| Library / Tipiṭaka / ತಿಪಿಟಕ • Tipiṭaka / ಅಙ್ಗುತ್ತರನಿಕಾಯ • Aṅguttaranikāya |
೨. ಭಯಸುತ್ತಂ
2. Bhayasuttaṃ
೬೩. ‘‘ತೀಣಿಮಾನಿ , ಭಿಕ್ಖವೇ, ಅಮಾತಾಪುತ್ತಿಕಾನಿ ಭಯಾನೀತಿ ಅಸ್ಸುತವಾ ಪುಥುಜ್ಜನೋ ಭಾಸತಿ। ಕತಮಾನಿ ತೀಣಿ? ಹೋತಿ ಸೋ, ಭಿಕ್ಖವೇ, ಸಮಯೋ ಯಂ ಮಹಾಅಗ್ಗಿಡಾಹೋ ವುಟ್ಠಾತಿ। ಮಹಾಅಗ್ಗಿಡಾಹೇ ಖೋ ಪನ, ಭಿಕ್ಖವೇ, ವುಟ್ಠಿತೇ ತೇನ ಗಾಮಾಪಿ ಡಯ್ಹನ್ತಿ ನಿಗಮಾಪಿ ಡಯ್ಹನ್ತಿ ನಗರಾಪಿ ಡಯ್ಹನ್ತಿ। ಗಾಮೇಸುಪಿ ಡಯ್ಹಮಾನೇಸು ನಿಗಮೇಸುಪಿ ಡಯ್ಹಮಾನೇಸು ನಗರೇಸುಪಿ ಡಯ್ಹಮಾನೇಸು ತತ್ಥ ಮಾತಾಪಿ ಪುತ್ತಂ ನಪ್ಪಟಿಲಭತಿ, ಪುತ್ತೋಪಿ ಮಾತರಂ ನಪ್ಪಟಿಲಭತಿ । ಇದಂ, ಭಿಕ್ಖವೇ, ಪಠಮಂ ಅಮಾತಾಪುತ್ತಿಕಂ ಭಯನ್ತಿ ಅಸ್ಸುತವಾ ಪುಥುಜ್ಜನೋ ಭಾಸತಿ।
63. ‘‘Tīṇimāni , bhikkhave, amātāputtikāni bhayānīti assutavā puthujjano bhāsati. Katamāni tīṇi? Hoti so, bhikkhave, samayo yaṃ mahāaggiḍāho vuṭṭhāti. Mahāaggiḍāhe kho pana, bhikkhave, vuṭṭhite tena gāmāpi ḍayhanti nigamāpi ḍayhanti nagarāpi ḍayhanti. Gāmesupi ḍayhamānesu nigamesupi ḍayhamānesu nagaresupi ḍayhamānesu tattha mātāpi puttaṃ nappaṭilabhati, puttopi mātaraṃ nappaṭilabhati . Idaṃ, bhikkhave, paṭhamaṃ amātāputtikaṃ bhayanti assutavā puthujjano bhāsati.
