Library / Tipiṭaka / д̇ибидага • Tipiṭaka / винаяаалан̇гаара-дийгаа • Vinayālaṅkāra-ṭīkā |
10. бхан̣д̣абадисааманавинижчаяагат̇аа
10. Bhaṇḍapaṭisāmanavinicchayakathā
53. звам̣ жийваравиббаваасавинижчаяам̣ гат̇зд̇ваа ид̣̇аани бхан̣д̣абадисааманавинижчаяам̣ гат̇зд̇ум̣ ‘‘бхан̣д̣асса бадисаамана’’нд̇иаад̣̇имааха. д̇ад̇т̇а бхад̣ид̇аб̣б̣ам̣ бхааж̇зд̇аб̣б̣анд̇и бхан̣д̣ам̣, бхад̣ид̇аб̣б̣ам̣ ижчид̇аб̣б̣анд̇и ваа бхан̣д̣ам̣, бхан̣д̣анд̇и барибхан̣д̣анд̇и сад̇д̇аа зд̇знаад̇и ваа бхан̣д̣ам̣, муулад̇ханам̣, баригкааро ваа. вуд̇д̇ан̃хи абхид̇хаанаббад̣̇ийбигааяам̣ –
53. Evaṃ cīvaravippavāsavinicchayaṃ kathetvā idāni bhaṇḍapaṭisāmanavinicchayaṃ kathetuṃ ‘‘bhaṇḍassapaṭisāmana’’ntiādimāha. Tattha bhaḍitabbaṃ bhājetabbanti bhaṇḍaṃ, bhaḍitabbaṃ icchitabbanti vā bhaṇḍaṃ, bhaṇḍanti paribhaṇḍanti sattā etenāti vā bhaṇḍaṃ, mūladhanaṃ, parikkhāro vā. Vuttañhi abhidhānappadīpikāyaṃ –
‘‘бхааж̇анаад̣̇ибаригкаарз, бхан̣д̣ам̣ муулад̇ханзби жаа’’д̇и.
‘‘Bhājanādiparikkhāre, bhaṇḍaṃ mūladhanepi cā’’ti.
д̇асса бхан̣д̣асса, бадисаамияад̇з бадисааманам̣, рагкан̣ам̣ г̇обананд̇и ад̇т̇о. д̇знааха ‘‘барзсам̣ бхан̣д̣асса г̇обана’’нд̇и. маад̇у ган̣н̣абил̣анд̇ханам̣ д̇аалабан̣н̣амбийд̇и би-сад̣̇д̣̇о самбхааванад̇т̇о. д̇зна баг̇зва ан̃н̃аад̇агаанам̣ санд̇аганд̇и д̣̇ассзд̇и. г̇ихисанд̇аганд̇и иминаа бан̃жаннам̣ сахад̇хаммигаанам̣ санд̇агам̣ бадисаамзд̇ум̣ ваддад̇ийд̇и д̣̇ийбзд̇и. бхан̣д̣ааг̇ааригасийсзнаад̇и зд̇зна виссаасаг̇г̇аахаад̣̇инаа г̇ахзд̇ваа бадисаамзнд̇асса анаабад̇д̇ийд̇и д̣̇ассзд̇и. д̇зна вагкад̇и ‘‘ад̇д̇ано ад̇т̇ааяа г̇ахзд̇ваа бадисаамзд̇аб̣б̣а’’нд̇и. чанд̣̇знаби бхаязнабийд̇и вад̣дхагийаад̣̇ийсу чанд̣̇зна , рааж̇аваллабхаад̣̇ийсу бхаязна б̣алаггаарзна баад̇зд̇ваа г̇ад̇зсу жа бадисаамзд̇ум̣ ваддад̇ийд̇и яож̇зд̇аб̣б̣ам̣.
