| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
10. ப⁴ரியாஸுத்தவண்ணனா
10. Bhariyāsuttavaṇṇanā
63. த³ஸமே கேவட்டா மஞ்ஞே மச்ச²விலோபேதி கேவட்டானங் மச்ச²பச்சி²ங் ஓதாரெத்வா டி²தட்டா²னே ஜாலே வா உத³கதோ உக்கி²த்தமத்தே மச்ச²க்³கா³ஹகானங் மஹாஸத்³தோ³ ஹோதி, தங் ஸந்தா⁴யேதங் வுத்தங். ஸுஜாதாதி விஸாகா²ய கனிட்டா². ஸா நேவ ஸஸ்ஸுங் ஆதி³யதீதி ஸஸ்ஸுயா கத்தப்³ப³வத்தங் நாம அத்தி², தங் ந கரோதி, ஸஸ்ஸூதிபி நங் ந க³ணேதி. ந ஸஸுரங் ஆதி³யதீதி வசனங் ந க³ண்ஹாதி. ஏவங் அனாத³ரதாயபி அக்³க³ஹணேனபி ந ஆதி³யதி நாம. ஸேஸேஸுபி ஏஸேவ நயோ. ஏவங் அனாத²பிண்டி³கோ ஸுணிஸாய ஆசாரங் க³ஹெத்வா ஸத்து² புரதோ நிஸீதி³. ஸாபி ஸுஜாதா ‘‘கிங் நு கோ² அயங் ஸெட்டி² த³ஸப³லஸ்ஸ ஸந்திகே மய்ஹங் கு³ணங் கதெ²ஸ்ஸதி உதா³ஹு அகு³ண’’ந்தி க³ந்த்வா அவிதூ³ரே ஸத்³த³ங் ஸுணந்தீ அட்டா²ஸி. அத² நங் ஸத்தா² ஏஹி ஸுஜாதேதி ஆமந்தேஸி.
63. Dasame kevaṭṭā maññe macchavilopeti kevaṭṭānaṃ macchapacchiṃ otāretvā ṭhitaṭṭhāne jāle vā udakato ukkhittamatte macchaggāhakānaṃ mahāsaddo hoti, taṃ sandhāyetaṃ vuttaṃ. Sujātāti visākhāya kaniṭṭhā. Sā neva sassuṃ ādiyatīti sassuyā kattabbavattaṃ nāma atthi, taṃ na karoti, sassūtipi naṃ na gaṇeti. Na sasuraṃ ādiyatīti vacanaṃ na gaṇhāti. Evaṃ anādaratāyapi aggahaṇenapi na ādiyati nāma. Sesesupi eseva nayo. Evaṃ anāthapiṇḍiko suṇisāya ācāraṃ gahetvā satthu purato nisīdi. Sāpi sujātā ‘‘kiṃ nu kho ayaṃ seṭṭhi dasabalassa santike mayhaṃ guṇaṃ kathessati udāhu aguṇa’’nti gantvā avidūre saddaṃ suṇantī aṭṭhāsi. Atha naṃ satthā ehi sujāteti āmantesi.
அஹிதானுகம்பினீதி ந ஹிதானுகம்பினீ. அஞ்ஞேஸூதி பரபுரிஸேஸு. அதிமஞ்ஞதேதி ஓமானாதி மானவஸேன அதிமஞ்ஞதி. த⁴னேன கீதஸ்ஸாதி த⁴னேன கீதா அஸ்ஸ. வதா⁴ய உஸ்ஸுகா வதி⁴துங் உஸ்ஸுக்கமாபன்னா. யங் இத்தி²யா விந்த³தி ஸாமிகோ த⁴னந்தி இத்தி²யா ஸாமிகோ யங் த⁴னங் லப⁴தி. அப்பம்பி தஸ்ஸ அபஹாதுமிச்ச²தீதி தோ²கதோபி அஸ்ஸ ஹரிதுங் இச்ச²தி, உத்³த⁴னே ஆரோபிதஉக்க²லியங் பக்கி²பிதப்³ப³தண்டு³லதோபி தோ²கங் ஹரிதுமேவ வாயமதி. அலஸாதி நிஸின்னட்டா²னே நிஸின்னாவ டி²தட்டா²னே டி²தாவ ஹோதி. ப²ருஸாதி க²ரா. து³ருத்தவாதி³னீதி து³ப்³பா⁴ஸிதபா⁴ஸினீ, கக்க²ளங் வாளகத²மேவ கதே²தி. உட்டா²யகானங் அபி⁴பு⁴ய்ய வத்ததீதி எத்த² உட்டா²யகானந்தி ப³ஹுவசனவஸேன விரியுட்டா²னஸம்பன்னோ ஸாமிகோ வுத்தோ, தஸ்ஸ தங் உட்டா²னஸம்பத்திங் அபி⁴ப⁴வித்வா ஹெட்டா² கத்வா வத்ததி. பமோத³தீதி ஆமோதி³தபமோதி³தா ஹோதி . கோலெய்யகாதி குலஸம்பன்னா. பதிப்³ப³தாதி பதிதே³வதா. வத⁴த³ண்ட³தஜ்ஜிதாதி த³ண்ட³கங் க³ஹெத்வா வதே⁴ன தஜ்ஜிதா, ‘‘கா⁴தெஸ்ஸாமி ந’’ந்தி வுத்தா. தா³ஸீஸமந்தி ஸாமிகஸ்ஸ வத்தபூரிகா தா³ஸீதி மங் ப⁴க³வா தா⁴ரேதூதி வத்வா ஸரணேஸு பதிட்டா²ஸி.
Ahitānukampinīti na hitānukampinī. Aññesūti parapurisesu. Atimaññateti omānāti mānavasena atimaññati. Dhanena kītassāti dhanena kītā assa. Vadhāya ussukā vadhituṃ ussukkamāpannā. Yaṃ itthiyā vindati sāmiko dhananti itthiyā sāmiko yaṃ dhanaṃ labhati. Appampi tassa apahātumicchatīti thokatopi assa harituṃ icchati, uddhane āropitaukkhaliyaṃ pakkhipitabbataṇḍulatopi thokaṃ haritumeva vāyamati. Alasāti nisinnaṭṭhāne nisinnāva ṭhitaṭṭhāne ṭhitāva hoti. Pharusāti kharā. Duruttavādinīti dubbhāsitabhāsinī, kakkhaḷaṃ vāḷakathameva katheti. Uṭṭhāyakānaṃ abhibhuyya vattatīti ettha uṭṭhāyakānanti bahuvacanavasena viriyuṭṭhānasampanno sāmiko vutto, tassa taṃ uṭṭhānasampattiṃ abhibhavitvā heṭṭhā katvā vattati. Pamodatīti āmoditapamoditā hoti . Koleyyakāti kulasampannā. Patibbatāti patidevatā. Vadhadaṇḍatajjitāti daṇḍakaṃ gahetvā vadhena tajjitā, ‘‘ghātessāmi na’’nti vuttā. Dāsīsamanti sāmikassa vattapūrikā dāsīti maṃ bhagavā dhāretūti vatvā saraṇesu patiṭṭhāsi.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 10. ப⁴ரியாஸுத்தங் • 10. Bhariyāsuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 10. ப⁴ரியாஸுத்தவண்ணனா • 10. Bhariyāsuttavaṇṇanā