‘‘ಪುನ ಚಪರಂ, ಭಿಕ್ಖವೇ, ಹೋತಿ ಸೋ ಸಮಯೋ ಯಂ ಮಹಾಮೇಘೋ ವುಟ್ಠಾತಿ। ಮಹಾಮೇಘೇ ಖೋ ಪನ, ಭಿಕ್ಖವೇ, ವುಟ್ಠಿತೇ ಮಹಾಉದಕವಾಹಕೋ ಸಞ್ಜಾಯತಿ। ಮಹಾಉದಕವಾಹಕೇ ಖೋ ಪನ, ಭಿಕ್ಖವೇ, ಸಞ್ಜಾಯನ್ತೇ ತೇನ ಗಾಮಾಪಿ ವುಯ್ಹನ್ತಿ ನಿಗಮಾಪಿ ವುಯ್ಹನ್ತಿ ನಗರಾಪಿ ವುಯ್ಹನ್ತಿ। ಗಾಮೇಸುಪಿ ವುಯ್ಹಮಾನೇಸು ನಿಗಮೇಸುಪಿ ವುಯ್ಹಮಾನೇಸು ನಗರೇಸುಪಿ ವುಯ್ಹಮಾನೇಸು ತತ್ಥ ಮಾತಾಪಿ ಪುತ್ತಂ ನಪ್ಪಟಿಲಭತಿ, ಪುತ್ತೋಪಿ ಮಾತರಂ ನಪ್ಪಟಿಲಭತಿ। ಇದಂ, ಭಿಕ್ಖವೇ, ದುತಿಯಂ ಅಮಾತಾಪುತ್ತಿಕಂ ಭಯನ್ತಿ ಅಸ್ಸುತವಾ ಪುಥುಜ್ಜನೋ ಭಾಸತಿ।
‘‘Puna caparaṃ, bhikkhave, hoti so samayo yaṃ mahāmegho vuṭṭhāti. Mahāmeghe kho pana, bhikkhave, vuṭṭhite mahāudakavāhako sañjāyati. Mahāudakavāhake kho pana, bhikkhave, sañjāyante tena gāmāpi vuyhanti nigamāpi vuyhanti nagarāpi vuyhanti. Gāmesupi vuyhamānesu nigamesupi vuyhamānesu nagaresupi vuyhamānesu tattha mātāpi puttaṃ nappaṭilabhati, puttopi mātaraṃ nappaṭilabhati. Idaṃ, bhikkhave, dutiyaṃ amātāputtikaṃ bhayanti assutavā puthujjano bhāsati.
‘‘ಪುನ ಚಪರಂ, ಭಿಕ್ಖವೇ, ಹೋತಿ ಸೋ ಸಮಯೋ ಯಂ ಭಯಂ ಹೋತಿ ಅಟವಿಸಙ್ಕೋಪೋ, ಚಕ್ಕಸಮಾರುಳ್ಹಾ ಜಾನಪದಾ ಪರಿಯಾಯನ್ತಿ। ಭಯೇ ಖೋ ಪನ, ಭಿಕ್ಖವೇ, ಸತಿ ಅಟವಿಸಙ್ಕೋಪೇ ಚಕ್ಕಸಮಾರುಳ್ಹೇಸು ಜಾನಪದೇಸು ಪರಿಯಾಯನ್ತೇಸು ತತ್ಥ ಮಾತಾಪಿ ಪುತ್ತಂ ನಪ್ಪಟಿಲಭತಿ, ಪುತ್ತೋಪಿ ಮಾತರಂ ನಪ್ಪಟಿಲಭತಿ। ಇದಂ, ಭಿಕ್ಖವೇ, ತತಿಯಂ ಅಮಾತಾಪುತ್ತಿಕಂ ಭಯನ್ತಿ ಅಸ್ಸುತವಾ ಪುಥುಜ್ಜನೋ ಭಾಸತಿ। ಇಮಾನಿ ಖೋ, ಭಿಕ್ಖವೇ, ತೀಣಿ ಅಮಾತಾಪುತ್ತಿಕಾನಿ ಭಯಾನೀತಿ ಅಸ್ಸುತವಾ ಪುಥುಜ್ಜನೋ ಭಾಸತಿ।
‘‘Puna caparaṃ, bhikkhave, hoti so samayo yaṃ bhayaṃ hoti aṭavisaṅkopo, cakkasamāruḷhā jānapadā pariyāyanti. Bhaye kho pana, bhikkhave, sati aṭavisaṅkope cakkasamāruḷhesu jānapadesu pariyāyantesu tattha mātāpi puttaṃ nappaṭilabhati, puttopi mātaraṃ nappaṭilabhati. Idaṃ, bhikkhave, tatiyaṃ amātāputtikaṃ bhayanti assutavā puthujjano bhāsati. Imāni kho, bhikkhave, tīṇi amātāputtikāni bhayānīti assutavā puthujjano bhāsati.
