| Library / Tipiṭaka / திபிடக • Tipiṭaka / விமதிவினோத³னீ-டீகா • Vimativinodanī-ṭīkā |
ப⁴த்தக்³க³வத்தகதா²வண்ணனா
Bhattaggavattakathāvaṇṇanā
364. மனுஸ்ஸானங் பரிவிஸனட்டா²னந்தி யத்த² அந்தோவிஹாரேபி மனுஸ்ஸா ஸபுத்ததா³ரா ஆவஸித்வா பி⁴க்கூ² நெத்வா போ⁴ஜெந்தி. ஆஸனேஸு ஸதீதி நிஸீத³னட்டா²னேஸு ஸந்தேஸு. இத³ங், ப⁴ந்தே, ஆஸனங் உச்சந்தி ஆஸன்னே ஸமபூ⁴மிபா⁴கே³ பஞ்ஞத்தங் தே²ராஸனேன ஸமகங் ஆஸனங் ஸந்தா⁴ய வுத்தங், தே²ராஸனதோ பன உச்சதரே ஆபுச்சி²த்வாபி நிஸீதி³துங் ந வட்டதி. யதி³ தங் ஆஸன்னம்பி நீசதரங் ஹோதி, அனாபுச்சா²பி நிஸீதி³துங் வட்டதி. மஹாதே²ரஸ்ஸேவ ஆபத்தீதி ஆஸனேன படிபா³ஹனாபத்தியா ஆபத்தி. அவத்த²ரித்வாதி பாருதஸங்கா⁴டிங் அவத்த²ரித்வா, அனுக்கி²பித்வாதி அத்தோ².
364.Manussānaṃparivisanaṭṭhānanti yattha antovihārepi manussā saputtadārā āvasitvā bhikkhū netvā bhojenti. Āsanesu satīti nisīdanaṭṭhānesu santesu. Idaṃ, bhante, āsanaṃ uccanti āsanne samabhūmibhāge paññattaṃ therāsanena samakaṃ āsanaṃ sandhāya vuttaṃ, therāsanato pana uccatare āpucchitvāpi nisīdituṃ na vaṭṭati. Yadi taṃ āsannampi nīcataraṃ hoti, anāpucchāpi nisīdituṃ vaṭṭati. Mahātherasseva āpattīti āsanena paṭibāhanāpattiyā āpatti. Avattharitvāti pārutasaṅghāṭiṃ avattharitvā, anukkhipitvāti attho.
பாளியங் ‘‘உபோ⁴ஹி ஹத்தே²ஹி…பே॰… ஓத³னோ படிக்³க³ஹேதப்³போ³’’தி இத³ங் ஹத்த²தலே வா பச்சி²பிட்டி²ஆதி³து³ஸ்ஸண்டி²தாதா⁴ரே வா பத்தங் ட²பெத்வா ஓத³னஸ்ஸ க³ஹணகாலே பத்தஸ்ஸ அபதனத்தா²ய வுத்தங், ஸுஸஜ்ஜிதே பன ஆதா⁴ரே பத்தங் ட²பெத்வா ஏகேன ஹத்தே²ன தங் பராமஸித்வாபி ஓத³னங் படிக்³க³ஹேதுங் வட்டதி ஏவ. உபோ⁴ஹி ஹத்தே²ஹி…பே॰… உத³கங் படிக்³க³ஹேதப்³ப³ந்தி எத்தா²பி ஏஸேவ நயோ.
Pāḷiyaṃ ‘‘ubhohi hatthehi…pe… odano paṭiggahetabbo’’ti idaṃ hatthatale vā pacchipiṭṭhiādidussaṇṭhitādhāre vā pattaṃ ṭhapetvā odanassa gahaṇakāle pattassa apatanatthāya vuttaṃ, susajjite pana ādhāre pattaṃ ṭhapetvā ekena hatthena taṃ parāmasitvāpi odanaṃ paṭiggahetuṃ vaṭṭati eva. Ubhohi hatthehi…pe… udakaṃ paṭiggahetabbanti etthāpi eseva nayo.
ஹத்த²தோ⁴வனஉத³கந்தி போ⁴ஜனாவஸானே உத³கங். தேனாஹ ‘‘பானீயங் பிவித்வா ஹத்தா² தோ⁴விதப்³பா³’’தி. தேன பரியோஸானே தோ⁴வனமேவ படிக்கி²த்தங், போ⁴ஜனந்தரே பன பானீயபிவனாதி³னா நயேன ஹத்த²ங் தோ⁴வித்வா புன பு⁴ஞ்ஜிதுங் வட்டதீதி த³ஸ்ஸேதி. பொத்த²கேஸு பன ‘‘பானீயங் பிவித்வா ஹத்தா² ந தோ⁴விதப்³பா³’’தி லிக²ந்தி, தங் புரிமவசனேன ந ஸமேதி பரியோஸானே உத³கஸ்ஸேவ ‘‘ஹத்த²தோ⁴வனஉத³க’’ந்தி வுத்தத்தா. ஸசே மனுஸ்ஸா தோ⁴வத², ப⁴ந்தேதிஆதி³ நிட்டி²தப⁴த்தங் நிஸின்னங் தே²ரங் ஸந்தா⁴ய வுத்தங். து⁴ரே த்³வாரஸமீபே.
Hatthadhovanaudakanti bhojanāvasāne udakaṃ. Tenāha ‘‘pānīyaṃ pivitvā hatthā dhovitabbā’’ti. Tena pariyosāne dhovanameva paṭikkhittaṃ, bhojanantare pana pānīyapivanādinā nayena hatthaṃ dhovitvā puna bhuñjituṃ vaṭṭatīti dasseti. Potthakesu pana ‘‘pānīyaṃ pivitvā hatthā na dhovitabbā’’ti likhanti, taṃ purimavacanena na sameti pariyosāne udakasseva ‘‘hatthadhovanaudaka’’nti vuttattā. Sace manussā dhovatha, bhantetiādi niṭṭhitabhattaṃ nisinnaṃ theraṃ sandhāya vuttaṃ. Dhure dvārasamīpe.
ப⁴த்தக்³க³வத்தகதா²வண்ணனா நிட்டி²தா.
Bhattaggavattakathāvaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / சூளவக்³க³பாளி • Cūḷavaggapāḷi / 5. ப⁴த்தக்³க³வத்தகதா² • 5. Bhattaggavattakathā
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / சூளவக்³க³-அட்ட²கதா² • Cūḷavagga-aṭṭhakathā / ப⁴த்தக்³க³வத்தகதா² • Bhattaggavattakathā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / ப⁴த்தக்³க³வத்தகதா²வண்ணனா • Bhattaggavattakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / அனுமோத³னவத்தகதா²வண்ணனா • Anumodanavattakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 5. ப⁴த்தக்³க³வத்தகதா² • 5. Bhattaggavattakathā
