| Library / Tipiṭaka / திபிடக • Tipiṭaka / ஸுத்தனிபாத-அட்ட²கதா² • Suttanipāta-aṭṭhakathā |
12. ப⁴த்³ராவுத⁴ஸுத்தவண்ணனா
12. Bhadrāvudhasuttavaṇṇanā
1108-9. ஓகஞ்ஜஹந்தி ப⁴த்³ராவுத⁴ஸுத்தங். தத்த² ஓகஞ்ஜஹந்தி ஆலயங் ஜஹங். தண்ஹச்சி²த³ந்தி ச²தண்ஹாகாயச்சி²த³ங். அனேஜந்தி லோகத⁴ம்மேஸு நிக்கம்பங். நந்தி³ஞ்ஜஹந்தி அனாக³தரூபாதி³பத்த²னாஜஹங். ஏகா ஏவ ஹி தண்ஹா து²திவஸேன இத⁴ நானப்பகாரதோ வுத்தா. கப்பஞ்ஜஹந்தி து³வித⁴கப்பஜஹங். அபி⁴யாசேதி அதிவிய யாசாமி. ஸுத்வான நாக³ஸ்ஸ அபனமிஸ்ஸந்தி இதோதி நாக³ஸ்ஸ தவ ப⁴க³வா வசனங் ஸுத்வா இதோ பாஸாணகசேதியதோ ப³ஹூ ஜனா பக்கமிஸ்ஸந்தீதி அதி⁴ப்பாயோ. ஜனபதே³ஹி ஸங்க³தாதி அங்கா³தீ³ஹி ஜனபதே³ஹி இத⁴ ஸமாக³தா. வியாகரோஹீதி த⁴ம்மங் தே³ஸேஹி.
1108-9.Okañjahanti bhadrāvudhasuttaṃ. Tattha okañjahanti ālayaṃ jahaṃ. Taṇhacchidanti chataṇhākāyacchidaṃ. Anejanti lokadhammesu nikkampaṃ. Nandiñjahanti anāgatarūpādipatthanājahaṃ. Ekā eva hi taṇhā thutivasena idha nānappakārato vuttā. Kappañjahanti duvidhakappajahaṃ. Abhiyāceti ativiya yācāmi. Sutvāna nāgassa apanamissanti itoti nāgassa tava bhagavā vacanaṃ sutvā ito pāsāṇakacetiyato bahū janā pakkamissantīti adhippāyo. Janapadehi saṅgatāti aṅgādīhi janapadehi idha samāgatā. Viyākarohīti dhammaṃ desehi.
1110. அத²ஸ்ஸ ஆஸயானுலோமேன த⁴ம்மங் தே³ஸெந்தோ ப⁴க³வா த்³வே கா³தா²யோ அபா⁴ஸி. தத்த² ஆதா³னதண்ஹந்தி ரூபாதீ³னங் ஆதா³யிகங் க³ஹணதண்ஹங், தண்ஹுபாதா³னந்தி வுத்தங் ஹோதி. யங் யஞ்ஹி லோகஸ்மிமுபாதி³யந்தீதி ஏதேஸு உத்³தா⁴தி³பே⁴தே³ஸு யங் யங் க³ண்ஹந்தி. தேனேவ மாரோ அன்வேதி ஜந்துந்தி தேனேவ உபாதா³னபச்சயனிப்³ப³த்தகம்மாபி⁴ஸங்கா²ரனிப்³ப³த்தவஸேன படிஸந்தி⁴க்க²ந்த⁴மாரோ தங் ஸத்தங் அனுக³ச்ச²தி.
1110. Athassa āsayānulomena dhammaṃ desento bhagavā dve gāthāyo abhāsi. Tattha ādānataṇhanti rūpādīnaṃ ādāyikaṃ gahaṇataṇhaṃ, taṇhupādānanti vuttaṃ hoti. Yaṃ yañhi lokasmimupādiyantīti etesu uddhādibhedesu yaṃ yaṃ gaṇhanti. Teneva māro anveti jantunti teneva upādānapaccayanibbattakammābhisaṅkhāranibbattavasena paṭisandhikkhandhamāro taṃ sattaṃ anugacchati.
1111. தஸ்மா பஜானந்தி தஸ்மா ஏதமாதீ³னவங் அனிச்சாதி³வஸேன வா ஸங்கா²ரே ஜானந்தோ. ஆதா³னஸத்தே இதி பெக்க²மானோ, பஜங் இமங் மச்சுதெ⁴ய்யே விஸத்தந்தி ஆதா³தப்³ப³ட்டே²ன ஆதா³னேஸு ரூபாதீ³ஸு ஸத்தே ஸப்³ப³லோகே இமங் பஜங் மச்சுதெ⁴ய்யே லக்³க³ங் பெக்க²மானோ. ஆதா³னஸத்தே வா ஆதா³னாபி⁴னிவிட்டே² புக்³க³லே ஆதா³னஸங்க³ஹேதுஞ்ச இமங் பஜங் மச்சுதெ⁴ய்யே லக்³க³ங் ததோ வீதிக்கமிதுங் அஸமத்த²ங் இதி பெக்க²மானோ கிஞ்சனங் ஸப்³ப³லோகே ந உப்பாதி³யேதா²தி ஸேஸங் ஸப்³ப³த்த² பாகடமேவ.
1111.Tasmā pajānanti tasmā etamādīnavaṃ aniccādivasena vā saṅkhāre jānanto. Ādānasatte iti pekkhamāno, pajaṃ imaṃ maccudheyye visattanti ādātabbaṭṭhena ādānesu rūpādīsu satte sabbaloke imaṃ pajaṃ maccudheyye laggaṃ pekkhamāno. Ādānasatte vā ādānābhiniviṭṭhe puggale ādānasaṅgahetuñca imaṃ pajaṃ maccudheyye laggaṃ tato vītikkamituṃ asamatthaṃ iti pekkhamāno kiñcanaṃ sabbaloke na uppādiyethāti sesaṃ sabbattha pākaṭameva.
ஏவங் ப⁴க³வா இமம்பி ஸுத்தங் அரஹத்தனிகூடேனேவ தே³ஸேஸி. தே³ஸனாபரியோஸானே ச புப்³ப³ஸதி³ஸோ ஏவ த⁴ம்மாபி⁴ஸமயோ அஹோஸீதி.
Evaṃ bhagavā imampi suttaṃ arahattanikūṭeneva desesi. Desanāpariyosāne ca pubbasadiso eva dhammābhisamayo ahosīti.
பரமத்த²ஜோதிகாய கு²த்³த³க-அட்ட²கதா²ய
Paramatthajotikāya khuddaka-aṭṭhakathāya
ஸுத்தனிபாத-அட்ட²கதா²ய ப⁴த்³ராவுத⁴ஸுத்தவண்ணனா நிட்டி²தா.
Suttanipāta-aṭṭhakathāya bhadrāvudhasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / ஸுத்தனிபாதபாளி • Suttanipātapāḷi / 12. ப⁴த்³ராவுத⁴மாணவபுச்சா² • 12. Bhadrāvudhamāṇavapucchā
