| Library / Tipiṭaka / തിപിടക • Tipiṭaka / അങ്ഗുത്തരനികായ (അട്ഠകഥാ) • Aṅguttaranikāya (aṭṭhakathā) |
൩. ഭദ്ദിയസുത്തവണ്ണനാ
3. Bhaddiyasuttavaṇṇanā
൧൯൩. തതിയേ ഉപസങ്കമീതി ഭുത്തപാതരാസോ ഹുത്വാ മാലാഗന്ധവിലേപനം ഗഹേത്വാ ഭഗവന്തം വന്ദിസ്സാമീതി ഉപസങ്കമി. മാ അനുസ്സവേനാതിആദീസു അനുസ്സവവചനേന മമ കഥം മാ ഗണ്ഹഥാതി ഇമിനാ നയേന അത്ഥോ വേദിതബ്ബോ. സാരമ്ഭോതി കരണുത്തരിയലക്ഖണോ സാരമ്ഭോ. അലോഭാദയോ ലോഭാദിപടിപക്ഖവസേന വേദിതബ്ബാ. കുസലധമ്മൂപസമ്പദായാതി കുസലധമ്മാനം സമ്പാദനത്ഥായ, പടിലാഭത്ഥായാതി വുത്തം ഹോതി. ഇമേ ചേപി, ഭദ്ദിയ, മഹാസാലാതി പുരതോ ഠിതേ സാലരുക്ഖേ ദസ്സേന്തോ ഏവമാഹ. സേസമേത്ഥ ഹേട്ഠാ വുത്തനയത്താ ഉത്താനത്ഥത്താ ച സുവിഞ്ഞേയ്യമേവ. സത്ഥരി പന ദേസനം വിനിവട്ടേന്തേ ഭദ്ദിയോ സോതാപന്നോ ജാതോതി.
193. Tatiye upasaṅkamīti bhuttapātarāso hutvā mālāgandhavilepanaṃ gahetvā bhagavantaṃ vandissāmīti upasaṅkami. Mā anussavenātiādīsu anussavavacanena mama kathaṃ mā gaṇhathāti iminā nayena attho veditabbo. Sārambhoti karaṇuttariyalakkhaṇo sārambho. Alobhādayo lobhādipaṭipakkhavasena veditabbā. Kusaladhammūpasampadāyāti kusaladhammānaṃ sampādanatthāya, paṭilābhatthāyāti vuttaṃ hoti. Ime cepi, bhaddiya, mahāsālāti purato ṭhite sālarukkhe dassento evamāha. Sesamettha heṭṭhā vuttanayattā uttānatthattā ca suviññeyyameva. Satthari pana desanaṃ vinivaṭṭente bhaddiyo sotāpanno jātoti.
Related texts:
തിപിടക (മൂല) • Tipiṭaka (Mūla) / സുത്തപിടക • Suttapiṭaka / അങ്ഗുത്തരനികായ • Aṅguttaranikāya / ൩. ഭദ്ദിയസുത്തം • 3. Bhaddiyasuttaṃ
ടീകാ • Tīkā / സുത്തപിടക (ടീകാ) • Suttapiṭaka (ṭīkā) / അങ്ഗുത്തരനികായ (ടീകാ) • Aṅguttaranikāya (ṭīkā) / ൩. ഭദ്ദിയസുത്തവണ്ണനാ • 3. Bhaddiyasuttavaṇṇanā
