| Library / Tipiṭaka / ತಿಪಿಟಕ • Tipiṭaka / ಅಪದಾನ-ಅಟ್ಠಕಥಾ • Apadāna-aṭṭhakathā |
೧೧. ಭಿಕ್ಖದಾಯಿವಗ್ಗೋ
11. Bhikkhadāyivaggo
೧. ಭಿಕ್ಖಾದಾಯಕತ್ಥೇರಅಪದಾನವಣ್ಣನಾ
1. Bhikkhādāyakattheraapadānavaṇṇanā
ಸುವಣ್ಣವಣ್ಣಂ ಸಮ್ಬುದ್ಧನ್ತಿಆದಿಕಂ ಆಯಸ್ಮತೋ ಭಿಕ್ಖಾದಾಯಕತ್ಥೇರಸ್ಸ ಅಪದಾನಂ। ಅಯಮ್ಪಿ ಪುರಿಮಜಿನವರೇಸು ಕತಾಧಿಕಾರೋ ತತ್ಥ ತತ್ಥ ಭವೇ ವಿವಟ್ಟೂಪನಿಸ್ಸಯಾನಿ ಪುಞ್ಞಾನಿ ಉಪಚಿನನ್ತೋ ಸಿದ್ಧತ್ಥಸ್ಸ ಭಗವತೋ ಕಾಲೇ ಏಕಸ್ಮಿಂ ಕುಲಗೇಹೇ ನಿಬ್ಬತ್ತೋ ವುದ್ಧಿಮನ್ವಾಯ ವಿಭವಸಮ್ಪನ್ನೋ ಸದ್ಧಾಜಾತೋ ವಿಹಾರತೋ ನಿಕ್ಖಮಿತ್ವಾ ಪಿಣ್ಡಾಯ ಚರಮಾನಂ ಸಿದ್ಧತ್ಥಂ ಭಗವನ್ತಂ ದಿಸ್ವಾ ಪಸನ್ನಮಾನಸೋ ಆಹಾರಮದಾಸಿ। ಭಗವಾ ತಂ ಪಟಿಗ್ಗಹೇತ್ವಾ ಅನುಮೋದನಂ ವತ್ವಾ ಪಕ್ಕಾಮಿ। ಸೋ ತೇನೇವ ಕುಸಲೇನ ಯಾವತಾಯುಕಂ ಠತ್ವಾ ಆಯುಪರಿಯೋಸಾನೇ ದೇವಲೋಕೇ ನಿಬ್ಬತ್ತೋ ತತ್ಥ ಛ ಕಾಮಾವಚರಸಮ್ಪತ್ತಿಯೋ ಅನುಭವಿತ್ವಾ ಮನುಸ್ಸೇಸು ಚ ಮನುಸ್ಸಸಮ್ಪತ್ತಿಮನುಭವಿತ್ವಾ ಇಮಸ್ಮಿಂ ಬುದ್ಧುಪ್ಪಾದೇ ಕುಲಗೇಹೇ ನಿಬ್ಬತ್ತೋ ವುದ್ಧಿಮನ್ವಾಯ ಸದ್ಧಾಜಾತೋ ಪಬ್ಬಜಿತ್ವಾ ನಚಿರಸ್ಸೇವ ಅರಹಾ ಅಹೋಸಿ।
Suvaṇṇavaṇṇaṃsambuddhantiādikaṃ āyasmato bhikkhādāyakattherassa apadānaṃ. Ayampi purimajinavaresu katādhikāro tattha tattha bhave vivaṭṭūpanissayāni puññāni upacinanto siddhatthassa bhagavato kāle ekasmiṃ kulagehe nibbatto vuddhimanvāya vibhavasampanno saddhājāto vihārato nikkhamitvā piṇḍāya caramānaṃ siddhatthaṃ bhagavantaṃ disvā pasannamānaso āhāramadāsi. Bhagavā taṃ paṭiggahetvā anumodanaṃ vatvā pakkāmi. So teneva kusalena yāvatāyukaṃ ṭhatvā āyupariyosāne devaloke nibbatto tattha cha kāmāvacarasampattiyo anubhavitvā manussesu ca manussasampattimanubhavitvā imasmiṃ buddhuppāde kulagehe nibbatto vuddhimanvāya saddhājāto pabbajitvā nacirasseva arahā ahosi.