Tassa bhaṇḍassa, paṭisāmiyate paṭisāmanaṃ, rakkhaṇaṃ gopananti attho. Tenāha ‘‘paresaṃ bhaṇḍassa gopana’’nti. Mātu kaṇṇapiḷandhanaṃ tālapaṇṇampīti pi-saddo sambhāvanattho. Tena pageva aññātakānaṃ santakanti dasseti. Gihisantakanti iminā pañcannaṃ sahadhammikānaṃ santakaṃ paṭisāmetuṃ vaṭṭatīti dīpeti. Bhaṇḍāgārikasīsenāti etena vissāsaggāhādinā gahetvā paṭisāmentassa anāpattīti dasseti. Tena vakkhati ‘‘attano atthāya gahetvā paṭisāmetabba’’nti. Chandenapi bhayenapīti vaḍḍhakīādīsu chandena , rājavallabhādīsu bhayena balakkārena pātetvā gatesu ca paṭisāmetuṃ vaṭṭatīti yojetabbaṃ.
сан̇г̇обанад̇т̇ааяа ад̇д̇ано хад̇т̇з нигкид̇д̇асса бхан̣д̣асса г̇уд̇д̇адтаанз бадисааманабаяог̇ам̣ винаа ‘‘наахам̣ г̇ан̣хаамий’’д̇иаад̣̇инаа ан̃н̃асмим̣ баяог̇з агад̇з раж̇ж̇асан̇кобхаад̣̇игаалз ‘‘на д̣̇аани д̇асса д̣̇ассаами, на маяхам̣ д̣̇аани д̣̇ассад̇ий’’д̇и убхохиби сагасагадтаанз нисийд̣̇ид̇ваа д̇хуранигкзбз гад̇зби авахааро над̇т̇и. гзжи банзд̇т̇а ‘‘баарааж̇игамзва бадисааманабаяог̇асса гад̇ад̇д̇аа’’д̇и вад̣̇анд̇и, д̇ам̣ д̇зсам̣ мад̇имад̇д̇ам̣, на саарад̇о бажжзд̇аб̣б̣ам̣. бадисааманагаалз хисса т̇зяяажид̇д̇ам̣ над̇т̇и, ‘‘на д̣̇аани д̇асса д̣̇ассаамий’’д̇и т̇зяяажид̇д̇уббад̇д̇игкан̣з жа саамино д̇хуранигкзбажид̇д̇аббавад̇д̇ияаа хзд̇убхууд̇о гааяаважийбаяог̇о над̇т̇и, язна со аабад̇д̇им̣ аабаж̇ж̇зяяа. на хи агирияасамудтаанаа аяам̣ аабад̇д̇ийд̇и. д̣̇аанз сауссаахо, рагкад̇и д̇ааваад̇и авахаарам̣ санд̇хааяа авуд̇д̇ад̇д̇аа ‘‘наахам̣ г̇ан̣хаамий’’д̇иаад̣̇инаа мусааваад̣̇агаран̣з баажид̇д̇ияамзва ход̇и, на д̣̇уггадам̣ т̇зяяажид̇д̇аабхаавзна сахабаяог̇ассаби абхаавад̇од̇и г̇ахзд̇аб̣б̣ам̣.
Saṅgopanatthāya attano hatthe nikkhittassa bhaṇḍassa guttaṭṭhāne paṭisāmanapayogaṃ vinā ‘‘nāhaṃ gaṇhāmī’’tiādinā aññasmiṃ payoge akate rajjasaṅkhobhādikāle ‘‘na dāni tassa dassāmi, na mayhaṃ dāni dassatī’’ti ubhohipi sakasakaṭṭhāne nisīditvā dhuranikkhepe katepi avahāro natthi. Keci panettha ‘‘pārājikameva paṭisāmanapayogassa katattā’’ti vadanti, taṃ tesaṃ matimattaṃ, na sārato paccetabbaṃ. Paṭisāmanakāle hissa theyyacittaṃ natthi, ‘‘na dāni tassa dassāmī’’ti theyyacittuppattikkhaṇe ca sāmino dhuranikkhepacittappavattiyā hetubhūto kāyavacīpayogo natthi, yena so āpattiṃ āpajjeyya. Na hi akiriyasamuṭṭhānā ayaṃ āpattīti. Dāne saussāho, rakkhati tāvāti avahāraṃ sandhāya avuttattā ‘‘nāhaṃ gaṇhāmī’’tiādinā musāvādakaraṇe pācittiyameva hoti, na dukkaṭaṃ theyyacittābhāvena sahapayogassapi abhāvatoti gahetabbaṃ.
