| Library / Tipiṭaka / તિપિટક • Tipiṭaka / અઙ્ગુત્તરનિકાય (ટીકા) • Aṅguttaranikāya (ṭīkā) |
૨. ભયસુત્તવણ્ણના
2. Bhayasuttavaṇṇanā
૬૩. દુતિયે પરિત્તાતું સમત્થભાવેનાતિ ઉપ્પન્નભયતો રક્ખિતું સમત્થભાવેન. નત્થિ એત્થ માતાપુત્તં અઞ્ઞમઞ્ઞં તાયિતું સમત્થન્તિ અમાતાપુત્તાનિ, તાનિયેવ અમાતાપુત્તિકાનિ. તેનાહ ‘‘નત્થિ એત્થા’’તિઆદિ. યન્તિ ભુમ્મત્થે ઉપયોગવચનન્તિ આહ ‘‘યસ્મિં સમયે’’તિ. માતાપિ પુત્તં પસ્સિતું ન લભતિ, પરિત્તાતું ન સમત્થન્તિ અધિપ્પાયો . પુત્તોપિ માતરન્તિ એત્થાપિ એસેવ નયો. ચિત્તુત્રાસોયેવ ભયં ચિત્તુત્રાસભયં. ઇમિના ઓત્તપ્પભયાદિં નિવત્તેતિ. અટવિગ્ગહણેન અટવિવાસિનો વુત્તા ‘‘સબ્બો ગામો આગતો’’તિઆદીસુ વિયાતિ આહ ‘‘અટવીતિ ચેત્થ અટવિવાસિનો ચોરા વેદિતબ્બા’’તિ. એતેતિ અટવિવાસિનો ચોરા. એતં વુત્તન્તિ ‘‘અટવિસઙ્કોપો’’તિ ઇદં વુત્તં. ઠાનગમનાદિઇરિયાપથચક્કસમઙ્ગિનો ઇરિયાપથચક્કસમારુળ્હા નામ હોન્તીતિ આહ ‘‘ઇરિયાપથચક્કમ્પિ વટ્ટતી’’તિ. ઇરિયાપથોયેવ પવત્તનટ્ઠેન ચક્કન્તિ ઇરિયાપથચક્કં.
63. Dutiye parittātuṃ samatthabhāvenāti uppannabhayato rakkhituṃ samatthabhāvena. Natthi ettha mātāputtaṃ aññamaññaṃ tāyituṃ samatthanti amātāputtāni, tāniyeva amātāputtikāni. Tenāha ‘‘natthi etthā’’tiādi. Yanti bhummatthe upayogavacananti āha ‘‘yasmiṃ samaye’’ti. Mātāpi puttaṃ passituṃ na labhati, parittātuṃ na samatthanti adhippāyo . Puttopi mātaranti etthāpi eseva nayo. Cittutrāsoyeva bhayaṃ cittutrāsabhayaṃ. Iminā ottappabhayādiṃ nivatteti. Aṭaviggahaṇena aṭavivāsino vuttā ‘‘sabbo gāmo āgato’’tiādīsu viyāti āha ‘‘aṭavīti cettha aṭavivāsino corā veditabbā’’ti. Eteti aṭavivāsino corā. Etaṃ vuttanti ‘‘aṭavisaṅkopo’’ti idaṃ vuttaṃ. Ṭhānagamanādiiriyāpathacakkasamaṅgino iriyāpathacakkasamāruḷhā nāma hontīti āha ‘‘iriyāpathacakkampi vaṭṭatī’’ti. Iriyāpathoyeva pavattanaṭṭhena cakkanti iriyāpathacakkaṃ.
પરિયાયન્તીતિ પરિતો તેન તેન દિસાભાગેન ગચ્છન્તિ. તેનાહ ‘‘ઇતો ચિતો ચ ગચ્છન્તી’’તિ. માતુપેમેન ગન્તું અવિસહિત્વા અત્તનો સન્તિકં આગચ્છન્તં. અત્તસિનેહસ્સ બલવભાવતો માતરમ્પિ અનપેક્ખિત્વા ‘‘અત્તાનંયેવ રક્ખિસ્સામી’’તિ ગચ્છન્તં. એકસ્મિં ઠાને નિલીનન્તિ વુત્તનયેનેવ ગન્ત્વા એકસ્મિં ખેમે પદેસે નિસિન્નં. કુલ્લે વાતિઆદીસુ કૂલં પરતીરં વહતિ પાપેતીહિ કુલ્લો, તરણત્થાય વેળુનળાદીહિ કલાપં કત્વા બદ્ધો. પત્થરિત્વા બદ્ધો પન ઉળુમ્પો, ચાટિઆદિ મત્તિકાભાજનં. વુય્હમાનન્તિ ઉદકોઘેન અધોસોતં નીયમાનં.
Pariyāyantīti parito tena tena disābhāgena gacchanti. Tenāha ‘‘ito cito ca gacchantī’’ti. Mātupemena gantuṃ avisahitvā attano santikaṃ āgacchantaṃ. Attasinehassa balavabhāvato mātarampi anapekkhitvā ‘‘attānaṃyeva rakkhissāmī’’ti gacchantaṃ. Ekasmiṃ ṭhāne nilīnanti vuttanayeneva gantvā ekasmiṃ kheme padese nisinnaṃ. Kulle vātiādīsu kūlaṃ paratīraṃ vahati pāpetīhi kullo, taraṇatthāya veḷunaḷādīhi kalāpaṃ katvā baddho. Pattharitvā baddho pana uḷumpo, cāṭiādi mattikābhājanaṃ. Vuyhamānanti udakoghena adhosotaṃ nīyamānaṃ.
યથાવુત્તાનિ તીણિ ભયાનિ સમાતાપુત્તિકાનિયેવ અસ્સુતવતો પુથુજ્જનસ્સ વસેન અમાતાપુત્તિકાનિ દસ્સિતાનીતિ આહ ‘‘એવં પરિયાયતો અમાતાપુત્તિકાનિ ભયાનિ દસ્સેત્વા’’તિ.
Yathāvuttāni tīṇi bhayāni samātāputtikāniyeva assutavato puthujjanassa vasena amātāputtikāni dassitānīti āha ‘‘evaṃ pariyāyato amātāputtikāni bhayāni dassetvā’’ti.
ભયસુત્તવણ્ણના નિટ્ઠિતા.
Bhayasuttavaṇṇanā niṭṭhitā.
Related texts:
તિપિટક (મૂલ) • Tipiṭaka (Mūla) / સુત્તપિટક • Suttapiṭaka / અઙ્ગુત્તરનિકાય • Aṅguttaranikāya / ૨. ભયસુત્તં • 2. Bhayasuttaṃ
અટ્ઠકથા • Aṭṭhakathā / સુત્તપિટક (અટ્ઠકથા) • Suttapiṭaka (aṭṭhakathā) / અઙ્ગુત્તરનિકાય (અટ્ઠકથા) • Aṅguttaranikāya (aṭṭhakathā) / ૨. ભયસુત્તવણ્ણના • 2. Bhayasuttavaṇṇanā
