| Library / Tipiṭaka / திபிடக • Tipiṭaka / தே²ரகா³தா²-அட்ட²கதா² • Theragāthā-aṭṭhakathā |
6. பே³லட்ட²ஸீஸத்தே²ரகா³தா²வண்ணனா
6. Belaṭṭhasīsattheragāthāvaṇṇanā
யதா²பி ப⁴த்³தோ³ ஆஜஞ்ஞோதி ஆயஸ்மதோ பே³லட்ட²ஸீஸத்தே²ரஸ்ஸ கா³தா². கா உப்பத்தி? ஸோ கிர பது³முத்தரஸ்ஸ ப⁴க³வதோ காலே குலகே³ஹே நிப்³ப³த்தோ ப⁴க³வந்தங் உபஸங்கமித்வா த⁴ம்மங் ஸுத்வா படிலத்³த⁴ஸத்³தோ⁴ பப்³ப³ஜித்வா ஸமணத⁴ம்மங் கரொந்தோ உபனிஸ்ஸயஸம்பத்தியா அபா⁴வேன விஸேஸங் நிப்³ப³த்தேதுங் நாஸக்கி². விவட்டூபனிஸ்ஸயங் பன ப³ஹுங் குஸலங் உபசினித்வா தே³வமனுஸ்ஸேஸு ஸங்ஸரந்தோ இதோ ஏகதிங்ஸே கப்பே வெஸ்ஸபு⁴ங் ப⁴க³வந்தங் பஸ்ஸித்வா பஸன்னசித்தோ மாதுலுங்க³ப²லங் அதா³ஸி. ஸோ தேன புஞ்ஞகம்மேன தே³வேஸு நிப்³ப³த்தித்வா அபராபரங் புஞ்ஞானி கத்வா ஸுக³திதோ ஸுக³திங் உபக³ச்ச²ந்தோ இமஸ்மிங் பு³த்³து⁴ப்பாதே³ ஸாவத்தி²யங் ப்³ராஹ்மணகுலே நிப்³ப³த்தோ ப⁴க³வதோ அபி⁴ஸம்போ³தி⁴யா புரேதரமேவ உருவேலகஸ்ஸபஸ்ஸ ஸந்திகே தாபஸபப்³ப³ஜ்ஜங் பப்³ப³ஜித்வா அக்³கி³ங் பரிசரந்தோ உருவேலகஸ்ஸபத³மனே ஆதி³த்தபரியாயதே³ஸனாய (மஹாவ॰ 54; ஸங்॰ நி॰ 4.28) புராணஜடிலஸஹஸ்ஸேன ஸத்³தி⁴ங் அரஹத்தங் பாபுணி. தேன வுத்தங் அபதா³னே (அப॰ தே²ர 2.51.68-73) –
Yathāpibhaddo ājaññoti āyasmato belaṭṭhasīsattherassa gāthā. Kā uppatti? So kira padumuttarassa bhagavato kāle kulagehe nibbatto bhagavantaṃ upasaṅkamitvā dhammaṃ sutvā paṭiladdhasaddho pabbajitvā samaṇadhammaṃ karonto upanissayasampattiyā abhāvena visesaṃ nibbattetuṃ nāsakkhi. Vivaṭṭūpanissayaṃ pana bahuṃ kusalaṃ upacinitvā devamanussesu saṃsaranto ito ekatiṃse kappe vessabhuṃ bhagavantaṃ passitvā pasannacitto mātuluṅgaphalaṃ adāsi. So tena puññakammena devesu nibbattitvā aparāparaṃ puññāni katvā sugatito sugatiṃ upagacchanto imasmiṃ buddhuppāde sāvatthiyaṃ brāhmaṇakule nibbatto bhagavato abhisambodhiyā puretarameva uruvelakassapassa santike tāpasapabbajjaṃ pabbajitvā aggiṃ paricaranto uruvelakassapadamane ādittapariyāyadesanāya (mahāva. 54; saṃ. ni. 4.28) purāṇajaṭilasahassena saddhiṃ arahattaṃ pāpuṇi. Tena vuttaṃ apadāne (apa. thera 2.51.68-73) –
‘‘கணிகாரங்வ ஜோதந்தங், புண்ணமாயேவ சந்தி³மங்;
‘‘Kaṇikāraṃva jotantaṃ, puṇṇamāyeva candimaṃ;
ஜலந்தங் தீ³பருக்க²ங்வ, அத்³த³ஸங் லோகனாயகங்.
Jalantaṃ dīparukkhaṃva, addasaṃ lokanāyakaṃ.
