| Library / Tipiṭaka / ತಿಪಿಟಕ • Tipiṭaka / ಅಪದಾನ-ಅಟ್ಠಕಥಾ • Apadāna-aṭṭhakathā |
೧೬. ಬನ್ಧುಜೀವಕವಗ್ಗೋ
16. Bandhujīvakavaggo
೧. ಬನ್ಧುಜೀವಕತ್ಥೇರಅಪದಾನವಣ್ಣನಾ
1. Bandhujīvakattheraapadānavaṇṇanā
ಚನ್ದಂವ ವಿಮಲಂ ಸುದ್ಧನ್ತಿಆದಿಕಂ ಆಯಸ್ಮತೋ ಬನ್ಧುಜೀವಕತ್ಥೇರಸ್ಸ ಅಪದಾನಂ। ಅಯಮ್ಪಾಯಸ್ಮಾ ಪುರಿಮಬುದ್ಧೇಸು ಕತಾಧಿಕಾರೋ ತತ್ಥ ತತ್ಥ ಭವೇ ವಿವಟ್ಟೂಪನಿಸ್ಸಯಾನಿ ಪುಞ್ಞಾನಿ ಉಪಚಿನನ್ತೋ ಸಿಖಿಸ್ಸ ಭಗವತೋ ಕಾಲೇ ಕುಲಗೇಹೇ ನಿಬ್ಬತ್ತೋ ವಿಞ್ಞುತಂ ಪತ್ತೋ ಘರಾವಾಸಂ ಸಣ್ಠಪೇತ್ವಾ ವಸನ್ತೋ ಸಿಖಿಸ್ಸ ಭಗವತೋ ರೂಪಕಾಯಸಮ್ಪತ್ತಿಂ ದಿಸ್ವಾ ಪಸನ್ನಮಾನಸೋ ಬನ್ಧುಜೀವಕಪುಪ್ಫಾನಿ ಗಹೇತ್ವಾ ಭಗವತೋ ಪಾದಮೂಲೇ ಪೂಜೇಸಿ। ಭಗವಾ ತಸ್ಸ ಚಿತ್ತಪ್ಪಸಾದವಡ್ಢನತ್ಥಾಯ ಅನುಮೋದನಮಕಾಸಿ। ಸೋ ಯಾವತಾಯುತಂ ಠತ್ವಾ ತೇನೇವ ಪುಞ್ಞೇನ ದೇವಲೋಕೇ ನಿಬ್ಬತ್ತೋ ಛ ಕಾಮಾವಚರಸಮ್ಪತ್ತಿಯೋ ಅನುಭವಿತ್ವಾ ಮನುಸ್ಸೇಸು ಚ ಚಕ್ಕವತ್ತಿಆದಿಸಮ್ಪತ್ತಿಯೋ ಅನುಭವಿತ್ವಾ ಇಮಸ್ಸ ಅಮ್ಹಾಕಂ ಸಮ್ಮಾಸಮ್ಬುದ್ಧಸ್ಸ ಉಪ್ಪನ್ನಕಾಲೇ ಗಹಪತಿಕುಲೇ ನಿಬ್ಬತ್ತೋ ರೂಪಗ್ಗಯಸಗ್ಗಪ್ಪತ್ತೋ ಸತ್ಥು ಧಮ್ಮದೇಸನಂ ಸುತ್ವಾ ಸದ್ಧಾಜಾತೋ ಗೇಹಂ ಪಹಾಯ ಪಬ್ಬಜಿತೋ ಅರಹತ್ತಂ ಪಾಪುಣಿ।
Candaṃvavimalaṃ suddhantiādikaṃ āyasmato bandhujīvakattherassa apadānaṃ. Ayampāyasmā purimabuddhesu katādhikāro tattha tattha bhave vivaṭṭūpanissayāni puññāni upacinanto sikhissa bhagavato kāle kulagehe nibbatto viññutaṃ patto gharāvāsaṃ saṇṭhapetvā vasanto sikhissa bhagavato rūpakāyasampattiṃ disvā pasannamānaso bandhujīvakapupphāni gahetvā bhagavato pādamūle pūjesi. Bhagavā tassa cittappasādavaḍḍhanatthāya anumodanamakāsi. So yāvatāyutaṃ ṭhatvā teneva puññena devaloke nibbatto cha kāmāvacarasampattiyo anubhavitvā manussesu ca cakkavattiādisampattiyo anubhavitvā imassa amhākaṃ sammāsambuddhassa uppannakāle gahapatikule nibbatto rūpaggayasaggappatto satthu dhammadesanaṃ sutvā saddhājāto gehaṃ pahāya pabbajito arahattaṃ pāpuṇi.
