| Library / Tipiṭaka / திபிடக • Tipiṭaka / வினயவினிச்ச²ய-டீகா • Vinayavinicchaya-ṭīkā |
பி⁴க்கு²னிக்க²ந்த⁴ககதா²வண்ணனா
Bhikkhunikkhandhakakathāvaṇṇanā
2952. விவரித்வான சீவரங் அபனெத்வா.
2952.Vivaritvāna cīvaraṃ apanetvā.
2953. யங் கிஞ்சி ஸம்பயோஜெந்தியாதி யங் கிஞ்சி அனாசாரங் கரொந்தியா. ததோதி தேன அனாசாரஸங்கா²தேன அஸத்³த⁴ம்மேன. பா⁴ஸந்தியாதி வாசாய பா⁴ஸந்தியா.
2953.Yaṃ kiñci sampayojentiyāti yaṃ kiñci anācāraṃ karontiyā. Tatoti tena anācārasaṅkhātena asaddhammena. Bhāsantiyāti vācāya bhāsantiyā.
2954-6. தீ³க⁴ந்தி ஏகபரிக்கே²பதோ தீ³க⁴ங். விலீவேன ச பட்டேனாதி ஸண்ஹேஹிபி விலீவேஹி கதபட்டேன. சம்மபட்டேனாதி சம்மமயபட்டேன. து³ஸ்ஸபட்டேனாதி ஸேதவத்தே²ன. து³ஸ்ஸவேணியாதி து³ஸ்ஸேன க³ண்டி²தவேணியா. து³ஸ்ஸவட்டியாதி து³ஸ்ஸேன கதவட்டியா . ந பா²ஸுகா நமேதப்³பா³தி மஜ்ஜி²மஸ்ஸ தனுபா⁴வத்தா²ய கா³மதா³ரிகா விய பா²ஸுலிகா ந நாமேதப்³பா³. ஜக⁴னந்தி முத்தகரணப்பதே³ஸங். அட்டி²காதி³னாதி கோ³ஜாணுட்டி²காதி³னா. ந க⁴ங்ஸாபெய்யாதி ந க⁴ட்டாபெய்ய. ‘‘அட்டி²காதி³னா’’தி இத³ங் ‘‘ந க⁴ங்ஸாபெய்யா’’தி இமினா ச ‘‘கொட்டாபேதீ’’தி இமினா கிரியாபதே³ன ச ஸம்ப³ந்தி⁴தப்³ப³ங்.
2954-6.Dīghanti ekaparikkhepato dīghaṃ. Vilīvena ca paṭṭenāti saṇhehipi vilīvehi katapaṭṭena. Cammapaṭṭenāti cammamayapaṭṭena. Dussapaṭṭenāti setavatthena. Dussaveṇiyāti dussena gaṇṭhitaveṇiyā. Dussavaṭṭiyāti dussena katavaṭṭiyā . Na phāsukā nametabbāti majjhimassa tanubhāvatthāya gāmadārikā viya phāsulikā na nāmetabbā. Jaghananti muttakaraṇappadesaṃ. Aṭṭhikādināti gojāṇuṭṭhikādinā. Na ghaṃsāpeyyāti na ghaṭṭāpeyya. ‘‘Aṭṭhikādinā’’ti idaṃ ‘‘na ghaṃsāpeyyā’’ti iminā ca ‘‘koṭṭāpetī’’ti iminā kiriyāpadena ca sambandhitabbaṃ.
2957. ‘‘கொட்டாபேதீ’’தி இத³ங் ‘‘ஹத்த²ங் வா’’திஆதீ³ஹி உபயோக³ந்தபதே³ஹி பச்சேகங் யோஜேதப்³ப³ங். ஹத்த²ந்தி அக்³க³பா³ஹங். ஹத்த²கொச்ச²ந்தி பிட்டி²ஹத்த²ங். பாத³ந்தி ஜங்க⁴ங்.
2957.‘‘Koṭṭāpetī’’ti idaṃ ‘‘hatthaṃ vā’’tiādīhi upayogantapadehi paccekaṃ yojetabbaṃ. Hatthanti aggabāhaṃ. Hatthakocchanti piṭṭhihatthaṃ. Pādanti jaṅghaṃ.