೧. ಸೋ ಅಪರಭಾಗೇ ಅತ್ತನೋ ಪುಬ್ಬಕಮ್ಮಂ ಅನುಸ್ಸರಿತ್ವಾ ಸೋಮನಸ್ಸಜಾತೋ ಪುಬ್ಬಚರಿತಾಪದಾನಂ ಪಕಾಸೇನ್ತೋ ಸುವಣ್ಣವಣ್ಣಂ ಸಮ್ಬುದ್ಧನ್ತಿಆದಿಮಾಹ। ತಂ ಸಬ್ಬಂ ಹೇಟ್ಠಾ ವುತ್ತನಯಮೇವ। ಪವರಾ ಅಭಿನಿಕ್ಖನ್ತನ್ತಿ ಪಕಾರೇನ ವರಿತಬ್ಬಂ ಪತ್ಥೇತಬ್ಬನ್ತಿ ಪವರಂ, ರಮ್ಮಭೂತತೋ ವಿವೇಕಭೂತತೋ ಸಕವಿಹಾರತೋ ಅಭಿ ವಿಸೇಸೇನ ನಿಕ್ಖನ್ತನ್ತಿ ಅತ್ಥೋ। ವಾನಾ ನಿಬ್ಬಾನಮಾಗತನ್ತಿ ವಾನಂ ವುಚ್ಚತಿ ತಣ್ಹಾ, ತತೋ ನಿಕ್ಖನ್ತತ್ತಾ ನಿಬ್ಬಾನಂ, ವಾನನಾಮಂ ತಣ್ಹಂ ಪಧಾನಂ ಕತ್ವಾ ಸಬ್ಬಕಿಲೇಸೇ ಪಹಾಯ ನಿಬ್ಬಾನಂ ಪತ್ತನ್ತಿ ಅತ್ಥೋ।
1. So aparabhāge attano pubbakammaṃ anussaritvā somanassajāto pubbacaritāpadānaṃ pakāsento suvaṇṇavaṇṇaṃ sambuddhantiādimāha. Taṃ sabbaṃ heṭṭhā vuttanayameva. Pavarā abhinikkhantanti pakārena varitabbaṃ patthetabbanti pavaraṃ, rammabhūtato vivekabhūtato sakavihārato abhi visesena nikkhantanti attho. Vānā nibbānamāgatanti vānaṃ vuccati taṇhā, tato nikkhantattā nibbānaṃ, vānanāmaṃ taṇhaṃ padhānaṃ katvā sabbakilese pahāya nibbānaṃ pattanti attho.
೨. ಕಟಚ್ಛುಭಿಕ್ಖಂ ದತ್ವಾನಾತಿ ಕರತಲೇನ ಗಹೇತಬ್ಬಾ ದಬ್ಬಿ ಕಟಚ್ಛು, ಭಿಕ್ಖೀಯತಿ ಆಯಾಚೀಯತೀತಿ ಭಿಕ್ಖಾ, ಅಭಿ ವಿಸೇಸೇನ ಖಾದಿತಬ್ಬಾ ಭಕ್ಖಿತಬ್ಬಾತಿ ವಾ ಭಿಕ್ಖಾ, ಕಟಚ್ಛುನಾ ಗಹೇತಬ್ಬಾ ಭಿಕ್ಖಾ ಕಟಚ್ಛುಭಿಕ್ಖಾ, ದಬ್ಬಿಯಾ ಭತ್ತಂ ದತ್ವಾತಿ ಅತ್ಥೋ। ಸೇಸಂ ಸಬ್ಬತ್ಥ ಉತ್ತಾನತ್ಥಮೇವಾತಿ।
2.Kaṭacchubhikkhaṃ datvānāti karatalena gahetabbā dabbi kaṭacchu, bhikkhīyati āyācīyatīti bhikkhā, abhi visesena khāditabbā bhakkhitabbāti vā bhikkhā, kaṭacchunā gahetabbā bhikkhā kaṭacchubhikkhā, dabbiyā bhattaṃ datvāti attho. Sesaṃ sabbattha uttānatthamevāti.
ಭಿಕ್ಖಾದಾಯಕತ್ಥೇರಅಪದಾನವಣ್ಣನಾ ಸಮತ್ತಾ।
Bhikkhādāyakattheraapadānavaṇṇanā samattā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಖುದ್ದಕನಿಕಾಯ • Khuddakanikāya / ಅಪದಾನಪಾಳಿ • Apadānapāḷi / ೧. ಭಿಕ್ಖದಾಯಕತ್ಥೇರಅಪದಾನಂ • 1. Bhikkhadāyakattheraapadānaṃ
