад̇и аб̣б̣уд̣̇аани згам̣ нираб̣б̣уд̣̇ам̣, д̇зсам̣ нираб̣б̣уд̣̇асад̇асахассаанам̣ згам̣ ахахам̣ наама, зд̇д̇агам̣ б̣агасса б̣рахмуно д̇асмим̣ бхавз авасидтам̣ ааяу, д̇ам̣ санд̇хааяа бхаг̇аваа звамааха.
Tattha sataṃ sahassāni nirabbudānanti nirabbudasaṅkhātānaṃ gaṇanānaṃ satasahassāni. Vassānañhi dasadasakaṃ sataṃ, dasa satānaṃ sahassaṃ, sataṃ sahassānaṃ satasahassaṃ, sataṃ satasahassānaṃ koṭi nāma, sataṃ koṭisatasahassānaṃ pakoṭi nāma, sataṃ pakoṭisatasahassānaṃ koṭipakoṭi nāma, sataṃ koṭipakoṭisatasahassānaṃ ekaṃ nahutaṃ nāma, sataṃ nahutasatasahassānaṃ ekaṃ ninnahutaṃ nāma. Cheko gaṇako ettakaṃ gaṇetuṃ sakkoti, tato paraṃ gaṇanā nāma buddhānameva visayo. Tattha sataṃ ninnahutasatasahassānaṃ ekaṃ abbudaṃ, vīsati abbudāni ekaṃ nirabbudaṃ, tesaṃ nirabbudasatasahassānaṃ ekaṃ ahahaṃ nāma, ettakaṃ bakassa brahmuno tasmiṃ bhave avasiṭṭhaṃ āyu, taṃ sandhāya bhagavā evamāha.
д̇ам̣ суд̇ваа б̣аго д̇ад̇ияам̣ г̇аат̇амааха –
Taṃ sutvā bako tatiyaṃ gāthamāha –
70.
70.
‘‘ананд̇ад̣̇ассий бхаг̇аваахамасми, ж̇аад̇иж̇ж̇арам̣ согамубаад̇ивад̇д̇о;
‘‘Anantadassī bhagavāhamasmi, jātijjaraṃ sokamupātivatto;
гим̣ мз бураан̣ам̣ вад̇асийлавад̇д̇ам̣, аажигка мз д̇ам̣ яамахам̣ виж̇ан̃н̃а’’нд̇и. (сам̣. ни. 1.175);
Kiṃ me purāṇaṃ vatasīlavattaṃ, ācikkha me taṃ yamahaṃ vijañña’’nti. (saṃ. ni. 1.175);
д̇ад̇т̇а бхаг̇аваад̇и бхаг̇аваа д̇умхз ‘‘ааяум̣ баж̇аанаами д̇авааха’’нд̇и вад̣̇анд̇аа ‘‘ахам̣ ананд̇ад̣̇ассий ж̇аад̇иж̇аран̃жа соган̃жа убаад̇ивад̇д̇осмий’’д̇и вад̣̇ат̇а. вад̇асийлавад̇д̇анд̇и вад̇асамаад̣̇аанан̃жа сийлавад̇д̇ан̃жа. ид̣̇ам̣ вуд̇д̇ам̣ ход̇и – яад̣̇и д̇умхз саб̣б̣ан̃н̃уб̣уд̣̇д̇хаа, звам̣ санд̇з гим̣ маяхам̣ бураан̣ам̣ вад̇ан̃жа сийлавад̇д̇ан̃жа, аажигка мз д̇ам̣, яамахам̣ д̇аяаа аажигкид̇ам̣ яаат̇аавасарасад̇о виж̇аанзяяанд̇и.