‘‘ತಾನಿ ಖೋ ಪನಿಮಾನಿ 1, ಭಿಕ್ಖವೇ, ತೀಣಿ ಸಮಾತಾಪುತ್ತಿಕಾನಿಯೇವ ಭಯಾನಿ ಅಮಾತಾಪುತ್ತಿಕಾನಿ ಭಯಾನೀತಿ ಅಸ್ಸುತವಾ ಪುಥುಜ್ಜನೋ ಭಾಸತಿ। ಕತಮಾನಿ ತೀಣಿ? ಹೋತಿ ಸೋ, ಭಿಕ್ಖವೇ, ಸಮಯೋ ಯಂ ಮಹಾಅಗ್ಗಿಡಾಹೋ ವುಟ್ಠಾತಿ। ಮಹಾಅಗ್ಗಿಡಾಹೇ ಖೋ ಪನ, ಭಿಕ್ಖವೇ, ವುಟ್ಠಿತೇ ತೇನ ಗಾಮಾಪಿ ಡಯ್ಹನ್ತಿ ನಿಗಮಾಪಿ ಡಯ್ಹನ್ತಿ ನಗರಾಪಿ ಡಯ್ಹನ್ತಿ। ಗಾಮೇಸುಪಿ ಡಯ್ಹಮಾನೇಸು ನಿಗಮೇಸುಪಿ ಡಯ್ಹಮಾನೇಸು ನಗರೇಸುಪಿ ಡಯ್ಹಮಾನೇಸು ಹೋತಿ ಸೋ ಸಮಯೋ ಯಂ ಕದಾಚಿ ಕರಹಚಿ ಮಾತಾಪಿ ಪುತ್ತಂ ಪಟಿಲಭತಿ, ಪುತ್ತೋಪಿ ಮಾತರಂ ಪಟಿಲಭತಿ। ಇದಂ, ಭಿಕ್ಖವೇ, ಪಠಮಂ ಸಮಾತಾಪುತ್ತಿಕಂಯೇವ ಭಯಂ ಅಮಾತಾಪುತ್ತಿಕಂ ಭಯನ್ತಿ ಅಸ್ಸುತವಾ ಪುಥುಜ್ಜನೋ ಭಾಸತಿ।
‘‘Tāni kho panimāni 2, bhikkhave, tīṇi samātāputtikāniyeva bhayāni amātāputtikāni bhayānīti assutavā puthujjano bhāsati. Katamāni tīṇi? Hoti so, bhikkhave, samayo yaṃ mahāaggiḍāho vuṭṭhāti. Mahāaggiḍāhe kho pana, bhikkhave, vuṭṭhite tena gāmāpi ḍayhanti nigamāpi ḍayhanti nagarāpi ḍayhanti. Gāmesupi ḍayhamānesu nigamesupi ḍayhamānesu nagaresupi ḍayhamānesu hoti so samayo yaṃ kadāci karahaci mātāpi puttaṃ paṭilabhati, puttopi mātaraṃ paṭilabhati. Idaṃ, bhikkhave, paṭhamaṃ samātāputtikaṃyeva bhayaṃ amātāputtikaṃ bhayanti assutavā puthujjano bhāsati.
‘‘ಪುನ ಚಪರಂ, ಭಿಕ್ಖವೇ, ಹೋತಿ ಸೋ ಸಮಯೋ ಯಂ ಮಹಾಮೇಘೋ ವುಟ್ಠಾತಿ। ಮಹಾಮೇಘೇ ಖೋ ಪನ, ಭಿಕ್ಖವೇ, ವುಟ್ಠಿತೇ ಮಹಾಉದಕವಾಹಕೋ ಸಞ್ಜಾಯತಿ। ಮಹಾಉದಕವಾಹಕೇ ಖೋ ಪನ, ಭಿಕ್ಖವೇ, ಸಞ್ಜಾತೇ ತೇನ ಗಾಮಾಪಿ ವುಯ್ಹನ್ತಿ ನಿಗಮಾಪಿ ವುಯ್ಹನ್ತಿ ನಗರಾಪಿ ವುಯ್ಹನ್ತಿ। ಗಾಮೇಸುಪಿ ವುಯ್ಹಮಾನೇಸು ನಿಗಮೇಸುಪಿ ವುಯ್ಹಮಾನೇಸು ನಗರೇಸುಪಿ ವುಯ್ಹಮಾನೇಸು ಹೋತಿ ಸೋ ಸಮಯೋ ಯಂ ಕದಾಚಿ ಕರಹಚಿ ಮಾತಾಪಿ ಪುತ್ತಂ ಪಟಿಲಭತಿ, ಪುತ್ತೋಪಿ ಮಾತರಂ ಪಟಿಲಭತಿ। ಇದಂ, ಭಿಕ್ಖವೇ, ದುತಿಯಂ ಸಮಾತಾಪುತ್ತಿಕಂಯೇವ ಭಯಂ ಅಮಾತಾಪುತ್ತಿಕಂ ಭಯನ್ತಿ ಅಸ್ಸುತವಾ ಪುಥುಜ್ಜನೋ ಭಾಸತಿ।
‘‘Puna caparaṃ, bhikkhave, hoti so samayo yaṃ mahāmegho vuṭṭhāti. Mahāmeghe kho pana, bhikkhave, vuṭṭhite mahāudakavāhako sañjāyati. Mahāudakavāhake kho pana, bhikkhave, sañjāte tena gāmāpi vuyhanti nigamāpi vuyhanti nagarāpi vuyhanti. Gāmesupi vuyhamānesu nigamesupi vuyhamānesu nagaresupi vuyhamānesu hoti so samayo yaṃ kadāci karahaci mātāpi puttaṃ paṭilabhati, puttopi mātaraṃ paṭilabhati. Idaṃ, bhikkhave, dutiyaṃ samātāputtikaṃyeva bhayaṃ amātāputtikaṃ bhayanti assutavā puthujjano bhāsati.