೧. ಸೋ ಪುಬ್ಬೇನಿವಾಸಞಾಣೇನ ಪುಬ್ಬೇ ಕತಕುಸಲಕಮ್ಮಂ ಅನುಸ್ಸರಿತ್ವಾ ಸೋಮನಸ್ಸಜಾತೋ ಪುಬ್ಬಚರಿತಾಪದಾನಂ ಪಕಾಸೇನ್ತೋ ಚನ್ದಂವ ವಿಮಲಂ ಸುದ್ಧನ್ತಿಆದಿಮಾಹ। ತತ್ಥ ಚನ್ದಂವ ವಿಮಲಂ ಸುದ್ಧನ್ತಿ ಅಬ್ಭಾ, ಮಹಿಕಾ, ಧುಮೋ, ರಜೋ, ರಾಹೂತಿ ಇಮೇಹಿ ಉಪಕ್ಕಿಲೇಸಮಲೇಹಿ ವಿಮುತ್ತಂ ಚನ್ದಂ ಇವ ದಿಯಡ್ಢಸಹಸ್ಸುಪಕ್ಕಿಲೇಸಮಲಾನಂ ಪಹೀನತ್ತಾ ವಿಮಲಂ ನಿಕ್ಕಿಲೇಸತ್ತಾ ಸುದ್ಧಂ ಪಸನ್ನಂ ಸಿಖಿಂ ಸಮ್ಬುದ್ಧನ್ತಿ ಸಮ್ಬನ್ಧೋ। ಕಿಲೇಸಕದ್ದಮಾನಂ ಅಭಾವೇನ ಅನಾವಿಲಂ। ನನ್ದೀಭವಸಙ್ಖಾತಾಯ ಬಲವಸ್ನೇಹಾಯ ಪರಿಸಮನ್ತತೋ ಖೀಣತ್ತಾ ನನ್ದೀಭವಪರಿಕ್ಖೀಣಂ। ತಿಣ್ಣಂ ಲೋಕೇತಿ ಲೋಕತ್ತಯತೋ ತಿಣ್ಣಂ ಉತ್ತಿಣ್ಣಂ ಅತಿಕ್ಕನ್ತಂ। ವಿಸತ್ತಿಕನ್ತಿ ವಿಸತ್ತಿಕಂ ವುಚ್ಚತಿ ತಣ್ಹಾ, ನಿತ್ತಣ್ಹನ್ತಿ ಅತ್ಥೋ।
1. So pubbenivāsañāṇena pubbe katakusalakammaṃ anussaritvā somanassajāto pubbacaritāpadānaṃ pakāsento candaṃva vimalaṃ suddhantiādimāha. Tattha candaṃva vimalaṃ suddhanti abbhā, mahikā, dhumo, rajo, rāhūti imehi upakkilesamalehi vimuttaṃ candaṃ iva diyaḍḍhasahassupakkilesamalānaṃ pahīnattā vimalaṃ nikkilesattā suddhaṃ pasannaṃ sikhiṃ sambuddhanti sambandho. Kilesakaddamānaṃ abhāvena anāvilaṃ. Nandībhavasaṅkhātāya balavasnehāya parisamantato khīṇattā nandībhavaparikkhīṇaṃ. Tiṇṇaṃ loketi lokattayato tiṇṇaṃ uttiṇṇaṃ atikkantaṃ. Visattikanti visattikaṃ vuccati taṇhā, nittaṇhanti attho.
