| Library / Tipiṭaka / တိပိဋက • Tipiṭaka / သံယုတ္တနိကာယ • Saṃyuttanikāya |
၅. ဗန္ဓနသုတ္တံ
5. Bandhanasuttaṃ
၁၁၇. သာဝတ္ထိနိဒာနံ ။ ‘‘ဣဓ ဘိက္ခဝေ အသ္သုတဝာ ပုထုဇ္ဇနော အရိယာနံ အဒသ္သာဝီ။ပေ.။ သပ္ပုရိသဓမ္မေ အဝိနီတော ရူပံ အတ္တတော သမနုပသ္သတိ, ရူပဝန္တံ ဝာ အတ္တာနံ; အတ္တနိ ဝာ ရူပံ, ရူပသ္မိံ ဝာ အတ္တာနံ။ အယံ ဝုစ္စတိ, ဘိက္ခဝေ, အသ္သုတဝာ ပုထုဇ္ဇနော ရူပဗန္ဓနဗဒ္ဓော သန္တရဗာဟိရဗန္ဓနဗဒ္ဓော အတီရဒသ္သီ အပာရဒသ္သီ, ဗဒ္ဓော ဇီယတိ 1 ဗဒ္ဓော မီယတိ ဗဒ္ဓော အသ္မာ လောကာ ပရံ လောကံ ဂစ္ဆတိ။ ဝေဒနံ အတ္တတော သမနုပသ္သတိ။ပေ.။ ဝေဒနာယ ဝာ အတ္တာနံ။ အယံ ဝုစ္စတိ, ဘိက္ခဝေ, အသ္သုတဝာ ပုထုဇ္ဇနော ဝေဒနာဗန္ဓနဗဒ္ဓော သန္တရဗာဟိရဗန္ဓနဗဒ္ဓော အတီရဒသ္သီ အပာရဒသ္သီ, ဗဒ္ဓော ဇီယတိ ဗဒ္ဓော မီယတိ ဗဒ္ဓော အသ္မာ လောကာ ပရံ လောကံ ဂစ္ဆတိ။ သညံ။ သင္ခာရေ။ ဝိညာဏံ အတ္တတော သမနုပသ္သတိ။ပေ.။ အယံ ဝုစ္စတိ, ဘိက္ခဝေ, အသ္သုတဝာ ပုထုဇ္ဇနော ဝိညာဏဗန္ဓနဗဒ္ဓော သန္တရဗာဟိရဗန္ဓနဗဒ္ဓော အတီရဒသ္သီ အပာရဒသ္သီ, ဗဒ္ဓော ဇီယတိ ဗဒ္ဓော မီယတိ ဗဒ္ဓော အသ္မာ လောကာ ပရံ လောကံ ဂစ္ဆတိ’’။
117. Sāvatthinidānaṃ . ‘‘Idha bhikkhave assutavā puthujjano ariyānaṃ adassāvī…pe… sappurisadhamme avinīto rūpaṃ attato samanupassati, rūpavantaṃ vā attānaṃ; attani vā rūpaṃ, rūpasmiṃ vā attānaṃ. Ayaṃ vuccati, bhikkhave, assutavā puthujjano rūpabandhanabaddho santarabāhirabandhanabaddho atīradassī apāradassī, baddho jīyati 2 baddho mīyati baddho asmā lokā paraṃ lokaṃ gacchati. Vedanaṃ attato samanupassati…pe… vedanāya vā attānaṃ. Ayaṃ vuccati, bhikkhave, assutavā puthujjano vedanābandhanabaddho santarabāhirabandhanabaddho atīradassī apāradassī, baddho jīyati baddho mīyati baddho asmā lokā paraṃ lokaṃ gacchati. Saññaṃ… saṅkhāre… viññāṇaṃ attato samanupassati…pe… ayaṃ vuccati, bhikkhave, assutavā puthujjano viññāṇabandhanabaddho santarabāhirabandhanabaddho atīradassī apāradassī, baddho jīyati baddho mīyati baddho asmā lokā paraṃ lokaṃ gacchati’’.
‘‘သုတဝာ စ ခော, ဘိက္ခဝေ, အရိယသာဝကော အရိယာနံ ဒသ္သာဝီ။ပေ.။ သပ္ပုရိသဓမ္မေ သုဝိနီတော န ရူပံ အတ္တတော သမနုပသ္သတိ, န ရူပဝန္တံ ဝာ အတ္တာနံ; န အတ္တနိ ဝာ ရူပံ, န ရူပသ္မိံ ဝာ အတ္တာနံ။ အယံ ဝုစ္စတိ, ဘိက္ခဝေ, သုတဝာ အရိယသာဝကော န ရူပဗန္ဓနဗဒ္ဓော, န သန္တရဗာဟိရဗန္ဓနဗဒ္ဓော, တီရဒသ္သီ, ပာရဒသ္သီ; ‘ပရိမုတ္တော သော ဒုက္ခသ္မာ’တိ ဝဒာမိ။ န ဝေဒနံ အတ္တတော။ပေ.။ န သညံ အတ္တတော။ပေ.။ န သင္ခာရေ အတ္တတော။ပေ.။ န ဝိညာဏံ အတ္တတော သမနုပသ္သတိ။ပေ.။ အယံ ဝုစ္စတိ, ဘိက္ခဝေ, သုတဝာ အရိယသာဝကော န ဝိညာဏဗန္ဓနဗဒ္ဓော, န သန္တရဗာဟိရဗန္ဓနဗဒ္ဓော, တီရဒသ္သီ, ပာရဒသ္သီ, ‘ပရိမုတ္တော သော ဒုက္ခသ္မာ’တိ ဝဒာမီ’’တိ။ ပဉ္စမံ။
‘‘Sutavā ca kho, bhikkhave, ariyasāvako ariyānaṃ dassāvī…pe… sappurisadhamme suvinīto na rūpaṃ attato samanupassati, na rūpavantaṃ vā attānaṃ; na attani vā rūpaṃ, na rūpasmiṃ vā attānaṃ. Ayaṃ vuccati, bhikkhave, sutavā ariyasāvako na rūpabandhanabaddho, na santarabāhirabandhanabaddho, tīradassī, pāradassī; ‘parimutto so dukkhasmā’ti vadāmi. Na vedanaṃ attato…pe… na saññaṃ attato…pe… na saṅkhāre attato…pe… na viññāṇaṃ attato samanupassati…pe… ayaṃ vuccati, bhikkhave, sutavā ariyasāvako na viññāṇabandhanabaddho, na santarabāhirabandhanabaddho, tīradassī, pāradassī, ‘parimutto so dukkhasmā’ti vadāmī’’ti. Pañcamaṃ.
Footnotes:
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၅-၉. ဗန္ဓနသုတ္တာဒိဝဏ္ဏနာ • 5-9. Bandhanasuttādivaṇṇanā
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၅-၉. ဗန္ဓနသုတ္တာဒိဝဏ္ဏနာ • 5-9. Bandhanasuttādivaṇṇanā