2958. ந முக²ங் லிம்பிதப்³ப³ந்தி ச²விபஸாத³கரேன திலஸாஸபகக்காதி³னா அனேகவிதே⁴ன லிம்பனேன ந லிம்பிதப்³ப³ங். ந சுண்ணேதப்³ப³ந்தி முக²சுண்ணலேபனங் ந காதப்³ப³ங். மனோஸிலாய முக²ங் லஞ்ஜந்தியா ஆபத்தி ஸியாதி யோஜனா.
2958.Na mukhaṃ limpitabbanti chavipasādakarena tilasāsapakakkādinā anekavidhena limpanena na limpitabbaṃ. Na cuṇṇetabbanti mukhacuṇṇalepanaṃ na kātabbaṃ. Manosilāya mukhaṃ lañjantiyā āpatti siyāti yojanā.
2959. அங்க³ராகோ³ ந காதப்³போ³தி ஹலித்³தி³குங்குமாதீ³ஹி ஸரீரச்ச²விராகோ³ ந காதப்³போ³. அவங்க³ங் ந ச காதப்³ப³ந்தி அஞ்ஜனங் ப³ஹி அக்கி²கோடியா லேக²ங் ட²பெத்வா ந அஞ்ஜிதப்³ப³ங். ந காதப்³ப³ங் விஸேஸகந்தி க³ண்ட³பதே³ஸே விசித்ரஸண்டா²னங் விஸேஸகங் வத்தப⁴ங்க³ங் ந காதப்³ப³ங்.
2959.Aṅgarāgo na kātabboti haliddikuṅkumādīhi sarīracchavirāgo na kātabbo. Avaṅgaṃ na ca kātabbanti añjanaṃ bahi akkhikoṭiyā lekhaṃ ṭhapetvā na añjitabbaṃ. Na kātabbaṃ visesakanti gaṇḍapadese vicitrasaṇṭhānaṃ visesakaṃ vattabhaṅgaṃ na kātabbaṃ.
2960. ஓலோகனகதோதி வாதபானதோ. ராகா³தி காமராகே³ன. ஓலோகேதுந்தி அந்தரவீதி²ங் விலோகேதுங், ஸாலோகே ந ச டா²தப்³ப³ந்தி யோஜனா. ஸாலோகே த்³வாரங் விவரித்வா உபட்³ட⁴காயங் த³ஸ்ஸெந்தீஹி ந டா²தப்³ப³ங். ஸனச்சந்தி நடஸமஜ்ஜங்.
2960.Olokanakatoti vātapānato. Rāgāti kāmarāgena. Oloketunti antaravīthiṃ viloketuṃ, sāloke na ca ṭhātabbanti yojanā. Sāloke dvāraṃ vivaritvā upaḍḍhakāyaṃ dassentīhi na ṭhātabbaṃ. Sanaccanti naṭasamajjaṃ.
2961. க³ணிகங் வுட்டா²பெந்தியா வேஸிங் வுட்டா²பெந்தியா. ‘‘விக்கிணந்தியா’’தி இத³ங் ‘‘ஸுர’’ந்திஆதீ³ஹி உபயோக³ந்தபதே³ஹி பச்சேகங் யோஜேதப்³ப³ங்.
2961.Gaṇikaṃ vuṭṭhāpentiyā vesiṃ vuṭṭhāpentiyā. ‘‘Vikkiṇantiyā’’ti idaṃ ‘‘sura’’ntiādīhi upayogantapadehi paccekaṃ yojetabbaṃ.
2963. ந சேவுபட்டா²பேதப்³போ³தி அத்தனோ வெய்யாவச்சங் நேவ காராபேதப்³போ³. திரச்சா²னக³தோபி தா³ஸோ வா தா³ஸீ வா திரச்சா²னக³தோபி கம்மகரோ வா ந சேவ உபட்டா²பேதப்³போ³ நேவ அத்தனோ வெய்யாவச்சங் காராபேதப்³போ³. அபி-ஸத்³தே³ன பகே³வ மனுஸ்ஸபூ⁴தோதி தீ³பேதி.