Tattha bhagavāti bhagavā tumhe ‘‘āyuṃ pajānāmi tavāha’’nti vadantā ‘‘ahaṃ anantadassī jātijarañca sokañca upātivattosmī’’ti vadatha. Vatasīlavattanti vatasamādānañca sīlavattañca. Idaṃ vuttaṃ hoti – yadi tumhe sabbaññubuddhā, evaṃ sante kiṃ mayhaṃ purāṇaṃ vatañca sīlavattañca, ācikkha me taṃ, yamahaṃ tayā ācikkhitaṃ yāthāvasarasato vijāneyyanti.
ат̇асса бхаг̇аваа ад̇ийд̇аани вад̇т̇ууни аахарид̇ваа аажигканд̇о жад̇ассо г̇аат̇аа абхааси –
Athassa bhagavā atītāni vatthūni āharitvā ācikkhanto catasso gāthā abhāsi –
71.
71.
‘‘яам̣ д̇вам̣ абааязси б̣ахуу мануссз, бибаасид̇з гхаммани самбарзд̇з;
‘‘Yaṃ tvaṃ apāyesi bahū manusse, pipāsite ghammani samparete;
д̇ам̣ д̇з бураан̣ам̣ вад̇асийлавад̇д̇ам̣, суд̇д̇аббаб̣уд̣̇д̇хова ануссараами.
Taṃ te purāṇaṃ vatasīlavattaṃ, suttappabuddhova anussarāmi.
72.
72.
‘‘яам̣ зн̣игууласми ж̇анам̣ г̇ахийд̇ам̣, аможаяий г̇аяхага нийяамаанам̣;
‘‘Yaṃ eṇikūlasmi janaṃ gahītaṃ, amocayī gayhaka nīyamānaṃ;
д̇ам̣ д̇з бураан̣ам̣ вад̇асийлавад̇д̇ам̣, суд̇д̇аббаб̣уд̣̇д̇хова ануссараами.
Taṃ te purāṇaṃ vatasīlavattaṃ, suttappabuddhova anussarāmi.
73.
73.
‘‘г̇ан̇г̇ааяа сод̇асмим̣ г̇ахийд̇анаавам̣, луд̣̇д̣̇зна нааг̇зна мануссагаббаа;
‘‘Gaṅgāya sotasmiṃ gahītanāvaṃ, luddena nāgena manussakappā;
аможаяи д̇вам̣ б̣аласаа басаяха, д̇ам̣ д̇з бураан̣ам̣ вад̇асийлавад̇д̇ам̣;
Amocayi tvaṃ balasā pasayha, taṃ te purāṇaṃ vatasīlavattaṃ;
суд̇д̇аббаб̣уд̣̇д̇хова ануссараами.
Suttappabuddhova anussarāmi.
74.
74.
‘‘габбо жа д̇з б̣ад̣̇д̇хажаро ахосим̣, самб̣уд̣̇д̇химанд̇ам̣ вад̇инам̣ аман̃н̃ам̣;
‘‘Kappo ca te baddhacaro ahosiṃ, sambuddhimantaṃ vatinaṃ amaññaṃ;
д̇ам̣ д̇з бураан̣ам̣ вад̇асийлавад̇д̇ам̣, суд̇д̇аббаб̣уд̣̇д̇хова ануссараамий’’д̇и. (сам̣. ни. 1.175);
Taṃ te purāṇaṃ vatasīlavattaṃ, suttappabuddhova anussarāmī’’ti. (saṃ. ni. 1.175);
