| Library / Tipiṭaka / တိပိဋက • Tipiṭaka / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) |
၃. ဘယသုတ္တဝဏ္ဏနာ
3. Bhayasuttavaṇṇanā
၂၃. တတိယေ ကာမရာဂရတ္တာယန္တိ ကာမရာဂရတ္တော အယံ။ ဆန္ဒရာဂဝိနိဗဒ္ဓောတိ ဆန္ဒရာဂေန ဝိနိဗဒ္ဓော။ ဘယာတိ စိတ္တုတ္ရာသဘယာ။ ပင္ကာတိ ကိလေသပင္ကတော။ သင္ဂော ပင္ကော စ ဥဘယန္တိ သင္ဂော စ ပင္ကော စ ဣဒမ္ပိ ဥဘယံ။ ဧတေ ကာမာ ပဝုစ္စန္တိ, ယတ္ထ သတ္တော ပုထုဇ္ဇနောတိ ယသ္မိံ သင္ဂေ စ ပင္ကေ စ ပုထုဇ္ဇနော သတ္တော လဂ္ဂော လဂ္ဂိတော ပလိဗုဒ္ဓော။ ဥပာဒာနေတိ စတုဗ္ဗိဓေ ဥပာဒာနေ။ ဇာတိမရဏသမ္ဘဝေတိ ဇာတိယာ စ မရဏသ္သ စ သမ္ဘဝေ ပစ္စယဘူတေ။ အနုပာဒာ ဝိမုစ္စန္တီတိ အနုပာဒိယိတ္ဝာ ဝိမုစ္စန္တိ။ ဇာတိမရဏသင္ခယေတိ ဇာတိမရဏာနံ သင္ခယသင္ခာတေ နိဗ္ဗာနေ, နိဗ္ဗာနာရမ္မဏာယ ဝိမုတ္တိယာ ဝိမုစ္စန္တီတိ အတ္ထော။ ဣမသ္မိံ ဌာနေ ဝိဝဋ္ဋေတ္ဝာ အရဟတ္တမေဝ ပတ္တော ဧသ ဘိက္ခု။ ဣဒာနိ တံ ခီဏာသဝံ ထောမေန္တော တေ ခေမပ္ပတ္တာတိအာဒိမာဟ။ တတ္ထ ခေမပ္ပတ္တာတိ ခေမဘာဝံ ပတ္တာ။ သုခိနောတိ လောကုတ္တရသုခေန သုခိတာ။ ဒိဋ္ဌဓမ္မာဘိနိဗ္ဗုတာတိ အဗ္ဘန္တရေ ကိလေသာဘာဝေန ဒိဋ္ဌဓမ္မေယေဝ အဘိနိဗ္ဗုတာ။ ဣမသ္မိံ သုတ္တေ ဝဋ္ဋမေဝ ကထေတ္ဝာ ဂာထာသု ဝဋ္ဋဝိဝဋံ ကထိတံ။
23. Tatiye kāmarāgarattāyanti kāmarāgaratto ayaṃ. Chandarāgavinibaddhoti chandarāgena vinibaddho. Bhayāti cittutrāsabhayā. Paṅkāti kilesapaṅkato. Saṅgo paṅko ca ubhayanti saṅgo ca paṅko ca idampi ubhayaṃ. Ete kāmā pavuccanti, yattha satto puthujjanoti yasmiṃ saṅge ca paṅke ca puthujjano satto laggo laggito palibuddho. Upādāneti catubbidhe upādāne. Jātimaraṇasambhaveti jātiyā ca maraṇassa ca sambhave paccayabhūte. Anupādāvimuccantīti anupādiyitvā vimuccanti. Jātimaraṇasaṅkhayeti jātimaraṇānaṃ saṅkhayasaṅkhāte nibbāne, nibbānārammaṇāya vimuttiyā vimuccantīti attho. Imasmiṃ ṭhāne vivaṭṭetvā arahattameva patto esa bhikkhu. Idāni taṃ khīṇāsavaṃ thomento te khemappattātiādimāha. Tattha khemappattāti khemabhāvaṃ pattā. Sukhinoti lokuttarasukhena sukhitā. Diṭṭhadhammābhinibbutāti abbhantare kilesābhāvena diṭṭhadhammeyeva abhinibbutā. Imasmiṃ sutte vaṭṭameva kathetvā gāthāsu vaṭṭavivaṭaṃ kathitaṃ.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / အင္ဂုတ္တရနိကာယ • Aṅguttaranikāya / ၃. ဘယသုတ္တံ • 3. Bhayasuttaṃ
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / အင္ဂုတ္တရနိကာယ (ဋီကာ) • Aṅguttaranikāya (ṭīkā) / ၃. ဘယသုတ္တဝဏ္ဏနာ • 3. Bhayasuttavaṇṇanā