2963.Nacevupaṭṭhāpetabboti attano veyyāvaccaṃ neva kārāpetabbo. Tiracchānagatopi dāso vā dāsī vā tiracchānagatopi kammakaro vā na ceva upaṭṭhāpetabbo neva attano veyyāvaccaṃ kārāpetabbo. Api-saddena pageva manussabhūtoti dīpeti.
2964. ‘‘ஸப்³ப³னீலாதி³’’ந்தி இமினா –
2964.‘‘Sabbanīlādi’’nti iminā –
‘‘ஸப்³ப³னீலகமஞ்ஜெட்ட²-கண்ஹலோஹிதபீதகே;
‘‘Sabbanīlakamañjeṭṭha-kaṇhalohitapītake;
மஹானாமமஹாரங்க³-ரத்தேஸூ’’தி. (வி॰ வி॰ 598) –
Mahānāmamahāraṅga-rattesū’’ti. (vi. vi. 598) –
வுத்தானி அகப்பியசீவரானி ஸங்க³ஹிதானி. ‘‘நமதகங் நாம ஏளகலோமேஹி கதங் அவாயிமங் சம்மக²ண்ட³பரிபோ⁴கே³ன பரிபு⁴ஞ்ஜிதப்³ப³’’ந்தி (சூளவ॰ அட்ட²॰ 264) அட்ட²கதா²ய வுத்தத்தா, க³ண்டி²பதே³ ச ‘‘ஸந்த²ரணஸதி³ஸோ பிலோதிகாஹி கதோ பரிக்கா²ரவிஸேஸோ’’தி வுத்தத்தா ச நிபஜ்ஜாய பரிபு⁴ஞ்ஜிதப்³போ³ பரிக்கா²ரவிஸேஸோ நமதகங் நாம.
Vuttāni akappiyacīvarāni saṅgahitāni. ‘‘Namatakaṃ nāma eḷakalomehi kataṃ avāyimaṃ cammakhaṇḍaparibhogena paribhuñjitabba’’nti (cūḷava. aṭṭha. 264) aṭṭhakathāya vuttattā, gaṇṭhipade ca ‘‘santharaṇasadiso pilotikāhi kato parikkhāraviseso’’ti vuttattā ca nipajjāya paribhuñjitabbo parikkhāraviseso namatakaṃ nāma.
2965. ச²ன்னம்பி புரிஸப்³யஞ்ஜனங் ‘‘எத்தா²’’தி சிந்தெத்வா ராக³சித்தேன ஓலோகெந்தியா து³க்கடங் ஹோதி. ஸப்³ப³ந்தி வுத்தப்பகாரங் ஸப்³ப³ங்.
2965. Channampi purisabyañjanaṃ ‘‘etthā’’ti cintetvā rāgacittena olokentiyā dukkaṭaṃ hoti. Sabbanti vuttappakāraṃ sabbaṃ.
2966. பி⁴க்கு²ங் தூ³ரதோவ பஸ்ஸித்வா தஸ்ஸ பி⁴க்கு²னோ தூ³ரதோ ஓக்கமித்வான மக்³கோ³ தா³தப்³போ³தி யோஜனா.
2966. Bhikkhuṃ dūratova passitvā tassa bhikkhuno dūrato okkamitvāna maggo dātabboti yojanā.
2967. பி⁴க்க²ங் சரந்தியா பி⁴க்கு²னியா பி⁴க்கு²ங் பஸ்ஸித்வா பன யேன பி⁴க்கா²ய சரதி, தங் பத்தங் நீஹரித்வா உபரி சா²தெ³த்வா டி²தங் ஸங்கா⁴டிசீவரங் அபனெத்வா உக்குஜ்ஜங் உத்³த⁴ங்முக²ங் கத்வா பி⁴க்கு²னோ த³ஸ்ஸேதப்³ப³ந்தி யோஜனா.
2967. Bhikkhaṃ carantiyā bhikkhuniyā bhikkhuṃ passitvā pana yena bhikkhāya carati, taṃ pattaṃ nīharitvā upari chādetvā ṭhitaṃ saṅghāṭicīvaraṃ apanetvā ukkujjaṃ uddhaṃmukhaṃ katvā bhikkhuno dassetabbanti yojanā.