д̇ад̇т̇а абааязсийд̇и бааязси. гхаммани самбарзд̇зд̇и гхаммзна самбарзд̇з ад̇ивияа пудтз гхаммагиланд̇з. суд̇д̇аббаб̣уд̣̇д̇ховаад̇и бажжуусагаалз субанд̇о субинам̣ бассид̇ваа д̇ам̣ субинагам̣ вияа ануссараами. со гира б̣агаб̣рахмаа згасмим̣ габбз д̇аабасо худ̇ваа маруганд̇аарз васанд̇о б̣ахуунам̣ ганд̇аарабадибаннаанам̣ баанийяам̣ аахарид̇ваа ад̣̇ааси. ат̇згад̣̇ивасам̣ зго сад̇т̇аваахо бан̃жахи сагадасад̇зхи маруганд̇аарам̣ бадибаж̇ж̇и. мануссаа д̣̇исаа вавад̇т̇абзд̇ум̣ асаггонд̇аа сад̇д̇а д̣̇ивасаани аахин̣д̣ид̇ваа кийн̣ад̣̇ааруд̣̇агаа нираахаараа ун̣хаабхибхууд̇аа ‘‘ид̣̇аани но ж̇ийвид̇ам̣ над̇т̇ий’’д̇и сагадз баривад̇д̇зд̇ваа г̇он̣з можзд̇ваа хздтаасагадзсу нибаж̇ж̇им̣су. д̇ад̣̇аа д̇аабасо ааваж̇ж̇знд̇о д̇з д̣̇исваа ‘‘маяи бассанд̇з маа нассим̣суу’’д̇и жинд̇зд̇ваа ад̇д̇ано ид̣̇д̇хаанубхаавзна г̇ан̇г̇аасод̇ам̣ уб̣б̣ад̇д̇зд̇ваа сад̇т̇аваахаабхимукам̣ агааси, авид̣̇уурз жа згам̣ ванасан̣д̣ам̣ маабзси. мануссаа баанийяам̣ бивид̇ваа нхад̇ваа г̇он̣з санд̇аббзд̇ваа ванасан̣д̣ад̇о д̇ин̣ам̣ лааяид̇ваа д̣̇аарууни г̇ахзд̇ваа д̣̇исам̣ саллагкзд̇ваа арог̇аа ганд̇аарам̣ ад̇иггамим̣су, д̇ам̣ санд̇хааязд̇ам̣ вуд̇д̇ам̣.
Tattha apāyesīti pāyesi. Ghammani sampareteti ghammena samparete ativiya phuṭṭhe ghammakilante. Suttappabuddhovāti paccūsakāle supanto supinaṃ passitvā taṃ supinakaṃ viya anussarāmi. So kira bakabrahmā ekasmiṃ kappe tāpaso hutvā marukantāre vasanto bahūnaṃ kantārapaṭipannānaṃ pānīyaṃ āharitvā adāsi. Athekadivasaṃ eko satthavāho pañcahi sakaṭasatehi marukantāraṃ paṭipajji. Manussā disā vavatthapetuṃ asakkontā satta divasāni āhiṇḍitvā khīṇadārudakā nirāhārā uṇhābhibhūtā ‘‘idāni no jīvitaṃ natthī’’ti sakaṭe parivattetvā goṇe mocetvā heṭṭhāsakaṭesu nipajjiṃsu. Tadā tāpaso āvajjento te disvā ‘‘mayi passante mā nassiṃsū’’ti cintetvā attano iddhānubhāvena gaṅgāsotaṃ ubbattetvā satthavāhābhimukhaṃ akāsi, avidūre ca ekaṃ vanasaṇḍaṃ māpesi. Manussā pānīyaṃ pivitvā nhatvā goṇe santappetvā vanasaṇḍato tiṇaṃ lāyitvā dārūni gahetvā disaṃ sallakkhetvā arogā kantāraṃ atikkamiṃsu, taṃ sandhāyetaṃ vuttaṃ.