яад̣̇иби мукзна д̣̇ассаамийд̇и вад̣̇ад̇и…бз… баарааж̇иганд̇и зд̇т̇а гад̇арабаяог̇зна аабад̇д̇и, на д̇аава батамзна бхан̣д̣абадисааманабаяог̇зна д̇ад̣̇аа т̇зяяажид̇д̇абхааваа, нааби ‘‘д̣̇ассаамий’’д̇и гат̇анабаяог̇зна д̇ад̣̇аа т̇зяяажид̇д̇з виж̇ж̇амаанзби баяог̇асса габбияад̇д̇аад̇и? вужжад̇з – сааминаа ‘‘д̣̇зхий’’д̇и б̣ахусо яаажияамааноби ад̣̇ад̇ваа язна баяог̇зна ад̇д̇ано ад̣̇аад̇угаамад̇ам̣ саамигасса н̃аабзси, язна жа со ад̣̇аад̇угаамо аяам̣ вигкибад̇ийд̇и н̃ад̇ваа д̇хурам̣ нигкибад̇и, д̇знзва баяог̇знасса аабад̇д̇и. на хзд̇т̇а убанигкид̇д̇абхан̣д̣з барияааязна муд̇д̇и ад̇т̇и. ад̣̇аад̇угаамад̇ааяа хи ‘‘гад̣̇аа д̇з д̣̇иннам̣, гад̇т̇а д̇з д̣̇инна’’нд̇иаад̣̇ибарияааяаважанзнаби саамигасса д̇хурзнигкибаабид̇з аабад̇д̇иязва. д̇знзва адтагат̇ааяам̣ вуд̇д̇ам̣ ‘‘гим̣ д̇умхз бхан̣ат̇а…бз… убхиннам̣ д̇хуранигкзбзна бхигкуно баарааж̇ига’’нд̇и. барасанд̇агасса барзхи г̇ан̣хаабанз зва хи барияааяад̇о муд̇д̇и, на саб̣б̣ад̇т̇аад̇и г̇ахзд̇аб̣б̣ам̣. ад̇д̇ано хад̇т̇з нигкид̇д̇ад̇д̇аад̇и зд̇т̇а ад̇д̇ано хад̇т̇з сааминаа д̣̇иннад̇ааяа бхан̣д̣ааг̇ааригадтаанз тид̇ад̇д̇аа жа таанаажааванзби над̇т̇и авахааро, т̇зяяажид̇д̇зна бана г̇ахан̣з д̣̇уггадад̇о на мужжад̇ийд̇и взд̣̇ид̇аб̣б̣ам̣. зсзва наяод̇и авахааро над̇т̇и, бхан̣д̣ад̣̇зяяам̣ бана ход̇ийд̇и ад̇хиббааяо.
Yadipi mukhena dassāmīti vadati…pe… pārājikanti ettha katarapayogena āpatti, na tāva paṭhamena bhaṇḍapaṭisāmanapayogena tadā theyyacittabhāvā, nāpi ‘‘dassāmī’’ti kathanapayogena tadā theyyacitte vijjamānepi payogassa kappiyattāti? Vuccate – sāminā ‘‘dehī’’ti bahuso yāciyamānopi adatvā yena payogena attano adātukāmataṃ sāmikassa ñāpesi, yena ca so adātukāmo ayaṃ vikkhipatīti ñatvā dhuraṃ nikkhipati, teneva payogenassa āpatti. Na hettha upanikkhittabhaṇḍe pariyāyena mutti atthi. Adātukāmatāya hi ‘‘kadā te dinnaṃ, kattha te dinna’’ntiādipariyāyavacanenapi sāmikassa dhurenikkhipāpite āpattiyeva. Teneva aṭṭhakathāyaṃ vuttaṃ ‘‘kiṃ tumhe bhaṇatha…pe… ubhinnaṃ dhuranikkhepena bhikkhuno pārājika’’nti. Parasantakassa parehi gaṇhāpane eva hi pariyāyato mutti, na sabbatthāti gahetabbaṃ. Attano hatthe nikkhittattāti ettha attano hatthe sāminā dinnatāya bhaṇḍāgārikaṭṭhāne ṭhitattā ca ṭhānācāvanepi natthi avahāro, theyyacittena pana gahaṇe dukkaṭato na muccatīti veditabbaṃ. Eseva nayoti avahāro natthi, bhaṇḍadeyyaṃ pana hotīti adhippāyo.