2968. உதுனீனங் பி⁴க்கு²னீனங் உதுகாலே ஸஞ்ஜாதபுப்பே² காலே ஸங்வேல்லிகங் காதுங் கச்ச²ங் ப³ந்தி⁴துங் மஹேஸினா கடிஸுத்தகங் அனுஞ்ஞாதந்தி யோஜனா, இமினா அஞ்ஞஸ்மிங் காலே கடிஸுத்தகங் ப³ந்தி⁴துங் ந வட்டதீதி தீ³பேதி. யதா²ஹ – ‘‘ந, பி⁴க்க²வே, பி⁴க்கு²னியா ஸப்³ப³காலங் கடிஸுத்தகங் தா⁴ரேதப்³ப³ங், யா தா⁴ரெய்ய, ஆபத்தி து³க்கடஸ்ஸ. அனுஜானாமி, பி⁴க்க²வே, உதுனியா கடிஸுத்தக’’ந்தி (சூளவ॰ 422).
2968.Utunīnaṃ bhikkhunīnaṃ utukāle sañjātapupphe kāle saṃvellikaṃ kātuṃ kacchaṃ bandhituṃ mahesinā kaṭisuttakaṃ anuññātanti yojanā, iminā aññasmiṃ kāle kaṭisuttakaṃ bandhituṃ na vaṭṭatīti dīpeti. Yathāha – ‘‘na, bhikkhave, bhikkhuniyā sabbakālaṃ kaṭisuttakaṃ dhāretabbaṃ, yā dhāreyya, āpatti dukkaṭassa. Anujānāmi, bhikkhave, utuniyā kaṭisuttaka’’nti (cūḷava. 422).
2969. இத்தி²போஸயுதந்தி இத்தீ²ஹி வா புரிஸேஹி வா இத்தி²புரிஸேஹி வா யுத்தங். இத்தி²போஸயுத்தங் ஹத்த²வட்டகமேவ வா. பாடங்கீதி படபொட்டலிகங்.
2969.Itthiposayutanti itthīhi vā purisehi vā itthipurisehi vā yuttaṃ. Itthiposayuttaṃ hatthavaṭṭakameva vā. Pāṭaṅkīti paṭapoṭṭalikaṃ.
2970. க³ருத⁴ம்மேதி ஸங்கா⁴தி³ஸேஸே. மானத்தந்தி பக்க²மானத்தங். ஸம்மன்னித்வாதி ஞத்திது³தியாய கம்மவாசாய ஸம்மன்னித்வா.
2970.Garudhammeti saṅghādisese. Mānattanti pakkhamānattaṃ. Sammannitvāti ñattidutiyāya kammavācāya sammannitvā.
2971. யஸ்ஸா இத்தி²யா பப்³ப³ஜிதகாலே க³ப்³போ⁴ வுட்டா²தி விஜாயதி யதி³, புத்தோ சே, தஸ்ஸாபி தா³ரகமாது யாவ ஸோ தா³ரகோ விஞ்ஞுதங் பாபுணாதி, யாவ கா²தி³துங், பு⁴ஞ்ஜிதுங், நஹாயிதுஞ்ச அத்தனோ த⁴ம்மதாய ஸக்கோதி, தாவ து³தியா பி⁴க்கு²னீ ததா² ஸம்மன்னித்வா தா³தப்³பா³தி யோஜனா.
2971. Yassā itthiyā pabbajitakāle gabbho vuṭṭhāti vijāyati yadi, putto ce, tassāpi dārakamātu yāva so dārako viññutaṃ pāpuṇāti, yāva khādituṃ, bhuñjituṃ, nahāyituñca attano dhammatāya sakkoti, tāva dutiyā bhikkhunī tathā sammannitvā dātabbāti yojanā.
2972. ஸா பன மாதா பி⁴க்கு²னீ அத்தனோ புத்தங் பாயேதுங், போ⁴ஜேதுங், மண்டே³துங், உரே கத்வா ஸயிதுஞ்ச லப⁴தீதி யோஜனா.