‘‘ಪುನ ಚಪರಂ, ಭಿಕ್ಖವೇ, ಹೋತಿ ಸೋ ಸಮಯೋ ಯಂ ಭಯಂ ಹೋತಿ ಅಟವಿಸಙ್ಕೋಪೋ, ಚಕ್ಕಸಮಾರುಳ್ಹಾ ಜಾನಪದಾ ಪರಿಯಾಯನ್ತಿ। ಭಯೇ ಖೋ ಪನ, ಭಿಕ್ಖವೇ, ಸತಿ ಅಟವಿಸಙ್ಕೋಪೇ ಚಕ್ಕಸಮಾರುಳ್ಹೇಸು ಜಾನಪದೇಸು ಪರಿಯಾಯನ್ತೇಸು ಹೋತಿ ಸೋ ಸಮಯೋ ಯಂ ಕದಾಚಿ ಕರಹಚಿ ಮಾತಾಪಿ ಪುತ್ತಂ ಪಟಿಲಭತಿ, ಪುತ್ತೋಪಿ ಮಾತರಂ ಪಟಿಲಭತಿ। ಇದಂ, ಭಿಕ್ಖವೇ, ತತಿಯಂ ಸಮಾತಾಪುತ್ತಿಕಂಯೇವ ಭಯಂ ಅಮಾತಾಪುತ್ತಿಕಂ ಭಯನ್ತಿ ಅಸ್ಸುತವಾ ಪುಥುಜ್ಜನೋ ಭಾಸತಿ। ‘‘ಇಮಾನಿ ಖೋ, ಭಿಕ್ಖವೇ, ತೀಣಿ ಸಮಾತಾಪುತ್ತಿಕಾನಿಯೇವ ಭಯಾನಿ ಅಮಾತಾಪುತ್ತಿಕಾನಿ ಭಯಾನೀತಿ ಅಸ್ಸುತವಾ ಪುಥುಜ್ಜನೋ ಭಾಸತಿ’’।
‘‘Puna caparaṃ, bhikkhave, hoti so samayo yaṃ bhayaṃ hoti aṭavisaṅkopo, cakkasamāruḷhā jānapadā pariyāyanti. Bhaye kho pana, bhikkhave, sati aṭavisaṅkope cakkasamāruḷhesu jānapadesu pariyāyantesu hoti so samayo yaṃ kadāci karahaci mātāpi puttaṃ paṭilabhati, puttopi mātaraṃ paṭilabhati. Idaṃ, bhikkhave, tatiyaṃ samātāputtikaṃyeva bhayaṃ amātāputtikaṃ bhayanti assutavā puthujjano bhāsati. ‘‘Imāni kho, bhikkhave, tīṇi samātāputtikāniyeva bhayāni amātāputtikāni bhayānīti assutavā puthujjano bhāsati’’.
