| Library / Tipiṭaka / တိပိဋက • Tipiṭaka / ပဋိသမ္ဘိဒာမဂ္ဂပာဠိ • Paṭisambhidāmaggapāḷi |
၂. ဗလဝာရော
2. Balavāro
၂၄. သဗ္ဗေ သတ္တာ အဝေရိနော ဟောန္တု, ခေမိနော ဟောန္တု, သုခိနော ဟောန္တူတိ – အသ္သဒ္ဓိယေ န ကမ္ပတိ။ သဒ္ဓာဗလပရိဘာဝိတာ ဟောတိ မေတ္တာစေတောဝိမုတ္တိ။
24. Sabbe sattā averino hontu, khemino hontu, sukhino hontūti – assaddhiye na kampati. Saddhābalaparibhāvitā hoti mettācetovimutti.
သဗ္ဗေ သတ္တာ အဝေရိနော ဟောန္တု, ခေမိနော ဟောန္တု, သုခိနော ဟောန္တူတိ – ကောသဇ္ဇေ န ကမ္ပတိ။ ဝီရိယဗလပရိဘာဝိတာ ဟောတိ မေတ္တာစေတောဝိမုတ္တိ။
Sabbe sattā averino hontu, khemino hontu, sukhino hontūti – kosajje na kampati. Vīriyabalaparibhāvitā hoti mettācetovimutti.
သဗ္ဗေ သတ္တာ အဝေရိနော ဟောန္တု, ခေမိနော ဟောန္တု, သုခိနော ဟောန္တူတိ – ပမာဒေ န ကမ္ပတိ။ သတိဗလပရိဘာဝိတာ ဟောတိ မေတ္တာစေတောဝိမုတ္တိ။
Sabbe sattā averino hontu, khemino hontu, sukhino hontūti – pamāde na kampati. Satibalaparibhāvitā hoti mettācetovimutti.
သဗ္ဗေ သတ္တာ အဝေရိနော ဟောန္တု, ခေမိနော ဟောန္တု, သုခိနော ဟောန္တူတိ – ဥဒ္ဓစ္စေ န ကမ္ပတိ။ သမာဓိဗလပရိဘာဝိတာ ဟောတိ မေတ္တာစေတောဝိမုတ္တိ။
Sabbe sattā averino hontu, khemino hontu, sukhino hontūti – uddhacce na kampati. Samādhibalaparibhāvitā hoti mettācetovimutti.
သဗ္ဗေ သတ္တာ အဝေရိနော ဟောန္တု, ခေမိနော ဟောန္တု, သုခိနော ဟောန္တူတိ – အဝိဇ္ဇာယ န ကမ္ပတိ။ ပညာဗလပရိဘာဝိတာ ဟောတိ မေတ္တာစေတောဝိမုတ္တိ။
Sabbe sattā averino hontu, khemino hontu, sukhino hontūti – avijjāya na kampati. Paññābalaparibhāvitā hoti mettācetovimutti.
ဣမာနိ ပဉ္စ ဗလာနိ မေတ္တာယ စေတောဝိမုတ္တိယာ အာသေဝနာ ဟောန္တိ။ ဣမေဟိ ပဉ္စဟိ ဗလေဟိ မေတ္တာစေတောဝိမုတ္တိ အာသေဝီယတိ။ ဣမာနိ ပဉ္စ ဗလာနိ မေတ္တာယ စေတောဝိမုတ္တိယာ ဘာဝနာ ဟောန္တိ။ ဣမေဟိ ပဉ္စဟိ ဗလေဟိ မေတ္တာစေတောဝိမုတ္တိ ဘာဝီယတိ။ ဣမာနိ ပဉ္စ ဗလာနိ မေတ္တာယ စေတောဝိမုတ္တိယာ ဗဟုလီကတာ ဟောန္တိ။ ဣမေဟိ ပဉ္စဟိ ဗလေဟိ မေတ္တာစေတောဝိမုတ္တိ ဗဟုလီကရီယတိ။ ဣမာနိ ပဉ္စ ဗလာနိ မေတ္တာယ စေတောဝိမုတ္တိယာ အလင္ကာရာ ဟောန္တိ။ ဣမေဟိ ပဉ္စဟိ ဗလေဟိ မေတ္တာစေတောဝိမုတ္တိ သ္ဝာလင္ကတာ ဟောတိ။ ဣမာနိ ပဉ္စ ဗလာနိ မေတ္တာယ စေတောဝိမုတ္တိယာ ပရိက္ခာရာ ဟောန္တိ။ ဣမေဟိ ပဉ္စဟိ ဗလေဟိ မေတ္တာစေတောဝိမုတ္တိ သုပရိက္ခတာ ဟောတိ။ ဣမာနိ ပဉ္စ ဗလာနိ မေတ္တာယ စေတောဝိမုတ္တိယာ ပရိဝာရာ ဟောန္တိ။ ဣမေဟိ ပဉ္စဟိ ဗလေဟိ မေတ္တာစေတောဝိမုတ္တိ သုပရိဝုတာ ဟောတိ။ ဣမာနိ ပဉ္စ ဗလာနိ မေတ္တာယ စေတောဝိမုတ္တိယာ အာသေဝနာ ဟောန္တိ, ဘာဝနာ ဟောန္တိ, ဗဟုလီကတာ ဟောန္တိ, အလင္ကာရာ ဟောန္တိ, ပရိက္ခာရာ ဟောန္တိ, ပရိဝာရာ ဟောန္တိ, ပာရိပူရီ ဟောန္တိ, သဟဂတာ ဟောန္တိ, သဟဇာတာ ဟောန္တိ, သံသဋ္ဌာ ဟောန္တိ, သမ္ပယုတ္တာ ဟောန္တိ, ပက္ခန္ဒနာ ဟောန္တိ, ပသီဒနာ ဟောန္တိ, သန္တိဋ္ဌနာ ဟောန္တိ, ဝိမုစ္စနာ ဟောန္တိ, ‘‘ဧတံ သန္တ’’န္တိ ဖသ္သနာ ဟောန္တိ, ယာနီကတာ ဟောန္တိ, ဝတ္ထုကတာ ဟောန္တိ, အနုဋ္ဌိတာ ဟောန္တိ, ပရိစိတာ ဟောန္တိ, သုသမာရဒ္ဓာ ဟောန္တိ, သုဘာဝိတာ ဟောန္တိ, သ္ဝာဓိဋ္ဌိတာ ဟောန္တိ, သုသမုဂ္ဂတာ ဟောန္တိ, သုဝိမုတ္တာ ဟောန္တိ နိဗ္ဗတ္တေန္တိ ဇောတေန္တိ ပတာပေန္တိ။
Imāni pañca balāni mettāya cetovimuttiyā āsevanā honti. Imehi pañcahi balehi mettācetovimutti āsevīyati. Imāni pañca balāni mettāya cetovimuttiyā bhāvanā honti. Imehi pañcahi balehi mettācetovimutti bhāvīyati. Imāni pañca balāni mettāya cetovimuttiyā bahulīkatā honti. Imehi pañcahi balehi mettācetovimutti bahulīkarīyati. Imāni pañca balāni mettāya cetovimuttiyā alaṅkārā honti. Imehi pañcahi balehi mettācetovimutti svālaṅkatā hoti. Imāni pañca balāni mettāya cetovimuttiyā parikkhārā honti. Imehi pañcahi balehi mettācetovimutti suparikkhatā hoti. Imāni pañca balāni mettāya cetovimuttiyā parivārā honti. Imehi pañcahi balehi mettācetovimutti suparivutā hoti. Imāni pañca balāni mettāya cetovimuttiyā āsevanā honti, bhāvanā honti, bahulīkatā honti, alaṅkārā honti, parikkhārā honti, parivārā honti, pāripūrī honti, sahagatā honti, sahajātā honti, saṃsaṭṭhā honti, sampayuttā honti, pakkhandanā honti, pasīdanā honti, santiṭṭhanā honti, vimuccanā honti, ‘‘etaṃ santa’’nti phassanā honti, yānīkatā honti, vatthukatā honti, anuṭṭhitā honti, paricitā honti, susamāraddhā honti, subhāvitā honti, svādhiṭṭhitā honti, susamuggatā honti, suvimuttā honti nibbattenti jotenti patāpenti.
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / ခုဒ္ဒကနိကာယ (အဋ္ဌကထာ) • Khuddakanikāya (aṭṭhakathā) / ပဋိသမ္ဘိဒာမဂ္ဂ-အဋ္ဌကထာ • Paṭisambhidāmagga-aṭṭhakathā / ၂-၄. ဗလာဒိဝာရတ္တယဝဏ္ဏနာ • 2-4. Balādivārattayavaṇṇanā