2972.Sāpana mātā bhikkhunī attano puttaṃ pāyetuṃ, bhojetuṃ, maṇḍetuṃ, ure katvā sayituñca labhatīti yojanā.
2973. து³தியிகாய பி⁴க்கு²னியா தா³ரகேன ஸஹஸெய்யங் ட²பெத்வா யதா² அஞ்ஞேஸு புரிஸேஸு வத்திதப்³ப³ங் படிபஜ்ஜிதப்³ப³ங், ததா² ஏவ தஸ்மிங் தா³ரகே வத்திதப்³ப³ந்தி யோஜனா.
2973.Dutiyikāya bhikkhuniyā dārakena sahaseyyaṃ ṭhapetvā yathā aññesu purisesu vattitabbaṃ paṭipajjitabbaṃ, tathā eva tasmiṃ dārake vattitabbanti yojanā.
2974. விப்³ப⁴மேனேவாதி அத்தனோ ருசியா ஸேதவத்தா²னங் க³ஹணேனேவ. யதா²ஹ – ‘‘யஸ்மா ஸா விப்³ப⁴ந்தா அத்தனோ ருசியா க²ந்தியா ஓதா³தானி வத்தா²னி நிவத்தா², தஸ்மாயேவ ஸா அபி⁴க்கு²னீ, ந ஸிக்கா²பச்சக்கா²னேனா’’தி (சூளவ॰ அட்ட²॰ 434). இதா⁴தி இமஸ்மிங் ஸாஸனே.
2974.Vibbhamenevāti attano ruciyā setavatthānaṃ gahaṇeneva. Yathāha – ‘‘yasmā sā vibbhantā attano ruciyā khantiyā odātāni vatthāni nivatthā, tasmāyeva sā abhikkhunī, na sikkhāpaccakkhānenā’’ti (cūḷava. aṭṭha. 434). Idhāti imasmiṃ sāsane.
2975. க³தாயாதி எத்த² ‘‘ஸகாவாஸா’’தி ஸேஸோ. யதா²ஹ – ‘‘யா ஸா, பி⁴க்க²வே, பி⁴க்கு²னீ ஸகாவாஸா தித்தா²யதனங் ஸங்கந்தா, ஸா ஆக³தா ந உபஸம்பாதே³தப்³பா³’’தி. ந கேவலங் ந உபஸம்பாதே³தப்³பா³, பப்³ப³ஜ்ஜம்பி ந லப⁴தி. ஓதா³தானி க³ஹெத்வா விப்³ப⁴ந்தா பன பப்³ப³ஜ்ஜாமத்தங் லப⁴தி.
2975.Gatāyāti ettha ‘‘sakāvāsā’’ti seso. Yathāha – ‘‘yā sā, bhikkhave, bhikkhunī sakāvāsā titthāyatanaṃ saṅkantā, sā āgatā na upasampādetabbā’’ti. Na kevalaṃ na upasampādetabbā, pabbajjampi na labhati. Odātāni gahetvā vibbhantā pana pabbajjāmattaṃ labhati.
2976. வந்த³னந்தி பாதே³ ஸம்பா³ஹெத்வா வந்த³னங். ஸாதி³துங் வட்டதீதி ‘‘அனுஜானாமி, பி⁴க்க²வே, ஸாதி³து’’ந்தி (சூளவ॰ 434) அனுஞ்ஞாதத்தா வட்டதி. தத்ரேகே ஆசரியா ‘‘ஸசே ஏகதோ வா உப⁴தோ வா அவஸ்ஸுதா ஹொந்தி ஸாரத்தா, யதா²வத்து²கமேவா’’தி வத³ந்தி. ஏகே ஆசரியா ‘‘நத்தி² எத்த² ஆபத்தீ’’தி வத³ந்தீதி ஏவங் ஆசரியவாத³ங் த³ஸ்ஸெத்வா ‘‘இத³ங் ஓதி³ஸ்ஸ அனுஞ்ஞாதங் வட்டதீ’’தி அட்ட²கதா²ஸு வுத்தங், தங் பமாணங். ‘‘அனுஜானாமி, பி⁴க்க²வே, ஸாதி³து’’ந்தி (சூளவ॰ 434) ஹி வசனேனேவ கப்பியங்.