зн̣игууласминд̇и зн̣ияаа наама над̣̇ияаа гуулз. г̇аяхага нийяамаананд̇и гарамараг̇аахам̣ г̇ахзд̇ваа нийяамаанам̣. со гира д̇аабасо абарасмим̣ гаалз згам̣ бажжанд̇аг̇аамам̣ ниссааяа над̣̇ийд̇ийрз ванасан̣д̣з вихааси. ат̇згасмим̣ д̣̇ивасз баб̣б̣ад̇ад̇о жораа од̇арид̇ваа д̇ам̣ г̇аамам̣ бахарид̇ваа махааж̇анам̣ г̇ахзд̇ваа баб̣б̣ад̇ам̣ ааробзд̇ваа анд̇араамаг̇г̇з жаарагамануссз табзд̇ваа баб̣б̣ад̇аб̣илам̣ бависид̇ваа аахаарам̣ бажаабзнд̇аа нисийд̣̇им̣су. д̇аабасо г̇омахим̣саад̣̇ийнан̃жзва д̣̇аарагад̣̇ааригаад̣̇ийнан̃жа маханд̇ам̣ аддассарам̣ суд̇ваа ‘‘маяи бассанд̇з маа нассим̣суу’’д̇и ид̣̇д̇хаанубхаавзна ад̇д̇абхаавам̣ ж̇ахид̇ваа жад̇уран̇г̇инияаа сзнааяа баривуд̇о рааж̇аа худ̇ваа яуд̣̇д̇хабхзрим̣ аагодаабзнд̇о д̇ам̣ таанам̣ аг̇амааси. жаарагамануссаа д̇ам̣ д̣̇исваа жораанам̣ аарожзсум̣. жораа ‘‘ран̃н̃аа сад̣̇д̇хим̣ виг̇г̇ахо наама на яуд̇д̇о’’д̇и саб̣б̣ам̣ г̇ахид̇аг̇ахид̇ам̣ бхан̣д̣агам̣ чад̣д̣зд̇ваа бхад̇д̇ам̣ абхун̃ж̇ид̇ваава балааяим̣су. д̇аабасо д̇з саб̣б̣з аанзд̇ваа сагаг̇аамзязва бад̇идтаабзси, д̇ам̣ санд̇хааязд̇ам̣ вуд̇д̇ам̣.
Eṇikūlasminti eṇiyā nāma nadiyā kūle. Gayhaka nīyamānanti karamaragāhaṃ gahetvā nīyamānaṃ. So kira tāpaso aparasmiṃ kāle ekaṃ paccantagāmaṃ nissāya nadītīre vanasaṇḍe vihāsi. Athekasmiṃ divase pabbatato corā otaritvā taṃ gāmaṃ paharitvā mahājanaṃ gahetvā pabbataṃ āropetvā antarāmagge cārakamanusse ṭhapetvā pabbatabilaṃ pavisitvā āhāraṃ pacāpentā nisīdiṃsu. Tāpaso gomahiṃsādīnañceva dārakadārikādīnañca mahantaṃ aṭṭassaraṃ sutvā ‘‘mayi passante mā nassiṃsū’’ti iddhānubhāvena attabhāvaṃ jahitvā caturaṅginiyā senāya parivuto rājā hutvā yuddhabheriṃ ākoṭāpento taṃ ṭhānaṃ agamāsi. Cārakamanussā taṃ disvā corānaṃ ārocesuṃ. Corā ‘‘raññā saddhiṃ viggaho nāma na yutto’’ti sabbaṃ gahitagahitaṃ bhaṇḍakaṃ chaḍḍetvā bhattaṃ abhuñjitvāva palāyiṃsu. Tāpaso te sabbe ānetvā sakagāmeyeva patiṭṭhāpesi, taṃ sandhāyetaṃ vuttaṃ.