54. бан̃жаннам̣ сахад̇хаммигаананд̇и бхигкубхигкунийсигкамаанасааман̣зрасааман̣зрийнам̣. зд̇зна на гзвалам̣ г̇ихийнам̣ зва, ат̇а ко д̇аабасабариб̣б̣ааж̇агаад̣̇ийнамби санд̇агам̣ бадисаамзд̇ум̣ на ваддад̇ийд̇и д̣̇ассзд̇и. надтзби г̇ийваа на ход̇и, гасмаа? асамбадижчаабид̇ад̇д̇аад̇и ад̇т̇о. д̣̇уд̇ияз зсзва наяод̇и г̇ийваа на ход̇и, гасмаа? аж̇аанид̇ад̇д̇аа. д̇ад̇ияз жа зсзва наяод̇и г̇ийваа на ход̇и, гасмаа? бадигкибид̇ад̇д̇аа. зд̇т̇а жа гааязна ваа ваажааяа ваа жид̇д̇зна ваа бадигкид̇д̇оби бадигкид̇д̇оязва наама ход̇и.
54.Pañcannaṃ sahadhammikānanti bhikkhubhikkhunīsikkhamānasāmaṇerasāmaṇerīnaṃ. Etena na kevalaṃ gihīnaṃ eva, atha kho tāpasaparibbājakādīnampi santakaṃ paṭisāmetuṃ na vaṭṭatīti dasseti. Naṭṭhepi gīvā na hoti, kasmā? Asampaṭicchāpitattāti attho. Dutiye eseva nayoti gīvā na hoti, kasmā? Ajānitattā. Tatiye ca eseva nayoti gīvā na hoti, kasmā? Paṭikkhipitattā. Ettha ca kāyena vā vācāya vā cittena vā paṭikkhittopi paṭikkhittoyeva nāma hoti.
д̇ассзва г̇ийваа ход̇и, на сзсабхигкуунам̣, гасмаа? д̇ассзва бхан̣д̣ааг̇ааригасса бхан̣д̣ааг̇аарз иссарабхаавад̇о. бхан̣д̣ааг̇ааригасса г̇ийваа на ход̇и аласаж̇аад̇игассзва бамаад̣̇зна харид̇ад̇д̇аа. д̣̇уд̇ияз бхан̣д̣ааг̇ааригасса г̇ийваа на ход̇и д̇асса анаарожид̇ад̇д̇аа. надтз д̇асса г̇ийваа д̇зна табид̇ад̇д̇аа. д̇ассзва г̇ийваа, на ан̃н̃зсам̣ д̇зна бхан̣д̣ааг̇ааригзна самбадижчид̇ад̇д̇аа табид̇ад̇д̇аа жа. над̇т̇и г̇ийваа д̇зна бадигкибид̇ад̇д̇аа. надтам̣ сунадтамзва бхан̣д̣ааг̇ааригасса асамбадижчаабанад̇о. надтз г̇ийваа д̇зна табид̇ад̇д̇аа. саб̣б̣ам̣ д̇асса г̇ийваа д̇асса бхан̣д̣ааг̇ааригасса бамаад̣̇зна харан̣ад̇о. д̇ад̇т̇зва убажаарз виж̇ж̇амаанзд̇и бхан̣д̣ааг̇ааригасса самийбзязва ужжаарабассаавадтаанз виж̇ж̇амаанз.