೨. ನಿಬ್ಬಾಪಯನ್ತಂ ಜನತನ್ತಿ ಧಮ್ಮವಸ್ಸಂ ವಸ್ಸನ್ತೋ ಜನತಂ ಜನಸಮೂಹಂ ಕಿಲೇಸಪರಿಳಾಹಾಭಾವೇನ ನಿಬ್ಬಾಪಯನ್ತಂ ವೂಪಸಮೇನ್ತಂ। ಸಯಂ ಸಂಸಾರತೋ ತಿಣ್ಣಂ, ಸಬ್ಬಸತ್ತೇ ಸಂಸಾರತೋ ತಾರಯನ್ತಂ ಅತಿಕ್ಕಮೇನ್ತಂ ಚತುನ್ನಂ ಸಚ್ಚಾನಂ ಮುನನತೋ ಜಾನನತೋ ಮುನಿಂ ಸಿಖಿಂ ಸಮ್ಬುದ್ಧನ್ತಿ ಸಮ್ಬನ್ಧೋ। ವನಸ್ಮಿಂ ಝಾಯಮಾನನ್ತಿ ಆರಮ್ಮಣೂಪನಿಜ್ಝಾನಲಕ್ಖಣೂಪನಿಜ್ಝಾನೇಹಿ ಝಾಯನ್ತಂ ಚಿನ್ತೇನ್ತಂ ಚಿತ್ತೇನ ಭಾವೇನ್ತಂ ವನಮಜ್ಝೇತಿ ಅತ್ಥೋ। ಏಕಗ್ಗಂ ಏಕಗ್ಗಚಿತ್ತಂ ಸುಸಮಾಹಿತಂ ಸುಟ್ಠು ಆರಮ್ಮಣೇ ಆಹಿತಂ ಠಪಿತಚಿತ್ತಂ ಸಿಖಿಂ ಮುನಿಂ ದಿಸ್ವಾತಿ ಸಮ್ಬನ್ಧೋ।
2.Nibbāpayantaṃ janatanti dhammavassaṃ vassanto janataṃ janasamūhaṃ kilesapariḷāhābhāvena nibbāpayantaṃ vūpasamentaṃ. Sayaṃ saṃsārato tiṇṇaṃ, sabbasatte saṃsārato tārayantaṃ atikkamentaṃ catunnaṃ saccānaṃ munanato jānanato muniṃ sikhiṃ sambuddhanti sambandho. Vanasmiṃ jhāyamānanti ārammaṇūpanijjhānalakkhaṇūpanijjhānehi jhāyantaṃ cintentaṃ cittena bhāventaṃ vanamajjheti attho. Ekaggaṃ ekaggacittaṃ susamāhitaṃ suṭṭhu ārammaṇe āhitaṃ ṭhapitacittaṃ sikhiṃ muniṃ disvāti sambandho.
೩. ಬನ್ಧುಜೀವಕಪುಪ್ಫಾನೀತಿ ಬನ್ಧೂನಂ ಞಾತೀನಂ ಜೀವಕಂ ಜೀವಿತನಿಸ್ಸಯಂ ಹದಯಮಂಸಲೋಹಿತಂ ಬನ್ಧುಜೀವಕಂ ಹದಯಮಂಸಲೋಹಿತಸಮಾನವಣ್ಣಂ ಪುಪ್ಫಂ ಬನ್ಧುಜೀವಕಪುಪ್ಫಂ ಗಹೇತ್ವಾ ಸಿಖಿನೋ ಲೋಕಬನ್ಧುನೋ ಪೂಜೇಸಿನ್ತಿ ಅತ್ಥೋ। ಸೇಸಂ ಉತ್ತಾನತ್ಥಮೇವಾತಿ।
3.Bandhujīvakapupphānīti bandhūnaṃ ñātīnaṃ jīvakaṃ jīvitanissayaṃ hadayamaṃsalohitaṃ bandhujīvakaṃ hadayamaṃsalohitasamānavaṇṇaṃ pupphaṃ bandhujīvakapupphaṃ gahetvā sikhino lokabandhuno pūjesinti attho. Sesaṃ uttānatthamevāti.
ಬನ್ಧುಜೀವಕತ್ಥೇರಅಪದಾನವಣ್ಣನಾ ಸಮತ್ತಾ।
Bandhujīvakattheraapadānavaṇṇanā samattā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಖುದ್ದಕನಿಕಾಯ • Khuddakanikāya / ಅಪದಾನಪಾಳಿ • Apadānapāḷi / ೧. ಬನ್ಧುಜೀವಕತ್ಥೇರಅಪದಾನಂ • 1. Bandhujīvakattheraapadānaṃ
