| Library / Tipiṭaka / ತಿಪಿಟಕ • Tipiṭaka / ಅಙ್ಗುತ್ತರನಿಕಾಯ • Aṅguttaranikāya |
೨. ಭಣ್ಡನಸುತ್ತಂ
2. Bhaṇḍanasuttaṃ
೧೨೫. ‘‘ಯಸ್ಸಂ, ಭಿಕ್ಖವೇ, ದಿಸಾಯಂ ಭಿಕ್ಖೂ ಭಣ್ಡನಜಾತಾ ಕಲಹಜಾತಾ ವಿವಾದಾಪನ್ನಾ ಅಞ್ಞಮಞ್ಞಂ ಮುಖಸತ್ತೀಹಿ ವಿತುದನ್ತಾ ವಿಹರನ್ತಿ, ಮನಸಿ ಕಾತುಮ್ಪಿ ಮೇ ಏಸಾ, ಭಿಕ್ಖವೇ, ದಿಸಾ ನ ಫಾಸು ಹೋತಿ, ಪಗೇವ ಗನ್ತುಂ! ನಿಟ್ಠಮೇತ್ಥ ಗಚ್ಛಾಮಿ – ‘ಅದ್ಧಾ ತೇ ಆಯಸ್ಮನ್ತೋ ತಯೋ ಧಮ್ಮೇ ಪಜಹಿಂಸು, ತಯೋ ಧಮ್ಮೇ ಬಹುಲಮಕಂಸು 1। ಕತಮೇ ತಯೋ ಧಮ್ಮೇ ಪಜಹಿಂಸು? ನೇಕ್ಖಮ್ಮವಿತಕ್ಕಂ, ಅಬ್ಯಾಪಾದವಿತಕ್ಕಂ, ಅವಿಹಿಂಸಾವಿತಕ್ಕಂ – ಇಮೇ ತಯೋ ಧಮ್ಮೇ ಪಜಹಿಂಸು। ಕತಮೇ ತಯೋ ಧಮ್ಮೇ ಬಹುಲಮಕಂಸು? ಕಾಮವಿತಕ್ಕಂ, ಬ್ಯಾಪಾದವಿತಕ್ಕಂ, ವಿಹಿಂಸಾವಿತಕ್ಕಂ – ಇಮೇ ತಯೋ ಧಮ್ಮೇ ಬಹುಲಮಕಂಸು’। ಯಸ್ಸಂ, ಭಿಕ್ಖವೇ, ದಿಸಾಯಂ ಭಿಕ್ಖೂ ಭಣ್ಡನಜಾತಾ ಕಲಹಜಾತಾ ವಿವಾದಾಪನ್ನಾ ಅಞ್ಞಮಞ್ಞಂ ಮುಖಸತ್ತೀಹಿ ವಿತುದನ್ತಾ ವಿಹರನ್ತಿ, ಮನಸಿ ಕಾತುಮ್ಪಿ ಮೇ ಏಸಾ, ಭಿಕ್ಖವೇ, ದಿಸಾ ನ ಫಾಸು ಹೋತಿ, ಪಗೇವ ಗನ್ತುಂ! ನಿಟ್ಠಮೇತ್ಥ ಗಚ್ಛಾಮಿ – ‘ಅದ್ಧಾ ತೇ ಆಯಸ್ಮನ್ತೋ ಇಮೇ ತಯೋ ಧಮ್ಮೇ ಪಜಹಿಂಸು, ಇಮೇ ತಯೋ ಧಮ್ಮೇ ಬಹುಲಮಕಂಸು’’’।
125. ‘‘Yassaṃ, bhikkhave, disāyaṃ bhikkhū bhaṇḍanajātā kalahajātā vivādāpannā aññamaññaṃ mukhasattīhi vitudantā viharanti, manasi kātumpi me esā, bhikkhave, disā na phāsu hoti, pageva gantuṃ! Niṭṭhamettha gacchāmi – ‘addhā te āyasmanto tayo dhamme pajahiṃsu, tayo dhamme bahulamakaṃsu 2. Katame tayo dhamme pajahiṃsu? Nekkhammavitakkaṃ, abyāpādavitakkaṃ, avihiṃsāvitakkaṃ – ime tayo dhamme pajahiṃsu. Katame tayo dhamme bahulamakaṃsu? Kāmavitakkaṃ, byāpādavitakkaṃ, vihiṃsāvitakkaṃ – ime tayo dhamme bahulamakaṃsu’. Yassaṃ, bhikkhave, disāyaṃ bhikkhū bhaṇḍanajātā kalahajātā vivādāpannā aññamaññaṃ mukhasattīhi vitudantā viharanti, manasi kātumpi me esā, bhikkhave, disā na phāsu hoti, pageva gantuṃ! Niṭṭhamettha gacchāmi – ‘addhā te āyasmanto ime tayo dhamme pajahiṃsu, ime tayo dhamme bahulamakaṃsu’’’.
‘‘ಯಸ್ಸಂ ಪನ, ಭಿಕ್ಖವೇ, ದಿಸಾಯಂ ಭಿಕ್ಖೂ ಸಮಗ್ಗಾ ಸಮ್ಮೋದಮಾನಾ ಅವಿವದಮಾನಾ ಖೀರೋದಕೀಭೂತಾ ಅಞ್ಞಮಞ್ಞಂ ಪಿಯಚಕ್ಖೂಹಿ ಸಮ್ಪಸ್ಸನ್ತಾ ವಿಹರನ್ತಿ, ಗನ್ತುಮ್ಪಿ ಮೇ ಏಸಾ, ಭಿಕ್ಖವೇ, ದಿಸಾ ಫಾಸು ಹೋತಿ, ಪಗೇವ ಮನಸಿ ಕಾತುಂ! ನಿಟ್ಠಮೇತ್ಥ ಗಚ್ಛಾಮಿ – ‘ಅದ್ಧಾ ತೇ ಆಯಸ್ಮನ್ತೋ ತಯೋ ಧಮ್ಮೇ ಪಜಹಿಂಸು, ತಯೋ ಧಮ್ಮೇ ಬಹುಲಮಕಂಸು। ಕತಮೇ ತಯೋ ಧಮ್ಮೇ ಪಜಹಿಂಸು? ಕಾಮವಿತಕ್ಕಂ , ಬ್ಯಾಪಾದವಿತಕ್ಕಂ, ವಿಹಿಂಸಾವಿತಕ್ಕಂ – ಇಮೇ ತಯೋ ಧಮ್ಮೇ ಪಜಹಿಂಸು। ಕತಮೇ ತಯೋ ಧಮ್ಮೇ ಬಹುಲಮಕಂಸು? ನೇಕ್ಖಮ್ಮವಿತಕ್ಕಂ, ಅಬ್ಯಾಪಾದವಿತಕ್ಕಂ, ಅವಿಹಿಂಸಾವಿತಕ್ಕಂ – ಇಮೇ ತಯೋ ಧಮ್ಮೇ ಬಹುಲಮಕಂಸು’। ಯಸ್ಸಂ , ಭಿಕ್ಖವೇ, ದಿಸಾಯಂ ಭಿಕ್ಖೂ ಸಮಗ್ಗಾ ಸಮ್ಮೋದಮಾನಾ ಅವಿವದಮಾನಾ ಖೀರೋದಕೀಭೂತಾ ಅಞ್ಞಮಞ್ಞಂ ಪಿಯಚಕ್ಖೂಹಿ ಸಮ್ಪಸ್ಸನ್ತಾ ವಿಹರನ್ತಿ, ಗನ್ತುಮ್ಪಿ ಮೇ ಏಸಾ, ಭಿಕ್ಖವೇ, ದಿಸಾ ಫಾಸು ಹೋತಿ, ಪಗೇವ ಮನಸಿ ಕಾತುಂ! ನಿಟ್ಠಮೇತ್ಥ ಗಚ್ಛಾಮಿ – ‘ಅದ್ಧಾ ತೇ ಆಯಸ್ಮನ್ತೋ ಇಮೇ ತಯೋ ಧಮ್ಮೇ ಪಜಹಿಂಸು, ಇಮೇ ತಯೋ ಧಮ್ಮೇ ಬಹುಲಮಕಂಸೂ’’’ತಿ। ದುತಿಯಂ।
‘‘Yassaṃ pana, bhikkhave, disāyaṃ bhikkhū samaggā sammodamānā avivadamānā khīrodakībhūtā aññamaññaṃ piyacakkhūhi sampassantā viharanti, gantumpi me esā, bhikkhave, disā phāsu hoti, pageva manasi kātuṃ! Niṭṭhamettha gacchāmi – ‘addhā te āyasmanto tayo dhamme pajahiṃsu, tayo dhamme bahulamakaṃsu. Katame tayo dhamme pajahiṃsu? Kāmavitakkaṃ , byāpādavitakkaṃ, vihiṃsāvitakkaṃ – ime tayo dhamme pajahiṃsu. Katame tayo dhamme bahulamakaṃsu? Nekkhammavitakkaṃ, abyāpādavitakkaṃ, avihiṃsāvitakkaṃ – ime tayo dhamme bahulamakaṃsu’. Yassaṃ , bhikkhave, disāyaṃ bhikkhū samaggā sammodamānā avivadamānā khīrodakībhūtā aññamaññaṃ piyacakkhūhi sampassantā viharanti, gantumpi me esā, bhikkhave, disā phāsu hoti, pageva manasi kātuṃ! Niṭṭhamettha gacchāmi – ‘addhā te āyasmanto ime tayo dhamme pajahiṃsu, ime tayo dhamme bahulamakaṃsū’’’ti. Dutiyaṃ.
Footnotes:
Related texts:
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಅಙ್ಗುತ್ತರನಿಕಾಯ (ಅಟ್ಠಕಥಾ) • Aṅguttaranikāya (aṭṭhakathā) / ೨. ಭಣ್ಡನಸುತ್ತವಣ್ಣನಾ • 2. Bhaṇḍanasuttavaṇṇanā
ಟೀಕಾ • Tīkā / ಸುತ್ತಪಿಟಕ (ಟೀಕಾ) • Suttapiṭaka (ṭīkā) / ಅಙ್ಗುತ್ತರನಿಕಾಯ (ಟೀಕಾ) • Aṅguttaranikāya (ṭīkā) / ೧-೨. ಕುಸಿನಾರಸುತ್ತಾದಿವಣ್ಣನಾ • 1-2. Kusinārasuttādivaṇṇanā
