A World of Knowledge
    Library / Tipiṭaka / ཏིཔིཊཀ • Tipiṭaka / ཁུདྡསིཀྑཱ-མཱུལསིཀྑཱ • Khuddasikkhā-mūlasikkhā

    ༣༦. བྷེསཛྫནིདྡེསོ

    36. Bhesajjaniddeso

    བྷེསཛྫནྟི –

    Bhesajjanti –

    ༢༧༤.

    274.

    ཛནསྶ ཀཱཏུཾ བྷེསཛྫཾ, དཱཏུཾ ཝཏྟུཾ ན ལབྦྷཏི།

    Janassa kātuṃ bhesajjaṃ, dātuṃ vattuṃ na labbhati;

    བྷིཀྑཱཙརིཡཝིཉྙཏྟི, སཀེཧི སཧདྷམྨིནཾ༎

    Bhikkhācariyaviññatti, sakehi sahadhamminaṃ.

    ༢༧༥.

    275.

    པིཏཱུནཾ ཏདུཔཊྛཱཀབྷིཀྑུནིསྶིཏབྷཎྜུནཾ།

    Pitūnaṃ tadupaṭṭhākabhikkhunissitabhaṇḍunaṃ;

    ལབྦྷཾ བྷེསཛྫཀརཎཾ, ཝེཡྻཱཝཙྩཀརསྶ ཙ༎

    Labbhaṃ bhesajjakaraṇaṃ, veyyāvaccakarassa ca.

    ༢༧༦.

    276.

    མཧཱཙཱུལ༹པིཏཱམཱཏཱབྷཱཏཱབྷགིནིཨཱདིནཾ།

    Mahācūḷapitāmātābhātābhaginiādinaṃ;

    ཏེསཾ སཀེནཏྟནིཡེ, དཱཏབྦཾ ཏཱཝཀཱལིཀཾ༎

    Tesaṃ sakenattaniye, dātabbaṃ tāvakālikaṃ.

    ༢༧༧.

    277.

    ཀུལདཱུསནཝིཉྙཏྟི, བྷེསཛྫཀརཎཱདི ཧི།

    Kuladūsanaviññatti, bhesajjakaraṇādi hi;

    མཱཏཱཔིཏཱུཧི སམྦནྡྷཉཱཏཀེསུ ན རཱུཧཏི༎

    Mātāpitūhi sambandhañātakesu na rūhati.

    ༢༧༨.

    278.

    པིཎྜཔཱཏོ ཨནཱམཊྛོ, མཱཏཱདཱིནམཝཱརིཏོ།

    Piṇḍapāto anāmaṭṭho, mātādīnamavārito;

    ཚནྣཾ དཱམརིཀཙོརསྶ, དཱཏུམིསྶརིཡསྶ ཙ༎

    Channaṃ dāmarikacorassa, dātumissariyassa ca.

    ༢༧༩.

    279.

    ཏེསཾ སུཏྟོདཀེཧེཝ, པརིཏྟཾ ཀཡིརཱ ནཏྟནོ།

    Tesaṃ suttodakeheva, parittaṃ kayirā nattano;

    བྷཎིཏབྦཾ བྷཎཱཔེནྟེ, པརིཏྟཾ སཱསནོགདྷཾ༎

    Bhaṇitabbaṃ bhaṇāpente, parittaṃ sāsanogadhaṃ.

    ༢༨༠.

    280.

    སཱིལཾ དྷམྨཾ པརིཏྟཾ ཝཱ, ཨཱགནྟྭཱ དེཏུ བྷཱསཏུ།

    Sīlaṃ dhammaṃ parittaṃ vā, āgantvā detu bhāsatu;

    དཱཏུཾ ཝཏྟུཉྩ ལབྦྷཏི, གནྟྭཱ ཀེནཙི པེསིཏོཏི༎

    Dātuṃ vattuñca labbhati, gantvā kenaci pesitoti.





    © 1991-2025 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact