| Library / Tipiṭaka / તિપિટક • Tipiṭaka / મહાવિભઙ્ગ-અટ્ઠકથા • Mahāvibhaṅga-aṭṭhakathā |
૩. ભિક્ખુનુપસ્સયસિક્ખાપદવણ્ણના
3. Bhikkhunupassayasikkhāpadavaṇṇanā
૧૬૨. તતિયસિક્ખાપદે – અઞ્ઞત્ર સમયા ઓવદતિ આપત્તિ પાચિત્તિયસ્સાતિઆદીસુ અટ્ઠહિ ગરુધમ્મેહિ ઓવદન્તસ્સેવ પાચિત્તિયં, અઞ્ઞેન ધમ્મેન દુક્કટન્તિ વેદિતબ્બં. એકતોઉપસમ્પન્નાયાતિ ભિક્ખુનિસઙ્ઘે ઉપસમ્પન્નાય, ભિક્ખુસઙ્ઘે ઉપસમ્પન્નાય પન ઓવદતો પાચિત્તિયમેવ. ઇતો પરમ્પિ યત્થ યત્થ ‘‘એકતોઉપસમ્પન્ના’’તિ વુચ્ચતિ, સબ્બત્થ અયમેવ અત્થો દટ્ઠબ્બો. સેસં ઉત્તાનમેવ.
162. Tatiyasikkhāpade – aññatra samayā ovadati āpatti pācittiyassātiādīsu aṭṭhahi garudhammehi ovadantasseva pācittiyaṃ, aññena dhammena dukkaṭanti veditabbaṃ. Ekatoupasampannāyāti bhikkhunisaṅghe upasampannāya, bhikkhusaṅghe upasampannāya pana ovadato pācittiyameva. Ito parampi yattha yattha ‘‘ekatoupasampannā’’ti vuccati, sabbattha ayameva attho daṭṭhabbo. Sesaṃ uttānameva.
કથિનસમુટ્ઠાનં – કાયવાચતો, કાયવાચાચિત્તતો ચ સમુટ્ઠાતિ, કિરિયં, નોસઞ્ઞાવિમોક્ખં, અચિત્તકં, પણ્ણત્તિવજ્જં, કાયકમ્મં, વચીકમ્મં, તિચિત્તં, તિવેદનન્તિ.
Kathinasamuṭṭhānaṃ – kāyavācato, kāyavācācittato ca samuṭṭhāti, kiriyaṃ, nosaññāvimokkhaṃ, acittakaṃ, paṇṇattivajjaṃ, kāyakammaṃ, vacīkammaṃ, ticittaṃ, tivedananti.
ભિક્ખુનુપસ્સયસિક્ખાપદં તતિયં.
Bhikkhunupassayasikkhāpadaṃ tatiyaṃ.
ઇદં પનેત્થ મહાપચ્ચરિયં વુત્તં પકિણ્ણકં – અસમ્મતો ચે ભિક્ખુ અત્થઙ્ગતે સૂરિયે ભિક્ખુનુપસ્સયં ઉપસઙ્કમિત્વા અટ્ઠહિ ગરુધમ્મેહિ ઓવદતિ, તીણિ પાચિત્તિયાનિ. અઞ્ઞેન ધમ્મેન ઓવદતો દ્વે દુક્કટાનિ, એકં પાચિત્તિયં. કથં? અસમ્મતમૂલકં દુક્કટં, ઉપસ્સયં ગન્ત્વા અઞ્ઞેન ધમ્મેન ઓવદનમૂલકં દુક્કટં, અત્થઙ્ગતે સૂરિયે ઓવદનમૂલકં પાચિત્તિયન્તિ. સમ્મતસ્સ અત્થઙ્ગતે સૂરિયે તત્થ ગન્ત્વા અટ્ઠહિ ગરુધમ્મેહિ ઓવદન્તસ્સ એકા અનાપત્તિ, દ્વે પાચિત્તિયાનિ. કથં? સમ્મતત્તા અનાપત્તિ, અત્થઙ્ગતે સૂરિયે ઓવદનમૂલકં એકં, ગન્ત્વા ગરુધમ્મેહિ ઓવદનમૂલકં એકન્તિ દ્વે પાચિત્તિયાનિ. તસ્સેવ અઞ્ઞેન ધમ્મેન ઓવદતો એકા અનાપત્તિ, એકં દુક્કટં, એકં પાચિત્તિયં. કથં? સમ્મતત્તા અનાપત્તિ, ગન્ત્વા અઞ્ઞેન ધમ્મેન ઓવદનમૂલકં દુક્કટં, અત્થઙ્ગતે સૂરિયે ઓવદનમૂલકં પાચિત્તિયન્તિ. દિવા પન ગન્ત્વા ઓવદતો સમ્મતસ્સ ચ અસમ્મતસ્સ ચ રત્તિં ઓવદનમૂલકં એકં પાચિત્તિયં અપનેત્વા અવસેસા આપત્તાનાપત્તિયો વેદિતબ્બાતિ.