‘‘மாதுலுங்க³ப²லங் க³ய்ஹ, அதா³ஸிங் ஸத்து²னோ அஹங்;
‘‘Mātuluṅgaphalaṃ gayha, adāsiṃ satthuno ahaṃ;
த³க்கி²ணெய்யஸ்ஸ வீரஸ்ஸ, பஸன்னோ ஸேஹி பாணிபி⁴.
Dakkhiṇeyyassa vīrassa, pasanno sehi pāṇibhi.
‘‘ஏகதிங்ஸே இதோ கப்பே, யங் ப²லங் அத³தி³ங் ததா³;
‘‘Ekatiṃse ito kappe, yaṃ phalaṃ adadiṃ tadā;
து³க்³க³திங் நாபி⁴ஜானாமி, ப²லதா³னஸ்ஸித³ங் ப²லங்.
Duggatiṃ nābhijānāmi, phaladānassidaṃ phalaṃ.
‘‘கிலேஸா ஜா²பிதா மய்ஹங்…பே॰… கதங் பு³த்³த⁴ஸ்ஸ ஸாஸன’’ந்தி.
‘‘Kilesā jhāpitā mayhaṃ…pe… kataṃ buddhassa sāsana’’nti.
ஏவங் அதி⁴க³தாரஹத்தோ ஆயஸ்மதோ த⁴ம்மப⁴ண்டா³கா³ரிகஸ்ஸ உபஜ்ஜா²யோ அயங் தே²ரோ ஏகதி³வஸங் ப²லஸமாபத்திதோ உட்டா²ய தங் ஸந்தங் பணீதங் நிராமிஸங் ஸுக²ங் அத்தனோ புப்³ப³யோக³ஞ்ச பச்சவெக்கி²த்வா பீதிவேக³வஸேன ‘‘யதா²பி ப⁴த்³தோ³ ஆஜஞ்ஞோ’’தி கா³த²ங் அபா⁴ஸி.
Evaṃ adhigatārahatto āyasmato dhammabhaṇḍāgārikassa upajjhāyo ayaṃ thero ekadivasaṃ phalasamāpattito uṭṭhāya taṃ santaṃ paṇītaṃ nirāmisaṃ sukhaṃ attano pubbayogañca paccavekkhitvā pītivegavasena ‘‘yathāpi bhaddo ājañño’’ti gāthaṃ abhāsi.
16. தத்த² யதா²பீதி ஓபம்மபடிபாத³னத்தே² நிபாதோ. ப⁴த்³தோ³தி ஸுந்த³ரோ தா²மப³லஸமத்த²ஜவபரக்கமாதி³ஸம்பன்னோ. ஆஜஞ்ஞோதி ஆஜானீயோ ஜாதிமா காரணாகாரணானங் ஆஜானநகோ. ஸோ திவிதோ⁴ உஸபா⁴ஜஞ்ஞோ அஸ்ஸாஜஞ்ஞோ ஹத்தா²ஜஞ்ஞோதி. தேஸு உஸபா⁴ஜஞ்ஞோ இதா⁴தி⁴ப்பேதோ. ஸோ ச கோ² சே²ககஸனகிச்சே நியுத்தோ, தேனாஹ ‘‘நங்க³லாவத்தனீ’’தி. நங்க³லஸ்ஸ பா²லஸ்ஸ ஆவத்தனகோ, நங்க³லங் இதோ சிதோ ச ஆவத்தெத்வா கெ²த்தே கஸனகோதி அத்தோ². நங்க³லங் வா ஆவத்தயதி எத்தா²தி நங்க³லாவத்தங் , கெ²த்தே நங்க³லபதோ², தஸ்மிங் நங்க³லாவத்தனி. கா³தா²ஸுக²த்த²ஞ்ஹெத்த² ‘‘வத்தனீ’’தி தீ³க⁴ங் கத்வா வுத்தங். ஸிகீ²தி மத்த²கே அவட்டா²னதோ ஸிகா²ஸதி³ஸதாய ஸிகா², ஸிங்க³ங். தத³ஸ்ஸ அத்தீ²தி ஸிகீ². அபரே பன ‘‘ககுத⁴ங் இத⁴ ‘ஸிகா²’தி அதி⁴ப்பேத’’ந்தி வத³ந்தி, உப⁴யதா²பி பதா⁴னங்க³கித்தனமேதங் ‘‘ஸிகீ²’’தி. அப்பகஸிரேனாதி அப்பகிலமதே²ன. ரத்திந்தி³வாதி ரத்தியோ தி³வா ச, ஏவங் மமங் அப்பகஸிரேன க³ச்ச²ந்தீதி யோஜனா. இத³ங் வுத்தங் ஹோதி – யதா² ‘‘ப⁴த்³தோ³ உஸபா⁴ஜானீயோ கஸனே நியுத்தோ க⁴னதிணமூலாதி³கேபி நங்க³லபதே² தங் அக³ணெந்தோ அப்பகஸிரேன இதோ சிதோ ச பரிவத்தெந்தோ க³ச்ச²தி, யாவ கஸனதிணானங் பரிஸ்ஸமங் த³ஸ்ஸேதி, ஏவங் மமங் ரத்திந்தி³வாபி அப்பகஸிரேனேவ க³ச்ச²ந்தி அதிக்கமந்தீ’’தி. தத்த² காரணமாஹ ‘‘ஸுகே² லத்³தே⁴ நிராமிஸே’’தி. யஸ்மா காமாமிஸலோகாமிஸவட்டாமிஸேஹி