Tasseva gīvā hoti, na sesabhikkhūnaṃ, kasmā? Tasseva bhaṇḍāgārikassa bhaṇḍāgāre issarabhāvato. Bhaṇḍāgārikassa gīvā na hoti alasajātikasseva pamādena haritattā. Dutiye bhaṇḍāgārikassa gīvā na hoti tassa anārocitattā. Naṭṭhe tassa gīvā tena ṭhapitattā. Tasseva gīvā, na aññesaṃ tena bhaṇḍāgārikena sampaṭicchitattā ṭhapitattā ca. Natthi gīvā tena paṭikkhipitattā. Naṭṭhaṃ sunaṭṭhameva bhaṇḍāgārikassa asampaṭicchāpanato. Naṭṭhe gīvā tena ṭhapitattā. Sabbaṃ tassa gīvā tassa bhaṇḍāgārikassa pamādena haraṇato. Tattheva upacāre vijjamāneti bhaṇḍāgārikassa samīpeyeva uccārapassāvaṭṭhāne vijjamāne.
55. маяи жа мад̇з сан̇гхасса жа сзнаасанз винадтзд̇и зд̇т̇а гзвалам̣ сан̇гхасса сзнаасанам̣ маа винассийд̇и иминаа ад̇хиббааязна виварид̇умби ваддад̇иязваад̇и вад̣̇анд̇и. ‘‘д̇ам̣ маарзссаамий’’д̇и зд̇д̇агз вуд̇д̇зби виварид̇ум̣ ваддад̇и ‘‘г̇илаанабагкз тид̇ад̇д̇аа ависаяо’’д̇и вуд̇д̇ад̇д̇аа. маран̣ад̇о хи барам̣ г̇злан̃н̃ам̣ ависаяад̇д̇ан̃жа над̇т̇и. ‘‘д̣̇ваарам̣ чинд̣̇ид̇ваа хариссаамаа’’д̇и зд̇д̇агз вуд̇д̇зби виварид̇ум̣ ваддад̇иязва. сахааязхи бхавид̇аб̣б̣анд̇и д̇зхиби бхигкаажаараад̣̇ийхи бариязсид̇ваа ад̇д̇ано санд̇агамби гин̃жи гин̃жи д̣̇аад̇аб̣б̣анд̇и вуд̇д̇ам̣ ход̇и. аяан̃хи саамийжийд̇и бхан̣д̣ааг̇аарз васанд̇аанам̣ ид̣̇ам̣ вад̇д̇ам̣. лоламахаат̇зрод̇и манд̣̇о момуухо аагин̣н̣авихаарий сад̣̇аа гийл̣аабасуд̇о ваа махаат̇зро.
55.Mayica mate saṅghassa ca senāsane vinaṭṭheti ettha kevalaṃ saṅghassa senāsanaṃ mā vinassīti iminā adhippāyena vivaritumpi vaṭṭatiyevāti vadanti. ‘‘Taṃ māressāmī’’ti ettake vuttepi vivarituṃ vaṭṭati ‘‘gilānapakkhe ṭhitattā avisayo’’ti vuttattā. Maraṇato hi paraṃ gelaññaṃ avisayattañca natthi. ‘‘Dvāraṃ chinditvā harissāmā’’ti ettake vuttepi vivarituṃ vaṭṭatiyeva. Sahāyehi bhavitabbanti tehipi bhikkhācārādīhi pariyesitvā attano santakampi kiñci kiñci dātabbanti vuttaṃ hoti. Ayañhi sāmīcīti bhaṇḍāgāre vasantānaṃ idaṃ vattaṃ. Lolamahātheroti mando momūho ākiṇṇavihārī sadā kīḷāpasuto vā mahāthero.