‘‘ತೀಣಿಮಾನಿ, ಭಿಕ್ಖವೇ, ಅಮಾತಾಪುತ್ತಿಕಾನಿ ಭಯಾನಿ। ಕತಮಾನಿ ತೀಣಿ? ಜರಾಭಯಂ, ಬ್ಯಾಧಿಭಯಂ, ಮರಣಭಯನ್ತಿ। ನ, ಭಿಕ್ಖವೇ, ಮಾತಾ ಪುತ್ತಂ ಜೀರಮಾನಂ ಏವಂ ಲಭತಿ – ‘ಅಹಂ ಜೀರಾಮಿ, ಮಾ ಮೇ ಪುತ್ತೋ ಜೀರೀ’ತಿ; ಪುತ್ತೋ ವಾ ಪನ ಮಾತರಂ ಜೀರಮಾನಂ ನ ಏವಂ ಲಭತಿ – ‘ಅಹಂ ಜೀರಾಮಿ, ಮಾ ಮೇ ಮಾತಾ ಜೀರೀ’’’ತಿ।
‘‘Tīṇimāni, bhikkhave, amātāputtikāni bhayāni. Katamāni tīṇi? Jarābhayaṃ, byādhibhayaṃ, maraṇabhayanti. Na, bhikkhave, mātā puttaṃ jīramānaṃ evaṃ labhati – ‘ahaṃ jīrāmi, mā me putto jīrī’ti; putto vā pana mātaraṃ jīramānaṃ na evaṃ labhati – ‘ahaṃ jīrāmi, mā me mātā jīrī’’’ti.
‘‘ನ, ಭಿಕ್ಖವೇ, ಮಾತಾ ಪುತ್ತಂ ಬ್ಯಾಧಿಯಮಾನಂ ಏವಂ ಲಭತಿ – ‘ಅಹಂ ಬ್ಯಾಧಿಯಾಮಿ, ಮಾ ಮೇ ಪುತ್ತೋ ಬ್ಯಾಧಿಯೀ’ತಿ; ಪುತ್ತೋ ವಾ ಪನ ಮಾತರಂ ಬ್ಯಾಧಿಯಮಾನಂ ನ ಏವಂ ಲಭತಿ – ‘ಅಹಂ ಬ್ಯಾಧಿಯಾಮಿ, ಮಾ ಮೇ ಮಾತಾ ಬ್ಯಾಧಿಯೀ’’’ತಿ।
‘‘Na, bhikkhave, mātā puttaṃ byādhiyamānaṃ evaṃ labhati – ‘ahaṃ byādhiyāmi, mā me putto byādhiyī’ti; putto vā pana mātaraṃ byādhiyamānaṃ na evaṃ labhati – ‘ahaṃ byādhiyāmi, mā me mātā byādhiyī’’’ti.
‘‘ನ, ಭಿಕ್ಖವೇ, ಮಾತಾ ಪುತ್ತಂ ಮೀಯಮಾನಂ ಏವಂ ಲಭತಿ – ‘ಅಹಂ ಮೀಯಾಮಿ, ಮಾ ಮೇ ಪುತ್ತೋ ಮೀಯೀ’ತಿ; ಪುತ್ತೋ ವಾ ಪನ ಮಾತರಂ ಮೀಯಮಾನಂ ನ ಏವಂ ಲಭತಿ – ‘ಅಹಂ ಮೀಯಾಮಿ, ಮಾ ಮೇ ಮಾತಾ ಮೀಯೀ’ತಿ। ಇಮಾನಿ ಖೋ, ಭಿಕ್ಖವೇ, ತೀಣಿ ಅಮಾತಾಪುತ್ತಿಕಾನಿ ಭಯಾನೀ’’ತಿ।
‘‘Na, bhikkhave, mātā puttaṃ mīyamānaṃ evaṃ labhati – ‘ahaṃ mīyāmi, mā me putto mīyī’ti; putto vā pana mātaraṃ mīyamānaṃ na evaṃ labhati – ‘ahaṃ mīyāmi, mā me mātā mīyī’ti. Imāni kho, bhikkhave, tīṇi amātāputtikāni bhayānī’’ti.