2976.Vandananti pāde sambāhetvā vandanaṃ. Sādituṃ vaṭṭatīti ‘‘anujānāmi, bhikkhave, sāditu’’nti (cūḷava. 434) anuññātattā vaṭṭati. Tatreke ācariyā ‘‘sace ekato vā ubhato vā avassutā honti sārattā, yathāvatthukamevā’’ti vadanti. Eke ācariyā ‘‘natthi ettha āpattī’’ti vadantīti evaṃ ācariyavādaṃ dassetvā ‘‘idaṃ odissa anuññātaṃ vaṭṭatī’’ti aṭṭhakathāsu vuttaṃ, taṃ pamāṇaṃ. ‘‘Anujānāmi, bhikkhave, sāditu’’nti (cūḷava. 434) hi vacaneneva kappiyaṃ.
2977. யாய காயசி வச்சகுடியா வச்சோ ந காதப்³போ³, ஹெட்டா² விவடே உத்³த⁴ங் படிச்ச²ன்னே பன வச்சங் காதுங் வட்டதி. ஹெட்டா² விவடே உபரி படிச்ச²ன்னேதி அட்ட²கதா²யங் ‘‘ஸசே கூபோ க²தோ ஹோதி, உபரி பன பத³ரமத்தமேவ ஸப்³ப³தி³ஸாஸு பஞ்ஞாயதி, ஏவரூபேபி வட்டதீ’’தி (சூளவ॰ அட்ட²॰ 435) வுத்தங்.
2977. Yāya kāyaci vaccakuṭiyā vacco na kātabbo, heṭṭhā vivaṭe uddhaṃ paṭicchanne pana vaccaṃ kātuṃ vaṭṭati. Heṭṭhā vivaṭe upari paṭicchanneti aṭṭhakathāyaṃ ‘‘sace kūpo khato hoti, upari pana padaramattameva sabbadisāsu paññāyati, evarūpepi vaṭṭatī’’ti (cūḷava. aṭṭha. 435) vuttaṃ.
2978. ஸப்³ப³த்தா²தி பி⁴க்கு²னிஉபஸ்ஸயஅந்தரக⁴ராதி³ஸப்³ப³ட்டா²னேஸு. கி³லானாயாதி யஸ்ஸா வினா பல்லங்கங் ந பா²ஸு ஹோதி. அட்³ட⁴பல்லங்கந்தி ஏகபாத³ங் ஆபு⁴ஜித்வா கதபல்லங்கங். ஸோ ஏகங் பண்ஹிங் ஊருமூலாஸன்னங் கத்வா இதரங் தூ³ரே கத்வா ஆபு⁴ஜிதபல்லங்கோ நாம.
2978.Sabbatthāti bhikkhuniupassayaantaragharādisabbaṭṭhānesu. Gilānāyāti yassā vinā pallaṅkaṃ na phāsu hoti. Aḍḍhapallaṅkanti ekapādaṃ ābhujitvā katapallaṅkaṃ. So ekaṃ paṇhiṃ ūrumūlāsannaṃ katvā itaraṃ dūre katvā ābhujitapallaṅko nāma.
2979. நரதித்தே²தி புரிஸானங் நஹானதித்தே². யதா²ஹ – ‘‘ந, பி⁴க்க²வே, பி⁴க்கு²னியா புரிஸதித்தே² நஹாயிதப்³ப³ங், யா நஹாயெய்ய, ஆபத்தி து³க்கடஸ்ஸ. அனுஜானாமி, பி⁴க்க²வே, மஹிலாதித்தே² நஹாயிது’’ந்தி (சூளவ॰ 436).
2979.Naratittheti purisānaṃ nahānatitthe. Yathāha – ‘‘na, bhikkhave, bhikkhuniyā purisatitthe nahāyitabbaṃ, yā nahāyeyya, āpatti dukkaṭassa. Anujānāmi, bhikkhave, mahilātitthe nahāyitu’’nti (cūḷava. 436).