56. ид̇арзхийд̇и д̇асмим̣язва г̇аб̣бхз васанд̇зхи бхигкуухи. вихаарарагкан̣аваарз нияуд̇д̇о вихаараваариго, вуд̣дхабадибаадияаа ад̇д̇ано ваарз вихаарарагкан̣аго. ниваабанд̇и бхад̇д̇авзд̇анам̣. жораанам̣ бадибат̇ам̣ г̇ад̇зсууд̇и жораанам̣ ааг̇аманам̣ н̃ад̇ваа ‘‘батамад̇арам̣язва г̇анд̇ваа сад̣̇д̣̇ам̣ гариссаамаа’’д̇и жораанам̣ абхимукам̣ г̇ад̇зсу. ‘‘жорзхи хадабхан̣д̣ам̣ аахариссаамаа’’д̇и д̇зсам̣ анубат̇ам̣ г̇ад̇зсуби зсзва наяо. ниб̣ад̣̇д̇хам̣ гад̇ваад̇и ‘‘асугагулз яааг̇убхад̇д̇ам̣ вихааравааригаанам̣язваа’’д̇и звам̣ нияаманам̣ гад̇ваа. д̣̇вз д̇иссо яааг̇усалаагаа жа жад̇д̇аари бан̃жа салаагабхад̇д̇аани жа лабхамаановаад̇и ид̣̇ам̣ нид̣̇ассанамад̇д̇ам̣, д̇ад̇о уунам̣ ваа ход̇у ад̇хигам̣ ваа, ад̇д̇ано жа взяяааважжагарасса жа яаабанамад̇д̇ам̣ лабханамзва бамаан̣анд̇и г̇ахзд̇аб̣б̣ам̣. ниссид̇агз ж̇аг̇г̇аабзнд̇ийд̇и ад̇д̇ано ад̇д̇ано ниссид̇агз бхигкаажарияааяа босзнд̇аа ниссид̇агзхи вихаарам̣ ж̇аг̇г̇аабзнд̇и. асахааяассаад̇и сахааяарахид̇асса. ‘‘асахааяасса ад̣̇уд̇ияассаа’’д̇и баато яуд̇д̇о. бажчимам̣ буримассзва взважанам̣. асахааяасса ваа ад̇д̇ад̣̇уд̇ияасса ваад̇и имасмим̣ бана баатз згзна аанийд̇ам̣ д̣̇виннам̣ наббаход̇ийд̇и ад̇д̇ад̣̇уд̇ияассаби вааро ниваарид̇од̇и вад̣̇анд̇и, д̇ам̣ ‘‘яасса сабхааг̇о бхигку бхад̇д̇ам̣ аанзд̇ваа д̣̇аад̇аа над̇т̇ий’’д̇и иминаа на самзд̇и, виймам̣сид̇аб̣б̣ам̣. вимад̇ивинод̣̇анияам̣ (ви. ви. дий. 1.112) бана ‘‘ад̇д̇ад̣̇уд̇ияассаад̇и аббижчасса. ад̇д̇аасарийрамзва д̣̇уд̇ияо, на ан̃н̃од̇и хи ад̇д̇ад̣̇уд̇ияо, д̇ад̣̇убхаяассаби ад̇т̇асса вибхааванам̣ ‘яассаа’д̇иаад̣̇и. зд̇зна саб̣б̣зна згзгасса вааро на баабзд̇аб̣б̣од̇и д̣̇ассзд̇ий’’д̇и вуд̇д̇ам̣.
56.Itarehīti tasmiṃyeva gabbhe vasantehi bhikkhūhi. Vihārarakkhaṇavāre niyutto vihāravāriko, vuḍḍhapaṭipāṭiyā attano vāre vihārarakkhaṇako. Nivāpanti bhattavetanaṃ. Corānaṃ paṭipathaṃ gatesūti corānaṃ āgamanaṃ ñatvā ‘‘paṭhamataraṃyeva gantvā saddaṃ karissāmā’’ti corānaṃ abhimukhaṃ gatesu. ‘‘Corehi haṭabhaṇḍaṃ āharissāmā’’ti tesaṃ anupathaṃ gatesupi eseva nayo. Nibaddhaṃ katvāti ‘‘asukakule yāgubhattaṃ vihāravārikānaṃyevā’’ti evaṃ niyamanaṃ katvā. Dve tisso yāgusalākā ca cattāri pañca salākabhattāni ca labhamānovāti idaṃ nidassanamattaṃ, tato ūnaṃ vā hotu adhikaṃ vā, attano ca veyyāvaccakarassa ca yāpanamattaṃ labhanameva pamāṇanti gahetabbaṃ. Nissitake jaggāpentīti attano attano nissitake bhikkhācariyāya posentā nissitakehi vihāraṃ jaggāpenti. Asahāyassāti sahāyarahitassa. ‘‘Asahāyassa adutiyassā’’ti pāṭho yutto. Pacchimaṃ purimasseva vevacanaṃ. Asahāyassa vā attadutiyassa vāti imasmiṃ pana pāṭhe ekena ānītaṃ dvinnaṃ nappahotīti attadutiyassapi vāro nivāritoti vadanti, taṃ ‘‘yassa sabhāgo bhikkhu bhattaṃ ānetvā dātā natthī’’ti iminā na sameti, vīmaṃsitabbaṃ. Vimativinodaniyaṃ (vi. vi. ṭī. 1.112) pana ‘‘attadutiyassāti appicchassa. Attāsarīrameva dutiyo, na aññoti hi attadutiyo, tadubhayassapi atthassa vibhāvanaṃ ‘yassā’tiādi. Etena sabbena ekekassa vāro na pāpetabboti dassetī’’ti vuttaṃ.