г̇ахийд̇анааванд̇и ниг̇г̇ахид̇анаавам̣. луд̣̇д̣̇знаад̇и гагкал̣зна. мануссагаббаад̇и мануссз винаасзд̇угаамад̇ааяа. б̣аласаад̇и б̣алзна. басаяхаад̇и абхибхавид̇ваа. абарасмим̣ гаалз со д̇аабасо г̇ан̇г̇аад̇ийрз вихааси. д̇ад̣̇аа мануссаа д̣̇вз д̇аяо нааваасан̇гхаадз б̣анд̇хид̇ваа сан̇гхаадамад̇т̇агз бубпаман̣д̣абам̣ гаарзд̇ваа сан̇гхаадз нисийд̣̇ид̇ваа каад̣̇анд̇аа биванд̇аа самб̣анд̇хагулам̣ г̇ажчанд̇и. д̇з бийд̇аавасзсам̣ сурам̣ бхуд̇д̇акаад̣̇ид̇аавасзсаани бхад̇д̇амажчамам̣сад̇амб̣улаад̣̇ийни г̇ан̇г̇ааяамзва баад̇знд̇и. г̇ан̇г̇зяяо нааг̇арааж̇аа ‘‘имз ужчидтагам̣ мама убари кибанд̇ий’’д̇и гуж̇жхид̇ваа ‘‘саб̣б̣з д̇з ж̇анз г̇ахзд̇ваа г̇ан̇г̇ааяа осийд̣̇аабзссаамий’’д̇и маханд̇ам̣ згад̣̇он̣иганааваббамаан̣ам̣ ад̇д̇абхаавам̣ маабзд̇ваа уд̣̇агам̣ бхинд̣̇ид̇ваа пан̣ам̣ д̇хаараяамаано д̇зсам̣ абхимуко бааяааси. д̇з нааг̇арааж̇аанам̣ д̣̇исваа маран̣абхаяад̇аж̇ж̇ид̇аа згаббахаарзнзва махаасад̣̇д̣̇ам̣ гарим̣су. д̇аабасо д̇зсам̣ барид̣̇звид̇асад̣̇д̣̇ам̣ суд̇ваа нааг̇арааж̇асса жа гуд̣̇д̇хабхаавам̣ н̃ад̇ваа ‘‘маяи бассанд̇з маа нассим̣суу’’д̇и киббанисанд̇ияаа ад̇д̇ано аанубхаавзна киббам̣ субан̣н̣аван̣н̣ам̣ ад̇д̇аанам̣ маабзд̇ваа аг̇амааси . нааг̇арааж̇аа д̇ам̣ д̣̇исваа маран̣абхаяад̇аж̇ж̇ид̇о уд̣̇агз нимуж̇ж̇и. мануссаа сод̇т̇ибхаавам̣ бад̇ваа аг̇амам̣су, д̇ам̣ санд̇хааязд̇ам̣ вуд̇д̇ам̣.
Gahītanāvanti niggahitanāvaṃ. Luddenāti kakkhaḷena. Manussakappāti manusse vināsetukāmatāya. Balasāti balena. Pasayhāti abhibhavitvā. Aparasmiṃ kāle so tāpaso gaṅgātīre vihāsi. Tadā manussā dve tayo nāvāsaṅghāṭe bandhitvā saṅghāṭamatthake pupphamaṇḍapaṃ kāretvā saṅghāṭe nisīditvā khādantā pivantā sambandhakulaṃ gacchanti. Te pītāvasesaṃ suraṃ bhuttakhāditāvasesāni bhattamacchamaṃsatambulādīni gaṅgāyameva pātenti. Gaṅgeyyo nāgarājā ‘‘ime ucchiṭṭhakaṃ mama upari khipantī’’ti kujjhitvā ‘‘sabbe te jane gahetvā gaṅgāya osīdāpessāmī’’ti mahantaṃ ekadoṇikanāvappamāṇaṃ attabhāvaṃ māpetvā udakaṃ bhinditvā phaṇaṃ dhārayamāno tesaṃ abhimukho pāyāsi. Te nāgarājānaṃ disvā maraṇabhayatajjitā ekappahāreneva mahāsaddaṃ kariṃsu. Tāpaso tesaṃ paridevitasaddaṃ sutvā nāgarājassa ca kuddhabhāvaṃ ñatvā ‘‘mayi passante mā nassiṃsū’’ti khippanisantiyā attano ānubhāvena khippaṃ supaṇṇavaṇṇaṃ attānaṃ māpetvā agamāsi . Nāgarājā taṃ disvā maraṇabhayatajjito udake nimujji. Manussā sotthibhāvaṃ patvā agamaṃsu, taṃ sandhāyetaṃ vuttaṃ.