2980. யா ஸமணீ க³ந்த⁴சுண்ணேன வா வாஸிதமத்தியா வாஸிதகாய மத்திகாய வா படிஸோதே வா ந்ஹாயெய்ய, தஸ்ஸா ஆபத்தி து³க்கடந்தி யோஜனா. வாஸிதவிஸேஸனேன அவாஸிதா வட்டதீதி தீ³பேதி. யதா²ஹ – ‘‘அனுஜானாமி, பி⁴க்க²வே, பகதிமத்திக’’ந்தி (சூளவ॰ 436).
2980. Yā samaṇī gandhacuṇṇena vā vāsitamattiyā vāsitakāya mattikāya vā paṭisote vā nhāyeyya, tassā āpatti dukkaṭanti yojanā. Vāsitavisesanena avāsitā vaṭṭatīti dīpeti. Yathāha – ‘‘anujānāmi, bhikkhave, pakatimattika’’nti (cūḷava. 436).
2981. அபு⁴த்வாதி எத்த² ஆமிஸஅக்³க³ங் க³ஹணமத்தம்பி அகத்வா, பத்தசீவரங் கதிபயதி³வஸானிபி அபரிபு⁴ஞ்ஜித்வாதி அத்தோ². ஸசே அஸப்பாயங், ஸப்³ப³ம்பி அபனேதுங் வட்டதி.
2981.Abhutvāti ettha āmisaaggaṃ gahaṇamattampi akatvā, pattacīvaraṃ katipayadivasānipi aparibhuñjitvāti attho. Sace asappāyaṃ, sabbampi apanetuṃ vaṭṭati.
2982. அனுபஸம்பன்னே அஸந்தே ஸப்³ப³ங் பி⁴க்கூ²ஹி படிக்³க³ஹிதங் வா அப்படிக்³க³ஹிதங் வா ஸன்னிதி⁴கதங் வா ஸப்³ப³ங் அஜ்ஜோ²ஹரணீயங் பி⁴க்கூ²ஹி படிக்³க³ஹாபெத்வா பரிபு⁴ஞ்ஜிதுங் பி⁴க்கு²னீனங் வட்டதீதி யோஜனா. ‘‘பி⁴க்கு²னீனங் வட்டதீ’’தி இத³ங் பகரணவஸேன வுத்தங். பி⁴க்கு²னீஹிபி படிக்³க³ஹாபெத்வா பி⁴க்கூ²னம்பி ததா²வித⁴ங் பரிபு⁴ஞ்ஜிதுங் வட்டதி. யதா²ஹ – ‘‘அனுஜானாமி, பி⁴க்க²வே, பி⁴க்கூ²னங் ஸன்னிதி⁴ங் பி⁴க்கு²னீஹி படிக்³கா³ஹாபெத்வா பரிபு⁴ஞ்ஜிது’’ந்தி (சூளவ॰ 421).
2982. Anupasampanne asante sabbaṃ bhikkhūhi paṭiggahitaṃ vā appaṭiggahitaṃ vā sannidhikataṃ vā sabbaṃ ajjhoharaṇīyaṃ bhikkhūhi paṭiggahāpetvā paribhuñjituṃ bhikkhunīnaṃ vaṭṭatīti yojanā. ‘‘Bhikkhunīnaṃ vaṭṭatī’’ti idaṃ pakaraṇavasena vuttaṃ. Bhikkhunīhipi paṭiggahāpetvā bhikkhūnampi tathāvidhaṃ paribhuñjituṃ vaṭṭati. Yathāha – ‘‘anujānāmi, bhikkhave, bhikkhūnaṃ sannidhiṃ bhikkhunīhi paṭiggāhāpetvā paribhuñjitu’’nti (cūḷava. 421).
பி⁴க்கு²னிக்க²ந்த⁴ககதா²வண்ணனா.
Bhikkhunikkhandhakakathāvaṇṇanā.
இதி வினயத்த²ஸாரஸந்தீ³பனியா வினயவினிச்ச²யவண்ணனாய
Iti vinayatthasārasandīpaniyā vinayavinicchayavaṇṇanāya
க²ந்த⁴ககதா²வண்ணனா நிட்டி²தா.
Khandhakakathāvaṇṇanā niṭṭhitā.