அஸம்மிஸ்ஸங் ஸந்தங் பணீதங் ப²லஸமாபத்திஸுக²ங் லத்³த⁴ங், தஸ்மாதி அத்தோ². பச்சத்தே சேதங் பு⁴ம்மவசனங் யதா² ‘‘வனப்பகு³ம்பே³’’ (கு²॰ பா॰ 6.13; ஸு॰ நி॰ 236) ‘‘தேன வத ரே வத்தப்³பே³’’தி (கதா²॰ 1) ச. அத² வா ததோ பபு⁴தி ரத்திந்தி³வா அப்பகஸிரேன க³ச்ச²ந்தீதி விசாரணாய ஆஹ – ‘‘ஸுகே² லத்³தே⁴ நிராமிஸே’’தி, நிராமிஸே ஸுகே² லத்³தே⁴ ஸதி தஸ்ஸ லத்³த⁴காலதோ பட்டா²யாதி அத்தோ².
16. Tattha yathāpīti opammapaṭipādanatthe nipāto. Bhaddoti sundaro thāmabalasamatthajavaparakkamādisampanno. Ājaññoti ājānīyo jātimā kāraṇākāraṇānaṃ ājānanako. So tividho usabhājañño assājañño hatthājaññoti. Tesu usabhājañño idhādhippeto. So ca kho chekakasanakicce niyutto, tenāha ‘‘naṅgalāvattanī’’ti. Naṅgalassa phālassa āvattanako, naṅgalaṃ ito cito ca āvattetvā khette kasanakoti attho. Naṅgalaṃ vā āvattayati etthāti naṅgalāvattaṃ , khette naṅgalapatho, tasmiṃ naṅgalāvattani. Gāthāsukhatthañhettha ‘‘vattanī’’ti dīghaṃ katvā vuttaṃ. Sikhīti matthake avaṭṭhānato sikhāsadisatāya sikhā, siṅgaṃ. Tadassa atthīti sikhī. Apare pana ‘‘kakudhaṃ idha ‘sikhā’ti adhippeta’’nti vadanti, ubhayathāpi padhānaṅgakittanametaṃ ‘‘sikhī’’ti. Appakasirenāti appakilamathena. Rattindivāti rattiyo divā ca, evaṃ mamaṃ appakasirena gacchantīti yojanā. Idaṃ vuttaṃ hoti – yathā ‘‘bhaddo usabhājānīyo kasane niyutto ghanatiṇamūlādikepi naṅgalapathe taṃ agaṇento appakasirena ito cito ca parivattento gacchati, yāva kasanatiṇānaṃ parissamaṃ dasseti, evaṃ mamaṃ rattindivāpi appakasireneva gacchanti atikkamantī’’ti. Tattha kāraṇamāha ‘‘sukhe laddhe nirāmise’’ti. Yasmā kāmāmisalokāmisavaṭṭāmisehi asammissaṃ santaṃ paṇītaṃ phalasamāpattisukhaṃ laddhaṃ, tasmāti attho. Paccatte cetaṃ bhummavacanaṃ yathā ‘‘vanappagumbe’’ (khu. pā. 6.13; su. ni. 236) ‘‘tena vata re vattabbe’’ti (kathā. 1) ca. Atha vā tato pabhuti rattindivā appakasirena gacchantīti vicāraṇāya āha – ‘‘sukhe laddhe nirāmise’’ti, nirāmise sukhe laddhe sati tassa laddhakālato paṭṭhāyāti attho.
பே³லட்ட²ஸீஸத்தே²ரகா³தா²வண்ணனா நிட்டி²தா.
Belaṭṭhasīsattheragāthāvaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / தே²ரகா³தா²பாளி • Theragāthāpāḷi / 6. பே³லட்ட²ஸீஸத்தே²ரகா³தா² • 6. Belaṭṭhasīsattheragāthā