б̣ад̣̇д̇хажарод̇и анд̇зваасиго. самб̣уд̣̇д̇химанд̇ам̣ вад̇инам̣ аман̃н̃анд̇и б̣уд̣̇д̇хисамбанно жзва вад̇асамбанно жа д̇аабасод̇и д̇ам̣ ман̃н̃амаано. иминаа гим̣ д̣̇ассзд̇и? махааб̣рахмз ахам̣ ад̇ийд̇з д̇ава гзсавад̇аабасагаалз габбо наама анд̇зваасиго взяяааважжагаро худ̇ваа д̇уяхам̣ наарад̣̇зна наама амажжзна б̣аараан̣асид̇о химаванд̇ам̣ аанийд̇асса рог̇ам̣ вуубасамзсим̣. ат̇а нам̣ наарад̣̇о д̣̇уд̇ияаваарз ааг̇анд̇ваа нирог̇ам̣ д̣̇исваа имам̣ г̇аат̇ам̣ абхааси –
Baddhacaroti antevāsiko. Sambuddhimantaṃ vatinaṃ amaññanti buddhisampanno ceva vatasampanno ca tāpasoti taṃ maññamāno. Iminā kiṃ dasseti? Mahābrahme ahaṃ atīte tava kesavatāpasakāle kappo nāma antevāsiko veyyāvaccakaro hutvā tuyhaṃ nāradena nāma amaccena bārāṇasito himavantaṃ ānītassa rogaṃ vūpasamesiṃ. Atha naṃ nārado dutiyavāre āgantvā nirogaṃ disvā imaṃ gāthaṃ abhāsi –
‘‘мануссинд̣̇ам̣ ж̇ахид̇ваана, саб̣б̣агаамасамид̣̇д̇хинам̣;
‘‘Manussindaṃ jahitvāna, sabbakāmasamiddhinaṃ;
гат̇ам̣ ну бхаг̇аваа гзси, габбасса рамад̇и ассамз’’д̇и. (ж̇аа. 1.4.181);
Kathaṃ nu bhagavā kesi, kappassa ramati assame’’ti. (jā. 1.4.181);
д̇амзнам̣ д̇вам̣ зд̇ад̣̇авожа –
Tamenaṃ tvaṃ etadavoca –
‘‘саад̣̇ууни раман̣ийяаани, санд̇и вагкаа манорамаа;
‘‘Sādūni ramaṇīyāni, santi vakkhā manoramā;
субхаасид̇аани габбасса, наарад̣̇а рамаяанд̇и ма’’нд̇и. (ж̇аа. 1.4.182);
Subhāsitāni kappassa, nārada ramayanti ma’’nti. (jā. 1.4.182);
ид̇исса бхаг̇аваа имам̣ ад̇д̇анаа анд̇зваасигзна худ̇ваа рог̇асса вуубасамид̇абхаавам̣ д̣̇ийбзнд̇о звамааха. д̇ан̃жа бана б̣рахмунаа мануссалогз гад̇агаммам̣ саб̣б̣ам̣ махааб̣рахмаанам̣ саллагкаабзнд̇ова гат̇зси.
Itissa bhagavā imaṃ attanā antevāsikena hutvā rogassa vūpasamitabhāvaṃ dīpento evamāha. Tañca pana brahmunā manussaloke katakammaṃ sabbaṃ mahābrahmānaṃ sallakkhāpentova kathesi.
со сад̇т̇у важанзна ад̇д̇анаа гад̇агаммам̣ сарид̇ваа д̇ат̇ааг̇ад̇асса т̇уд̇им̣ гаронд̇о осаанаг̇аат̇амааха –
So satthu vacanena attanā katakammaṃ saritvā tathāgatassa thutiṃ karonto osānagāthamāha –
75.
75.
