| Library / Tipiṭaka / તિપિટક • Tipiṭaka / અઙ્ગુત્તરનિકાય (ટીકા) • Aṅguttaranikāya (ṭīkā) |
નમો તસ્સ ભગવતો અરહતો સમ્માસમ્બુદ્ધસ્સ
Namo tassa bhagavato arahato sammāsambuddhassa
અઙ્ગુત્તરનિકાયે
Aṅguttaranikāye
તિકનિપાત-ટીકા
Tikanipāta-ṭīkā
૧. પઠમપણ્ણાસકં
1. Paṭhamapaṇṇāsakaṃ
૧. બાલવગ્ગો
1. Bālavaggo
૧. ભયસુત્તવણ્ણના
1. Bhayasuttavaṇṇanā
૧. તિકનિપાતસ્સ પઠમે ભયન્તિ ભીતિ ચેતસો બ્યધોતિ આહ ‘‘ચિત્તુત્રાસો’’તિ. ઉપદ્દવોતિ અન્તરાયો. તસ્સ પન વિક્ખેપકારણત્તા વુત્તં ‘‘અનેકગ્ગતાકારો’’તિ. ઉપસગ્ગોતિ ઉપસજ્જનં, દેવતોપપીળાદિના અપ્પટિકારવિઘાતાપત્તિ. સા પન યસ્મા પટિકારાભાવેન વિહઞ્ઞમાનસ્સ કિઞ્ચિ કાતું અસમત્થસ્સ ઓસીદનકારણં, તસ્મા વુત્તં ‘‘તત્થ તત્થ લગ્ગનાકારો’’તિ. યથાવુત્તે દિવસે અનાગચ્છન્તેસૂતિ વઞ્ચેત્વા આગન્તું નિયમિતદિવસે અનાગચ્છન્તેસુ. દ્વારે અગ્ગિં દત્વાતિ બહિ અનિક્ખમનત્થાય દ્વારે અગ્ગિં દત્વા.
1. Tikanipātassa paṭhame bhayanti bhīti cetaso byadhoti āha ‘‘cittutrāso’’ti. Upaddavoti antarāyo. Tassa pana vikkhepakāraṇattā vuttaṃ ‘‘anekaggatākāro’’ti. Upasaggoti upasajjanaṃ, devatopapīḷādinā appaṭikāravighātāpatti. Sā pana yasmā paṭikārābhāvena vihaññamānassa kiñci kātuṃ asamatthassa osīdanakāraṇaṃ, tasmā vuttaṃ ‘‘tattha tattha lagganākāro’’ti. Yathāvutte divase anāgacchantesūti vañcetvā āgantuṃ niyamitadivase anāgacchantesu. Dvāre aggiṃ datvāti bahi anikkhamanatthāya dvāre aggiṃ datvā.
નળેહિ છન્નપટિચ્છન્નાતિ નળેહિ તિણચ્છદનસઙ્ખેપેન ઉપરિ છાદેત્વા તેહિયેવ દારુકુટિકનિયામેન પરિતોપિ છાદિતા. એસેવ નયોતિ ઇમિના તિણેહિ છન્નતં સેસસમ્ભારાનં રુક્ખમયતઞ્ચ અતિદિસતિ.
Naḷehichannapaṭicchannāti naḷehi tiṇacchadanasaṅkhepena upari chādetvā tehiyeva dārukuṭikaniyāmena paritopi chāditā. Eseva nayoti iminā tiṇehi channataṃ sesasambhārānaṃ rukkhamayatañca atidisati.
વિધવપુત્તેતિ અન્તભાવોપલક્ખણં. તે હિ નિપ્પિતિકા અવિનીતા અસંયતા યં કિઞ્ચિ કારિનો. સેસમેત્થ ઉત્તાનમેવ.
Vidhavaputteti antabhāvopalakkhaṇaṃ. Te hi nippitikā avinītā asaṃyatā yaṃ kiñci kārino. Sesamettha uttānameva.
ભયસુત્તવણ્ણના નિટ્ઠિતા.
Bhayasuttavaṇṇanā niṭṭhitā.
Related texts:
તિપિટક (મૂલ) • Tipiṭaka (Mūla) / સુત્તપિટક • Suttapiṭaka / અઙ્ગુત્તરનિકાય • Aṅguttaranikāya / ૧. ભયસુત્તં • 1. Bhayasuttaṃ
અટ્ઠકથા • Aṭṭhakathā / સુત્તપિટક (અટ્ઠકથા) • Suttapiṭaka (aṭṭhakathā) / અઙ્ગુત્તરનિકાય (અટ્ઠકથા) • Aṅguttaranikāya (aṭṭhakathā) / ૧. ભયસુત્તવણ્ણના • 1. Bhayasuttavaṇṇanā