Idaṃ panettha mahāpaccariyaṃ vuttaṃ pakiṇṇakaṃ – asammato ce bhikkhu atthaṅgate sūriye bhikkhunupassayaṃ upasaṅkamitvā aṭṭhahi garudhammehi ovadati, tīṇi pācittiyāni. Aññena dhammena ovadato dve dukkaṭāni, ekaṃ pācittiyaṃ. Kathaṃ? Asammatamūlakaṃ dukkaṭaṃ, upassayaṃ gantvā aññena dhammena ovadanamūlakaṃ dukkaṭaṃ, atthaṅgate sūriye ovadanamūlakaṃ pācittiyanti. Sammatassa atthaṅgate sūriye tattha gantvā aṭṭhahi garudhammehi ovadantassa ekā anāpatti, dve pācittiyāni. Kathaṃ? Sammatattā anāpatti, atthaṅgate sūriye ovadanamūlakaṃ ekaṃ, gantvā garudhammehi ovadanamūlakaṃ ekanti dve pācittiyāni. Tasseva aññena dhammena ovadato ekā anāpatti, ekaṃ dukkaṭaṃ, ekaṃ pācittiyaṃ. Kathaṃ? Sammatattā anāpatti, gantvā aññena dhammena ovadanamūlakaṃ dukkaṭaṃ, atthaṅgate sūriye ovadanamūlakaṃ pācittiyanti. Divā pana gantvā ovadato sammatassa ca asammatassa ca rattiṃ ovadanamūlakaṃ ekaṃ pācittiyaṃ apanetvā avasesā āpattānāpattiyo veditabbāti.
પકિણ્ણકકથા નિટ્ઠિતા.
Pakiṇṇakakathā niṭṭhitā.
Related texts:
તિપિટક (મૂલ) • Tipiṭaka (Mūla) / વિનયપિટક • Vinayapiṭaka / મહાવિભઙ્ગ • Mahāvibhaṅga / ૩. ઓવાદવગ્ગો • 3. Ovādavaggo
ટીકા • Tīkā / વિનયપિટક (ટીકા) • Vinayapiṭaka (ṭīkā) / સારત્થદીપની-ટીકા • Sāratthadīpanī-ṭīkā / ૩. ભિક્ખુનુપસ્સયસિક્ખાપદવણ્ણના • 3. Bhikkhunupassayasikkhāpadavaṇṇanā
ટીકા • Tīkā / વિનયપિટક (ટીકા) • Vinayapiṭaka (ṭīkā) / વજિરબુદ્ધિ-ટીકા • Vajirabuddhi-ṭīkā / ૩. ભિક્ખુનુપસ્સયસિક્ખાપદવણ્ણના • 3. Bhikkhunupassayasikkhāpadavaṇṇanā
ટીકા • Tīkā / વિનયપિટક (ટીકા) • Vinayapiṭaka (ṭīkā) / વિમતિવિનોદની-ટીકા • Vimativinodanī-ṭīkā / ૩. ભિક્ખુનુપસ્સયસિક્ખાપદવણ્ણના • 3. Bhikkhunupassayasikkhāpadavaṇṇanā
ટીકા • Tīkā / વિનયપિટક (ટીકા) • Vinayapiṭaka (ṭīkā) / પાચિત્યાદિયોજનાપાળિ • Pācityādiyojanāpāḷi / ૩. ભિક્ખુનુપસ્સયસિક્ખાપદં • 3. Bhikkhunupassayasikkhāpadaṃ