‘‘ಅತ್ಥಿ , ಭಿಕ್ಖವೇ, ಮಗ್ಗೋ ಅತ್ಥಿ ಪಟಿಪದಾ ಇಮೇಸಞ್ಚ ತಿಣ್ಣಂ ಸಮಾತಾಪುತ್ತಿಕಾನಂ ಭಯಾನಂ ಇಮೇಸಞ್ಚ ತಿಣ್ಣಂ ಅಮಾತಾಪುತ್ತಿಕಾನಂ ಭಯಾನಂ ಪಹಾನಾಯ ಸಮತಿಕ್ಕಮಾಯ ಸಂವತ್ತತಿ। ಕತಮೋ ಚ, ಭಿಕ್ಖವೇ, ಮಗ್ಗೋ ಕತಮಾ ಚ ಪಟಿಪದಾ ಇಮೇಸಞ್ಚ ತಿಣ್ಣಂ ಸಮಾತಾಪುತ್ತಿಕಾನಂ ಭಯಾನಂ ಇಮೇಸಞ್ಚ ತಿಣ್ಣಂ ಅಮಾತಾಪುತ್ತಿಕಾನಂ ಭಯಾನಂ ಪಹಾನಾಯ ಸಮತಿಕ್ಕಮಾಯ ಸಂವತ್ತತಿ? ಅಯಮೇವ ಅರಿಯೋ ಅಟ್ಠಙ್ಗಿಕೋ ಮಗ್ಗೋ, ಸೇಯ್ಯಥಿದಂ – ಸಮ್ಮಾದಿಟ್ಠಿ, ಸಮ್ಮಾಸಙ್ಕಪೋ, ಸಮ್ಮಾವಾಚಾ, ಸಮ್ಮಾಕಮ್ಮನ್ತೋ, ಸಮ್ಮಾಆಜೀವೋ, ಸಮ್ಮಾವಾಯಾಮೋ, ಸಮ್ಮಾಸತಿ, ಸಮ್ಮಾಸಮಾಧಿ। ಅಯಂ ಖೋ, ಭಿಕ್ಖವೇ, ಮಗ್ಗೋ ಅಯಂ ಪಟಿಪದಾ ಇಮೇಸಞ್ಚ ತಿಣ್ಣಂ ಸಮಾತಾಪುತ್ತಿಕಾನಂ ಭಯಾನಂ ಇಮೇಸಞ್ಚ ತಿಣ್ಣಂ ಅಮಾತಾಪುತ್ತಿಕಾನಂ ಭಯಾನಂ ಪಹಾನಾಯ ಸಮತಿಕ್ಕಮಾಯ ಸಂವತ್ತತೀ’’ತಿ। ದುತಿಯಂ।
‘‘Atthi , bhikkhave, maggo atthi paṭipadā imesañca tiṇṇaṃ samātāputtikānaṃ bhayānaṃ imesañca tiṇṇaṃ amātāputtikānaṃ bhayānaṃ pahānāya samatikkamāya saṃvattati. Katamo ca, bhikkhave, maggo katamā ca paṭipadā imesañca tiṇṇaṃ samātāputtikānaṃ bhayānaṃ imesañca tiṇṇaṃ amātāputtikānaṃ bhayānaṃ pahānāya samatikkamāya saṃvattati? Ayameva ariyo aṭṭhaṅgiko maggo, seyyathidaṃ – sammādiṭṭhi, sammāsaṅkapo, sammāvācā, sammākammanto, sammāājīvo, sammāvāyāmo, sammāsati, sammāsamādhi. Ayaṃ kho, bhikkhave, maggo ayaṃ paṭipadā imesañca tiṇṇaṃ samātāputtikānaṃ bhayānaṃ imesañca tiṇṇaṃ amātāputtikānaṃ bhayānaṃ pahānāya samatikkamāya saṃvattatī’’ti. Dutiyaṃ.
Footnotes:
Related texts:
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಅಙ್ಗುತ್ತರನಿಕಾಯ (ಅಟ್ಠಕಥಾ) • Aṅguttaranikāya (aṭṭhakathā) / ೨. ಭಯಸುತ್ತವಣ್ಣನಾ • 2. Bhayasuttavaṇṇanā
ಟೀಕಾ • Tīkā / ಸುತ್ತಪಿಟಕ (ಟೀಕಾ) • Suttapiṭaka (ṭīkā) / ಅಙ್ಗುತ್ತರನಿಕಾಯ (ಟೀಕಾ) • Aṅguttaranikāya (ṭīkā) / ೨. ಭಯಸುತ್ತವಣ್ಣನಾ • 2. Bhayasuttavaṇṇanā
