| Library / Tipiṭaka / તિપિટક • Tipiṭaka / અઙ્ગુત્તરનિકાય (અટ્ઠકથા) • Aṅguttaranikāya (aṭṭhakathā) |
(૧૦) ૫. બાલવગ્ગવણ્ણના
(10) 5. Bālavaggavaṇṇanā
૯૯. પઞ્ચમસ્સ પઠમે અનાગતં ભારં વહતીતિ ‘‘સમ્મજ્જની પદીપો ચ, ઉદકં આસનેન ચ, છન્દપારિસુદ્ધિઉતુક્ખાનં, ભિક્ખુગણના ચ ઓવાદો, પાતિમોક્ખં થેરભારોતિ વુચ્ચતી’’તિ ઇમં દસવિધં થેરભારં નવકો હુત્વા થેરેન અનજ્ઝિટ્ઠો કરોન્તો અનાગતં ભારં વહતિ નામ. આગતં ભારં ન વહતીતિ થેરો સમાનો તમેવ દસવિધં ભારં અત્તના વા અકરોન્તો પરં વા અસમાદપેન્તો આગતં ભારં ન વહતિ નામ. દુતિયસુત્તેપિ ઇમિનાવ નયેન અત્થો વેદિતબ્બો.
99. Pañcamassa paṭhame anāgataṃ bhāraṃ vahatīti ‘‘sammajjanī padīpo ca, udakaṃ āsanena ca, chandapārisuddhiutukkhānaṃ, bhikkhugaṇanā ca ovādo, pātimokkhaṃ therabhāroti vuccatī’’ti imaṃ dasavidhaṃ therabhāraṃ navako hutvā therena anajjhiṭṭho karonto anāgataṃ bhāraṃ vahati nāma. Āgataṃ bhāraṃ na vahatīti thero samāno tameva dasavidhaṃ bhāraṃ attanā vā akaronto paraṃ vā asamādapento āgataṃ bhāraṃ na vahati nāma. Dutiyasuttepi imināva nayena attho veditabbo.
૧૦૧. તતિયે અકપ્પિયે કપ્પિયસઞ્ઞીતિ અકપ્પિયે સીહમંસાદિમ્હિ ‘‘કપ્પિયં ઇદ’’ન્તિ એવંસઞ્ઞી. કપ્પિયે અકપ્પિયસઞ્ઞીતિ કુમ્ભીલમંસબિળારમંસાદિમ્હિ કપ્પિયે ‘‘અકપ્પિયં ઇદ’’ન્તિ એવંસઞ્ઞી. ચતુત્થં વુત્તનયેનેવ વેદિતબ્બં.
101. Tatiye akappiye kappiyasaññīti akappiye sīhamaṃsādimhi ‘‘kappiyaṃ ida’’nti evaṃsaññī. Kappiye akappiyasaññīti kumbhīlamaṃsabiḷāramaṃsādimhi kappiye ‘‘akappiyaṃ ida’’nti evaṃsaññī. Catutthaṃ vuttanayeneva veditabbaṃ.
૧૦૩. પઞ્ચમે અનાપત્તિયા આપત્તિસઞ્ઞીતિ આપુચ્છિત્વા ભણ્ડકં ધોવન્તસ્સ, પત્તં પચન્તસ્સ, કેસે છિન્દન્તસ્સ, ગામં પવિસન્તસ્સાતિઆદીસુ અનાપત્તિ, તત્થ ‘‘આપત્તિ અય’’ન્તિ એવંસઞ્ઞી. આપત્તિયા અનાપત્તિસઞ્ઞીતિ તેસઞ્ઞેવ વત્થૂનં અનાપુચ્છાકરણે આપત્તિ, તત્થ ‘‘અનાપત્તી’’તિ એવંસઞ્ઞી. છટ્ઠેપિ વુત્તનયેનેવ અત્થો વેદિતબ્બો. સત્તમાદીનિ ઉત્તાનત્થાનેવ.
103. Pañcame anāpattiyā āpattisaññīti āpucchitvā bhaṇḍakaṃ dhovantassa, pattaṃ pacantassa, kese chindantassa, gāmaṃ pavisantassātiādīsu anāpatti, tattha ‘‘āpatti aya’’nti evaṃsaññī. Āpattiyā anāpattisaññīti tesaññeva vatthūnaṃ anāpucchākaraṇe āpatti, tattha ‘‘anāpattī’’ti evaṃsaññī. Chaṭṭhepi vuttanayeneva attho veditabbo. Sattamādīni uttānatthāneva.
૧૦૯. એકાદસમે આસવાતિ કિલેસા. ન કુક્કુચ્ચાયિતબ્બન્તિ સઙ્ઘભોગસ્સ અપટ્ઠપનં અવિચારણં ન કુક્કુચ્ચાયિતબ્બં નામ, તં કુક્કુચ્ચાયતિ. કુક્કુચ્ચાયિતબ્બન્તિ તસ્સેવ પટ્ઠપનં વિચારણં, તં ન કુક્કુચ્ચાયતિ. દ્વાદસમાદીનિ હેટ્ઠા વુત્તનયેનેવ વેદિતબ્બાનીતિ.
109. Ekādasame āsavāti kilesā. Na kukkuccāyitabbanti saṅghabhogassa apaṭṭhapanaṃ avicāraṇaṃ na kukkuccāyitabbaṃ nāma, taṃ kukkuccāyati. Kukkuccāyitabbanti tasseva paṭṭhapanaṃ vicāraṇaṃ, taṃ na kukkuccāyati. Dvādasamādīni heṭṭhā vuttanayeneva veditabbānīti.
બાલવગ્ગો પઞ્ચમો.
Bālavaggo pañcamo.
દુતિયપણ્ણાસકં નિટ્ઠિતં.
Dutiyapaṇṇāsakaṃ niṭṭhitaṃ.
Related texts:
તિપિટક (મૂલ) • Tipiṭaka (Mūla) / સુત્તપિટક • Suttapiṭaka / અઙ્ગુત્તરનિકાય • Aṅguttaranikāya / (૧૦) ૫. બાલવગ્ગો • (10) 5. Bālavaggo
ટીકા • Tīkā / સુત્તપિટક (ટીકા) • Suttapiṭaka (ṭīkā) / અઙ્ગુત્તરનિકાય (ટીકા) • Aṅguttaranikāya (ṭīkā) / (૧૦) ૫. બાલવગ્ગવણ્ણના • (10) 5. Bālavaggavaṇṇanā
