| Library / Tipiṭaka / તિપિટક • Tipiṭaka / અઙ્ગુત્તરનિકાય (અટ્ઠકથા) • Aṅguttaranikāya (aṭṭhakathā) |
૨. ભયસુત્તવણ્ણના
2. Bhayasuttavaṇṇanā
૬૩. દુતિયે અમાતાપુત્તિકાનીતિ માતા ચ પુત્તો ચ માતાપુત્તં, પરિત્તાતું સમત્થભાવેન નત્થિ એત્થ માતાપુત્તન્તિ અમાતાપુત્તિકાનિ. યન્તિ યસ્મિં સમયે. તત્થ માતાપિ પુત્તં નપ્પટિલભતીતિ તસ્મિં અગ્ગિભયે ઉપ્પન્ને માતાપિ પુત્તં પસ્સિતું ન લભતિ, પુત્તોપિ માતરં પસ્સિતું ન લભતીતિ અત્થો. ભયં હોતીતિ ચિત્તુત્રાસભયં હોતિ. અટવિસઙ્કોપોતિ અટવિયા સઙ્કોપો. અટવીતિ ચેત્થ અટવિવાસિનો ચોરા વેદિતબ્બા. યદા હિ તે અટવિતો જનપદં ઓતરિત્વા ગામનિગમરાજધાનિયો પહરિત્વા વિલુમ્પન્તિ, તદા અટવિસઙ્કોપો નામ હોતિ, તં સન્ધાયેતં વુત્તં. ચક્કસમારૂળ્હાતિ એત્થ ઇરિયાપથચક્કમ્પિ વટ્ટતિ યાનચક્કમ્પિ. ભયસ્મિં હિ સમ્પત્તે યેસં યાનકાનિ અત્થિ, તે અત્તનો પરિક્ખારભણ્ડં તેસુ આરોપેત્વા પલાયન્તિ. યેસં નત્થિ , તે કાજેન વા આદાય સીસેન વા ઉક્ખિપિત્વા પલાયન્તિયેવ. તે ચક્કસમારૂળ્હા નામ હોન્તિ. પરિયાયન્તીતિ ઇતો ચિતો ચ ગચ્છન્તિ. કદાચીતિ કિસ્મિઞ્ચિદેવ કાલે. કરહચીતિ તસ્સેવ વેવચનં. માતાપિ પુત્તં પટિલભતીતિ આગચ્છન્તં વા ગચ્છન્તં વા એકસ્મિં ઠાને નિલીનં વા પસ્સિતું લભતિ. ઉદકવાહકોતિ નદીપૂરો. માતાપિ પુત્તં પટિલભતીતિ કુલ્લે વા ઉળુમ્પે વા મત્તિકાભાજને વા દારુક્ખણ્ડે વા લગ્ગં વુય્હમાનં પસ્સિતું પટિલભતિ, સોત્થિના વા પુન ઉત્તરિત્વા ગામે વા અરઞ્ઞે વા ઠિતં પસ્સિતું લભતીતિ.
63. Dutiye amātāputtikānīti mātā ca putto ca mātāputtaṃ, parittātuṃ samatthabhāvena natthi ettha mātāputtanti amātāputtikāni. Yanti yasmiṃ samaye. Tattha mātāpi puttaṃ nappaṭilabhatīti tasmiṃ aggibhaye uppanne mātāpi puttaṃ passituṃ na labhati, puttopi mātaraṃ passituṃ na labhatīti attho. Bhayaṃ hotīti cittutrāsabhayaṃ hoti. Aṭavisaṅkopoti aṭaviyā saṅkopo. Aṭavīti cettha aṭavivāsino corā veditabbā. Yadā hi te aṭavito janapadaṃ otaritvā gāmanigamarājadhāniyo paharitvā vilumpanti, tadā aṭavisaṅkopo nāma hoti, taṃ sandhāyetaṃ vuttaṃ. Cakkasamārūḷhāti ettha iriyāpathacakkampi vaṭṭati yānacakkampi. Bhayasmiṃ hi sampatte yesaṃ yānakāni atthi, te attano parikkhārabhaṇḍaṃ tesu āropetvā palāyanti. Yesaṃ natthi , te kājena vā ādāya sīsena vā ukkhipitvā palāyantiyeva. Te cakkasamārūḷhā nāma honti. Pariyāyantīti ito cito ca gacchanti. Kadācīti kismiñcideva kāle. Karahacīti tasseva vevacanaṃ. Mātāpi puttaṃ paṭilabhatīti āgacchantaṃ vā gacchantaṃ vā ekasmiṃ ṭhāne nilīnaṃ vā passituṃ labhati. Udakavāhakoti nadīpūro. Mātāpi puttaṃ paṭilabhatīti kulle vā uḷumpe vā mattikābhājane vā dārukkhaṇḍe vā laggaṃ vuyhamānaṃ passituṃ paṭilabhati, sotthinā vā puna uttaritvā gāme vā araññe vā ṭhitaṃ passituṃ labhatīti.
એવં પરિયાયતો અમાતાપુત્તિકાનિ ભયાનિ દસ્સેત્વા ઇદાનિ નિપ્પરિયાયેન દસ્સેન્તો તીણિમાનીતિઆદિમાહ. તત્થ જરાભયન્તિ જરં પટિચ્ચ ઉપ્પજ્જનકભયં. ઇતરેસુપિ એસેવ નયો. વુત્તમ્પિ ચેતં – ‘‘જરં પટિચ્ચ ઉપ્પજ્જતિ ભયં ભયાનકં છમ્ભિતત્તં લોમહંસો ચેતસો ઉત્રાસો. બ્યાધિં પટિચ્ચ, મરણં પટિચ્ચ ઉપ્પજ્જતિ ભયં ભયાનકં છમ્ભિતત્તં લોમહંસો ચેતસો ઉત્રાસો’’તિ (વિભ॰ ૯૨૧). સેસં સબ્બત્થ ઉત્તાનમેવાતિ.
Evaṃ pariyāyato amātāputtikāni bhayāni dassetvā idāni nippariyāyena dassento tīṇimānītiādimāha. Tattha jarābhayanti jaraṃ paṭicca uppajjanakabhayaṃ. Itaresupi eseva nayo. Vuttampi cetaṃ – ‘‘jaraṃ paṭicca uppajjati bhayaṃ bhayānakaṃ chambhitattaṃ lomahaṃso cetaso utrāso. Byādhiṃ paṭicca, maraṇaṃ paṭicca uppajjati bhayaṃ bhayānakaṃ chambhitattaṃ lomahaṃso cetaso utrāso’’ti (vibha. 921). Sesaṃ sabbattha uttānamevāti.
Related texts:
તિપિટક (મૂલ) • Tipiṭaka (Mūla) / સુત્તપિટક • Suttapiṭaka / અઙ્ગુત્તરનિકાય • Aṅguttaranikāya / ૨. ભયસુત્તં • 2. Bhayasuttaṃ
ટીકા • Tīkā / સુત્તપિટક (ટીકા) • Suttapiṭaka (ṭīkā) / અઙ્ગુત્તરનિકાય (ટીકા) • Aṅguttaranikāya (ṭīkā) / ૨. ભયસુત્તવણ્ણના • 2. Bhayasuttavaṇṇanā