‘‘ад̣̇д̇хаа баж̇аанааси мамзд̇амааяум̣, ан̃н̃амби ж̇аанааси д̇ат̇аа хи б̣уд̣̇д̇хо;
‘‘Addhā pajānāsi mametamāyuṃ, aññampi jānāsi tathā hi buddho;
д̇ат̇аа хи д̇ааяам̣ ж̇алид̇аанубхааво, обхаасаяам̣ д̇идтад̇и б̣рахмалога’’нд̇и.
Tathā hi tāyaṃ jalitānubhāvo, obhāsayaṃ tiṭṭhati brahmaloka’’nti.
д̇ад̇т̇а д̇ат̇аа хи б̣уд̣̇д̇ход̇и д̇ат̇аа хи д̇вам̣ б̣уд̣̇д̇хо. б̣уд̣̇д̇хаанан̃хи ан̃н̃аад̇ам̣ наама над̇т̇и, саб̣б̣ад̇хаммаанам̣ б̣уд̣̇д̇хад̇д̇ааязва хи д̇з б̣уд̣̇д̇хаа наамаад̇и д̣̇ассзд̇и. д̇ат̇аа хи д̇ааяанд̇и б̣уд̣̇д̇хад̇д̇ааязва жа бана д̇ава аяам̣ ж̇алид̇о сарийраббабхаанубхааво. обхаасаяам̣ д̇идтад̇ийд̇и имам̣ сагаламби б̣рахмалогам̣ обхаасзнд̇о д̇идтад̇и.
Tattha tathā hi buddhoti tathā hi tvaṃ buddho. Buddhānañhi aññātaṃ nāma natthi, sabbadhammānaṃ buddhattāyeva hi te buddhā nāmāti dasseti. Tathā hi tāyanti buddhattāyeva ca pana tava ayaṃ jalito sarīrappabhānubhāvo. Obhāsayaṃ tiṭṭhatīti imaṃ sakalampi brahmalokaṃ obhāsento tiṭṭhati.
звам̣ сад̇т̇аа ад̇д̇ано б̣уд̣̇д̇хаг̇ун̣ам̣ ж̇аанаабзнд̇о д̇хаммам̣ д̣̇зсзд̇ваа сажжаани багаасзси, сажжабарияосаанз самбад̇д̇аанам̣ д̣̇асамад̇д̇аанам̣ б̣рахмасахассаанам̣ анубаад̣̇ааяа аасавзхи жид̇д̇аани вимужжим̣су. ид̇и бхаг̇аваа б̣ахуунам̣ б̣рахмаанам̣ авассаяо худ̇ваа б̣рахмалогаа ж̇зд̇аванам̣ ааг̇анд̇ваа д̇ад̇т̇а гат̇ид̇анияаамзнзва д̇ам̣ д̇хаммад̣̇зсанам̣ бхигкуунам̣ гат̇зд̇ваа ж̇аад̇агам̣ самод̇хаанзси – ‘‘д̇ад̣̇аа гзсавад̇аабасо б̣агаб̣рахмаа ахоси, габбамаан̣аво бана ахамзва ахоси’’нд̇и.
Evaṃ satthā attano buddhaguṇaṃ jānāpento dhammaṃ desetvā saccāni pakāsesi, saccapariyosāne sampattānaṃ dasamattānaṃ brahmasahassānaṃ anupādāya āsavehi cittāni vimucciṃsu. Iti bhagavā bahūnaṃ brahmānaṃ avassayo hutvā brahmalokā jetavanaṃ āgantvā tattha kathitaniyāmeneva taṃ dhammadesanaṃ bhikkhūnaṃ kathetvā jātakaṃ samodhānesi – ‘‘tadā kesavatāpaso bakabrahmā ahosi, kappamāṇavo pana ahameva ahosi’’nti.
б̣агаж̇аад̇агаван̣н̣анаа д̣̇асамаа.
Bakajātakavaṇṇanā dasamā.
гуггуваг̇г̇о батамо.
Kukkuvaggo paṭhamo.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / ж̇аад̇агабаал̣и • Jātakapāḷi / 405. б̣агаж̇аад̇агам̣ • 405. Bakajātakaṃ