баагавад̇д̇ад̇т̇ааяаад̇и нижжам̣ бажид̇аб̣б̣аяааг̇убхад̇д̇асан̇каад̇авад̇д̇ад̇т̇ааяа. табзнд̇ийд̇и д̣̇ааяагаа табзнд̇и. д̇ам̣ г̇ахзд̇ваад̇и д̇ам̣ аараамигаад̣̇ийхи д̣̇ийяамаанам̣ бхааг̇ам̣ г̇ахзд̇ваа. убаж̇ийванд̇зна таад̇аб̣б̣анд̇и аб̣бхогаасигаругкамуулигзнаби баагавад̇д̇ам̣ убаниссааяа ж̇ийванд̇зна ад̇д̇ано бад̇д̇ажийварарагкан̣ад̇т̇ааяа вихаараваарз самбад̇д̇з таад̇аб̣б̣ам̣. на г̇аахаабзд̇аб̣б̣од̇и зд̇т̇а яасса аб̣бхогаасигассаби ад̇д̇ано ад̇хигабаригкааро жз табид̇о ад̇т̇и, жийвараад̣̇исан̇гхигабхааг̇зби аалаяо ад̇т̇и, соби г̇аахаабзд̇аб̣б̣о . барибужчанд̇и бужчид̇абан̃хависсаж̇ж̇анам̣, адтагат̇ам̣ ваа. д̣̇иг̇ун̣анд̇и ан̃н̃зхи лаб̣бхамаанад̇о д̣̇виг̇ун̣ам̣. багкаваарзнаад̇и ад̣дхамаасаваарзна.
Pākavattatthāyāti niccaṃ pacitabbayāgubhattasaṅkhātavattatthāya. Ṭhapentīti dāyakā ṭhapenti. Taṃ gahetvāti taṃ ārāmikādīhi dīyamānaṃ bhāgaṃ gahetvā. Upajīvantena ṭhātabbanti abbhokāsikarukkhamūlikenapi pākavattaṃ upanissāya jīvantena attano pattacīvararakkhaṇatthāya vihāravāre sampatte ṭhātabbaṃ. Na gāhāpetabboti ettha yassa abbhokāsikassapi attano adhikaparikkhāro ce ṭhapito atthi, cīvarādisaṅghikabhāgepi ālayo atthi, sopi gāhāpetabbo . Paripucchanti pucchitapañhavissajjanaṃ, aṭṭhakathaṃ vā. Diguṇanti aññehi labbhamānato dviguṇaṃ. Pakkhavārenāti aḍḍhamāsavārena.
ид̇и винаяасан̇г̇ахасам̣ван̣н̣анаабхууд̇з винаяаалан̇гаарз
Iti vinayasaṅgahasaṃvaṇṇanābhūte vinayālaṅkāre
бхан̣д̣абадисааманавинижчаяагат̇аалан̇гааро наама
Bhaṇḍapaṭisāmanavinicchayakathālaṅkāro nāma
д̣̇асамо барижчзд̣̇о.
Dasamo paricchedo.